BAQ.kz - Қазақстан жаңалықтары USD 366.43 BAQ.kz - Қазақстан жаңалықтары EUR 420.11 BAQ.kz - Қазақстан жаңалықтары RUB 5.58
استانا:

ەلباسى شەرحان مۇرتازانىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى

نۇرسۇلتان نازاربايەۆ شەرحان مۇرتازانىڭ قايتىس بولۋىنا بايلانىستى تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى، دەپ حابارلايدى baq.kz اقپارات اگەنتتىگى اقوردانىڭ ٴباسپاسوز قىزمەتىنە سىلتەمە جاساپ.

مەملەكەت باسشىسى قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى شەرحان مۇرتازانىڭ قايتىس بولعانى تۋرالى حاباردى زور كۇيزەلىسپەن قابىلدادى.

شەرحان مۇرتازا بۇكىل عۇمىرىن ٴتول ادەبيەتىمىز بەن مادەنيەتىمىزدىڭ دامۋىنا ارناعان ٴبىرتۋار ازامات، قازاقتىڭ مۇڭىن مۇڭداپ، جوعىن جوقتاعان نار تۇلعالى قالامگەر، قارىمدى قوعام قايراتكەرى بولدى. ۇلت رۋحانياتىندا وزىندىك قولتاڭباسى بار زاڭعار جازۋشى سوڭىنا مول مۇرا، ٴورىستى ونەگە قالدىردى.

«شەرحان مۇرتازا قازاق جۋرناليستەرىنىڭ بىرنەشە بۋىنىن تاربيەلەگەن ۇلتتىق ٴباسپاسوزدىڭ بيىك بايتەرەگى ەدى. قاشاندا ادىلدىك پەن اقيقاتتىڭ الداسپانى بولعانى ٴۇشىن قارا ٴسوزدىڭ زەرگەرى، شىندىقتىڭ شىراقشىسى اتانعان شەرحان مۇرتازانى حالقى «شەراعاڭ» دەپ ٴقادىر تۇتتى. سوناۋ تەمىرتاۋداعى ەڭبەك جولىمنىڭ تىكەلەي كۋاسى بولعان ول تاۋەلسىز مەملەكەتتىڭ ىرگەسىن قالاعان جىلداردا دا جانىمدا ٴجۇرىپ، ەلدى ىلگەرىلەتۋ ىسىنە زور ۇلەس قوستى. شەرحان مۇرتازانىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى دەپ سەنەمىن»، – دەلىنگەن جەدەلحاتتا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي