USD 335.71 EUR 357.36 RUB 5.23
استانا:

سەۋلدە ٴبىلىم العان كارىس قىزى: قازاقستاندى ەشبىر ەلگە ايىرباستامايمىن

انجەليكا كيم ەسىمدى بويجەتكەن شەت ەلدە تۇرمىس جاقسى بولسا دا، قازاقستاندى ەشبىر ەلگە ايىرباستامايمىن دەپ وتىر.

كيمپابتى الماتىنىڭ كارتوپ بالىشىنە ايىرباستامايمىن

الماتىدا تۋىپ-وسكەن ول ون جەتى جاسىندا سەۋلگە وقۋعا اتتانعان. «سەۋل ٴبىر كورگەننەن جۇرەگىمدى جاۋلاپ الدى. ٴمىنسىز تازا كوشەلەر، مينۋت-مينۋتىمەن ۋاقىتىندا جۇرەتىن قوعامدىق كولىكتەر، كىشىپەيىل ٴارى ۇستامدى ادامدار، قىزمەت كورسەتۋدىڭ جوعارى دەڭگەيى — مۇنىڭ بارلىعى قالاي ۇناماسىن؟ ٴبىراق مەن سەۋلگە بارعان العاشقى كۇننەن باستاپ قازاقستاندى ساعىندىم. كارىستەردىڭ كيمپاب سياقتى تاعام تۇرلەرىن مەن الماتىنىڭ كارتوپ بالىشىنە ايىرباستاماس ەدىم. ٴيا، مەن اششى تاعامداردى جاقسى كورەمىن. كيمچيدى كۇندە جەۋگە دايىنمىن. ٴبىراق پالاۋ، مانتى جانە قازى-قارتانىڭ ورنى مەن ٴۇشىن بولەك. تەگىم كارىس بولسا دا، قازاق حالقىنىڭ ۇلتتىق تاعامدارى مەنىڭ جانىما جاقىن.

مانتىنىڭ قامىرىن بوتەلكەمەن جايدىم

قازاقستاندى ساعىنعانىم سونشا، ورتاق تىلدە سويلەسەتىن ادام ىزدەدىم. كورەيادا بارلىعى كارىس تىلىندە سويلەيدى. مەن دە بۇل ٴتىلدى جەتىك مەڭگەرگەنمىن. ٴبىراق قازاق جانە ورىس تىلدەرىندە ارالاساتىن قۇربى-قۇرداستارىمدى ىشتەي ىزدەي باستادىم. ٴسويتىپ، ورتا ازيادان شىققان، كورەيادا تۇراتىن ورىس ٴتىلدى جاستارمەن تانىسىپ، مەرەكەلەر ۇيىمداستىرىپ، ٴجيى-جيى باس قوسىپ تۇردىق. ٴالى ەسىمدە، ەكىنشى كۋرستا وقىپ جۇرگەندە ٴبارىمىز بىرىگىپ مانتى جاساماق بولدىق. جۋساي سالىنىپ، كۇرىش كەسپە قوسىلعان كارىس مانتىسى ەمەس، ٴوزىمىزدىڭ قازاقستاندىق، مايلى ەت، پياز، كارتوپ، اسقاباق قوسىلعان مانتى. كورەيادا وقتاۋ قايدان بولسىن؟ دۇكەندەردەن ىزدەسەك تە تاپپادىق. سودان ماعان يدەيا كەلدى. قامىردى يلەگەن سوڭ سۋسىننان بوساعان بوتەلكەنى وقتاۋ قىلىپ، نانىن جايدىم. مانتى پىسكەندە ٴبارىمىز جابىلىپ، قاس-قاعىم ساتتە جەپ الدىق.

كارىس دوستارىمىز قازاق تاعامىنا تامسانۋمەن بولدى

الماتىداعى اكە-شەشەم ماعان قازاقستاندىق تاعامداردى جىبەرىپ تۇردى. ەلدەن سالەمدەمە كەلگەندە، ون-ون بەس دوسىمدى شاقىرىپ، بىرگە جەيتىنبىز. جەرگىلىكتى كارىس دوستارىمىزبەن دە بولىستىك. كارىس جاستارىنا قازاقستاندىق ونىمدەر قاتتى ۇنادى. اسىرەسە، بال، شوكولاد، سىر، شۇجىق، نان مەن جەمىس-جيدەكتەرگە دەيىن ٴدامدى ەكەندىگىن ايتىپ ماقتاپ جاتتى. ول جاقتا بۇنداي تابيعي تاعامدار كەزدەسپەيدى. ٴبارىنىڭ ٴدامى ٴبىرتۇرلى جاساندى سياقتى. سوندىقتان ٴدامى ٴتىل ۇيىرەر قازاق تاعامدارىنا كارىس دوستارىمىز تامساندى-اق. ولارعا ەلدەن كەلگەن قۇرت-ىرىمشىككە دەيىن ۇلەستىردىك. كارىس دوستارىمىز بارىنەن دە قازاقتىڭ قۇرتىنا تاڭعالدى. ولار ٴۇشىن تاڭسىق تاعام عوي.

كارىستەردىڭ جان-دۇنيەسى مەن ٴۇشىن جۇمباق كۇيىندە قالدى

«كورەيادا ٴسىزدى تاڭ قالدىرعان نە نارسە؟» دەگەن سۇراعىمىزعا انجەليكا بىلاي دەپ جاۋاپ بەردى: كارىستەردىڭ جان-دۇنيەسى مەن ٴۇشىن جۇمباق كۇيىندە قالدى. مەن كوپشىل بولعاندىقتان دوستارىم دا كوپ. سەۋلگە العاش بارعاندا جانىم قۇلازىپ، ٴوزىمدى قويارعا جەر تاپپادىم. كارىستەردىڭ ٴبىر ەرەكشەلىگى كەزدەسكەن ادامنان بىردەن جاسىن سۇرايدى. ال ٴبىزدىڭ تاربيەمىز باسقاشا عوي، قىزدىڭ جاسىن سۇرامايدى. مەنەن جاسىمدى سۇراعاندا قىسىلىپ، ىشتەي رەنجىپ قالدىم. كارىستەردىڭ ادامنىڭ جاسىن نەلىكتەن سۇرايتىنىن كەيىن ٴبىلدىم. ولار قالاي سويلەسۋ كەرەكتىگىن انىقتاۋ ٴۇشىن سۇرايدى ەكەن ادامنىڭ جاسىن. كورەياداعى كارىستەردىڭ مەنتاليتەتى تۋرالى ايتسام، ولار كارىس ٴتىلىن مەڭگەرگەن ادامدى باعالايدى. ەگەر ٴسىز «سالەمەتسىز بە» جانە «راحمەت» دەگەن ەكى ٴسوزدى عانا بىلسەڭىز، سوعان قۋانادى.

وڭتۇستىك كورەيا تۇرعىندارى ۇيىنە قوناق شاقىرمايدى

كارىستەر قوناقجاي حالىق. كەز-كەلگەن مەيرامحانادا ٴسىزدىڭ شەتەلدىك ەكەنىڭىزدى بىلگەن يەسى سىزگە سالات پەن كوفە ۇسىنادى. ساتۋ ٴۇشىن ەمەس، جاي قوناقجايلىق بەلگىسى رەتىندە. كارىس جاستارى قوناققا كەلگەن شەت ەل ازاماتتارىنا كورىكتى جەرلەردى كورسەتۋگە اسىعادى. بۇل دا وزدەرىن تانىتۋعا ۇمتىلعان ٴبىر ۇلتجاندىلىقتىڭ بەلگىسى بولسا كەرەك. ٴبىراق، قازاقستان حالقىنىڭ قوناقجايلىعىنا ەشبىر ەل تەڭ كەلمەيدى، ارينە. تەك قازاقستاندىقتار عانا كەڭ داستارحانىن جايىپ، ۇيىنە قوناق شاقىراتىن سياقتى. ويتكەنى، مەن ٴبىلىم العان وڭتۇستىك كورەيا تۇرعىندارى ۇيىنە قوناق شاقىرمايدى. ۇيلەرىنە كىسى بارۋى سيرەك. قازاقستان حالقىنىڭ تاعى ٴبىر ارتىقشىلىعى قوناعىنا بار ٴدامدىسىن ۇسىنۋى. ىستىق تاعام، سالاتتىڭ نەبىر ٴتۇرى، تاتتى-دامدىلەرمەن داستارحاندى تولتىرادى. داستارحان باسىندا بىر-بىرىنە جاقسى تىلەكتەر ايتادى. ال كارىستەردە ولاي ەمەس. مەن بىردە كارىس دوستارىمدى قازاقتىڭ ۇيلەنۋ تويىنا شاقىرعان ەدىم. سول تويدان العان اسەرلەرىن كارىستەر كوپكە دەيىن ۇمىتا الماي ٴجۇردى. «قازاقتىڭ تويىنا ەشبىر ەلدىڭ مەيرام-مەرەكەسى جەتپەيدى ەكەن» دەپ تاڭ قالعان. سەۋلدە وتكەن سەگىز جىل جارقىن ساتتەرگە تولى بولسا دا، مەن قازاقستاندا تۇرۋعا بەل بۋدىم. جولداسىم كارىس ازاماتى، ٴبىر ۇلىمىز بار. ۇيدە دە قازاقتىڭ اس مازىرلەرىن داستارحاننان ۇزبەيمىز. قازاقستاندى ەشبىر ەلگە ايىرباستامايمىن!

دانا قامشىبەك

qamshy.kz پورتالى

كوممەنتاريي2
جاندوس
وتە كەرەمەت!مەندە سەۋل قالاسىنا عاشىقپىن!كارىس ۇلتىنىڭ سالت-داستۇرلەرىنە، ادەت-عۇرپىنا قاتتى قىزىعامىن!
kamilla
كەرەمەت سۇحبات ەكەن! وسىنداي سۇحباتتار كوبىرەك بولسا ەكەن. اسىرەسە، سەۋل قالاسى تۋرالى تاعى باسقا. راحمەت ۇلكەن!

ۆاش كوممەنتاريي بۋدەت وپۋبليكوۆان پوسلە مودەراسيي