BAQ.kz - Қазақстан жаңалықтары USD 374.2 BAQ.kz - Қазақстан жаңалықтары EUR 420.34 BAQ.kz - Қазақстан жаңалықтары RUB 5.52
استانا:

توقەتەرى. «فينالدا قىرعىزدارمەن ويناساق تا وسى شۋ شىعاتىن ەدى» ەكسكليۋزيۆ

جاقىندا ٴىىى دۇنيەجۇزىلىك كوشپەندىلەر ويىندارى ٴوز مارەسىنە جەتتى. الەمنىڭ 80-گە جۋىق ەلى باق سىناعان دودادا قازاقستان ەكىنشى ورىنعا يە بولدى. دەگەنمەن وسى ويىندا ونەر كورسەتكەن كوكپارشىلارىمىزدىڭ توڭىرەگىندە شىققان شۋ قوعامدى ٴبىراز دۇرلىكتىردى. وسى ماسەلەگە قاتىستى قر ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىبايمەن سۇقباتتاسقان ەدىك.

- «ۇلتتىق سپورتتىڭ» اتقارىپ جاتقان جۇمىستارىنان باستاساق.

- ۇلتتىق سپورت قاۋىمداستىعى 6 ٴتۇرلى سپورت باعىتىن بىرىكتىرەدى. ولار – جامبى اتۋ، كوكپار، اۋدارىسپاق، تەڭگە ٴىلۋ، بايگە جانە قۇسبەگىلىك.

ٴقازىر ەكى باعىتتاعى جۇمىسقا باسىمدىق بەرىپ وتىرمىز. ٴبىرىنشىسى –ەلىمىزدەگى ۇلتتىق سپورت ناسيحاتى; رۋحاني جاڭعىرۋىمىز بار، باسقاسى بار - سولاردىڭ جاستار اراسىندا تارالۋىن قامتاماسىز ەتۋ. ەكىنشىسى – ۇلتتىق سپورتىمىزدى حالىقارالىق دەڭگەيگە شىعارۋ.

وسى ورايدا - ٴبىز وتكىزەتىن ەل ىشىندەگى چەمپيوناتتار، جاسايتىن ونىمدەرىمىز، جۇرگىزەتىن ٴىس-قاعازدارىمىز - بارلىعى دا ىشكى نارىق ٴۇشىن، ياعني ىشكى سۇرانىس ٴۇشىن بەيىمدەلگەن.

ال، ازيا چەمپيوناتى، كەشە وتكەن «التىن جەبە» حالىقارالىق ٴتۋرنيرى، الدا وتەدى دەپ جوسپارلانعان بۇركىتشىلەردىڭ حالىقارالىق شاراسى – بارلىعى دا ۇلتتىق سپورتتى حالىقارالىق دەڭگەيگە كوتەرۋ ٴۇشىن جاسالىپ جاتىر.

بيىلعى جىلدىڭ سوڭىنا دەيىن ٴبىزدى كۇتىپ تۇرعان ٴداستۇرلى شارالاردىڭ ٴبىرى – «التىن تۇعىر» ۇلتتىق سپورتتى دامىتۋعا ۇلەس قوسىپ جۇرگەن ازاماتتاردى ماراپاتتاۋ ٴراسىمى. سونىمەن قاتار، الداعى كەزەك كۇتتىرمەس ماسەلەلەردىڭ ٴبىرى – تورەشىلەردىڭ بىلىكتىلىگىن ارتتىرۋ. ٴبىر سوزبەن ايتقاندا - وسى جىلدىڭ سوڭىندا وقۋ-وقىتۋ جاعىنا كوبىرەك كوڭىل ٴبولۋدى جوسپارلاپ وتىرمىز.

- تورەشىلەردى وقىتۋ دەگەننەن شىعادى، وتكەندەگى ٴىى دۇنيەجۇزىلىك كوشپەندىلەر ويىندارىندا دا تورەشىلەر ماسەلەسى ٴسوز بولدى. ٴبىزدىڭ تورەشىلەردىڭ قۇرامعا كىرمەۋىنەن ٴبىراز سپورتشىلارىمىز ٴتيىستى باعاسىن الماي قالدى...

- كوشپەندىلەر ويىندارىندا، اسىرەسە اۋدارىسپاقتا - بارلىق تورەشى سول فەستيۆالدى ۇيىمداستىرۋشى ەلدىڭ وكىلدەرىنەن بولدى. راسىمەن، ٴبىزدىڭ ەلدەن بارعان تورەشىلەردىڭ قۇرامىندا دا تورەلىك جاساۋعا بىلىكتىلىگى جەتەتىن ماماندار بولعان ەدى. ٴبىراق، ۇيىمداستىرۋشى تاراپ وزگە ەلدەن تورەشى قوسۋدى قالاماعان سەكىلدى، ايتپەسە بىزدەن وزگە ەلدەن كەلگەن تورەشىلەردەن دە بىر-ەكى ادام قوسۋعا بولۋشى ەدى.

ال ەلىمىزدە تورەشىلەر ماسەلەسى 100 پايىز شەشىمىن تاپقان دەپ ايتا المايمىن. سوندىقتان وسى جىلدىڭ سوڭىنان باستاپ تۋرا تورەشىلەردى وقىتۋدى، بىلىكتىلىگىن ارتتىرۋدى قولعا الماقپىز. بۇل ماسەلەگە ٴتورت تاراپ تا مۇددەلى. ولار – سپورتتى دامىتۋ ديرەكسياسى، مينيسترلىك، سپورت كوميتەتى جانە ٴبىز – ۇلتتىق سپورت قاۋىمداستىعى.

- قايدان وقىتاسىزدار؟ مىسالى، اۋدارىسپاقتان ورتا ازيادا قازاقتاردان مىقتى سايىسكەر جوق. دەمەك وسى سپورت ٴتۇرى بويىنشا مىقتى تورەشى دە بىزدە دەگەن ٴسوز. ەندەشە ٴبىزدىڭ تورەشىلەرگە ۇيرەتەتىن تورەشىنى قايدان تاباسىزدار؟

- ۇلتتىق سپورتتىڭ وليمپيادالىق سپورتتان ٴبىر ەرەكشەلىگى –وليمپيادالىق سپورت جۇيەگە قويىلعان، بارلىق قاتىسۋشى ٴبىر ٴتارتىپ پەن ەرەجەگە باعىنادى. ٴتىپتى كەز كەلگەن ەل وليمپيادالىق سپورتتان فەدەراسيا اشامىن دەسە، وعان بارلىعى دايىن تۇر. ال ٴداستۇرلى، ۇلتتىق سپورتتا بارلىعىن ٴوزىڭ - ٴوزىڭ ٴۇشىن جاساۋىڭ كەرەك. سەبەبى ۇلتتىق سپورت - ۇلتقا عانا تيەسىلى. سوندىقتان دا، سپورتشىدان باستاپ، تورەشىگە دەيىن ٴوزىڭ وقىتىپ، ٴوزىڭ دايىنداۋىڭ كەرەك.

ٴبىز مۇنداي باسپالداقتان وتكەنبىز. ٴوزىڭىز بىلەتىندەي، ٴبىزدىڭ ەل قازاق كۇرەسىن الەمدىك دەڭگەيگە كوتەردى. قازاق كۇرەسى فەدەراسياسىن قۇرعان كەزدە بارلىعى وزىمىزدە دايىندالدى. تۋرا وسى تاسىلمەن، بىزدە بايگەگە قاتىستى مامانداردى، اتتىڭ بابىن بىلەر اتبەگىلەردى، بايگەگە شاباتىن شاباندوزدى; ٴتىپتى - قانداي اتقا قانداي سالماقتاعى، قانداي جاستاعى بالا شابۋى كەرەگىن وقىتاتىن ماماندار بار. سول سياقتى، قاي سپورت ٴتۇرى بولماسىن، ول – كوكپار ما، اۋدارىسپاق پا، جامبى اتۋ ما – ٴبارىبىر - سول سپورتقا قاتىستى دايىنداپ شىعاتىن ماماندار بار. ٴقازىر ۇلتتىق سپورت قاۋىمداستىعى وسىنداي ماماندار مەن وقيتىن ازاماتتار اراسىن ۇيلەستىرۋ جۇمىستارىن جۇرگىزىپ جاتىر.

- وسى جەردە ۇلتتىق سپورت تۇرلەرىنە بولىنەتىن قارجىعا توقتالساڭىز؟

- ٴبىزدىڭ باستى قارجىلىق دەمەۋشىمىز – «سامۇرىق-قازىنا» ٴال-اۋقات قورى. ال ولار بىزگە قارجىنى الدىن الا بەكىتىلگەن قۇجاتقا، ناقتى شاراعا عانا بەرەدى. بارا سالىپ، كەز كەلگەن ۋاقىتتا قارجى سۇراپ الىپ، قالاعانىڭمەن جۇمساي بەرۋ دەگەن جوق. ال ۇلتتىق سپورتتىڭ شوتىنا تۇسكەن قارجىنىڭ قوماقتى بولىگى شارانىڭ جۇلدە قورىنا جۇمسالادى. سودان كەيىن عانا ۇيىمداستىرۋعا، تورەشىلەردىڭ ەڭبەگىنە، قاجەتتى اتتاردى جالعا الۋعا، جەم-شوپ دەگەن سەكىلدى شىعىندارعا جۇمسالادى.

ەل ىشىندە ۇيىمداستىرىلاتىن سايىستاردا قارجىنىڭ كوپ بولىگى جۇلدە قورىنا جۇمسالسا، حالىقارالىق جارىستاردا شىعىن مولشەرى ۇلعايادى. سەبەبى جارىستى ۇيىمداستىرىپ وتىرعان ٴبىزدىڭ ەل بولعاندىقتان، جارىسقا كەلەتىن سپورتشىلاردىڭ جول شىعىنىن، جاتار ورنىن، ىشىپ-جەمىن تۇگەلدەي ۇلتتىق سپورت تاراپى كوتەرەدى. بۇل ٴبىر ادامعا كوپ بولماعانمەن، ايتالىق - 100 ادام قاتىسقان كەزدە، وتە ۇلكەن سوما شىعادى.

- ناقتىراق. ٴوزىڭىز دە ەستىگەن بولارسىز، وتكەندە «كوكپارعا جىلىنا 150 ميلليون تەڭگە بولىنەدى ەكەن» دەگەن قاۋەسەت تارادى. بۇل قايدان الىنعان سان؟

- بىلمەيمىن.

- جاقسى. ەندەشە جاقىندا وتكەن كوشپەندىلەر ويىندارىنا ويىسايىقشى. كوكپارعا نەگە ەكىنشى قۇرامدى اپاردىڭىزدار؟

- سپورتتا ەكىنشى قۇرامنىڭ نە جاستار قۇراماسىنىڭ باق سىناۋى تاجىريبەدە بار. مىسالى، حالىقارالىق ويىنداردا ٴبىزدىڭ بوكسشىلار ەكىنشى، ٴۇشىنشى قۇرامانى اپارىپ، سىناپ جاتادى. بۇل دا سولاي. ٴارى، ٴبىزدىڭ سپورتشىلار ەشقانداي اتاق الىپ، سپورتتىق دارەجەسىن كوتەرىپ، كۆاليفيكاسيا المايدى. بۇل ويىن شىنىن ايتقاندا، قازاق پەن قىرعىزدىڭ تويى سەكىلدى عانا نارسە. سوندىقتان بۇل ويىنعا ٴۇشىنشى قۇراما بارسا دا، وزگەرىپ كەتەر ەشتەڭە جوق. ٴبىراق، سوعان قاراماستان، جالپى ەسەپتەگى ەكىنشى ورىن – ماعان وتە جاقسى كورسەتكىش سياقتى.

- نەگە اتسىز باردىڭىزدار؟

- ٴبىرىنشى ماسەلە – ۇلتتىق سپورتتى اتسىز ەلەستەتۋ مۇمكىن ەمەس. 90-95 پايىزى تىكەلەي اتپەن بايلانىستى. ال اتتىڭ تاسىمالى، جەم-شوبى ٴتىپتى ەل ٴىشىنىڭ وزىندە قيىن. ولاردى شەتەلگە اپارۋ ودان دا ۇلكەن ماسەلە.

ال، «نەگە اتسىز باردىڭىزدار؟» دەگەن سۇراققا كەلسەك، ٴبىز ات جوقتان اتسىز بارعان جوقپىز. ۇيىمداستىرۋشى تاراپپەن اۋەلدەگى كەلىسىم سولاي بولعان.

- الەۋمەتتىك جەلىدە ات سۇراپ جازعان حاتتارىڭىز ٴجۇر عوي؟

- ول ەكى تاراپتىڭ كەلىسىمىنەن كەيىن جازىلعان حات. قىرعىز تاراپى بىزدەن ارنايى حات جازۋدى سۇرادى. قاعاز جۇزىندە بولسىن دەپ.

- ال سول حاتتا «بىزدە دايىن ات بولماي قالعاندىقتان» دەپ كورسەتىلگەن. بىزدە ات دايىن بولماي قالۋ دەگەن شىنىمەن بولا ما؟

- قازاقستان قۇراماسىنىڭ اتتارى ەل چەمپيوناتىندا بولدى. ال ودان بولەك قوسىمشا اتتار قولدا تۇرعان ەدى. ەگەر «ٴوز اتتارىڭمەن كەلىڭدەر!» دەگەن بولسا، ٴبىزدىڭ سول قوسالقى اتتاردى الىپ بارۋعا مۇمكىندىگىمىز بولدى.

بيىل جارىستار بىرىنەن سوڭ ٴبىرى جالعاسىپ كەتتى دە، ات دەمالتۋعا ۋاقىت بولعان جوق. ەرتەڭ قورىتىندى ويىنى بولاتىن « ۇلى دالا رۋحى»، ەل چەمپيوناتى، جاستار چەمپيوناتى بىرىنەن سوڭ ٴبىرى جالعاستى. سوندىقتان كەي وبلىستار كەيبىر جارىستارعا قاتىسا الماي قالدى. تۋرا وسى كوكپارعا سالاتىن اتتارى بولدىرىپ قالدى.

- مىسالى؟

- مىسالى اقتوبە وبلىسى. اقتوبە وبلىسى سولتۇستىكتە وتكەن جاستار چەمپيوناتىنا كەلە الماي قالدى. سەبەپ – اتتارى شارشاپ قالدى. سپورتشىلاردىڭ ٴبارى دايىن، تەك اتتار جارامادى.

ال قىرعىزستاندا العاشقى كۇنى تەحنيكالىق سەبەپتەرگە بايلانىستى تۇسىنىسپەۋشىلىك بولعانىمەن، ارتىنشا ۇيىمداستىرۋشى تاراپ ات بەردى. جانە بەرگەن اتتارى سونداعى قىرعىز كوكپارشىلارىنىڭ، كوماندادا ويناپ جۇرگەن اتتار بولدى. ولار ٴبىزدى عانا ەمەس، كوكپارعا قاتىسقان باسقا 10 ەلدى دە اتپەن قامتاماسىز ەتتى.

- وزبەكستان قۇراماسىنان جەڭىلۋىمىزدىڭ سەبەبى نەدە؟

- مەن كوشپەندىلەر ويىندارىنا باردىم. ٴبىراق العاشقى كۇندەردەن كەيىن ەلگە قايتىپ كەتتىم دە، قازاقستان مەن وزبەكستان ويىنىن تۋرا الاڭنان كورگەن جوقپىن. بۇل – ٴبىر، ەكىنشىدەن – وزبەكستاندا كوكپار تارتاتىن كوكپارشىلار قازاقستاننان از ەمەس. ۇشىنشىدەن – وزبەكستان سپورتتىق دەرجاۆا بولۋدىڭ الدىندا تۇر: جانە وسى كوكپاردان - «بۋزاحشي»، «ۋلاك تارتىس» دەپ اتالاتىن ويىن تۇرلەرى ارقىلى ازياداعى العاشقى بەستىككە كىرەتىن بەلدى مەملەكەتتىڭ ٴبىرى. تورتىنشىدەن – وزبەكستان ات ابزەلدەرىن دايىنداۋ، ونى ەكسپورتتاۋدا العاشقى ورىندا. جانە ٴبىر قىزىعى، قىرعىزستان مەن قازاقستاندى ات ابزەلىمەن قامتاماسىز ەتىپ وتىرعان بىردەن ٴبىر ەل - وسى وزبەكتەر. ەندەشە وزبەكستاندى كوكپاردا مۇلدە اۋتسايدەر دەپ قاراۋعا بولمايدى.

وسى جولعى ويىندا ٴبىزدىڭ قۇراما اقش-تان نە فرانسيا قۇراماسىنان جەڭىلىپ قالعان بولسا، مەن تۇسىنەر ەدىم. مىسالى مەن فرانسۋزدىق قۇرامامەن تانىستىم. ولادىڭ وزدەرىنىڭ horseball دەگەن ويىندارى بار. كوكپارعا كەلگەندەردىڭ بارلىعى سول ويىننىڭ وكىلدەرى. ولار دا - ات ۇستىندە مىقتى، ويىنعا دەگەن فيزيكالىق قابىلەتتەرى بار. ٴبىراق ولار سەركە ەمەس، دوپپەن وينايدى. سەبەتكە دوپ لاقتىرادى. مىنە، سول كوماندامەن ويناپ، جەڭىلىپ قالسا، ايتۋعا، نامىستانۋعا بولاتىن ەدى. سوسىن، وزبەكتەرمەن اراداعى ەسەپ سونشا الشاق ەمەس – 5:4 بولدى. دەمەك، وزبەك قۇراماسىنىڭ باسىمدىعىن مويىنداۋعا بولادى.

- «وزبەكستاننان جەڭىلۋ ارقىلى قازاقتار فينالدا قىرعىز قۇراماسىمەن كەزدەسپەۋدى كوزدەدى» دەگەنگە نە دەيسىز؟

- بۇل ويىن وتكەننەن بەرى ايتىلىپ كەلە جاتقان اڭگىمە عوي. قانشا جەردەن «ادىلەتسىزدىك بولدى»، «تورەشىلەر قاراۋ جاسادى»، «ادەيى جەڭىلدى» دەسە دە، سوڭىندا 5:4 دەگەن ەسەپ قالدى عوي. ارينە، بىزدىكى جاستار قۇراماسى بولدى. ال وزبەكتەردەگى ساقا ويىنشىلار. ٴبىراق انىق ٴبىر نارسە بار: فينالدا ٴبىزدىڭ كوكپارشىلار قىرعىزدارمەن ويناسا دا - وسى اڭگىمە تۋىندايتىن ەدى.

- «ٴبىزدى دايىندىقسىز الىپ باردى» دەگەن اڭگىمە شىعاردى كوكپارشىلار. ٴتىپتى ونىڭ ۆيدەوسى دا تارادى. شىنىمەن دايىندىق بولمادى ما؟

- بىرىنشىدەن، بيىل وتەدى دەگەن رەسپۋبليكالىق، حالىقارالىق، الەمدىك جارىستار جىل باسىندا بەكىتىلىپ، كۇنتىزبەلىك جوسپارعا ەنىپ، وعان وقۋ-جاتتىعۋ جيىندارى وتكىزىلەتىنى مەملەكەتتىك دەڭگەيدە بەكىتىلەدى. جانە ونىڭ ٴوزىنىڭ بەلگىلەنگەن مەرزىمى بار، تەك سول بويىنشا وتەدى. ال ٴبىزدىڭ كوكپارشىلار اراسىندا، اسىرەسە حالىقارالىق جارىستارعا قاتىساتىن سپورتشىلار اراسىندا مۇنداي وقۋ-جاتتىعۋ جيىندارى ٴوتتى.

ەكىنشىدەن، الەۋمەتتىك جەلىدە تاراپ جۇرگەن - ەسكى ۆيدەولار. وسى احۋالدى ٴتيىمدى پايدالانىپ، سول ۆيدەولاردىڭ كەڭىنەن تاراۋىنا مۇمكىندىك بەردى.

ۇشىنشىدەن، ٴبىزدىڭ كوكپارشىلار اۆتوبۋستا وتىرعاندا كەلىپ سويلەگەن قىرعىز كوكپارشىسىن كورسەتكەن ٴبىر ۆيدەو ٴجۇر عوي. ول ماسەلەنى قازىپ، ارتىنان داۋ تۋعىزا بەرەر بولساق، تەرەڭدەي بەرەمىز، سوندىقتان اڭگىمەنى وسى جەردە توقتاتقىم كەلەدى. ال الداعى ۋاقىتتا قىرعىز كوكپار فەدەراسياسىمەن تىعىز قارىم-قاتىناستا جۇمىس ىستەيتىن بولامىز.

- جاقسى. وتكەن جىلى ٴبىراز ەلدىڭ ۇسىنىسىمەن، ٴبىراز ەلدىڭ قاتىسۋىمەن حالىقارالىق كوكپار ەرەجەسىنە وزگەرىس ەنگىزدىك. ەلىمىزدە وتكەن الەم چەمپيوناتى سول وزگەرگەن ەرەجەمەن وينالدى. ٴبىراق وسى جولى قىرعىزستان كوشپەندىلەر ويىندارىنداعى كوكپاردى باياعى ەسكى ەرەجەمەن ويناتتى. الداعى ۋاقىتتا ايىر قالپاق اعايىنمەن وسى ماسەلە بويىنشا جۇمىس ىستەۋ كەرەك شىعار؟

- كوكپار ەرەجەسىنە جاسالعان نەگىزگى وزگەرىس - قازاندىقتى الىپ تاستاپ، شەڭبەرگە ويناۋ بولاتىن. ال قازاندىق سوڭعى 20-25 جىلدا پايدا بولعان دۇنيە. ال شەڭبەرگە ويناۋ باياعىدان قازاق پەن قىرعىزعا ورتاق ەدى. سوسىن، سپورتتا ەرەجەنى وزگەرتىپ وتىرۋ حالىقارالىق تاجىريبەدە بار. سوندىقتان، «مىناۋ مىندەتتى تۇردە قازاندىقتا وينالسىن»، نە «مىندەتتى تۇردە شەڭبەرگە ويناۋ كەرەك» دەگەن ۇستانىم جوق. تاعى ٴبىر ماسەلە - وسى جولعى كوشپەندىلەر ويىندارىنىڭ ەرەجەسىندە قىرعىزدار: «حالىقارالىق كوكپار ەرەجەسىمەن وتەدى» دەپ اتاپ كورسەتكەن جوق. كەرىسىنشە، «قىرعىزدىڭ كوك-بورى ەرەجەسىنە ساي وتەدى» دەپ جازعان بولاتىن. سوندىقتان بۇل ويىندا ايتارلىقتاي ەرەجە بۇزىلدى دەپ ەشكىم ايتا المايدى.

بالكىم بولاشاقتا ەكى ەلدىڭ دە ەرەجەسى قاتار جۇرەتىن بولار. مۇمكىن، اپروباسيادان وتكەننەن كەيىن - ٴبىزدىڭ نۇسقا ٴوزىنىڭ تيىمدىلىگىن دالەلدەپ، كوبىرەك ەلدەر قاتىساتىن بولار. حالىقارالىق دارەجەدە قاۋىپسىزدىگى جاعىنان شەڭبەرگە ويناۋ سۇرانىسقا يە بولار مۇمكىن. ونىڭ بارلىعىنا ۋاقىت كەرەك. الداعى 4-5 جىلدىڭ ىشىندە ٴبىر جاعىنا شىعىپ قالادى دەپ ويلايمىن.

- ۇلتتىق سپورت - كوپ سالالى. ٴبىرازىن تىلگە تيەك ەتتىك. الداعى ۋاقىتتا قانداي جاڭاشىلدىق بولادى بۇل سالادا؟

- مىناداي ٴبىر تاجىريبەنى بايقادىق جاقىندا. «التىن جەبە» ٴتۋرنيرىن وتكىزگەن كەزدە ٴداستۇرلى جامبى اتۋدى ۇيىمداستىردىق. بۇل مەرگەندەرىمىزگە جاتتىعۋ بولسا، قاراپايىم حالىق ٴۇشىن جارىستىڭ ٴبىر ٴتۇرى بولدى. سول كەزدە ٴداستۇرلى ساداق اتۋدى قاراپايىم حالىق اراسىندا دامىتۋعا بولاتىنىن بايقادىق. وعان ۇلكەن الاڭنىڭ كەرەگى جوق، كوپ شىعىندى دا قاجەت ەتپەيدى دەگەندەي. وسى باعىتتا جۇمىس جاساۋدى قولعا الماقپىز.

سوسىن، كوشپەندىلەر ويىندارىندا ٴبىزدىڭ قۇرام ارقان تارتۋدان كۇمىس جۇلدە الدى. ال ٴبىز ونى ٴجاي - تويلاردا، ايت، ناۋرىز مەرەكەلەرىندە كوڭىل كوتەرۋ ٴۇشىن عانا ۇيىمداستىرىپ ٴجۇرمىز. شىن مانىندە بۇل ويىن الەمدە سپورت سانالادى. 51 ەلدە ارقان تارتۋ فەدەراسياسى بار. وسى باعىتتا جۇمىس ىستەگىمىز كەلەدى.

ٴۇشىنشى، قازاق جىر-داستاندارىندا كەزدەسەتىن نايزا لاقتىرۋ دەگەن جاۋىنگەرلىك ونەر بار. وسىنىڭ تۇرىكتەردە ساقتالعان نۇسقاسى بار ەكەن. سونى ٴبىز دە قولعا الىپ، دامىتقىمىز كەلەدى.

- اڭگىمەڭىزگە راحمەت!


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي