BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

لايك ٴۇشىن سەلفيدەن 300 ادام جان تاپسىرعان

لايك جيناۋ ٴۇشىن سەلفي جاساپ جان تاپسىرعاندار قاتارى ارتىپ كەتكەن. عالامدىق زەرتتەۋى بويىنشا سوڭعى جىلدارى ٴوزىن-وزى فوتوعا ٴتۇسىرۋ كەزىندە كوز جۇمعانداردىڭ سانى 300-گە جەتكەن، دەپ حابارلايدى baq.kz اقپارات اگەنتتىگى ەۋرازيا ٴبىرىنشى ارناسىنا سىلتەمە جاساپ.

اتالعان ترەندپەن كۇرەسۋ ٴۇشىن ٴتىپتى ٴبىرقاتار مەملەكەتتەر ارنايى زاڭ قابىلداماقشى. حالقىنىڭ سانى 300 ميلليوننان اسقان اقش ەكسترەمالدى سەلفيمەن كۇرەستى باستاپ كەتكەن. امەريكا ٴزاۋلىم عيماراتتار، تاۋ مەن تاس، وزەن مەن كول جاعاسىندا ادەمى كادر ٴۇشىن باسىن بايگەگە تىگەتىندەرگە توسقاۋىل قويماق.

فوتوعا تۇسەمىن دەپ كوز جۇماتىنداردىڭ سانى ٴبىزدىڭ ەلدە دە ٴوسىپ كەلەدى. بىرەر جىل بۇرىن وسمەكەندە ٴجاسوسپىرىم سەلفي جاسايمىن دەپ ەرتىس وزەنىنە سەكىرىپ، كوز جۇمعان. اعىستىڭ قاتتىلىعىنان ونىڭ دەنەسى ٴبىر ايدان سوڭ، 18 شاقىرىم جەردەن تابىلعان ەدى. ماماندار جالپى سەلفيدى كىمدەردىڭ كوپ جاسايتىنىن ايتىپ بەردى.

«ەشقانداي ىستە ٴوزىن-وزى كورسەتە الماعان كىسىلەر سەلفيعا باعىنىشتى بولىپ كەتەدى. ەگەر، ٴسىز كەرەمەت مامان بولساڭىز، ٴوز ىسىڭىزدە ٴبىر جەتىستىكتەرگە جەتىپ جاتساڭىز، سەلفي جاساپ جۇرتقا تاراتىپ جۇرۋگە ٴسىزدىڭ ۋاقىتىڭىز بولمايدى»، - دەيدى پسيحولوگ ايمان نۇرماعانبەتوۆا.

عالىمداردىڭ زەرتتەۋىنشە، كۇنىنە ٴۇش رەت سۋرەتكە تۇسكەن ادامعا «سەلفيتيس» دياگنوزىن قويۋعا بولادى. ال ونىڭ اسقىنعان تۇرىنە فوتوسىن الەۋمەتتىك جەلىگە سالعىسى كەلىپ تۇراتىندار جاتادى. سوڭعىسى سوزىلمالى. بۇعان تاۋلىگىنە 6 سۋرەتتەن ارتىق فوتو سالاتىندار كىرەدى.

تىلدىك قولدانىسىمىزعا بۇدان 4 جىل بۇرىن عانا ەنگەن «سەلفيدى» ٴقازىر ٴبارى بىلەدى. ٴاۋ باستا قىزىعۋشىلىقپەن باستالعان بۇل ادەت، از ۋاقىتتىڭ ىشىندە تالاي ادامعا دەرت بولىپ جابىستى.

«لايك جيناعان سايىن، ونىڭ بويىنداعى باقىت گارمونى، قۋانىش گارمونى وينايدى. ودان كەيىن سوعان تاۋەلدى بولىپ قالادى. كەز كەلگەن نارسەگە تاۋەلدىلىك – اۋرۋ! پسيحيكاسى بۇزىلا باستايدى»، - دەيدى پسيحولوگ عالياش ماحاشەۆا.

لايك جينايمىن دەپ جان تاپسىرعانداردىڭ ٴبىرى تالدىقورعان قالاسىنىڭ تۇرعىنى. 15 جاستاعى قىز 8 قاباتتان قۇلاپ كەتكەن بولاتىن. بويجەتكەن قۇرىلىسى اياقتالماعان قوناق ٴۇيدىڭ ۇستىنە شىعىپ، ينستاگرام جەلىسىندە تىكەلەي ەفيرگە شىققان ەكەن. كورەرمەندەرىمەن سويلەسىپ جاتقاندا اياعى تايىپ، تومەن قۇلاعان. جەرگىلىكتى جۇرتتىڭ ايتۋىنشا، اتالعان جەردە وسىعان دەيىن دە قايعىلى جاعدايلار تىركەلگەن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي