BAQ.kz - Қазақстан жаңалықтары USD 342.49 BAQ.kz - Қазақстан жаңалықтары EUR 400.85 BAQ.kz - Қазақстан жаңалықтары RUB 5.51
استانا:

نازاربايەۆتىڭ ايگىلى فوتوسىنىڭ اۆتورى: «ەلباسى» جانىما جاقىن سوزگە اينالدى 

استانادا ٴوتىپ جاتقان ٴىى photofest.kz حالىقارالىق فوتوفەستيۆالىنە بىرنەشە ەلدىڭ فوتوگرافتارى كەلدى. سولاردىڭ ىشىندە قازاقستان پرەزيدەنتى نۇرسۇلتان نازاربايەۆتىڭ ەرەكشە سۋرەتىن ٴتۇسىرىپ، تانىمالدىلىققا يە بولعان ارمەنيا پرەزيدەنتىنىڭ جەكە فوتوگرافى داۆيد اكوپياندى bnews.kz ٴتىلشىسى سوزگە تارتتى.

- داۆيد، نازاربايەۆتىڭ فوتوسىن ٴدال وسىلاي ەتىپ قالاي تۇسىرە الدىڭىز؟

- ەڭ الدىمەن پرەزيدەنتىم سەرج ٴازاتوۆيچتى تۇسىرمەك بولدىم. مەملەكەت باسشىلارىنىڭ كەزدەسۋى تار فورماتتا ٴوتتى. ٴبىز ولاردى ۇلكەن زالدا كۇتىپ وتىردىق. كۇزەتشىلەر ارى-بەرى جۇرگەن كەزدە جارىقتى بايقادىم دا العا جاقىنداپ، پرەزيدەنتىمدى تۇسىرەمىن دەپ ويلادىم. ەڭ ٴبىرىنشى نۇرسۇلتان نازاربايەۆ كىرىپ كەلدى. سول كۇنى ادەتتەگىدەي كوپ فوتو ٴتۇسىردىم. جاقسى كادر شىعاتىنىنا كۇدىكتەنبەدىم دە.

- نەلىكتەن ٴدال وسى فوتو ۇلكەن تانىمالدىلىققا يە بولدى؟ بۇل كادردان قانداي دا ٴبىر ماعىنا تابۋعا بولا ما؟

- نەگىزىندە كوپ نارسە تابۋعا بولادى. ساياسي تۇسى دا بار: باسقا ەلدەردىڭ پرەزيدەنتتەرى فوتونىڭ ارتقى جاعىندا، ال ولاردىڭ اراسىندا نۇرسۇلتان نازاربايەۆ ەرەكشەلەنىپ تۇر. بۇل قازاقستان پرەزيدەنتىنىڭ پوستكەڭەستىك كەڭىستىكتەگى ٴرولى مەن ابىرويىن كورسەتەدى.

- ٴسىزدىڭ فوتولارىڭىز وسىلاي ٴجيى نازارعا ىلىگە مە؟

- ارمەنيادا دا كوپ كادر ٴتۇسىردىم. سەرج سارگسياننىڭ ريم پاپاسىمەن بىرگە فوتوسىن كوپ ادام كوردى. شىنىمدى ايتسام، بۇگىندە نازاربايەۆتىڭ فوتوسى ۇلكەن نازارعا ىلىككەن جالعىز فوتوم بولىپ وتىر. مەن تاڭقالدىم. تاڭەرتەڭ ويانعانىمدا تەلەفونىم قوڭىراۋلار مەن حابارلامالاردان اتىلايىن دەپ جاتتى. facebook-تا مىڭنان استام قازاق دوستاسۋعا ٴوتىنىم جىبەرىپتى. سول ساتتەن قازاقتارمەن دوستىعىم باستالدى. جەكە باسىما بۇل كۇتپەگەن جاعداي بولدى. كوپتەگەن پىكىر وقىدىم. قازاقتار راحمەتىن ايتتى. بارلىعى «ەلباسى» دەپ جازدى. ال مەن بۇل ٴسوزدىڭ ماعىناسىن بىلگەن دە جوقپىن، ٴبىراق ٴقازىر وسى فوتومەن بايلانىستى جاقىن سوزگە اينالدى.

- نازاربايەۆتىڭ فوتوسۋرەتىنىڭ الداعى تاعدىرى قانداي؟

- ينتەرنەتتە اشىق جاتىر. استانادان بيزنەسمەندەر حابارلاسىپ، جاڭا قوناق ٴۇيدىڭ ديزاينىنا قوسقىسى كەلەتىندەرىن ايتتى. پرەزيدەنت نومىرىنە بولماسا لوببيگە قويامىز دەدى. سودان كەيىن ولار جوق بولىپ كەتتى. نەگىزىندە ٴار اي سايىن وسى جونىندە ماعان حابارلاسادى.

- استانادا وتەتىن فوتوفەستيۆالگە قاتىساسىز با؟

- ٴيا، مەنى استانا كۇنىنە وراي وتەتىن شاراعا قاتىسۋعا شاقىردى. بىرنەشە ەلدەن كەلگەن 17 فوتوگراف استانا تۋرالى فوتولار تۇسىردىك. مەن ٴدىن تاقىرىبىن تاڭدادىم. قازاقستاندا ٴارتۇرلى ٴدىن وكىلدەرى بەيبىت، دوستىقتا ٴومىر سۇرەدى، سونى كورسەتكىم كەلدى.

- قازاقستاندىقتارمەن سويلەسكەندە قانداي اسەر قالدىردى؟

- جاعىمدى. فوتودان كەيىن قازاقتاردى ٴوزىم ٴۇشىن اشا باستادىم. ولار وتە ٴمىيىرىمدى ادامدار.

- استانادا ٴسىزدى بىلە مە؟

- مەشىت پەن مۋزەيدە ەكى ادام جانىما كەلدى.

- ٴاردايىم فوتوگراف بولۋدى قالادىڭىز با؟

- ٴيا، كوپ ساياحاتتاعىم كەلدى جانە بۇل ماقساتىم ورىندالدى. 24 جاسىمنان باستاپ جۇمىس ىستەيمىن. مۇنى جۇمىس دەپ ايتۋعا بولمايدى، ٴومىر ٴسۇرۋ سالتى سەكىلدى. سەبەبى مەن مۇنى ماحابباتپەن ىستەيمىن. بۇل ماڭىزدى. سونىمەن بىرگە وسى ارقىلى اقشا تابا دا ٴبىلۋىڭ كەرەك.

- پرەزيدەنتتەردى ٴارتۇرلى راكۋرستان ٴتۇسىرۋ نەنى كورسەتەدى؟

- ساياساتكەردىڭ وزىنە دە كوپ نارسە تاۋەلدى. مىسالى سەرج سارگسيان فوتوعا ٴتۇسۋدى قاتتى ۇناتپايدى. مەن اقش-تىڭ ەكس-پرەزيدەنتى باراك وبامانىڭ فوتوگرافى پيت سوۋزدى ۇنەمى ۇلگى رەتىندە ايتامىن. ول مەن ٴۇشىن ەڭ ۇزدىك، ٴبىراق وعان پرەزيدەنتى دە اسەر ەتەدى. وباما جيىن كەزىندە ستولعا اياعىن قويىپ، ٴوزىن ەركىن ۇستايدى، ونىمەن وڭاي جۇمىس ىستەي الاسىڭ. ال ول باسقا پرەزيدەنتپەن جۇمىس ىستەگەندە ٴدال سونداي قىزىق كادرلار تۇسىرە الماۋى مۇمكىن.

- نەلىكتەن تمد پرەزيدەنتتەرى اشىق ەمەس؟ مىسالى حورۆاتيا پرەزيدەنتى كوليندا گرابار-كيتاروۆيچ وتە اشىق جانە الەۋمەتتىك جەلىگە فوتوسۋرەتتەرىن ٴجيى جاريالاپ تۇرادى.

- پوستكەڭەستىك ەلدەردىڭ مەنتاليتەتى باسقاشا. ٴبىزدىڭ شەنەۋنىكتەر مۇندايدى قالامايدى. جاڭا بۋىن پايدا بولۋى كەرەك. الەۋمەتتىك جەلىنىڭ ماڭىزدى ەكەنىن تەز تۇسىنگەندەر دە بار. حورۆاتيا پرەزيدەنتىنىڭ سىرت كەلبەتىن باقىلاپ وتىرا بەرگىڭ كەلەدى. وزگە ەل، مەنتاليتەتى دە وزگە. ٴار نارسەنىڭ ٴوز ۋاقىتى بار.

- ٴسىزدىڭ جۇمىسىڭىزدا ەڭ ٴقاۋىپتى ٴساتتى ايتا الاسىز با؟

- باسىما بىردەن كەلە قويمايدى. ارمەنيا مەن تۇركيا اراسىنداعى قاتىناس تۋرالى بىلەتىن بولارسىز. 2007 جىل فوتواگەنتتىكتە جۇمىس ىستەدىم. سوندا ارمەنيا پرەزيدەنتى فۋتبول ماتچنا كەلدى. جۋرناليستەرمەن بىرگە اۆتوبۋسپەن ستاديونعا بارۋىمىز كەرەك ەدى، ال اۆتوبۋستا ارميان تۋى تۇر. تۇركيادا جانكۇيەرلەر اگرەسسياشىل. ستاديونعا كەلگەندە ولار ارميان تۋىن كوردى دە اۆتوبۋسقا تاس لاقتىرا باستادى. مازاسىنداندىق. ارنايى جاساق ٴبىزدى شىعارىپ الدى.

- وسى ٴساتتى فوتوعا تۇسىرە الدىڭىز با؟

- العاشىندا ٴيا، ٴبىراق ودان كەيىن تۇسىرمەدىم. سەبەبى ٴبىزدىڭ فوتوعا ٴتۇسىرىپ جاتقانىمىزدى كورگەن سوڭ ولار ودان سايىن اگرەسسياعا بەرىلدى.

- موبيلوگرافيا كاسىبي فوتوگرافيانى الماستىرا الا ما؟

- سولاي بولۋى مۇمكىن. فوتوگرافتار بۇعان قىزعانا قارايدى، ٴبىراق بۇل ٴومىر شىندىعى. ٴقازىر ٴبارى وزگەردى. تەحنيكا دامىپ جاتىر. بۇگىندە تەحنيكاڭ مەن وبەكتيۆىڭنىڭ قانداي ەكەنى ەمەس، جاريالايتىن فوتوڭ باعالانادى. ايفونمەن دە جاقسى فوتو شىعارۋعا بولادى.

- فوتوگرافتاردىڭ تابىسى تۇراقسىز با؟

- ٴارقالاي. ماۋسىمعا بايلانىستى، توي كوپ بولسا كوپ تاباسىڭ. تاپسىرىس مۇلدەم بولمايتىن ايلار دا بولادى. سول سبەەپتى تۇراقتى جۇمىس تابۋىڭ كەرەك.

- توي تۇسىرۋگە ٴسىزدى قازاقستانعا شاقىردى ما؟

- قازاقستاننان ۇسىنىستار كوپ ٴتۇستى، ٴبىراق ٴالى مۇنداي بولمادى. (كۇلدى) مۇنداي ٴساتتى نەگە پايدالانىپ كورمەسكە؟ مەنى جاقسى تۇسىنەتىن شىعارسىزدار. مۇمكىندىكتەردى جىبەرىپ الىپ وكىنبەس ٴۇشىن قابىلەتتەرىڭدى كوممەرسيالاي الۋىڭ كەرەك. نەگىزىندە تاپسىرىس بەرۋشىگە جاقسى باعانى ايتا ٴبىلۋ دە ماڭىزدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي