BAQ.kz - Қазақстан жаңалықтары USD 366.43 BAQ.kz - Қазақстан жаңалықтары EUR 420.11 BAQ.kz - Қазақстан жаңалықтары RUB 5.58
استانا:

بجزق پروبلەمالىق ەميتەنتتەرمەن جۇمىسىن جالعاستىرۋدا

فوتو: Qamshy.kz

2018 جىلدىڭ 1 شىلدەسىندەگى جاعداي بويىنشا قور 20 پروبلەمالىق ەميتەنتتەرمەن جۇمىس ىستەۋدە جانە ولاردىڭ اتاۋلى قۇنى بويىنشا بەرەشەگىنىڭ جالپى سوماسى 41،15 ملرد تەڭگەنى قۇرادى. ەستەرىڭىزگە سالا كەتەيىك، 2014 جىلى زەينەتاقى اكتيۆتەرىن شوعىرلاندىرۋ ناتيجەسىندە بجزق پورتفەلىنە وتكەن 32 ەميتەنتتىڭ اتاۋلى قۇنى بويىنشا بەرەشەگىنىڭ جالپى سوماسى 161،45 ملرد تەڭگە بولعان ەدى، دەپ حابارلايدى baq.kz ٴتىلشىسى «بجزق» اق ٴباسپاسوز ورتالىعىنا سىلتەمە جاساپ.

«قازاقستان قاعازى» اق ەميتەنتى بويىنشا – 2017 جىلدىڭ جەلتوقسانىندا وڭالتۋ شارالارى توقتاتىلدى جانە بانكروتتىق ٴراسىمى قولدانىلدى. الايدا قور وڭالتۋ شارالارىنىڭ توقتاتىلۋىمەن كەلىسپەۋىنە بايلانىستى 2018 جىلى جوعارعى سوتقا ٴوتىنىش جولدادى. وسى جىلدىڭ شىلدە ايىندا جوعارعى سوت وڭالتۋ شارالارىن توقتاتۋ تۋرالى بۇرىنعى سوت اكتىلەرىنىڭ كۇشىن جويۋ، ٴىستى جوعارعى سوتتىڭ ازاماتتىق ىستەر بويىنشا القاسىنىڭ سوت وتىرىسىندا قاراۋ تۋرالى شەشىم شىعاردى. ٴىستى قايتا قاراۋ بيىلعى جىلدىڭ 22 تامىزىنا بەلگىلەنگەن»، - دەلىنگەن حابارلامادا.

قور بورىشتاردى ازاماتتىق تارتىپتە قايتارۋدىڭ بۇكىل مۇمكىندىكتەرى ناتيجە بەرمەگەن ەميتەنتتەرگە قاتىستى شارالاردى قىلمىستىق-قۇقىقتىق نەگىزدە شەشۋ تۋرالى شەشىم قابىلداعان. بۇل شەشىم وسى باعىتتاعى جۇمىستاردىڭ ىلگەرىلەۋىنە ايتارلىقتاي ىقپال ەتىپتى.

«زەينەتاقى اكتيۆتەرىنە زيان كەلتىرگەن تۇلعالاردى جاۋاپقا تارتۋ تۋرالى قور جۇمىسىنىڭ ناتيجەسىندە «رەميكس-ر» اق لاۋازىمدى قىزمەتكەرلەرىنە قاتىستى قىلمىستىق كودەكستىڭ «اسا ٴىرى كولەمدەگى الاياقتىق» بابى بويىنشا جانە «ورنەك xxi» اق باسشىلارىنا قاتىستى «اسا ٴىرى كولەمدە قارجى جىمقىرعان» (ەسكى رەداكسيا) بابى بويىنشا قىلمىستىق ٴىس قوزعالدى. «رەميكس-ر» كومپانياسىنا قاتىستى قىلمىستىق ٴىس اياسىندا قورعا كەلتىرىلگەن شىعىن كولەمىن انىقتاۋ ماقساتىندا اۋديتورلىق تەكسەرۋ، سونىمەن قاتار قر ۇلتتىق بانكىنىڭ قاتىسۋىمەن تەكسەرۋ جۇرگىزىلۋدە. تەكسەرۋ قورىتىندىسى بويىنشا ەميتەنتتىڭ لاۋازىمدى تۇلعالارىنىڭ ارەكەتىنە باعا بەرىلەتىن بولادى»، - دەلىنگەن حابارلامادا.

ۇلتتىق بانكتىڭ «ورنەك ٴححى» كومپانياسىنا قاتىستى وبليگاسيالىق قارىزدى ماقساتتى پايدالانىلۋىن تەكسەرۋ بارىسىندا ەميتەنت باسشىلىعىنىڭ وبليگاسيالاردى ورنالاستىرۋ بارىسىندا 2 ملرد تەڭگەدەن استام قارجىنى پروسپەكتىدە بەلگىلەنبەگەن ماقساتتارعا جۇمساعانى انىقتالعان.

سونىمەن بىرگە، كەيبىر ەميتەنتتەر قور الدىنداعى مىندەتتەمەلەرىن ورىنداۋدان جالتارىپ باعۋدا. سونىڭ ىشىندە 2010 جىلى «اتامەكەن» جانە «ۇلار ٴۇمىت» زەينەتاقى جيناقتاۋشى قورلارىنىڭ وبليگاسيالارىن ساتىپ العان «homebroker» اق بار. 2014 جىلى كومپانيا دەفولتقا جول بەرگەن.

«ەميتەنتتىڭ مۇلىگى مەن اكتيۆتەرىنىڭ بولماۋىنا بايلانىستى قور الدىنداعى بەرەشەكتى وتەۋدىڭ جالعىز جولى – سول ەميتەنتتىڭ دەبيتورلىق قارىزى ارقىلى وتەپ الۋ. بۇل رەتتە ەميتەنتتىڭ بورىشكەرلەرى اساۋبايەۆ باۋىرجان قانات ۇلىنىڭ مۇراگەرلەرى بولىپ تابىلادى. ول كەزىندە ەميتەنت الدىندا ٴۇشىنشى تۇلعالاردىڭ قارىزى ٴۇشىن جەكە ٴوزى كەپىلدىك بەرگەن.

الايدا 2017 جىلى ماۋسىمدا الماتى قالاسىنىڭ ارناۋلى مامانداندىرىلعان ەكونوميكالىق سوتىنى شەشىمىمەن اساۋبايەۆ مىرزانىڭ مۇراگەرلەرى ەميتەنتتىڭ بورىشكەرلەرى تىزىمىنەن الىنىپ تاستالدى. قور بۇل شەشىمگە قاتىستى قر جوعارعى سوتىنا شاعىم ٴتۇسىردى. قر جوعارعى سوتى بجزق-نىڭ شاعىمىن قاناعاتتاندىرعانىنا قاراماستان، 2018 جىلدىڭ 31 شىلدەسىندە الماتى قالالىق سوتىنىڭ شەشىمىمەن ب. ك. اساۋبايەۆتىڭ مۇراگەرلەرى ەميتەنت بورىشكەرلەرى تىزىمىنەن تاعى دا شىعارىلىپ تاستالدى. ەندى سوت اكتىسى الىنىپ، قارالعان سوڭ، قور بۇل شەشىمگە قاتىستى شاعىم ٴتۇسىرۋ بويىنشا شارا قابىلدايتىن بولادى»، - دەلىنگەن «بجزق» اق تاراتقان حابارلامادا.

تاعى ٴبىر ەميتەنت – «تەما.كو» اق جەتەكشىسى گ. ا. احمەتوۆ جانە ەميتەنتتىڭ بەنەفيسيارلىق مەنشىك يەلەرىنىڭ ٴبىرى ب. ا. احمەتوۆ وبليگاسيالىق قارىزدى وزگە ماقساتقا پايدالانعانى ٴۇشىن جاۋاپكەرشىلىكتەن جالتارىپ، سوت شەشىمىن ورىنداماۋ ٴۇشىن باسشىلار مەن قۇرىلتايشىلاردى جالعان جەكە تۇلعانىڭ اتىنا اۋدارىپ، كومپانيانى جوق مەكەنجايعا قايتا تىركەگەن. الايدا قور جۇمىستارىنىڭ ارقاسىندا ەميتەنتتىڭ زاڭسىز قايتا تىركەلۋىنە توسقاۋىل قويىلعان. ادىلەت ورگاندارى زاڭدى تۇلعالار بازاسىنا تۇزەتۋ ەنگىزىپ، «تەما.كو» كومپانياسىنىڭ بۇرىنعى مەكەنجايىن قالپىنا كەلتىرگەن. قازىرگى كەزدە ۇلتتىق بانك اتالمىش ەميتەنتتىڭ وبليگاسيالارىن «وتان» زەينەتاقى جيناقتاۋشى قورىنىڭ ساتىپ الۋى قانشالىقتى زاڭدى ەكەنىن تەكسەرۋدى اياقتاۋعا جاقىن.

«كازنەفتەحيم» اق-تىڭ 2005 جىلى زەينەتاقى اكتيۆتەرى ەسەبىنەن قۇرال-جابدىق ساتىپ الۋعا تارتقان 1،03 ملرد تەڭگە كولەمىندەگى وبليگاسيالىق قارىزى وزگە ماقساتقا جۇمسالعان. وسىعان وراي، قور ەميتەنتتىڭ باسشىسى ە. ل. كيريشەۆتى قىلمىستىق كودەكستىڭ «قارجى جىمقىرۋ، تالان-تاراجعا سالۋ» جانە «وبليگاسيالىق قارىزدى وزگە ماقساتقا جۇمساۋ» باپتارى بويىنشا قىلمىستىق جاۋاپكەرشىلىككە تارتۋ تۋرالى قۇقىق قورعاۋ ورگاندارىنا شاعىم ٴتۇسىردى. قۇقىق قورعاۋ ورگاندارىنىڭ اقپاراتىنا ساي، سوتقا دەيىنگى تەرگەۋ جۇمىستارى تەك كيريشەۆتىڭ قايدا ەكەنى انىقتالعاننان كەيىن باستالادى. ٴقازىر وعان جازاسىن وتەۋدەن بوي تاسالاپ جۇرگەنى ٴۇشىن ىزدەۋ جاريالانعان»، - دەلىنگەن حابارلامادا.

قور زەينەتاقى اكتيۆتەرىن تالان-تاراجعا سالعان تۇلعالاردى جانە سوت شەشىمدەرىن ورىنداۋعا كەدەرگى كەلتىرىپ جۇرگەن ازاماتتاردى جاۋاپقا تارتۋ ٴۇشىن بارلىق ارەكەتتەردى جۇزەگە اسىرىپ جاتقاندىعىن مالىمدەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي