BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

الەمدىك جانە ٴداستۇرلى دىندەر كوشباسشىلارىنىڭ vi سەزىنىڭ دەكلاراسياسى

فوتو: Нұржас Жақсыбай

بۇگىن استانادا الەمدىك جانە ٴداستۇرلى دىندەر كوشباسشىلارىنىڭ vi سەزى اياقتالىپ، قورىتىندى قۇجات – دەكلاراسيا قابىلداندى، دەپ حابارلايدى baq.kz ٴتىلشىسى.

قابىلدانعان دەكلاراسيانىڭ تولىق نۇسقاسى تومەندەگىدەي.

ٴبىز، vi سەزدىڭ قاتىسۋشىلارى – بارشا ادامزاتتىڭ گۇلدەنۋى جولىندا بەيبىتشىلىككە، كەلىسىمگە جانە جاسامپاز ىنتىماقتاستىققا ٴبىرىڭعاي ۇمتىلىسپەن بىرىككەن الەمدىك جانە ٴداستۇرلى دىندەردىڭ وكىلدەرى، مەملەكەت باسشىلارى، حالىقارالىق ۇيىمداردىڭ باسشىلارى،

قازاقستان رەسپۋبليكاسىنىڭ پرەزيدەنتى، جوعارى مارتەبەلى نۇرسۇلتان نازاربايەۆ مىرزاعا ٴبىزدىڭ حالىقتارىمىز بەن مەملەكەتتەرىمىز اراسىنداعى بەيبىتشىلىك پەن كەلىسىمگە، ديالوگ پەن قاۋىپسىزدىككە قول جەتكىزۋ ۇدەرىسىنە تەڭدەسسىز ۇلەسى ٴۇشىن شەكسىز ريزاشىلىعىمىز بەن العىسىمىزدى بىلدىرە وتىرىپ،

بارشا قازاقستان حالقىنا جانە ونىڭ ۇكىمەتىنە ولاردىڭ كىشىپەيىلدىلىگى مەن قوناقجايلىلىعىنا ٴوزىمىزدىڭ شەكسىز قوشەمەتىمىز بەن قۇرمەتىمىزدى كۋالاندىرا وتىرىپ،

بولاشاق ۇرپاق ٴۇشىن جانجالسىز كەلەشەك قۇرۋ جولىندا وركەنيەتتەر مەن دىندەر اراسىنداعى بىتىمگەرلىك ديالوگتى دامىتۋ مەن العا جىلجىتۋداعى قازاقستان رەسپۋبليكاسىنىڭ بىرەگەي ۇلەسىن مويىنداي وتىرىپ،

وركەنيەتارالىق جانە ٴدىنارالىق ديالوگتى دامىتۋ مەن نىعايتۋ ٴۇشىن الەمدىك جانە ٴداستۇرلى دىندەر ليدەرلەرى سەزىنىڭ ىرگەلى ٴرولىن بىرەگەي جاھاندىق پلاتفورما رەتىندە قوشەمەتتەي وتىرىپ،

الەمدىك جانە ٴداستۇرلى دىندەر ليدەرلەرىنىڭ بەس سەزىنىڭ ناتيجەسى بويىنشا ايتىلعان الدىڭعى مالىمدەمەلەردىڭ رۋحىنا ادال بولا وتىرىپ،

پلانەتامىزدىڭ ٴدىني جانە مادەني ٴارالۋاندىعىن ادامزات وركەنيەتىنىڭ ۇلى مۇراسى رەتىندە ساقتاۋدىڭ ماڭىزدىلىعىن راستاي وتىرىپ،

الەمدىك جانە ٴداستۇرلى دىندەر ليدەرلەرىنىڭ ديالوگ پەن ٴپوزيتيۆتى گۋمانيستىك قۇندىلىقتاردى ناسيحاتتاۋ ارقىلى حالىقتار مەن مەملەكەتتەردىڭ بەيبىت قاتار ٴومىر ٴسۇرۋىن ىلگەرىلەتۋگە مۇددەلى مەملەكەتتىك جانە قوعامدىق ينستيتۋتتارمەن ىنتىماقتاستىعىنىڭ ماڭىزدىلىعىن اتاپ كورسەتە وتىرىپ،

مەملەكەتتەر، قوعام جانە حالىقتار اراسىنداعى بەيبىتشىلىك پەن ٴوزارا تۇسىنىستىك يدەيالارىن ىلگەرىلەتۋ مەن ناسيحاتتاۋ سالاسىنداعى ۇكىمەتتەردىڭ، سونداي-اق ۇكىمەتتىك جانە ۇكىمەتتىك ەمەس، ۇلتتىق جانە حالىقارالىق ۇيىمداردىڭ، بۇقارالىق اقپارات قۇرالدارىنىڭ ايرىقشا ٴرولىن بەلگىلەي وتىرىپ،

الەمدىك وركەنيەتتىڭ امبەباپ تىرەگى بولاتىن كوپكونفەسسيالىق قوعامنىڭ بەيبىت قاتار ٴومىر ٴسۇرۋى مەن ٴوزارا ٴىس-قيمىلىنىڭ بىرەگەي تاريحي ۇلگىلەرىنە سۇيەنە وتىرىپ،

ٴدىني، ەتنوستىق، مادەني جانە لينگۆيستيكالىق ايىرماشىلىق نەگىزىندەگى شەتتەتۋدى، توزىمسىزدىكتى، كەمسىتۋشىلىكتى، جانجالداردى جانە قايشىلىقتاردى ەڭسەرۋ جولىنداعى ىنتىماقتاستىقتىڭ رۋحاني باعدارىنان تايماۋدىڭ ماڭىزدىلىعىنا ايرىقشا ٴمان بەرە وتىرىپ،

يگى ىستەردىڭ، قايىرىمدىلىققا قىزمەت ەتۋدىڭ، بەيبىتشىلىك پەن ادىلدىك يدەيالارىنا بەرىلگەندىكتىڭ حالىقتار مەن مەملەكەتتەرگە اسكەري تەكەتىرەستەرگە قاراعاندا الدەقايدا كوپ پايدا اكەلۋى مۇمكىن ەكەنىن تۇسىنە وتىرىپ،

پلانەتانىڭ ٴتۇرلى وڭىرلەرىندەگى اسكەري جانجالدار مەن ناقاق قانتوگىستەردى شۇعىل رەتتەۋگە جانە تۇبەگەيلى شەشۋگە باعىتتالعان ساياسي ليدەرلەردىڭ جىگەرىن قولداي وتىرىپ،

حالىقارالىق تەرروريستىك ۇيىمدار تاراپىنان جالعاسىپ وتىرعان دورەكى، جۇيەلى جانە ادام قۇقىقتارىنا جاپپاي نۇقسان كەلتىرۋ مەن حالىقارالىق گۋمانيتارلىق قۇقىق نورمالارىن بۇزۋدى جانە/نەمەسە ٴتۇرلى دىندەرگە سەنۋشىلەر اراسىنداعى جانە سول ٴبىر سەنىمگە نانۋشىلار اراسىنداعى ٴوزارا سەنىم مەن ٴوزارا ٴىس-قيمىلدى بۇزاتىن تەرروريزمگە قولداۋ كورسەتۋدى بارىنشا قاتاڭ تۇردە سىنعا الا وتىرىپ،

ٴدىندى ساياسي جانجالداردا ٴارتۇرلى تەرىس پايدالانۋدان، وزىمشىلدىك پەن توزىمسىزدىك بىلدىرۋدەن، اگرەسسياشىل ۇلتشىلدىقتان جانە ەرەكشەلەنۋگە ۇمتىلۋدان باس تارتا وتىرىپ،

شەتەلدىك جاۋىنگەر-تەرروريستەردىڭ ورالۋ جانە ورىن اۋىستىرۋ پروبلەمالارىن بارلىق مەملەكەتتەردىڭ حالىقارالىق تەرروريزممەن جانە ٴدىني ەكسترەميزممەن كۇرەسىندەگى كەلەسى جاھاندىق قاتەر رەتىندە ەسكەرە وتىرىپ،

جوعارى ەتيكا نورمالارىنىڭ ۇستەمدىك قۇرۋىنا، ۇمتىلىستارىمىزدىڭ ورتاقتىعىنا، تۇراقتىلىق، بارلىق ادامداردىڭ سالاماتتىلىعى، قاۋىپسىزدىگى ماقساتىندا ٴوزارا سەنىم مەن ٴوزارا قۇرمەت كورسەتۋگە بەيىلدىلىكتى راستاي وتىرىپ،

الەمدىك جانە ٴداستۇرلى دىندەر ليدەرلەرى سەزىنىڭ قازاقستان رەسپۋبليكاسىنىڭ ەلورداسى استانا قالاسىندا شاقىرىلۋىن جالعاستىرۋ نيەتىن قولداي وتىرىپ،

مىنالارعا:

الەمدىك جانە ٴداستۇرلى دىندەر ليدەرلەرىنىڭ ۇزاق مەرزىمدى تۇراقتىلىققا قول جەتكىزۋ جانە وشپەندىلىك پەن توزبەۋشىلىكتەن تۋىندايتىن زورلىق-زومبىلىق وقيعالارىن بولعىزباۋ جونىندەگى اسا بەلسەندى كۇش-جىگەر سالۋعا تارتىلۋىنا بارىنشا جاردەمدەسۋگە.

الەمدەگى قاۋىپسىزدىكتى تولىق فورماتتى قامتاماسىز ەتۋگە باعىتتالعان ومىرلىك ماڭىزى بار ۇسىنىمدار مەن باعدارلامالاردى تابىستى جۇزەگە اسىرۋ ٴۇشىن نەگىزگى يدەيا رەتىندە ٴدىني ليدەرلەردىڭ حالىقارالىق ينستيتۋتتارمەن، ۇكىمەتتەرمەن جانە قوعامدىق ينستيتۋتتارمەن ىنتىماقتاستىعىن نىعايتۋعا،

ناسىلىنە، دىنىنە، نانىمىنا، تىلىنە جانە جىنىسىنا قاراماستان، بارلىق قوعامدار مەن حالىقتارعا بەيبىت ومىرگە اجىراماس قۇقىقتى يەلەنۋگە بارىنشا جاردەمدەسۋگە.

ناسىلدىك، تىلدىك، ٴدىني، ۇلتتىق، ەتنوستىق نەمەسە الەۋمەتتىك شىعۋ تەگىنە، مۇلىكتىك، جىكتىك نەمەسە وزگە دە جاعدايىنا قاراماستان، بارلىق ازاماتتاردىڭ تەڭ قۇقىقتارى مەن بوستاندىقتارىن قۇرمەتتەۋگە جانە
بىر-بىرىمىزبەن باۋىرلاستىق رۋحىنداعى قارىم-قاتىناستا بولۋعا.

حالىقارالىق قوعامداستىقتىڭ ٴادىل جانە تارتىسسىز الەمدىك احۋالدى قۇرۋ جونىندەگى قىزمەتىنىڭ نەگىزگى ٴارى اجىراماس باعىتتارىنىڭ ٴبىرى رەتىندە ٴدىنارالىق جانە كونفەسسياارالىق ديالوگتى نىعايتۋ سالاسىنداعى كۇش-جىگەردى تانۋ جونىندەگى باستامالاردى قولداۋعا.

ەكسترەميستەر مەن تەرروريستەر تاراپىنان قۇقىقتارىنا شەكتەۋ قويىلعان جانە زورلىق-زومبىلىققا ۇشىراعان بارلىق ٴدىني توپتار مەن ەتنوستىق قاۋىمدارعا نيەتتەستىك بىلدىرۋگە.

بوسقىنداردى، ولاردىڭ قۇقىقتارى مەن ار-نامىسىن قورعاۋعا باعىتتالعان كۇش-جىگەرگە قولداۋ كورسەتۋگە، سونداي-اق ولارعا بارلىق قاجەتتى كومەكتى كورسەتۋگە.

ساياسي قايراتكەرلەردى جانە الەمدىك باق-تى تەرروريزمدى دىنمەن تەڭدەستىرۋ پراكتيكاسىن توقتاتۋعا شاقىرۋعا، ويتكەنى بۇل يدەيالار ٴبىزدىڭ دىندەرىمىزدىڭ بولمىسىنا جانە ولاردىڭ بەيبىت قاتار ٴومىر سۇرۋىنە زيان كەلتىرەدى، ٴبىر عانا دىنگە جانە ٴارتۇرلى دىندەرگە ەرۋشىلەر اراسىنداعى ٴوزارا سەنىم مەن ٴوزارا ٴىس-قيمىلعا زالال كەلتىرەدى.

الەمدىك قوعامداستىقتىڭ پروگرەسسيۆتى بولىگىنىڭ قوعامدى ٴدىني، ناسىلدىك نە ەتنوستىق قاعيداتتار بويىنشا ٴبولۋ ارەكەتتەرىنىڭ جولىن كەسۋ جونىندەگى كۇش-جىگەرىن قولداۋعا.

ٴدىني ليدەرلەردى باق-تا، الەۋمەتتىك جەلىلەردە جانە قوعامدىق جينالىستاردا بەيبىتشىلىك، ٴوزارا تۇسىنىستىك جانە تولەرانتتىق قۇندىلىقتارىن ىلگەرىلەتۋگە شاقىرۋعا، سونداي-اق بارلىق دىندەر ٴۇشىن قاسيەتتى جەرلەردە ارانداتۋشىلىقتاردى جانە زورلىق-زومبىلىقتى بولعىزباۋ جونىندەگى بارلىق كۇش-جىگەردى سالۋعا.

بارلىق دىندەردىڭ قۇلشىلىق ەتۋ ورىندارىندا جانە قاسيەتتى جەرلەردە، ونىڭ ىشىندە بارلىق اۆراامدىق دىندەر وكىلدەرى ٴۇشىن قاسيەتتى جەر سانالاتىن يەرۋساليمدە ارانداتۋلاردى جانە زورلىق-زومبىلىقتى بولدىرماۋ ٴۇشىن بۇكىل كۇش-جىگەردى سالۋعا.

وركەنيەتارالىق ٴدىنارالىق جانە مادەنيەتارالىق ديالوگتى ٴادىل، بەيبىت ٴارى جاۋاپتى ازاماتتىق قوعامدى قۇرۋدىڭ ەڭ جاقسى ٴتاسىلى رەتىندە قاراستىراتىن باستامالار مەن ينستيتۋتتاردى ىلگەرىلەتۋگە.

قازاقستان رەسپۋبليكاسى تۇڭعىش پرەزيدەنتىنىڭ بەيبىتشىلىك پەن كەلىسىم جولىنداعى جاھاندىق ٴوزارا ٴىس-قيمىل پروسەسىنە قوسقان ايرىقشا ۇلەسىن تانۋدىڭ بەلگىسى رەتىندە «كونفەسسياارالىق جانە وركەنيەتارالىق ديالوگتى دامىتۋ جونىندەگى ن. نازاربايەۆ ورتالىعىن» قۇرۋدى قولداۋعا.

تەرروريستىك جانە ەكسترەميستىك ۇيىمداردىڭ يدەولوگيالارىن تاراتۋ ٴۇشىن نەگىز رەتىندە ٴدىني ىلىمدەردى بولشەكتەۋدى جانە ٴدىني قۇندىلىقتاردى ديففاماسيالاۋدى تەرىسكە شىعارۋعا.

الەم قۇرىلىسىنىڭ، ٴارتۇرلى دىندەردى ۇستانۋشىلار اراسىنداعى ٴوزارا تۇسىنىستىكتى نىعايتۋدىڭ، الەمدىك جانە ٴداستۇرلى دىندەر اراسىندا بولىپ تۇراتىن شيەلەنىستەردى شەشۋدىڭ داستۇرلەرىن كوتەرمەلەۋگە جانە ولاردى
ٴىس جۇزىندە قولدانۋعا.

ٴوز ٴدىنىمىزدىڭ وكىلدەرى اراسىندا بارلىق كونفەسسيا وكىلدەرىمەن بەيبىت قاتار ٴومىر ٴسۇرۋدىڭ قاجەتتىلىگى مەن ماڭىزدىلىعى تۋرالى يدەيانى ىلگەرىلەتۋگە.

وڭالتۋ جانە دەراديكاليزاسيالاۋ باعدارلامالارى شەڭبەرىندە
ٴوز ەلدەرىنە قايتا ورالعان شەتەلدىك سودىر تەرروريستەرگە قاتىستى ٴتيىمدى شارالار ازىرلەۋگە جاردەمدەسۋگە جانە قاتىسۋعا.

ۇلتتىق، ٴدىني جانە حالىقارالىق دەڭگەيلەردە ٴدىنارالىق ديالوگتى، ٴوزارا قۇرمەتپەن قاراۋدى جانە ۇيلەسىمدى نىعايتا تۇسۋگە ىقپال ەتۋگە.

ادام مەن ادامنىڭ قاتار ٴومىر ٴسۇرۋىنىڭ ەڭ ماڭىزدى نەگىزى رەتىندە ٴارتۇرلى وركەنيەتتەر مەن دىندەردىڭ جاقىنداسۋىنا ىقپال ەتۋگە.

مەملەكەتتەرگە جانە ساياسي ليدەرلەرگە ٴدىني ەكسترەميزمنىڭ جانە حالىقارالىق تەرروريزمنىڭ تۋىنداۋىنىڭ قاينار كوزدەرى مەن نەگىزگى سەبەپتەرىن تالداۋدا جانە زەرتتەۋدە جاردەم كورسەتۋگە.

جاستاردىڭ راديكاليزمگە بەت بۇرۋىن بولعىزباۋ ماقساتىندا ۇكىمەتتەردى ولارمەن جۇمىس جۇرگىزۋدى جانداندىرۋعا شاقىرۋعا.

بەدەلدى ٴدىني ليدەرلەردىڭ سوزدەرى عانا «ٴدىن پىكىرى» رەتىندە قابىلداناتىنداي پوزيسيانى انىق ۇستانۋعا.

الەمدىك جانە ٴداستۇرلى دىندەر ليدەرلەرىنىڭ vii سەزىن 2021 جىلى قازاقستان رەسپۋبليكاسى، استانا قالاسىندا وتكىزۋگە

ٴازىر ەكەندىگىمىز جونىندە مالىمدەيمىز.

ٴبىز بارشا ادال نيەتى مەن سەنىمى بار ادامداردى وسىنداي كۇردەلى كەزەڭدە بىرىگۋگە جانە عالامشارىمىزدا بەيبىتشىلىك پەن كەلىسىمدى قامتاماسىز ەتۋگە
ٴوزىنىڭ جاۋاپكەرشىلىك ۇلەسىن قوسۋعا شاقىرامىز.

قازاقستان رەسپۋبليكاسى

استانا ق.

2018 جىلعى 11 قازان


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي