BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

قازاقستان شەكاراسىنان ٴبىر جىلدا 48 ملن-نان استام ادام وتكەن

استانا، baq.kz. قازاقستان رەسپۋبليكاسى ۇقك شەكارا قىزمەتى اسكەري كەڭەسىنىڭ كەڭەيتىلگەن وتىرىسى ٴوتتى. كۇن تارتىبىنە سايكەس، شەكارا قىزمەتىنىڭ باسشىلىق قۇرامى 2018 جىلدىڭ جاۋىنگەرلىك-قىزمەتتىك ٴىس-قيمىل قورىتىندىلارىن، «قازاقستان رەسپۋبليكاسىنىڭ قارۋلى كۇشتەرىندە، وزگە دە اسكەرلەرى مەن اسكەري قۇرىلىمدارىندا قۇقىق بۇزۋشىلىقتىڭ الدىن الۋ بويىنشا 2016-2018 جىلدارعا ارنالعان باعدارلامانىڭ» ناتيجەلەرىن قاراستىردى.

قازاقستان رەسپۋبليكاسى ۇقك شەكارا قىزمەتىنىڭ ديرەكتورى قر قاۋىپسىزدىك كەڭەسىندە ايتىلعان ەل پرەزيدەنتىنىڭ تاپسىرماسىن ورىنداۋ جولىندا شەكارا قىزمەتىن دامىتۋ مەن مەملەكەتتىك شەكارا قۇرىلىسىن جەتىلدىرۋدىڭ 2018-2020 جىلدارعا ارنالعان كەشەندى جوسپارىنىڭ جاسالعاندىعىن، سونداي-اق جوسپاردا كوزدەلگەن شارالاردىڭ جۇزەگە اسىرىلا باستاعاندىعىن، اعىمداعى جىلى شەكارا قىزمەتىنىڭ ٴىس-قيمىلى تۇراقتى جانە بولجامدى وپەراتيۆتىك احۋالدا وربىگەندىگىن، شەكارالىق قاۋىپسىزدىككە قاتەر توندىرەتىن ماسەلەرگە قارسى باعىتتالعاندىعىن اتاپ ٴوتتى. ال ونداي قاتەرلەر – زاڭسىز كوشى-قون، ەل اۋماعىنا ەسىرتكى زاتتارىن ەنگىزۋگە توسقاۋىل قويۋ، شەكارالىق كەڭىستىكتەگى لاڭكەستىك جانە ٴدىني ەكسترەميزمي كورىنىستەرى.

شەكارا قىزمەتى بۇرىندارى قول جەتكىزىلگەن كەلىسىمدەرگە سايكەس 8 رەت ٴار ٴتۇرلى حالىقارالىق، رەسپۋبليكالىق، مەكەمەلىك وپەراسيالارعا جانە وپەراتيۆتىك-الدىن الۋ شارالارىنا، سونداي-اق، اكەري بولىمدەر 3 حالىقارالىق، 10 مەكەمەارالىق، 31 مەكەمەلىك جاتتىعۋلارعا قاتىستى.

اتقارىلعان ىستەر از ەمەس. 2018 جىلى مەملەكەتتىك شەكارانىڭ وتكىزۋ پۋنكتتەرىنەن 48 ملن-نان استام ادام، 6 ملن-نان استام كولىك تۇرلەرى وتكىزىلىپ، وزگە بىرەۋدىڭ قۇجاتىمەن وتپەكشى بولعان 44 دەرەك انىقتالدى. 18 ادام وتە شەبەرلىكپەن قولدان جاسالعان قۇجاتتاردى پايدالانىپ شەكارادان وتپەك بولعانى ٴۇشىن ۇستالىپ، جازاعا تارتىلدى.

كولىك قۇرالدارىن قاشىقتىقتان تەكسەرۋ قۇرالدارى مەن ارنايى ۇيرەتىلگەن يتتەردى پايدالانا وتىرىپ 1 059 كونتراباندانىڭ جولى كەسىلدى. مەكەمەنىڭ وكىلەتتى تۇلعالارى 23 041 ادامدى اكىمشىلىك جازاعا تارتتى.

تەڭىز بولىمدەرى 150 شەكارا بۇزۋشىنى، 97 كىشى كولەمدەگى جۇردەك كەمەلەردى ۇستاپ، 581 890 م. اۋ، 382 200 م. ىلمەكتى اۋ، 100 دەن استام براكونەرلىك اۋلاۋ قۇرالدارىن تاركىلەدى. 1 356 بەكىرە تۇقىمداس، 455 قىمبات باعالى بالىق شەكارا اسىرىلۋدان ساقتالىپ قالدى. ەل قازىناسىنا 4 487 738 تەڭگە ايىپپۇل قۇيىلدى. سالىنعان ايىپپۇلدىڭ جالپى سوماسى - 114 867 694 تەڭگە.

ينجەنەرلىك بولىمشەلەر 1 330 كم-دەن استام ٴتۇرلى ينجەنەرلىك قۇرىلىستار مەن كەدەرگى، توسقاۋىلدار سالىپ، 512 كم ٴارتۇرلى تيپتەگى توسقاۋىل قورشاۋلارىن تۇرعىزدى. جۇزدەگەن باقىلاۋ مۇنارالارىن، راديولوكاسيالىق ستانسيالارعا ارنالعان باعانالار ورناتىپ، تەكسەرۋ پوستتارىن، تىرەك پۋنكتتەرىن، تىكۇشاقتارعا ارنالعان الاڭدار، سۋ جۇرگىزۋ جانە وزگە دە قۇرىلعىلاردى ورناتتى. جەكە قورعانىس قۇرالدارىمەن تەحنيكا، شاتىرلار مەن ساۋىتتى كەۋدەشەلەر، كەۆلار دۋلىعالار قولدانىسقا ەنگىزىلدى.

جالپى العاندا، 2018 جىلى شەكارا قىزمەتىنىڭ جاۋىنگەرلىك جانە وپەراتيۆتىك-قىزمەتتىك دايىندىعىن، جاۋىنگەرلىك الەۋەتىن ارتتىرۋ مىندەتتەرى ٴتيىمدى شەشىمىن تاپتى. اۋعانستان يسلام رەسپۋبليكاسىنداعى ديپلوماتيالىق وكىلدىك پەن ونداعى قىزمەتكەرلەردى كۇزەتۋ شارالارى دا ابىرويمەن اتقارىلدى.

قىزمەتتىك-جاۋىنگەرلىك ٴىس-قيمىلدى قورىتىندىلاي وتىرىپ شەكارا قىزمەتىنىڭ باسشىلىعى مەملەكەتتىك شەكارا قۇرىلىسى مەن ونىڭ كۇزەتىن ودان ٴارى جەتىلدىرۋگە باعىتتالعان ٴبىرقاتار ناقتى تاپسىرمالار بەردى.

- 2018 جىلدىڭ قورىتىندىلارى مەكەمەنىڭ قىزمەتتىك جانە جاۋىنگەرلىك ٴىس-قيمىلدارىنىڭ جاعىمدى ديناميكاسىن كورسەتەدى – دەپ اتاپ كورسەتتى قر ۇقك ٴتوراعاسىنىڭ ورىنباسارى – شەكارا قىزمەتىنىڭ ديرەكتورى دارحان ايتقالي ۇلى ٴدىلمانوۆ. – 2019 جىلى بىزگە قانداي جاعدايدا بولماسىن وزىمىزگە جۇكتەلگەن مىندەتتەردى اتقارۋدى جالعاستىرامىز. مەن ٴاربىر شەكاراشىنىڭ مەملەكەتتىك شەكارا كۇزەتىن لايىقتى قامتاماسىز ەتەتىندىگىنە سەنەمىن - دەدى مەكەمە باسشىسى.

اسكەري كەڭەستە ۇزدىك شەكاراشى ماماندار مەن اسكەري ۇجىمدار ماراپاتتالدى. جىل شەكاراشىسى دەپ 2018 جىلعى 10 قاراشادا اتىراۋ شەكارا وتريادىنىڭ «سازدى» شەكارا زاستاۆاسىنىڭ اۋماعىندا ٴوزىنىڭ اۋىر جارالانعانىنا قاراماي قارۋلى شەكارا بۇزۋشىنى قولعا تۇسىرگەن لەيتەنانت ٴمۇسىلىم عيبرات بەرىك ۇلى تانىلدى.

كەلەسى جالدىڭ جاۋىنگەرلىك سايىس مىندەتتەمەسى - « ۇلى دالا شەكاراشىلارى – باتىرلار مۇراگەرلەرى» ۇرانىمەن بەرىلدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي