USD 334.89 EUR 361.61 RUB 5.28
استانا:

باس ٴمۇفتي ٴابساتتار سمانوۆتىڭ قايتىس بولۋىنا بايلانىستى كوڭىل ايتتى

قازاقستان مۇسىلماندارى ٴدىني باسقارماسىنىڭ ٴتوراعاسى ەرجان قاجى مالعاجى ۇلى قمدب عۇلامالار كەڭەسىنىڭ مۇشەسى، «سارىاعاش» مەدرەسەسىنىڭ ديرەكتورى، بەلگىلى ٴدىنتانۋشى عالىم ٴابساتتار شاكىر ۇلى سمانوۆتىڭ قايتىس بولۋىنا بايلانىستى مارقۇمنىڭ وتباسىنا، تۋعان-تۋىستارىنا كوڭىل ايتتى، دەپ حابارلايدى baq.kz.

«ەلىمىزدىڭ ٴدىني سالاسىندا ۇلكەن قايعىلى وقيعا ورىن الدى. اسىل ٴدىنىمىزدىڭ وركەندەۋ جولىندا تالاي جىل تاباندى ەڭبەك ەتىپ، شاكىرت تاربيەلەگەن باۋىرىمىز، تانىمال تەولوگ ٴابساتتار شاكىر ۇلى دۇنيە سالدى. مارقۇمنىڭ وتباسىنا، اعايىن-جۇرتىنا قازاقستان مۇسىلماندارى ٴدىني باسقارماسىنىڭ ۇجىمى، عۇلامالار كەڭەسى اتىنان كوڭىل ايتامىن. ٴا.سمانوۆتىڭ جازعان ەڭبەكتەرى مەن ٴدىني-اعارتۋ سالاسىنا قوسقان ۇلكەن ۇلەسى ەلىمىزدىڭ ٴدىن قىزمەتكەرلەرى ٴۇشىن ٴارقاشان ۇلگى بولماق. مارقۇمنىڭ جانى ٴجانناتتا بولعاي! اللا الدىنان جارىلقاپ، مەيىرىمى مەن راحىمىنا بولەگەي! ٴامين!» – دەلىنگەن باس ٴمۇفتيدىڭ كوڭىل ايتۋ جەدەلحاتىندا.

سمانوۆ ٴابساتتار شاكىر ۇلى 1989-1993 جىلدار ارالىعىندا وزبەكستانداعى يمام ٴال-بۇحاري اتىنداعى جوعارى يسلام ينستيتۋتىن ۇزدىك ديپلوممەن ٴبىتىردى. 1995-2002 جىلدار ارالىعىندا «تاياقتى ەشان» مەشىتى جانىنداعى ساۋات اشۋ كۋرسىن باسقاردى. 2009 جىلدان بەرى قمدب جانىنداعى عۇلامالار كەڭەسىنىڭ مۇشەسى. وسىعان دەيىن «سارىاعاش» مەدرەسەسىن باسقاردى. 2008-2010 جىلدارى قۇران كارىمدى قازاق تىلىنە اۋداردى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي