BAQ.kz - Қазақстан жаңалықтары USD 341.18 BAQ.kz - Қазақстан жаңалықтары EUR 392.97 BAQ.kz - Қазақстан жаңалықтары RUB 5.34
استانا:

زەينەتاقى تاعايىنداۋ «ٴبىر ٴوتىنىش» قاعيداسى ارقىلى ىسكە اسىرىلادى – ۆيسە-مينيستر

قازاقستاندىقتار ٴۇشىن زەينەتاقى تولەمدەرىن تاعايىنداۋ «ٴبىر ٴوتىنىش» قاعيداسى بويىنشا جۇزەگە اسىرىلادى. بۇل جونىندە بۇگىن وتكەن ٴباسپاسوز ٴماسليحاتى بارىسىندا قر ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا مالىمدەدى، دەپ حابارلايدى baq.kz اقپارات ٴتىلشىسى.

«قازىرگى ۋاقىتتا ٴبىز بيزنەس پروسەستەردى اۆتوماتتاندىرۋ بويىنشا جۇمىستاردى كۇشەيتىپ جاتىرمىز. ياعني، بۇل رەسپۋبليكالىق بيۋدجەتتەن زەينەتاقى تولەمدەرىن تاعايىنداۋ، رەسپۋبليكالىق بيۋدجەتتەن مەملەكەتتىك بازالىق زەينەتاقى تولەمدەرىن تاعايىنداۋ جانە ٴبىرىڭعاي زەينەتاقى جيناقتاۋ قورىنان زەينەتاقى تولەمدەرىن تاعايىنداۋ. ٴبىز بزجق، ۇلتتىق بانكپەن ٴبىرقاتار كەلىسسوز جۇرگىزدىك جانە ٴقازىر بۇل اتالعان تولەمدەر مەملەكەتتىك كورپوراسياعا كوشەتىنى تۋرالى كەلىسىم بار. سايكەسىنشە، زەينەتاقى جاسىنا جەتكەن ازاماتقا مەملەكەتتىك كورپوراسياعا ٴبىر، زەينەتاقى جيناقتاۋ قورىنىڭ فيليالىنا ەكى بارىپ، ساندالۋدىڭ قاجەتى بولمايدى. مۇنداي «ٴبىر ٴوتىنىش» قاعيداسى بويىنشا مەملەكەتتىك كورپوراسيادا اتالعان قىزمەت كورسەتىلىپ، اۆتوماتتى تۇردە زەينەتاقى تولەمى تاعايىندالادى»، - دەدى ۆيسە-مينيستر.

س.جاقىپوۆانىڭ بەرگەن مالىمەتى بويىنشا، اتالعان وڭتايلاندىرىلعان جۇيە اعىمداعى جىلدىڭ 1 شىلدەسىنەن باستاپ ىسكە قوسىلادى.

«زەينەتاقى تولەمدەرىن اۆتوماتتاندىرىلعان رەجيمدە 1 شىلدەدەن باستاپ ىسكە قوسۋدى جوسپارلاپ وتىرمىز. ٴقازىر بۇل قىزمەتتى تولىق ىسكە اسىرۋ بويىنشا بۇگىندە زاڭعا سايكەس وزگەرتۋلەر ەنگىزىلىپ جاتىر. قازاقستاندىقتار ٴوتىنىش بەرۋ ٴۇشىن بىرنەشە ورگانعا بارۋ قاجەتتىلىگىنەن بوساتىلاتىندارى ٴۇشىن قۋانادى دەگەن ويدامىن»، - دەپ تۇيىندەدى ەحاقم وكىلى.

سونداي-اق، ۆيسە-مينيستر قازاقستاندىقتار ٴۇشىن ەلەكتروندى ەڭبەك شارتتارىن ەنگىزۋ پيلوتتىق رەجيمدە 2018 جىلدىڭ ەكىنشى جارتىسىندا جۇزەگە اسىرىلاتىنىن مالىمدەگەن بولاتىن.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي