BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

اقتوبەدە باسپانا الۋ ٴۇشىن باستاپقى جارنا تومەندەتىلدى

فوتو: revistaflashvip.com.br

استانا، baq.kz. اقتوبە وبلىسىنىڭ اكىمى بەردىبەك ساپاربايەۆ پەن «قازاقستاننىڭ تۇرعىن ٴۇي قۇرىلىس جيناق بانكى» اق باسقارما ٴتورايىمى ٴلاززات يبراگيموۆا تۇرعىن ٴۇي قۇرىلىس جيناق بانكى سالىمشىلارىنا پاتەر ساتىپ الۋ ٴۇشىن قارىز بەرۋ تۋرالى مەموراندۋمعا قول قويدى. بۇل تۋرالى aktobegazeti.kz سايتى حابارلايدى.

جوبا اياسىندا وبلىستىق اكىمدىكتە تۇرعىن ٴۇي كەزەگىندە تۇرعان جانە «نۇرلى جەر» مەملەكەتتىك تۇرعىن ٴۇي باعدارلاماسىنا قاتىسۋعا نيەت بىلدىرگەن ازاماتتاردى قارجىلاي قولداۋ قاراستىرىلىپ وتىر. ياعني، مەموراندۋمعا سايكەس، ازاماتتار اتالعان باعدارلاما بويىنشا ٴۇي الۋ ٴۇشىن باستاپقى 20 پايىز جارنانىڭ 10 پايىزىن ٴوزى تولەيدى، قالعان 10 پايىزىن اكىمدىكتەن بولىنگەن قاراجات ەسەبىنەن الادى.

ەلباسى ن.نازاربايەۆ بيىلعى جولداۋىندا اكىمدەرگە تۇرعىنداردى قولجەتىمدى باسپانامەن قامتاماسىز ەتۋدىڭ بارلىق تەتىكتەرىن قاراستىرۋدى ايتقان بولاتىن. «اكىمدەرگە جەرگىلىكتى بيۋدجەت ەسەبىنەن جەڭىلدەتىلگەن يپوتەكا بويىنشا العاشقى جارنانى ٴىشىنارا سۋبسيديالاۋ ماسەلەسىن پىسىقتاۋدى تاپسىرامىن. مۇنداي تۇرعىن ٴۇي سەرتيفيكاتتارىن بەرۋ بىلىكتىلىگى جوعارى پەداگوگتار، مەديسينا قىزمەتكەرلەرى، پوليسەيلەر جانە وڭىرگە قاجەتتى باسقا دا ماماندار ٴۇشىن يپوتەكانىڭ قولجەتىمدىلىگىن ارتتىرادى» دەگەن ەدى مەملەكەت باسشىسى. بۇل جولعى مەموراندۋمنىڭ دا ماقساتى وسى. وبلىس اكىمىنىڭ ايتۋىنشا، تۇرعىن ٴۇي قۇرىلىس جيناق بانكىندە 90 مىڭعا جۋىق اقتوبەلىكتىڭ جيناقتارى بار. ولاردىڭ جالپى سوماسى 50 ميلليارد تەڭگەدەن اسادى.

«مەملەكەت باسشىسىنىڭ تۇرعىنداردى باسپانامەن قامتۋ باعىتىنداعى تاپسىرماسىن ورىنداۋ ٴۇشىن بيىل 870 مىڭ شارشى مەتر تۇرعىن ٴۇيدى ىسكە اسىرۋىمىز كەرەك. ازىرگە 580 مىڭ شارشى مەتر ٴۇي بەرىلدى، جىل اياعىنا دەيىن مىندەتتى تولىعىمەن ورىندايمىز. وسى ماقساتتا، مىنە، تۇرعىن ٴۇي قۇرىلىس جيناق بانكىمەن كەلىسىمگە قول قويدىق»، - دەدى وبلىس اكىمى.

مەموراندۋمعا سايكەس، وبلىستىق اكىمدىكتە تۇرعىن ٴۇي كەزەگىندە تۇرعان ازاماتتارعا «نۇرلى جەر» مەملەكەتتىك تۇرعىن ٴۇي باعدارلاماسىنا قاتىسۋ ٴۇشىن قارجىلاي قولداۋ كورسەتىلەدى. ولار ٴۇشىن جەرگىلىكتى قازىنادان ٴبىرىنشى كەزەڭدە 250 ملن تەڭگە قاراجات بولىنەدى. بۇل قارجى «نۇر اقتوبە» شاعىن اۋدانىنداعى ٴبىر بولمەلى پاتەرلەردى ساتىپ الۋدا باستاپقى جارنانى تومەندەتۋگە جۇمسالادى. بارلىعى 500-دەي پاتەر ساتىلادى دەپ جوسپارلانىپ وتىر. تازا ارلەۋدەگى تۇرعىن ۇيلەردىڭ 1 شارشى مەترى – 100 000-120 000 تەڭگە. پاتەرلەر اۋماعى – 32 جانە 54 شارشى مەتر ارالىعىندا.

«اقتوبە وبلىسى پرەزيدەنت جولداۋى اياسىندا تۇرعىن ٴۇي سەرتيفيكاتى تۋرالى مەموراندۋمعا رەسپۋبليكادا ٴبىرىنشى بولىپ قول قويىپ جاتىر. بۇل ايلىعى شامامەن 60 مىڭ تەڭگە بولاتىن ازاماتتارعا باسپانالى بولۋعا مۇمكىندىك بەرەدى. «نۇرلى جەر» باعدارلاماسىنىڭ شارتتارىنا سايكەس، 5% مولشەرلەمەمەن جەڭىلدەتىلگەن زاەم الۋ ٴۇشىن تۇرعىن ٴۇي قۇرىلىس جيناق بانكىندەگى شوتتا ٴۇي باعاسىنىڭ 20%-نا تەڭ باستاپقى جارنا بولۋى كەرەك. ماسەلەن، اۋماعى 45 شارشى مەتر بولاتىن پاتەردىڭ باعاسى شامامەن 5 ميلليون تەڭگە بولادى دەلىك. ونى ساتىپ الۋ ٴۇشىن بانكتەگى سالىمدا بار بولعانى ٴۇي قۇنىنىڭ 10 پايىزى، ياعني 500 000 تەڭگەنىڭ بولۋى جەتكىلىكتى، ال باستاپقى جارنا ٴۇشىن قاجەت قالعان 10%-دى تولەۋگە اكىمدىك قولداۋ كورسەتەدى. ونى قارىز الۋشى بەس جىل ىشىندە ۇستەماقىسىز، اي سايىن 8 مىڭ تەڭگەدەي تولەۋ ارقىلى قايتارادى»، - دەدى بانك باسشىسى ٴلاززات يبراگيموۆا.

ل.يبراگيموۆانىڭ ايتۋىنشا، اقتوبەدە تۇرعىنداردى قولجەتىمدى باسپانامەن قامتاماسىز ەتۋ باعىتىنداعى باعدارلامالار ناتيجەلى جۇزەگە اسىرىلىپ كەلەدى. سونىڭ ٴبىر ايعاعى — اقتوبە وبلىسىنىڭ نەسيەلىك تۇرعىن ۇيلەر ساتۋ بويىنشا رەسپۋبليكادا كوش باسىندا تۇرعاندىعى. «بۇگىنگە دەيىن 1770 پاتەر بەرىلگەن، تاعى دا 1400 جاڭا پاتەر بەرىلمەك. بۇل – ۇلكەن كورسەتكىش»، — دەيدى بانك باسشىسى.

بانك قىزمەتكەرلەرىنىڭ ايتۋىنشا، قارىز الۋ تۋرالى وتىنىشتەر 9 قاراشاعا دەيىن حالىقتىق كەڭسە عيماراتىندا قابىلدانادى. ۇمىتكەرلەرگە قويىلاتىن نەگىزگى تالاپ – مەنشىگىندە تۇرعىن ٴۇيدىڭ بولماۋى جانە تولەم قابىلەتتىلىگىن راستاي الۋى.

قارىز الۋشىلاردىڭ قورىتىندى پۋلى بەكىتىلگەن سوڭ اكىمدىك ٴار ۇمىتكەردىڭ تۇرعىن ٴۇي قۇرىلىس جيناق بانكىندەگى شوتىنا باستاپقى جارنا ٴۇشىن قاراجات اۋدارادى، وسىدان كەيىن زاەم رەسىمدەلىپ، ساتىپ الۋ-ساتۋ كەلىسىمشارتى جاسالادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي