BAQ.kz - Қазақстан жаңалықтары USD 370.49 BAQ.kz - Қазақстан жаңалықтары EUR 421.06 BAQ.kz - Қазақстан жаңалықтары RUB 5.54
استانا:

قازاقستاندىقتار ەندى تەلەفونىن كىمنىڭ جاسىرىن تىڭداعانىن ٴبىلىپ وتىرادى

بۇگىن سەنات وتىرىسىندا قۇقىق قورعاۋ قىزمەتىنىڭ پروسەستىك نەگىزدەرىن جاڭعىرتۋ ماسەلەلەرى جونىندەگى زاڭ جوباسى ەكى وقىلىمدا قارالدى، دەپ حابارلايدى baq.kz اقپارات اگەنتتىگى sputnik قازاقستان-عا سىلتەمە جاساپ.

"قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىقتىق قورعاۋ قىزمەتىنىڭ پروسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن ٴماجىلىس ماقۇلداپ، سەناتقا جىبەرگەن بولاتىن.

"بۇل زاڭ جوباسى قۇقىق قورعاۋ ورگاندارىن كۇشەيتپەيدى، بىزگە ەشقانداي جاڭا وكىلەتتىك بەرمەيدى. زاڭ جوباسىنىڭ ماقساتى ٴبىزدىڭ موينىمىزعا جاڭا مىندەتتەردى جۇكتەۋ بولىپ وتىر"، — دەدى باس پروكۋرور جاقىپ اسانوۆ بۇگىن سەنات وتىرىسىندا.

زاڭ جوباسى 5 ماڭىزدى باعىتتى قامتيدى. ٴبىرىنشى باعىت – قىلمىستىق پروسەستە ادامنىڭ قۇقىن قورعاۋ دەڭگەيىن ارتتىرۋ. ەكىنشى باعىت – قىلمىستىق پروسەستە جارىسپالىقتى كۇشەيتۋ. تاعى ٴبىر ماڭىزدى مىندەت — سوتقا دەيىنگى سوت باقىلاۋىن كۇشەيتۋ. بۇدان بولەك، تەرگەۋ جۇرگىزۋ ٴتارتىبىن وڭتايلاندىرۋ جانە تەرگەۋ،پروكۋراتۋرا جانە سوت وكىلەتتىلىكتەرىنىڭ قايتالانۋىن بولدىرماۋ، ولاردىڭ ناقتى ٴبولۋ. بۇل شارالار قىلمىستىق پروسەستى جاڭعىرتۋعا، ونى جەتىلدىرۋگە باعىتتالىپ وتىر.

"تەرگەۋ ورگاندارى كوپ جاسىرىن تەرگەۋ امالدارىن جاساۋعا قۇقىلى. مىسالى، اڭديدى، ازاماتتاردىڭ اڭگىمەسىن جاسىرىن تەلەفون ارقىلى تىڭدايدى. وسىنداي ٴبىراز نارسەلەر بار. ٴبىراق كەيىن كۇدىك راستالمايدى. سوسىن تەرگەۋ ورگانى نە ىستەيدى؟ جىلى جاۋىپ قويا سالادى. ادام ونى تىڭداعانى جونىندە ەشتەڭە بىلمەيدى. وسى پراكتيكانى زاڭ ارقىلى بۇزىپ وتىرمىز. ەگەر كۇدىك راستالماسا، وندا مىندەتتى تۇردە تەرگەۋ ورگانى ادامعا "سىزگە قاتىستى وسىنداي جاسىرىن تەرگەۋ امالى جۇرگىزىلدى" دەگەن حاتتى جىبەرۋگە مىندەتتى"، — دەپ اتاپ ٴوتتى اسانوۆ.

زاڭ جوباسىنا سايكەس، ادامدى سانكسياسىز ۇستاۋ مەرزىمى 72 ساعاتتان 48 ساعاتقا قىسقارتىلادى. ال كامەلەتكە تولماعاندار ٴۇشىن 24 ساعات بولادى. ٴبىراق 72 ساعات مەرزىمى مىنانداي كۇردەلى ىستەر — اسا اۋىر قىلمىستار، تەرروريزم جانە ەكسترەميزم، جاپپاي تارتىپسىزدىك، قىلمىستىق توپتار جاساعان قىلمىس; زاڭسىز ەسىرتكى اينالىمى جانە كامەلەتكە تولماعاندارعا قارسى جىنىستىق قىلمىستار; ادام ولىمىنە اكەلگەن قاساقانا ىس-ارەكەتتەر بولعاندا قالادى.

سونداي-اق، بيزنەسكە قىسىمدى ازايتۋ ٴۇشىن ەكونوميكالىق قىلمىستار بويىنشا سوتقا دەيىنگى قاماۋعا الىنبايتىن بولادى. ونداي قىلمىستار ادامنىڭ ومىرىنە ٴقاۋىپتى ەمەس. ارينە، رەيدەرلىك، جالعان اقشا جاساۋ، كونتراباندا، قارجى پيراميدالارى جانە ۇيىمداسقان قىلمىستار، قىلمىستىق توپتار وعان كىرمەيدى.

ەنگىزىلىپ جاتقان تاعى ٴبىر جاڭالىققا توقتالساق، "بۇيرىق ٴوندىرىسى" دەگەن جاڭا ينستيتۋت ەنگىزىلمەك. ياعني، تەرىس قىلىق جانە ونشا اۋىر ەمەس قىلمىستاردى قاراۋ مەرزىمى قىسقارادى. ادام كىناسىن مويىنداپ تۇرسا، دالەلدەر جەتكىلىكتى بولسا، ايىپپۇلعا كەلىسسە، سونداي-اق ەشكىم داۋ كوتەرمەسە، ونداي جاعدايدا "بۇيرىق ٴوندىرىسى" قولدانىلادى. دەمەك، ۇزاق تەرگەۋ مەن سوت پروسەسىن جۇرگىزۋدىڭ قاجەت جوق.

بۇعان قوسا، ادۆوكاتتاردىڭ مۇمكىندىكتەرى كەڭەيتىلىپ وتىر. قورعاۋشى تەرگەۋشىنىڭ پوزيسياسىمەن، پروكۋروردىڭ شەشىمىمەن كەلىسپەسە، سوت ارقىلى تەرگەۋشىنى ٴوز تالابىن ورىنداۋعا ماجبۇرلەي الادى.

سەنات دەپۋتاتتارى بۇگىن زاڭدى ەكى وقىلىمدا قاراپ، قابىلدادى. ەندى ول پرەزيدەنتتىڭ قول قويۋىنا جىبەرىلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي