BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

گۇلشارا ٴابدىقالىقوۆا: مەملەكەتتىك قىزمەتكەرلەردىڭ 55 پايىزى – ايەلدەر

فوتو: Бауыржан Жуасбаев

استانا، baq.kz ٴتىلشىسى. ەلوردادا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ 20 جىلدىعىنا ارنالعان «قازاقستاننىڭ وتباسىلىق جانە گەندەرلىك ساياساتى: جەتىستىكتەر مەن پەرسپەكتيۆالار» اتتى حالىقارالىق كونفەرەنسيا ٴوتىپ جاتىر.

جيىندى قر مەملەكەتتىك حاتشىسى گۇلشارا ٴابدىقالىقوۆا اشتى.

«مەملەكەتتىك ساياساتتىڭ ماڭىزدى باسىمدىعىنىڭ ٴبىرى – انا مەن بالانى قورعاۋ، ايەلدەردىڭ قۇقىعى مەن مۇمكىندىكتەرىن كەڭەيتۋ. قازاقستاننىڭ وتباسىلىق-گەندەرلىك ساياسات سالاسىنداعى جەتىستىكتەرى مەملەكەتتىك ورگاندار، ازاماتتىق قوعام جانە بيزنەس قاۋىمداستىقتارىنىڭ ٴوزارا ٴتيىمدى ىس-ارەكەتى ناتيجەسىندە مۇمكىن بولدى»، - دەدى ٴابدىقالىقوۆا.

مەملەكەتتىك حاتشىنىڭ ايتۋىنشا، ۇلتتىق كوميسسيانىڭ 20-جىلدىعى قىزمەتى بارىسىندا گەندەرلىك تەڭدىك ستراتەگياسى ىسكە اسىرىلدى.

گەندەرلىك باعىتتاعى «ەرلەر مەن ايەلدەردىڭ تەڭ قۇقىقتارىنىڭ جانە تەڭ مۇمكىندىكتەرىنىڭ مەملەكەتتىك كەپىلدىكتەرى تۋرالى»، «تۇرمىستىق زورلىق-زومبىلىق پروفيلاكتيكاسى تۋرالى» زاڭدار قابىلداندى.

قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى جۇزەگە اسىپ جاتىر.

بارلىق مەملەكەتتىك ورگاندا گەندەرلىك ساياساتتى ىسكە اسىرۋعا جاۋاپتىلار بار.

«بۇگىنگى دەپۋتاتتاردىڭ جالپى سانىنىڭ 22 پايىزى نەمەسە 34 ايەل – پارلامەنت مۇشەسى. مەملەكەتتىك قىزمەتتە 55 پايىزعا جۋىق، ساياسي مەملەكەتتىك قىزمەتشىلەر اراسىندا 10 پايىزدان استام ايەل قىزمەت ەتەدى. شاعىن جانە ورتا بيزنەستە 500 مىڭنان اسا كومپانيانى ايەلدەر باسقارادى. ولار بارلىق جۇمىس ورىندارىنىڭ ۇشتەن ٴبىرىن اشىپ وتىر»، - دەدى مەملەكەتتىك حاتشى.

ٴسوز سوڭىندا گۇلشارا ٴابدىقالىقوۆا بۇگىنگى مەرەيتويلىق جيىندا ايتىلاتىن جاڭا يدەيالار، ويلار مەن ۇسىنىستار ۇلتتىق كوميسسيانىڭ ودان ارعى جۇمىسىندا قولدانىلادى دەدى.

كونفەرەنسياعا ۇلتتىق كوميسسيا مۇشەلەرى، پارلامەنت دەپۋتاتتارى، مەملەكەتتىك ورگان باسشىلارى، ديپلوماتيالىق كورپۋس، حالىقارالىق ۇيىمدار، بيزنەس قۇرىلىمدار، ازاماتتىق قوعام وكىلدەرى قاتىسىپ وتىر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي