BAQ.kz - Қазақстан жаңалықтары USD 370.11 BAQ.kz - Қазақстан жаңалықтары EUR 419.37 BAQ.kz - Қазақстан жаңалықтары RUB 5.58
استانا:

اقتوبەدە ستۋدەنتتەر جاتاقحاناسى كوبەيدى

بيىل ەلباسى «پرەزيدەنتتىڭ بەس الەۋمەتتىك باستاماسى» اتتى ۇندەۋىندە جوعارى ٴبىلىمنىڭ قولجەتىمدىلىگى مەن ساپاسىن ارتتىرۋ، ستۋدەنت جاستاردى جاتاقحانامەن قامتاماسىز ەتۋ ٴۇشىن 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرعانى بەلگىلى. وسىعان ورايدا ەلىمىزدە جاتاقحانا پروبلەماسىن شەشۋ ماقساتىندا ٴبىراز ىلگەرىلەۋ بايقالادى. ٴبىراق بۇل شارۋا تولىق شەشىلۋى ٴۇشىن ٴالى كوپ جۇمىس جاساۋ كەرەك. الماتىدا ستۋدەنتتىك جاتاقحانا ٴۇشىن ٴبىر جىلدىق تولەم 30-135 مىڭ تەڭگە اراسىندا. ونداي اقشاعا دا ورىن تابىلماي قينالىپ جۇرگەندەر كوپ. ال ايماقتاردا ستۋدەنتتەر جاتاقحانامەن قالاي قامتىلعان؟ بۇل ماسەلەگە جوعارى وقۋ ورىندارىنىڭ وكىلدەرى نە ايتادى؟ «baq.kz» اقپاراتتىق پورتالى ەلىمىزدىڭ باتىس وڭىرىندەگى بولاشاق اگلومەراسيالىق ورتالىق اقتوبە قالاسىنداعى ستۋدەنتتەردىڭ الەۋمەتتىك جاعدايىن سۇراستىرىپ كوردى.

رەسمي دەرەكتەرگە سۇيەنسەك، ٴقازىر اقتوبەدە جوعارى جانە ارناۋلى ٴبىلىم الىپ جاتقان ستۋدەنتتەر سانى — 60 مىڭعا تاياپ قالدى. ونىڭ 30 مىڭعا جۋىعى قالاداعى التى جوعارى وقۋ ورىندارىندا وقيدى. قالاداعى 44 كوللەدجدە 30 مىڭ وقۋشى ٴبىلىم الۋدا. ارناۋلى ورتا ٴبىلىم بەرەتىن وقۋ ورىندارىندا ستۋدەنتتىك جاتاقحانا سالۋ كۇن تارتىبىندە، بۇلاردىڭ 65 پروسەنتى عانا جاتاقحاناعا ورنالاسقان. قازىرگى ۋاقىتتا وبلىستا ستۋدەنتتەردى جاتاقحانامەن قامتۋ ماسەلەسى تىكەلەي وبلىس اكىمىنىڭ باقىلاۋىندا تۇر. وبلىس باسشىسى ٴاربىر جيىن سايىن جاۋاپتى تۇلعالارعا بەرىلگەن تاپسىرمالاردى پىسىقتاپ، وسى باعىتتاعى جۇمىستى قارقىندى جۇرگىزۋىن قاداعالاپ وتىر.

ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى ايماقتاعى جوو اراسىندا ستۋدەنتتىك كونتينگەنتى ەڭ كوپ وقۋ ورنى. ستۋدەنتتەردى قۇجاتتاندىرۋ ٴبولىمىنىڭ باستىعى ٴىنجۋ كاميەۆا بەرگەن مالىمەتكە سايكەس: كۇندىزگى بولىمدە 8370، سىرتتاي بولىمدە 4209 ستۋدەنت وقيدى. سونداي اق، ماگيسترانتتار مەن دوكتورانتتار، ۋنيۆەرسيتەت جانىنداعى كوللەدجدىڭ شاكىرتتەرىن قوسقاندا ون ٴۇش مىڭنان استام بولاشاق ماماندار ٴبىلىم الىپ ٴجۇر. بۇرىن وقۋ ورداسىندا 500 جانە 650 ورىندىق ەكى ستۋدەنتتەر ٴۇيى بولاتىن. 2017 جىلى تاۋەلسىزدىك كۇنى قارساڭىندا ۋنيۆەرسيتەت اۋلاسىندا 500 ورىندىق توعىز قاباتتى «جاستار ٴۇيى» پايدالانۋعا بەرىلدى. 2018-2019 وقۋ جىلىنان باستاپ كۇردەلى جوندەۋدەن وتكەن №3 ستۋدەنتتەر ٴۇيى 350 العاشقى تۇرعىندارىن قابىلدادى.

ٴ-قازىر ۋنيۆەرسيتەتتە وزگە وڭىرلەردەن، شەت ەلدەردەن كەلگەن ستۋدەنتتەر وتە كوپ. «سەرپىن» باعدارلاماسىمەن وقىپ جاتقان 699 ستۋدەنت بار. ولار تۇگەلگە جۋىق جاتاقحانادا تۇرادى. ٴقازىر جاتاقحانادا تۇرۋعا سۇرانىس بەرگەن ستۋدەنتتەردىڭ وتىنىشتەرى تولىعىمەن قاناعاتتاندىرىلدى. ۋنيۆەرسيتەت قاراماعىندا بارلىعى 2000 ستۋدەنتكە ارنالعان ٴتورت جاتاقحانا بار. 2017 جىلى ەلباسىنىڭ ۇندەۋىنە سايكەس «جاستار ٴۇيى» سالىندى. ۇشەۋى بۇرىننان بار. بۇل ٴۇش جاتاقحانادا بارلىق جاعداي جاسالعان. عيماراتتارى ەسكى بولعانىمەن، ۇشەۋى دە جوندەۋدەن وتكەن. ستۋدەنتتەر جاتاقحانادا تۇرعانى ٴۇشىن ازىرشە جىلىنا 31420 تەڭگە تولەيدى. جەتىم بالالار تەگىن تۇرادى، - دەيدى ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ الەۋمەتتىك ماسەلەلەر جانە جاستار ساياساتى دەپارتامەنتىنىڭ ديرەكتورى قارىلعاش تورەتايقىزى.

اقتوبە قالاسىندا 1-2 بولمەلى پاتەر جالداۋ قۇنى اي سايىن 50-200 مىڭ تەڭگە ەكەنىن ەسكەرەتىن بولساق، مۇنداي قامقورلىق ستۋدەنتتەر ٴۇشىن ۇلكەن كومەك.

اقش، انگليا، گەرمانيا سياقتى مەملەكەتتەردە ستۋدەنتتىك جاتاقحانالار قۇرىلىسىن كاسىپكەرلەر مەن جەكە كومپانيالار ٴوز دەمەۋشىلىگىمەن سالادى ەكەن. مەملەكەت ٴوز تاراپىنان سالىققا جەڭىلدىك جاسايدى. مىسالى، اقش-تا جەكە كاسىپكەر مەملەكەتتەن جەر الىپ، جاتاقحانا سالادى. سوسىن قۇرىلىسقا جۇمساعان شىعىنىن ستۋدەنتتەردىڭ تولەماقىسى ەسەبىنەن قايتارىپ الادى. قر پرەزيدەنتى ۇسىنعان مەملەكەتتىك-جەكەمەنشىك ارىپتەستىك اياسىندا الەۋمەتتىك عيماراتتار سالۋ تۋرالى جوبانىڭ ٴمانى دە وسى. مەملەكەت تە، كاسىپكەر دە، ستۋدەنتتەر سياقتى الەۋمەتتىك توپتار دا ٴماز، ٴبارىنىڭ ۇپايى تۇگەل بولادى. الداعى ۋاقىتتا جوعارى جانە ارناۋلى وقۋ ورىندارى ٴۇشىن سالىناتىن جاتاقحانالار قۇرىلىسى وسى باعىتتا جۇزەگە اسپاق.

جاتاقحانا - ستۋدەنتتىڭ ٴوز ٴۇيى. ستۋدەنت بولعان سوڭ جاتاقحاناعا جاتىپ، ستۋدەنتتىك شاقتىڭ قىزىعى مەن قۋانىشىن كورگىسى كەلەدى. جاتاقحانا ٴومىرى كۇندە قايناعان تىرشىلىك. كۇندەلىكتى ساباعىنا دا بىرگە دايىندالىپ، تانىسىپ-بىلىسەتىن رۋحاني-مادەني ورتا. «جاستار ٴۇيى» تۇرعىندارىنىڭ جاعدايىمەن تانىسۋعا ارنايى باردىق. «smart home» ۇلگىسىندە جاسالعان جاتاقحانا قوناق ۇيدەن كەم ەمەس. سۋ جاڭا ليفت جۇمىس ىستەپ تۇر. 70 ادامدىق وقىرماندار زالى، مادەني شارالارعا ارنالعان كەڭ بولمە، بۋفەت سۋتۋدەنتتەر يگىلىگىنە بەرىلگەن. ٴار سەكسيادا ەكى جانە ٴۇش ادامدىق بولمەلەر، سونداي-اق دارەتحانا مەن دۋش كابينالارى بار. اسحانا بولمەلەرى كوپ، ەشقانداي كەزەك جوق.تۇرمىستىق بولمەدە ونداعان اۆتومات كىر جۋعىش ماشينالار ٴتىزىلىپ تۇر. جۋىلعان كيىمدەردى كەپتىرۋگە ارنالعان بولمە بار. كيىم ۇتىكتەيتىن ارنايى ستول مەن ۇتىكتەر ساقاداي سايلانىپ تۇر. بارلىق قاباتتار مەن دالىزدەردە بەينەباقىلاۋ جۇيەسى قويىلعان. ٴبىر بولمە مەدپۋنكت رەتىندە جابدىقتالعان. ەم قابىلداپ جۇرگەن ستۋدەنتكە ٴدارى ەگۋ كەرەك بولسا - ۋنيۆەرسيتەت ەمحاناسىنان مەدبيكە كەلىپ كومەگىن كورسەتەدى. سىرتتان كىرگەن ستۋدەنت قۇجاتىن تۋرنيكەتكە جاقىنداتقان ساتتە ۆاحتەر الدىنداعى ەكراننان سۋرەتىنەن باستاپ بارلىق مالىمەت كورىنىپ تۇرادى. ۋنيۆەرسيتەت اكىمشىلىگى ەندى ينتەرنەت پەن wi-fi جۇيەسىنىڭ جىلدامدىعىن كوبەيتۋگە جۇمىستانىپ جاتىر. «smart home» جۇيەسى باعدارلاماسىن جىل سايىن دامىتىپ، جەتىلدىرە بەرەتىن مۇمكىندىك مول. مىسالى، الداعى ۋاقىتتا شاتىردا كۇن ساۋلەسىنەن قۋات الاتىن باتارەيالار ورناتىپ، ەلەكتر ەنەرگياسىن ۇنەمدەۋگە بولادى.

وقۋ مەن دەمالىس ٴۇشىن بارىنشا قولايلى جاعداي جاسالعان ستۋدەنتتەن ۇلگىلى ٴتارتىپ پەن جاقسى وقۋ عانا تالاپ ەتىلەدى. ەسىك الدىندا فۋتبول، ۆولەيبول، باسكەتبول الاڭدارى بار. ىرگەدە تۇرعان ستاديوندا جۇگىرۋگە بولادى. بۇلشىق ەتتەردى شىنىقتىرامىن دەسەڭىز - سپورتتىق ترەناجەرلار دايىن. وقۋ كورپۋستارى تاياق تاستام جەردە، جولعا كوك تيىن شىعارمايسىز.

ۋنيۆەرسيتەت باسشىلىعى جاتاقحانالاردان ورىن بولگەندە فاكۋلتەت پەن وقۋ كورپۋسىنىڭ جاقىندىعىن ەسكەرۋگە تىرىسادى. ٴبىرىنشى كەزەكتە الەۋمەتتىك جەڭىلدىگى بار ستۋدەنتتەر، جەتىم بالالار، كوپ بالالى وتباسى وكىلدەرى، گرانتتا وقيتىندار، الىستان جانە شەت ەلدەن كەلگەندەر، وقۋ وزاتتارى مەن مادەني-قوعامدىق شارالاردىڭ بەلسەندىلەرى ارتىقشىلىققا يە. ارتىلىپ قالعان ورىندار دا ادىلدىك پرينسيپىمەن بەرىلەدى. قازىرگى ۋاقىتتا ارىز بەرگەن ستۋدەنتتەر تولىق ورىن الدى. وقۋدا وزات، ٴتارتىبى تاپ-تۇيناقتاي جوعارى كۋرس ستۋدەنتتەرى دە وتكەن جىلى تۇرعان بولمەلەرىنە قايتا ورنالاستى. وسى ۋاقىتقا دەيىن ٴتارتىپ بۇزعان، ەرسى ارەكەتى ٴۇشىن شىعارىلعان ەشكىم بولعان جوق. ستۋدەنتتەرگە شاعىن تەلەديدار مەن توڭازىتقىش كىرگىزۋگە دە رۇحسات بەردىك. مەزگىلسىز ۋاقىتتا كورشىلەرىنىڭ ساباق وقۋىنا كەدەرگى جاساماسا بولدى. سەسسيا ۋاقىتىندا عانا ەمەس، وقۋ زالىندا تاۋلىك بويى ساباققا دايىندالۋعا رۇحسات، - دەيدى «جاستار ٴۇيىنىڭ» ديرەكتورى بەيبىتشىلىك كوبەكقىزى.

«جاستار ٴۇيىنىڭ» بىرنەشە قاباتىن ارالاپ، ستۋدەنتتەردىڭ تۇرمىس تىرشىلىگىمەن تانىستىق. بەس ٴجۇز ادام كىرىپ-شىعىپ جۇرسە دە تىپ-تىنىش. جازۋىن جازىپ، كىتابىن وقىپ، كيىمدەرىن ۇتىكتەپ، اركىم ٴوز شارۋاسىمەن ٴجۇر. توقسانىنشى جىلداردا كۇندە توبەلەس، ايقاي-شۋ، ەسىك-تەرەزە قيراپ جاتاتىن جاتاقحانالاردى كوپ كورگەن اتا-انالار بالالارىنان حابار الۋعا كەلگەندە ٴوز كوزدەرىنە سەنبەي، جان-جاعىنا تامسانىپ قاراي بەرەدى ەكەن. ۋنيۆەرسيتەت ۇجىمى بۇل جەتىستىكتەردى مىسە تۇتپاي، ٴارى قاراي جەتىلدىرۋدى ويلاپ وتىر. ماتەريالدىق-تەحنيكالىق بازانىڭ نىعايۋى، وقىتۋ مەن وقۋ ساپاسىنىڭ ٴوسۋى، مەملەكەتتىك باعدارلامالار مەن مىندەتتەردىڭ تالابى توقىراۋدى ۇناتپايدى. «ەركىن ەلدىڭ ەرتەڭى - كەمەل ٴبىلىم مەن عىلىمدا» دەيدى مەملەكەت پرەزيدەنتى. تياناقتى ٴبىلىم العان جاستار تاۋەلسىز مەملەكەتتىڭ تىرەگى، ەرتەڭگى كۇنگە سەنىممەن اتتاناتىن ەلشىسى.

ايشۋاق دارمەن ۇلى، اقتوبە قالاسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي