BAQ.kz - Қазақстан жаңалықтары USD 343.45 BAQ.kz - Қазақстан жаңалықтары EUR 399.57 BAQ.kz - Қазақстан жаңалықтары RUB 5.52
استانا:

الاكولگە باردىڭ با؟

ٴقازىر ەلىمىزدىڭ ىشكى ٴتۋريزمىن دامىتۋعا كوڭىل ٴبولىنىپ، كوپتەگەن جۇمىستار اتقارىلىپ جاتقانى بەلگىلى. وسىعان بايلانىستى baq.kz ٴتىلشىسى شىعىستىڭ شىرايىن كەلتىرىپ تۇرعان الاكول جاعالاۋىنداعى «الاكول» تۋريستىك بازاسىنىڭ اكىمشى قىزمەتكەرى ەربول الىبايمەن تىلدەسىپ، دەمالىس ورتالىعىنداعى قازىرگى احۋال جونىندە سۇراستىرىپ ٴبىلدى.

ونىڭ ايتۋىنشا، ەلباسى ٴتۋريزمدى دامىتۋ جونىندە تاپسىرما بەرگەلى الاكولدە كوپتەگەن قۇرىلىستار باستالىپ كەتكەن. ورتالىقتاعى اربات اباتتاندىرىلىپ، ادام تانىماستاي وزگەرگەن. ٴتۇرلى شوۋ-باعدارلامالار، ويىن-ساۋىق شارالارى دا كوپتەپ قولعا الىنعان.

«اتراكسيوندار، ٴتۇرلى ٴىس-شارالار جۇمىس ىستەي باستادى. قۇرىلىس جۇمىستارى دا قارقىندى ٴجۇرىپ جاتىر. كاسىپكەرلەردى قارجىلاندىرۋ جاعى دا جامان ەمەس. ەل بيلىگى ٴتۋريزمدى دامىتۋ جونىندە تاپسىرما بەرگەلى كەلۋشىلەردىڭ قاتارى اناعۇرلىم ٴوستى. حالىقتى تارتۋ، ينفراقۇرىلىمدى دامىتۋ بويىنشا كوپتەگەن جۇمىستار اتقارىلىپ جاتىر. ماسەلەن، ٴۇرجارعا دەيىن ۇشاقپەن كەلىپ، ٴارى قاراي تاكسي، نە بولماسا اۆتوبۋسپەن جاعاجايعا ەكى ساعاتتا جەتۋگە بولادى. پويىزبەن جالاڭاشكول ستانسياسىنا دەيىن كەلىپ، ودان بەرى 60 شاقىرىم تاكسيمەن باسىپ، كول جيەگىنە ىلىنەسىز. ارينە، ەسكى جول بولعان سوڭ كەدىر-بۇدىردى دا باسۋعا تۋرا كەلەدى»، - دەيدى ەربول.

سونىمەن قاتار، ول ەلدىڭ ىشكى ٴتۋريزمى جان-جاقتى ناسيحاتتالىپ، تىڭعىلىقتى اتقارىلعان ىستەردىڭ ارقاسىندا بيىل كەلۋشىلەر سانىنىڭ اناعۇرلىم وسكەنىن جەتكىزدى.

«بۇرىن ٴبىر ماۋسىمدا 300-گە جۋىق ادامدى قابىلدايتىنبىز، بيىل ودان كوپ بولادى دەپ بولجاپ وتىرمىز. ويتكەنى ٴقازىردىڭ وزىندە دەمالىس ورتالىعىمىزدا ورىن جوق، ادام لىق تولى. ەگەر تامىزدىڭ ونىنا دەيىن وسىلاي بولسا، بۇل جىلداعىدان ەكى ەسەگە دەيىن جوعارى بولادى. تۋريستەر كوبىندە 3 كۇننەن ٴبىر اپتاعا دەيىنگى ۋاقىتقا كەلەدى»، - دەيدى ە. ٴالىباي.

تۋريستەردى كوپتەپ تارتۋ ٴۇشىن بۇل دەمالىس ورتالىعى دا ايانباي ەڭبەك ەتىپ جاتىر. اينالاسىن اباتتاندىرىپ، ٴتۇرلى اعاشتار وتىرعىزعان. الداعى ۋاقىتتا اۋلاعا باسسەين جاساماق نيەتتە، ونى قۇرىلىس جوسپارىنا ەنگىزىپ قويىپتى. بالالار وينايتىن الاڭقاي مەن سپورتتىق ويىن الاڭدارىنىڭ قۇرىلىسى ٴجۇرىپ جاتىر.

حالىق، قىزمەت كورسەتۋ ساپاسى جوعارى ٴارى تاعامى ٴدامدى ورىنداردى ىزدەيتىنى بەلگىلى. وسىنى ەسكەرگەن «الاكول» دەمالىس ورتالىعىنىڭ باسشىلارى اسپازشىلاردى ارنايى الماتىدان الدىرىپ، اس ٴمازىرىن تۇگەلدەي جاڭارتىپتى.

«رەسەيدىڭ ٴنوۆوسىبىر، نوۆوكۋزنەسك، ۋليانوۆ وبلىسى، بارناۋىلدان كەلۋشىلەر قاتارى بيىل وتە كوپ. بۇل الاكول ٴتۋريزمىن دامىتۋدى ناقتى قولعا العاندىعىن بىلدىرەدى دەپ ويلايمىن. ودان كەيىن تۋريستەردى تارتۋ بويىنشا ٴوز تاراپىمىزدان دا جارنامالار بەرىپ تۇرامىز. ماسەلەن ٴوزىمىزدىڭ الاكولدە تۋريستىك ورتالىق اشىلعان، سوعان ٴوتىنىم بەرەمىز، ٴارى قاراي ولار ٴوزى جارناما تاراتادى. ونىڭ ۇستىنە سايتىمىز بار، كوبى سول ارقىلى دەمالىس ورتالىعىمىزبەن الدىن الا تانىسىپ، ورىنعا تاپسىرىس بەرىپ جاتادى. ودان كەيىن «ۇزىن قۇلاق» دەيمىز عوي، ول دا جاقسى كومەكتەسەدى. جالپى قىزمەت كورسەتۋ ساپاسى قاي جەردە جاقسى، سول جەردى ادامدار وزدەرى-اق ىزدەپ تاۋىپ الادى»، - دەيدى ول.

جيىرماعا جۋىق ادامدى جۇمىسپەن قامتىپ وتىرعان بۇل دەمالىس ورتالىعى ٴبىر مەزەتتە 80 ادامدى قابىلداپ، قىزمەت كورسەتە الادى.

«بىزدەگى ۆيپ ورىندار ٴتورت ادامعا ارنالعان، ودان كەيىن 6-7 جانە 2 ادامدىق كەمپينگتەر بار. ادام باسىنا 7500 تەڭگەدەن باستالادى، وعان 3 ۋاقىت تاعامى كىرەدى. كەلۋشىلەرگە بارلىق جاعداي جاسالعان، سالقىنداتقىش، جۋىناتىن بولمە جانە دارەتحانامەن قامتاماسىز ەتىلگەن. وتاۋ-تۆ قوسىلعان تەلەديدار، توڭازىتقىش سياقتى قاجەتتى زاتتىڭ ٴبارى بار. ونىڭ ۇستىنە، ٴبىزدىڭ كولدە پايدالى مينەرال كوزدەرى بار. سونىڭ ٴبىرى – اق باتپاق، ولار تەرى اۋرۋىنا جاقسى. ال قارا باتپاق ادامنىڭ بۋىن اۋرۋلارىنا ەم. وسى مينەرال كوزدەرى ٴۇشىن ادامدار مىڭداعان شاقىرىمدىق جەردەن كەلەدى جانە ولار جىلدا تۇراقتى تۇردە كەلىپ تۇرادى»، - دەيدى ەربول.

سونىمەن قاتار، ول تۋريستەردى ازاپقا سالىپ، باس اۋرۋىنا اينالعان ەسكى جولداردىڭ جوندەلىپ جاتقاندىعىن ايتىپ ٴوتتى.

«بۇرىن تۋريستەر بىزگە كەلەر جولدىڭ ساپاسىنا سىن ايتىپ، كوڭىلدەرى تولمايتىندىعىن جەتكىزەتىن. ٴقازىر بارلىق جەرگە اسفالت جابىندىسى توسەلىپ جاتىر. بۇل تۋريستەردىڭ شارشاماي كەلىپ-كەتۋىنە ۇلكەن سەبەپ. ادامدار مۇندا دەمالىپ، جاقسى كوڭىل-كۇيمەن قايتقىسى كەلەدى. ەگەر جولدا قينالاتىن بولسا، ادەمى دەمالىستان ەش ەستەلىك قالمايدى دەپ ويلايمىن. سوندىقتان ەندىگى كۇشتى جول جوندەۋگە جۇمساپ، سونى تەزىرەك رەتكە كەلتىرسە جاقسى بولار ەدى»، - دەيدى ول.

جاقىندا عانا الاكولدە دەمالىپ قايتقان ساياساتتانۋشى ەرلان سايىروۆ بۇل دەمالىس ايماعى تۋرالى بىلاي دەيدى:

«قازاقستاندا ىشكى ٴتۋريزمدى دامىتۋ وتە وزەكتى. ەلدىڭ ەكونوميكالىق دامۋىنا تەك مۇناي نەمەسە تاعى باسقا شيكى زاتتاردى عانا ەمەس، ەلدىڭ ىشكى تابيعي جانە رۋحاني الەۋەتىن پايدالانۋ كەرەك. ٴتۋريزمدى دامىتقاندا ۇلكەن ٴبىر رۋحاني قۇندىلىق بولۋ كەرەك. قازاقستاننىڭ قاي تۇكپىرىن الساڭ دا، وزىنە ٴتان ەرەكشەلىگى بار. الاكولگە كەلەتىن بولساق، بىرىنشىدەن شىعىس قازاقستان رۋحاني جاعىنان وتە باي. اباي، قوزى-كورپەش بايان سۇلۋ، ەڭىلىك-كەبەك، ونىڭ ارعى جاعىندا ساقتار مەن عۇنداردىڭ ۇلكەن مادەنيەتى تۇر. الاكول ەلىمىزدەگى سۋ باسسەيىندەرىنىڭ ىشىندەگى ەڭ بىرەگەيى. ويتكەنى ول اششى سۋ، ونىڭ ۇستىنە تاريحتا سوناۋ قىتاي، اراب دەرەكتەرىندە دە كورسەتىلگەن.

بۇگىنگى تاڭدا الاكولدىڭ ينفراقۇرىلىمى دامىپ كەلە جاتىر. شىعىس قازاقستان وبلىسىنىڭ اكىمدىگى وعان جاقسىلاپ تۇرىپ ينۆەستيسيا سالىپ جاتىر. تۋريستەرگە كورسەتىلەتىن قىزمەتتىڭ ٴتۇر-تۇرى جاسالىپ جاتىر. ماسەلەن، كەشكى ساۋىق ورىندارى، ادامداردى جوعارى دارەجەدە تاماقتاندىراتىن كافەلەر مەن مەيرامحانالار بوي كوتەرگەن. ەندىگى ماسەلە الاكولگە تۋريستەردىڭ جەتۋى. ىشكى ينفراقۇرىلىمدى دامىتۋ كەرەك. تۋريستەر بارار جولعا بولا شارشاماۋ كەرەك. ٴقازىر استانادان الاكولگە دەيىن 1600 كم، وكىنىشكە وراي جولدىڭ كوپ بولىگى ادامدارعا قولايسىز. سونىمەن قاتار وعان جەتۋ جولداردىڭ باعىتىن دا كوبەيتكەن دۇرىس. قاراعاندى، قارقارالى جاقتان جەتەتىن باعىتتى دا دامىتۋ كەرەك. قازاقستان ىشىندە الاكولگە جان-جاقتان وڭاي جەتەتىن جولداردىڭ تورابىن جاساۋ كەرەك. سول كەزدە ادام قاراسى مولايا تۇسەدى.

دەگەنمەن ٴقازىردىڭ وزىندە وندا بارىپ دەمالاتىنداردىڭ قاتارى كوبەيگەن. ماسەلەن، ارباتتاعى كەشكىلىك ساۋىققا بارعان ادامداردىڭ سانى 20-30 مىڭعا دەيىن جەتەدى ەكەن. ياعني، الاكول كۇنىنە 25-30 مىڭ ادامدى قابىلدايدى دەگەن ٴسوز. ەندى بۇنى 95 كۇنگە كوبەيتەتىن بولساق، بۇل 1 ملن ادامنان اسىپ كەتۋى مۇمكىن. ويتكەنى وعان تەك ەلىمىزدەن عانا ەمەس، بۇرىنعى كەڭەس وداعىنىڭ بارلىق ەلىنەن ادامدار كەلەدى. الاكولدە تۋريستەردى قابىلداۋدىڭ ينفراقۇرىلىمى نەگىزى بۇرىننان جاسالعان. ول دامىپ جاتىر، سونىڭ ساپاسىن جاقسارتۋ كەرەك. سونىمەن قاتار، تۋريستەردى قابىلداعاندا سول جەردەگى ەكولوگياعا ەشقانداي زيان كەلمەيتىندەي ەتىپ جاساۋ كەرەك. ياعني، ادامداردى قابىلداۋدىڭ بەلگىلى ٴبىر تەپە-تەڭدىگى بولۋ كەرەك. ەگەر ادامدار شامادان تىس كوپ كەلسە، سۋدىڭ ساپاسى تومەندەپ كەتەدى».

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي