USD 335.71 EUR 357.36 RUB 5.23
استانا:

جەمقورلىققا قارسى شارالار قاتاڭ بولعانىمەن، ٴبارى بىردەي ٴتيىمدى ەمەس – ساراپشى

فوتو: altaynews.kz

قازاقستان تاۋەلسىزدىك العان العاشقى كۇننەن باستاپ-اق سىبايلاس جەمقورلىققا قارسى ٴتيىمدى، الەمدىك ستاندارتتارعا ساي كەلەتىن ينستيتۋتتار مەن تەتىكتەر قۇرۋ باعىتىنا ماقساتتى تۇردە جانە كەزەڭ-كەزەڭمەن ٴتۇسىپ كەلەدى. سول سەبەپتى ەلىمىزدە جەمقورلىق قىلمىستاردىڭ الدىن الۋ ماسەلەلەرىنىڭ ەلىمىزدە وزەكتىلىگى جوعارى.

كاسىپورىن ساندارىنىڭ ارتۋىمەن مەملەكەتىمىزدە نارىقتىق قارىم-قاتىناس تا دامىپ كەلەدى. الايدا، پوستكەڭەستىك ەلدەردە نارىقتىق قاتىناستىڭ دامۋىمەن ٴبىرقاتار تەرىس الەۋمەتتىك قۇبىلىستار دا، اتاپ ايتقاندا، ٴتۇرلى قۇقىقبۇزۋشىلىقتار، ونىڭ ىشىندە جەمقورلىق كەڭ تامىر جايعان.

وسىعان وراي زاڭ عىلىمدارىنىڭ كانديداتى، ل.ن.گۋميلەۆ اتىنداعى ەۇۋ قىلمىستىق-قۇقىقتىق پاندەپ كافەدراسىنىڭ دوسەنتى سۆەتلانا بايمولدينا سىبايلاس جەمقورلىقپەن كۇرەسكە قارسى قىلىمستىق-قۇقىقتىق شارالار قانشالىقتى قاتاڭ بولعانىمەن، تولىقتاي ٴتيىمدى دەپ ايتۋعا كەلمەيدى دەيدى.

«مەملەكەتتىڭ جالپى جاعدايى مەن دامۋىنا كەرى اسەر ەتەتىن جەمقورلىقتىڭ سالدارىنان مەملەكەتتىك مۇددەنىڭ ورنىن جەكە باستىڭ نەمەسە توپتاردىڭ قامى باسادى. وسىلايشا، حالىقتىڭ بيلىككە جانە ونىڭ ينستيتۋتتارىنا دەگەن سەنىم تومەندەپ، قوعامدىق سانا بۇلىنەدى. ونىڭ سوڭى يننوۆاسيا مەن ەل دامۋىن تەجەپ، جاڭا تەحنولوگيالاردىڭ يگەرىلۋىنە كەدەرگى كەلتىرەدى. ارتىنشا ەلدىڭ بەدەلىنە كولەڭكە ٴتۇسىرىپ، باسەكەگە قابىلەتتىلىگىن جويادى»، - دەيدى زاڭگەر.

ونىڭ ايتۋىنشا، قازاقستان رەسپۋبليكاسىنىڭ زاڭ شىعارۋ جۇيەسىندە سىبايلاس جەمقورلىق پەن ونىڭ سالدارىنا قارسى نورمالار جەتىپ ارتىلادى. الايدا ولاردى قازىرگى زامانعا ىڭعايلاپ، ٴالى دە جەتىلدىرۋ كەرەك.

«جەمقورلىق قىلمىستار ٴۇشىن اكىمشىلىكپەن قاتار، جاڭا قر قىلمىستىق كودەكسىنىڭ 361-371 باپتارىندا قاراستىرىلعان قىلمىستىق جاۋاپكەرشىلىك بەكىتىلگەن. بۇلنورمالار «مەملەكەتتىك قىزمەت پەن مەملەكەتتىك باسقارۋ مۇددەلەرىنە قارسى سىبايلاس جەمقورلىق جانە وزگە دە قىلمىستىق قۇقىقبۇزۋشىلىقتار» دەپ اتالاتىن 15-بولىمدە قاراستىرىلعان»، - دەپ ناقتىلادى ول.

سونىمەن قاتار ول اتالمىش قىلمىس سۋبەكتىلەرى كىرىستەرى مەن شىعىستارى مىندەتتى دەكلاراسيالاۋعا جاتاتىن تۇلعالاردىڭ ٴتىزىمىن كەڭەيتىپ، وعان مەملەكەتتىك قىزمەتكەرلەردىڭ وتباسى مۇشەلەرى مەن جاقىن تۋىستارىن قوسا قامتۋدى ۇسىندى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي