BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

شىمكەنتتەن سىرتقا كەتەتىن جاستار ازايدى – ايان ازيموۆ

فوتو: Автор

«شىمكەنتتىك جاستاردىڭ كاسىپ اشۋعا دەگەن ىنتاسى جوعارى. ولارعا باستاپقى كاپيتال رەتىندە كەپىلسىز نەسيە بەرۋ مۇمكىندىگىن قاراستىرىلسا»، دەيدى شىمكەنتتىك جاس كاسىپكەر ٴارى جاستار بۋىنىنىڭ وكىلى ايان ازيموۆ. ول مەملەكەت باسشىسىنىڭ 2019 جىلدى «جاستار جىلى» دەپ جاريالاۋىنان ۇلكەن ٴۇمىت كۇتەدى. وسى ورايدا baq.kz اقپارات اگەنتتىگىنىڭ ايماقتاعى ٴتىلشىسى 28 جاستاعى كاسىپكەر ٴارى قازاقستانعا تانىمال فرانشيزانىڭ يەسى ايان ازيموۆتەن قازان جولداۋى تۋرالى پىكىرىن بىلگەن ەدى.

ايان ازيموۆ 2016 جىلى دوستارىمەن بىرىگىپ كوفە قۋىرۋ، ونى باسقا كوفەحانالارعا ساتۋ جانە وزىڭمەن بىرگە الىپ جۇرۋگە ىڭعايلى كوفە ساتاتىن «salem company kazakhstan» كومپانياسىن قۇرعان. شاعىن كاسىپ بۇگىندە فرانشيزاعا اينالدى. شىمكەنتتەن بولەك، استانا، الماتى، اقتوبە، كوكشەتاۋ جانە قاراعاندى قالالارىندا كوفەحانالارى اشىلعان.

«ٴبىز 2016 جىلدان بەرى كوفە بيزنەسىمەن اينالىسامىز. كوفەنى وڭدەيمىز، قۋىرامىز جانە ٴوزىمىزدىڭ جەكە كوفەحانالار جەلىسىندە ساتامىز. ازىرگە قانداي دا ٴبىر اكىمشىلىك كەدەرگىلەرگە كەزدەسپەدىك. ٴبىراق، جاس كاسىپكەرلەردىڭ بيزنەس باستاۋىنا باستاپقى قارجى بەرۋ جاعىنان كومەكتەسۋ قاجەت. ولارعا كاسىپ اشىپ، ونى دامىتۋ ٴۇشىن قارجى كەرەك. سوندىقتان دا جاستاردىڭ بيزنەس باستاۋىنا كەپىلسىز نەسيە بەرۋ مۇمكىندىگىن قاراستىرعان ٴجون. سەبەبى، جاستاردا باستاپقى كەزدە كەپىلگە قوياتىن مۇلكى بولمايدى. ەلباسى دا جولداۋىندا «ايماقتارعا قارجى ۇلەستىرەمىز، ٴبىراق سول قارجىنى الاتىن كاسىپورىندار جوق» دەدى. ايماقتاردا كاسىپ اشۋعا قىزىعاتىن جاستار بار. ٴبىراق، بەرەتىن كەپىلزاتى جوق»، - دەيدى ايان ازيموۆ.

پرەزيدەنت قازان جولداۋىندا «قالىپتاسقان جاعدايدا ەكونوميكانى، اسىرەسە، وڭدەۋ سەكتورى مەن شاعىن جانە ورتا بيزنەستى نەسيەلەندىرۋدى ۇلعايتۋ وتە ماڭىزدى» ەكەنىن ايتا كەلە، باسىمدىعى بار جوبالارعا قولجەتىمدى نەسيە بەرۋ مىندەتىن شەشۋ ٴۇشىن ۇلتتىق بانككە كەمىندە 600 ميلليارد تەڭگە كولەمىندە ۇزاق مەرزىمگە قارجى ٴبولۋدى تاپسىرعان بولاتىن. ايان سول قارجىنىڭ جاستارعا دا كومەك بولاتىنىنان ٴۇمىتتى.

«پرەزيدەنت كەلەر جىلدى «جاستار جىلى» دەپ اتادى. سوندىقتان كاسىبىن باستاعىسى كەلەتىن جاستاردى دا قولداۋ مۇمكىندىكتەرى اشىلادى دەپ كۇتەمىن. تۇتىنۋ سەكتورىندا 5 ملن تەڭگەگە دەيىن كەپىلسىز نەسيە الۋعا بولادى. بيزنەسكە دە سولاي كەپىلسىز نەسيە بەرۋ جاعىن قاراستىرۋعا ابدەن بولادى. ٴبىز كومپانيامىزعا قاجەت مامانداردى دايىندايمىز. جۇمىس ىزدەپ كەلەتىن جاستار وتە تالانتتى. وتكەن جىلدارمەن سالىستىرعاندا شىمكەنتتە تالانتتى جاستار كوبەيىپ جاتىر. الماتى-استاناعا كەتەتىن جاستار ازايدى. شىمكەنتكە قايتا ورالىپ جاتقان جاستار كوپ. كەلىپ، ٴوز كاسىبىن باستاپ جاتىر. 2000 جىلداردان كەيىن تۋعان جاستار الدىڭعى بۋىندى ەڭبەك نارىعىنان ىعىستىرۋى مۇمكىن. ويتكەنى، ولار تەحنولوگيانى وتە جاقسى مەڭگەرگەن ٴارى تەحنولوگيانى قابىلداۋى تەز ٴارى وڭاي. تۇسىنىكتەرى باسقاشا. بالا كۇنىنەن تەلەفونمەن بىرگە وسكەن. سوندىقتان دا سالىستىرا قاراعاندا باسەكەگە قابىلەتتى»، - دەيدى.

ونىڭ سوزىنشە، ەڭ الدىمەن جاستاردىڭ باسپانالى بولۋىنا ٴمان بەرگەن ٴجون. سونداي-اق، جۇمىسپەن قامتۋ ورتالىقتارى ارقىلى جاستاردىڭ بىلىكتىلىگىن ارتتىرىپ، ولاردىڭ جۇمىس تابۋىنا جول اشۋ كەرەك. ال قازان جولداۋىندا ايتىلعانداي جالاقىنى كوتەرىلسە تاراپتاردىڭ ٴبارى ۇتار ەدى.

ايان شىمكەنتتە كوللەدجدە وقىپ، كەيىن ليتۆادا ٴبىلىمىن جالعاستىرعان. اڭگىمە بارىسىندا ەكى ەلدىڭ ٴبىلىم بەرۋ ساپاسىنىڭ ايىرماشىلىعىن دا سۇرادىق.

«پرەزيدەنتىمىز «بىزدەگى جوعارى وقۋ ورىندارىنا شەتەلدەن مىقتى مامانداردى شاقىرۋ قاجەت» دەپ ايتتى. مەن ليتۆادا ٴبىلىم الدىم. ول جاقتا پروفەسسورلاردىڭ دەڭگەيى وتە جوعارى. بىزدە اشىعىن ايتۋ كەرەك، سەسسيالاردى قالاي جاباتىنىن جاقسى بىلەمىز. ال شەتەلدە مۇلدەم باسقاشا. سايكەسىنشە، بىلىمگە قىزىعۋشىلىق ارتادى. ٴوزىڭ ٴۇشىن وقيسىڭ. ال مۇندا ديپلوم ٴۇشىن وقىعانبىز عوي. سوندىقتان دا شەتەلدىك وقىتۋشىلاردى شاقىرتىپ، ٴبىزدىڭ وقىتۋشىلار ولاردان ۇلگى الۋىنا جاعداي جاساعان ٴجون. ال ۋنيۆەرسيتەتتىڭ جۇمىسىن جالعاستىرا الاتىنىن، نە توقتاتاتىنىن نارىق شەشەدى. بىزدەگى ۋنيۆەرسيتەتتەردىڭ دەنى – جەكەمەنشىك. ەگەر ۋنيۆەرسيتەتتەر ٴبىلىم ساپاسىنا ٴمان بەرەتىن بولسا، وندا تاڭداۋدى ستۋدەنتتەر جاسايدى. ۋنيۆەرسيتەت تانىمال بولماسا، ارينە جۇمىسىن توقتاتادى. سودان كەيىن بارلىق جوعارى وقۋ ورىندارى ٴبىلىم بەرۋ ساپاسىن كوتەرۋگە ۇمتىلادى دەگەن ويدامىن»، - دەدى.

***

ايان ازيموۆ ەلباسىنىڭ شىمكەنتكە جاساعان ساپارى بارىسىندا مەملەكەت باسشىسىنىڭ الدىندا ٴسوز سويلەپ، ٴوز بيزنەسى تۋرالى ايتقان بولاتىن.

«ٴبىز كوفە باعىتىن دامىتىپ جاتىرمىز. قازاقستاننىڭ تۇپكىر-تۇكپىرىندە 20-دان استام كوفەحانامىز بار. فرانشيزامىزبەن تاياۋ شەتەلدەرگە ەكسپورتقا شىققالى وتىرمىز. ٴوزىڭىز ايتقانداي، شاعىن جانە ورتا بيزنەس مەملەكەتتىڭ تىرەگىنە اينالۋى ٴتيىس. ٴبىز سوعان شاما-شارقىمىزعا ۇلەس قوسۋدامىز. 2016 جىلى كاسىپ باستاعانىمىزدا نەسيە الدىق. سول كەزدە 14 پايىز ۇستەمەمەن نەسيە الساق، ٴقازىر ٴسىزدىڭ جاس كاسىپكەرلەردى قولداۋ تۋرالى باستاماڭىزدىڭ ارقاسىندا 6 پايىزبەن نەسيە بەرىپ جاتىر. شىمكەنتكە مەگاپوليس مارتەبەسىن بەرگەنىڭىزگە راحمەت. بۇل بيزنەسىمىزدى دامىتۋعا سەپتىگىن تيگىزەدى» دەدى.

ەلباسى ٴقازىر بيزنەستى دامىتۋعا بارلىق جاعداي جاسالعانىن، بيزنەستى تەكسەرۋدى ازايتۋ جاعىن ٴالى دە باستى نازارعا الاتىنىن ايتتى.

«تەكسەرۋشىلەر ۇنەمى قىسقارتىلعانىمەن، ولار تەكسەرگەندى جاقسى كورەدى. قانشا قىسقارتقانىمەن ازايار ەمەس. مىسالى، ٴورت ٴسوندىرۋشى مەيرامحاناداعى جارىقشامىنىڭ قالاي بۇرالعانىن كورۋگە كەلەدى. مەيرامحانا يەسى ٴتىپتى بولماعاندا ونىڭ تۇسكى اسىن بەرەدى. مۇندايدان باس تارتۋ كەرەك. مەن بيزنەستىڭ وسىنداي شابۋىلداردىڭ قورعالۋى باعىتىندا جۇمىس ىستەپ جاتىرمىن. قازاقستاندا ەكونوميكانىڭ دامۋىنىڭ 50 پايىزىن شاعىن جانە ورتا بيزنەس ۇلەسى قۇراسا، ٴبىز مەيلىنشە ەكونوميكاسى تۇراقتى ەلگە اينالامىز. بۇگىندە 30 پايىزدى قۇرايدى. سونى 50 پايىزعا جەتكىزىپ، اسىرۋىمىز كەرەك. الەمدە جاعداي وسىنداي. ٴىرى بيزنەستىڭ ۇلەسى از. ال ٴبىز كەڭەس زامانىنداعىداي كەن ورىندارىندا، زاۋىتتاردا 5000-15000 ادامدى جۇمىس ىستەتۋگە ۇيرەنىپ العانبىز»، - دەدى ەلباسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي