BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

سەمەي اۋەجايىن "اباي جولى" دەپ اتاۋ ۇسىنىلدى

سەمەي، baq.kz. بۇل تۋرالى قازاقستان جازۋشىلار وداعى سەمەي قالاسى فيليالىنىڭ ٴتوراعاسى، جاس اقىن مەرەي قارت ٴوزىنىڭ الەۋمەتتىك جەلىدەگى پاراقشاسىندا جازدى.

"تاۋەلسىزدىك العاننان بەرى ٴار ٴتۇرلى مەملەكەتتىك مەكەمەلەر، الەۋمەتتىك نىساندار، حالىقتىق ماڭىزى بار ورىندار قازاقشالانىپ، كەڭەستىك كەزەڭنىڭ قۇرساۋىنان شىعىپ كەلەدى. ٴتۇپ تامىرىمىزدى تەرەڭگە تارتقان سوڭ، جاپىراعىمىز دا ۇلتتىق بولمىستا جايقالۋى كەرەك. اركىم ٴوز ورتاسىنان باستاپ، جوعارىعا (بيلىككە) قوزعاۋ سالسا، «ايتا-ايتا التايدى، جامال اپام قارتايدى» دەگىزبەيتىن شىعار. مىسالى ٴبىزدىڭ شىعىس قازاقستان وبلىسىندا ورىسشالانىپ كەتكەن اۋداندار جونگە كەلىپ، تەزگە ٴتۇسىپ كەلەدى. اسىرەسە بەلگىسىز «تۇلعالاردىڭ» ەسىمى مەن ٴمانسىز اتاۋلار اتىن جامىلعان وسكەمەن ٴوڭىرى.
وسى رەتتە ايتا كەتپەسەك ٴسوزدىڭ اتاسى ولەدى. ەجەلدەن رۋحانياتتىڭ استاناسى ساناتىنداعى سەمەي قالاسى توعىز جولدىڭ تورابىندا تۇر.جۇيتكىگەن وتاربالار، قىتاي، رەسەيگە اعىلعان جۇك كولىكتەرى قالامىزدىڭ ۇستىمەن وتەدى، ٴتىپتى كەزىندە سۋ جولىمەن دە كورشى قالالارمەن قاتىناسىپ تۇراتىن" - دەپ جازادى اقىن.

ونىڭ ايتۋىنا قاراعاندا، اۋەجاي ماسەلەسى ٴالى دە شەشىمىن تاپپاعان.

"ەندىگى كەزەكتە اۋەجولى. اۋەجولىنىڭ ابىگەرى ٴالى باسىلماي تۇر. استانا، الماتى قالالارىنا تۇرعىندار وسى ۋاقىتقا دەيىن وسكەمەن ارقىلى ۇشىپ ٴجۇر. سەبەبى كۇردەلى جوندەۋ جاسالىپ جاتقالى قاشان؟! ٴبىراق، كومبىس، ٴتوزىمشىل حالىق وعان دا ۇيرەنىپ قالدى. جاقىندا ىسكە قوسىلادى دەگەن قۋانىشتى حاباردى قۇلاعىمىز شالعان ەدى. سول ورايدا 40 جىلدان كەيىن جوندەۋ كورىپ، جونگە كەلىپ جاتقان اۋەجايدى «اباي جولى» دەپ اتاساق دەيمىن. سەمەي قالاسى گەوگرافيالىق جاعىنان دا وتە ٴتيىمدى جەردە تۇر. ەندىگى ۋاقىتتا حالىقارالىق اۋەجايعا اينالىپ، حالىقتىڭ يگىلىگىنە جۇمىس جاسايدى دەپ سەنەمىن. سوندىقتان كۇرە جولدا تۇرعان، قاراۋىل، جيدەباي باعىتىندا ورنالاسقان اۋەجايدى "اباي" اتىنداعى xالىقارالىق اۋەجاي دەسەك، جاراسىمدى ەستىلەدى ەمەس پە؟! حالىق تا قولدايدى دەپ زور سەنىم بىلدىرەمىن" - دەيدى مەرەي قارت.

ول ٴوزىنىڭ ۇسىنىسىن شقو اكىمى دانيال احمەتوۆتىڭ قولداۋىن سۇرايدى.

"شىعىس قازاقستان وبلىسىنىڭ اكىمى دانيال كەنجەتاي ۇلى ٴسىزدىڭ نازارىڭىزدان وسى ٴوتىنىش تىس قالماي، ٴتيىستى جەرلەرگە جەتسە دەيمىن" - دەيدى ول ٴسوز سوڭىندا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي