BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

قازاقستاندا كيىك ساناعى باستالدى

فوتو: fhc.kz

اقتوبە وبلىسىندا كيىك ساناعى باستالدى. الدىمەن ٴۇستىرت دالاسىنداعى جانۋارلار باستى نازارعا الىنادى، دەپ حابارلايدى baq.kz اقپارات اگەنتتىگى 24.kz سايتىنا سىلتەمە جاساپ.

وتكەن جىلى اقبوكەندەر سانى ەلىمىزدە شامامەن 152 مىڭ بولسا، ونىڭ تەك ٴۇش مىڭعا جۋىعى وسى ٴۇستىرتتى مەكەندەيدى ەكەن. جالپى ماماندار سوڭعى جىلدارى كيىك سانىنىڭ ارتىپ كەلە جاتقاندىعىن ايتادى.

يەن دالادا قوزعالعان قارانى لەزدە بايقايتىن قورىقشىلار ساناق جۇرگىزگەندە كەرەك-اق. ٴۇستىرتتى دە بەس ساۋساعىنداي بىلەدى، سوندىقتان ەسەپتەۋ ٴادىسىن ساناۋلى مينۋتتاردا يگەرىپ، كوپ اينالماي ۇشاق ماڭعىستاۋ وبلىسىنا قاراي بەت الدى. ٴۇستىرتتى مەكەندەيتىن كيىك بەتپاق دالاسى مەن ورال پوپۋلياسياسىنان الدەقايدا از. 2015 جىلى جاپپاي قىرىلعاننان كەيىن بۇل جەردە شامامەن ٴۇش مىڭ باس اقبوكەن قالعان. جانۋارلاردىڭ بەيقام جايىلىپ، ەركىن تولدەۋىنە دە كەدەرگى كوپ.

«ٴۇستىرتتى مەكەندەيتىن كيىك ٴۇشىن قيىندىق بار. قارۋ كەزەگەن براكونەرلەر ٴوز الدىنا، جايىلىم جەرلەرى دە ازايعان. وسىدان بىرنەشە جىل بۇرىن سالىنعان تەمىرجول جانۋارلاردىڭ وڭتۇستىككە ايماققا وتۋىنە كەدەرگى. سوندىقتان كيىكتەر قىستا سولتۇستىكتەگى جايىلىمدا قالۋعا ٴماجبۇر. ساناق كەزىندە قوس اياقتى كولىكتى ەرتتەپ مىنگەن كۇدىكتىلەر دە كەزىكتى. ماماندار قىلمىسكەرلەر دەپ پايىمدادى، سوندىقتان ٴبىر توپ ينسپەكتور جەدەل ٴىز كەسۋگە كەتتى»، - دەيدى «التىن دالا» تابيعاتتى قورعاۋ باستاماسىنىڭ حالىقارالىق ۇيلەستىرۋشىسى شتەففان سۋپەر.

«وحوتزووپروم» رمقك وبلىستىق فيليالىنىڭ ديرەكتورى ٴسابيت دۇيسەكەنوۆ بۇل اقپاردىڭ انىق-قانىعىن انىقتاۋعا ارنايى توپ كەتكەنىن ايتتى.

«ولار اڭ اتۋعا شىققان براكونەرلەر بولۋى دا مۇمكىن. ٴۇي جانۋارلارىن ىزدەگەن جەرگىلىكتى تۇرعىندار دا بولۋى عاجاپ ەمەس. ماڭعىستاۋ مەن اقتوبە وبلىسىندا جايىلاتىن جانۋارلاردى قورعاۋعا 20 قورىقشى جۇمىلدىرىلعان. وتكەن جىلى ۇستىرتتە كيىكتى اتىپ، ٴمۇيىزىن كەسىپ الىپ جۇرگەن 4 توپتى قولعا تۇسىرگەن. قورىقشىلار سانى از بولعانىمەن، يەن دالانى مىلتىق اسىنعان قىلمىسكەرلەردەن قورعاۋ ٴۇشىن كۇنى-تۇنى دامىل تاپپايدى»، - دەيدى ول.

قازاقستان بيوالۋانتۇرلىلىكتى ساقتاۋ قاۋىمداستىعىنىڭ اعا قورىقشىسى الەكساندر پۋتيلين كوككە كوتەرىلىپ، كيىكتەردىڭ قىر-جوتالارعا جاقىن جۇرگەندىگىن انىقتاعاندارىن ايتتى.

«ەندى شامامەن 50 ساعات ۇشۋ جوسپارىمىزدا بار. سوسىن باتىس قازاقستان وبلىسىنداعى كيىكتەردى تۇگەندەيمىز. ۇستىرتتەگى ساناق ون تاۋلىكتە ٴتامامدالۋى ٴتيىس. الدا قۇرالايدىڭ جەلى باستالىپ، كيىكتەر تولدەيدى. باستىسى – كۇزەتتى كۇشەيتۋ. سوندا عانا ساناۋلى جىل ىشىندە اقبوكەندەر سانى بىرنەشە ەسە ارتۋى مۇمكىن»، - دەيدى ول.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي