BAQ.kz - Қазақстан жаңалықтары USD 319.65 BAQ.kz - Қазақстан жаңалықтары EUR 393.33 BAQ.kz - Қазақстан жаңалықтары RUB 5.67
استانا:

قۇسبەگىلىكتىڭ قۇپياسى

استانا. 18 اقپان. baq.kz – سوناۋ ىقىلىم زاماننان قولىندا قىران ويناتقان حالقىمىز ونىڭ قىر-سىرىنا ٴۇڭىلىپ، قىزىعىنا باتا بىلگەنى انىق. تاريحي دەرەكتەرگە سۇيەنسەك قۇسبەگىلىك ونەرى بۇدان ٴۇش مىڭ جىل بۇرىن پايدا بولعان ەكەن. ورتا عاسىرلارداعى يتاليان ساياحاتشىسى ماركو پولونىڭ جازبالارىندا قۇبىلاي حاننىڭ ساياتشىلىق ماقساتتا قولعا ۇيرەتكەن 500 اقسۇڭقارى جانە باسقا دا قىران قۇستارى بولعاندىعىن جانە ولاردى باپتاپ، كۇتۋگە، ارنايى 10 مىڭ قۇسبەگى ۇستاعانىن جازادى. ورتا عاسىرلاردا ورتالىق ازيا مەن قازاقستان، قىرىم، ەدىل بويىن بيلەگەن پاتشالار مەن حاندار دا ٴوز سارايلارىندا ارنايى قۇسبەگىلەر ۇستاعان. ولار ساراي قىزمەتكەرلەرىنىڭ قۇرمەتتىسى سانالعان. سوندىقتان دا حان سارايىنداعى قۇسبەگىلىك قىزمەتكە تەك اقسۇيەكتەر، بەكتەر، امىرلەر تاعايىندالعان. كەيبىر تاريحي دەرەكتەردە شىڭعىسحاننىڭ ۇلى جوشىنىڭ 3 مىڭ بۇركىتشى ۇستاعانى تۋرالى جازىلادى. دەمەك ۇلتىمىز قىران باپتاۋدىڭ قۇپياسىن ەرتەدەن اشا بىلگەن. ساياتشىلىقتىڭ سان قىرىن مەڭگەرە بىلگەن قىتايلىق قانداستارىمىز ٴتول ونەرىمىزدى بۇل كۇندە جاڭاشا جاڭعىرتىپ، فەستيۆالدەر وتكىزىپ جۇرگەنىن بۇدان بۇرىن حابارلاعان بولاتىنبىز. بۇركىت باپتاۋدىڭ قىرى مەن سىرىن قالامىنا تاقىرىپ ەتكەن قىتايلىق قانداسىمىز، جۋرناليست باعداۋلەت باتىربەك ۇلىنىڭ ماقالاسىن وقىرمان نازارىنا ۇسىنامىز.  

قازاق باعزى زاماننان تاۋ اسىپ، تاس باسىپ، سۋدىڭ تۇنىعىن، ٴشوپتىڭ شۇيگىنىن ىزدەپ مال شارۋاشىلىعىمەن شۇعىلدانىپ كەلگەنى تاريحتان بەلگىلى. سول كەزدە ٴتورت تۇلىگىن كۇيلى باعۋمەن بىرگە جاپان دالاداعى تاڭى جىرتىلعان دالا اڭدارىن قاقپان جانە تۇزاق قۇرىپ، تازىمەن اۋلادى. ساداق تارتىپ، مىلتىق اتىپ مەرگەندىكتى دە كاسىپ ەتكەن بابالارىمىز ەتى حالال اڭداردى ازىق ەتە ٴبىلدى. كەيبىرىنىڭ تەرىسىنەن كيىم تىگىپ كيسە، كەي ٴتۇز جانۋارلارىن قولعا ۇيرەتتى. سونىڭ ىشىندە زەڭگىر كوكتى شارلاعان قىران قۇستىڭ اڭ-قۇس اۋلايتىن تەگەۋرىندى تۇياعى مەن قىراعىلىعىن بايقاعاپ، ولاردى امال-ايلامەن ۇستاپ، قولعا قايىرا ٴبىلدى. ٴتۇز تاعىسىن باپتاپ قانا قويماي اڭعا سالىپ قىزىعىنا شومدى. اۋلاعان قاسقىر، تۇلكى، ەلىك، ۇكى سياقتى حايۋاناتتاردى يگىلىكتەرىنە جاراتتى. تۇلكى ىشىك، قاسقىر ىشىك، تۇلكى تىماق، ۇكىلى تاقيا سياقتى ۇلتتىق كيىمدەرگە تەرىسى باعالى اڭداردى پايدالاندى. باي اۋىلدىڭ ازاماتتارى ٴساندى كيىنىپ، قىران بۇركىتتەرىن قولعا قوندىرىپ، تازىلارىن ەرتىپ «سالبۇرىنعا» شىعاتىن بولعان. العان تۇلكىلەرىن ٴبىر-بىرىنىڭ قانجىعاسىنا بايلايتىن قاعيدانى قالىپتاستىرعان. جەتى قازىناعا كىرەتىن قىران بۇركىت، ۇشقىر تازى، جۇيرىك ات، بەرەن مىلتىقتى جىگىتتىڭ قىرسىعىن الادى، وتباسىنا باقىت اكەلەدى دەپ ساناعان.
قانسوناردا بۇركىتشى شىعادى اڭعا،
تاستان تۇلكى تابىلار اڭدىعانعا،- دەپ اباي اتامىز جىرلاعانىنداي حلقىمىز جاڭا جاۋعان قاردىڭ تاڭسارىدەگى كەزىن «قانسونار» دەپ اتاعان. بۇل كەزدە ٴۇپ ەتكەن جەل بولمايدى دا تۇلكىنىڭ جاڭا ٴىزى وڭاي كوزگە شالىنادى. ساياتشى ٴىزدى قۋىپ، تۇلكى جاسىرىنعان جەردى ٴدال تاۋىپ، قىران بۇركىتتىڭ وتكىر تۇياعىنا ٴىلدىرىپ ولجالى بولىپ، قانجىعاسى مايلانىپ قايتادى. ايتسا ايتقانداي قۇستىڭ بارلىق سىرىنا قانىق بولا بىلگەن قۇسبەگىلەر كوكتەگى قىراندى تۇرگە ٴبولدى. قانات، قۇيرىعىنا قاراپ جاسىن ايىردى. مىنەز-قۇلقىنا، تەگەۋرىن، توپشىسىنا، تۇياعىنا جانە وتكىر جانارىنا قاراپ العىرلىعىن، سەزگىرلىگىن، باتىلدىعىن سىنادى. ٴتىپتى، قاي تاۋدىڭ بۇركىتى ەكەنىن دە ٴداپ باسىپ ايىرا الاتىن بولدى.


قىراننىڭ ٴتۇر-تۇسى:
ٴتۇسى ٴبىرشاما سارىعا جاقىن قۇستى «سارى قۇس» نەمەسە «قارا قوڭىر قۇس»، ال يىعىندا اق ٴجۇنى بارلارىن «اقيىق» دەپ اتاسقان. ەڭ مىقتى قىران بۇركىت باسىنان قار-مۇزى كەتپەيتىن تاۋلاردا جاسايدى. قازاق ولارعا «مۇزبالاق»، «قاندىبالاق» دەپ ات قويعان. مۇزبالاقتىڭ قايسار كۇشى ارلانعا، ارقار، كيىكتەرگە ەمىن-ەركىن جەتەدى. بۇنداي قۇستار تاۋ باسىندا قاتتى داۋىل تۇرعاندا ەتەكتەرگە تۇسەدى. شەبەر قۇسبەگىلەر وسى كەزدى پايدالانىپ تور قۇرىپ ۇستاپ الىپ جاتادى.
ٴتۇز قىراندارىن ۇستاۋدىڭ ٴتاسىلى:
تور قۇرىپ ۇستاۋ. ەنى ەكى، ۇزىندىعى ٴتورت مەتردەي مولشەردەگى يىرىلگەن ٴجىپتى كەرەگە كوز ەتىپ توقىپ شىعادى. وسى توقىلعان توردى تاۋدىڭ باۋرايىنداعى الاڭقىعا ون شاقتى جىڭىشكە تالمەن تىتەپ، دوڭگەلەتىپ قۇرادى دا ىشىنە ولەكسەمەن قوسا ٴتىرى كەزقۇيرىقتى بايلاپ قويادى. مۇنداعى سەبەپ: كەزقۇيرىق ولەكسەنى جەپ جاتىر ەكەن دەپ تۇسىنگەن اش قىران اسپاننان اعىلىپ كەلىپ قۇلايدى دا، تورعا ورالىپ قالادى. وسى ٴساتتى كۇزەتكەن ساياتشىلار «كوكتەن كۇتكەنىن جەردەن» قاعىپ الادى.
قاقپان قۇرىپ ۇستاۋ. بۇل قاقپان بۇركىت قاقپانى دەپ اتالىپ ٴبىر سەرپەرلى بولىپ جاسالادى دا قاندى اۋزىنا قۇرىم كيگىز ورالىپ جەرگە جيرما سانتى مولشەرىندە جاسىرىلىپ، قاقپان بەتىنە شوپ – شالاڭ شاشىپ سەزىكتەنبەيتىندەي ەتىپ قويادى. قاسىنا مالدىڭ ولەكسەسى تاستالادى. ال قاقپاننىڭ شىنجىرى دا ەلۋ سانتى مەتىر ارالىققا جاسىرلىپ تەمىر قازىق مىقتاپ قاعىلادى. ولەكسەگە كەلگەن ٴتۇز تاعىسى جاسىرلعان قاقپانعا ٴتۇسىپ وڭاي ۇستالىپ قالادى.
ۇيادان ۇستاۋ. بۇركىت ۇياسىن كوبىنەسە قۇزار شىڭداردىڭ ۇشار باسىنداعى جارتاستىڭ قاتپارىنا سالادى. سوندىقتان دا ۇيادان بالاپان الۋ وڭايعا تۇسپەيدى. بۇركىت تۇياعى وتكىر، اشۋشاڭ جىرتقىش قۇستاردىڭ قاتارىنا جاتاتىندىقتان ادامدى زاقىمداپ قوياتىندارى دا بولادى. سوندىقتان دا قىران تاماعىن ىزدەۋگە كەتكەن ٴساتتى باقىلاپ وتىرىپ يكەمدى، باتىر ازاماتتار تەپە-تەڭدىگىن ساقتاپ، تاسقا سوعىلماۋى ٴۇشىن قايىس ارقانمەن ارقاسىنا كەرەگەنىڭ ٴبىر بولىگىن، ال كەۋدە جاعىنا سىرىق بايلاپ ۇياعا تۇسەدى. كەيدە ۇشۋدى ۇيرەنىپ، قاناتى قاتايىپ قالعان بالاپاندار بولسا ارقانعا جالبىرلايتىن زاتتار بايلاپ ۇياداعى بالاپاندى ۇركىتىپ ۇشىرىپ جىبەرەدى. الىسقا ۇزاپ ۇشا المايتىن جاس بالاپان شارشاپ قالادى دا تاۋ ەتەگىنە ٴتۇسىپ، قايتا كوتەرىلۋگە شاماسى جەتپەي ادامدارعا قولدى بولادى.
سونداي-اق، جازىقتاعى ولەكسەلەرگە ٴتۇسىپ، توياتتاپ ۇشا الماي قالعان قىران قۇستى جۇيرىك اتپەن قۋىپ تا ۇستايدى. قىراندى ۇستاۋدىڭ تاعى ٴبىر جولى – تۇنەكتە وتىرعان قۇستىڭ كوزىنە قول شاممنىڭ (فوناريك) جارىعىن ۇزاق ٴتۇسىرىپ، جانارىن جاسىتۋ ارقىلى قۇرىق سالىپ تا ۇستايدى.

 


قىرانىنىڭ قانات-قۇيرىعى مەن ساۋساقتارىنىڭ اتالۋى:
بۇركىتتىڭ قاناتىنىڭ شەتكى ۇزىن قاۋرسىندارىن شالعىسى، قۇيرىعىنىڭ ورتاسىنداعى ەكى قابات الدى قاۋىرسىنىن كوبەسى، قالعاندارىن جەبەسى دەپ اتايدى. اياعى ٴتورت ساۋساقتى بولادى. ارتقىسىن تەگۋىرىنى، ىشكىسىن جەمباسار، ورتانعىسىن سىعىمى، ال شەتكىسىن شەڭگەلى دەيدى.
قىراننىڭ جاسىنا قاراي اتالۋى:
بۇركىتتىڭ ەركەگىن ٴشاۋلى، ۇرعاشىسىن ۇياباسار دەپ اتايدى. ال بۇركىتتى جاسىنا قاراي بالاپان نەمەسە سارى اۋىز، تىرنەك، تاستۇلەك، قۇمتۇلەك، كوكتۇبىت، ٴمايتۇبىت، انا، قانا، بالابارشىن، شوگەل دەي كەلىپ وسىدان كەيىنگىلەرىن جاسامىس، كارى بۇركىت دەپ اتايدى. بۇركىتتىڭ انالىقتارى ٴتورت جاسقا، ياعني، قۇمتۇلەگىنەن باستاپ جۇمىرتقالاپ، بالاپان شىعارادى.


بۇركىتتىڭ مۇلىكتەرى:
اياقباۋ. ٴيى قانعان قايىستان التى تاسپا ەتىپ ٴورىپ، 50 سم مولشەرىندە باۋ جاسايدى دا، ونىڭ باسىنا ٴۇش ەلى جالپاق قۇرىم تىگەدى. قۇرىمنىڭ سىرتىن ويۋلاپ، ورتاسىنا كۇمىسورناتادى دا بۇركىتىڭ جىلىنشىگىنە مىقتام بايلنادى.
شىجىم. اياقباۋعا تاعىلاتىن ەكى قۇلاش اينالاسىنداعى ەكى ەلىگە جەتپەيتىن قايىستى شىجىم دەپ اتايدى. بۇنى قىراندى تۇعىرعا وتىرعىزعاندا جاناما قاعىلعان قازىققا مىقتاپ بايلايدى. ال ۇشىرعان كەزدە شىجىمىن شەشىپ الىپ، اياقباۋمەن قويا بەرىلەدى.
توماعا. بۇركىتتىڭ باسىنىڭ ۇلكەن-كىشىلىگىنە قاراي تاس ۇلتاننان قيىپ تىگىلىپ توبەباۋ جاسايدى، ساندىك ٴۇشىن ٴاربىر جەرىنە كۇمىستەر ورناتىلاى. قىرانعا توماعا سالۋداعى ماقسات – اينالاسىنداعى جان-جانۋارعا الباتى ۇمتىلماۋى ٴۇشىن.
بيالاي. ەرتەدە ەلىك تەكەسىنىڭ مويىن تەرىسىن مالماعا سالىپ ٴيىن قاندىرىپ، ٴبىر باسبارماق پەن ٴتورت ساۋساق قوس-قوستان سياتىن ەتىپ تىگىلەتىن قولعاپ. مۇنداي مويىن تەرىدەن جاسالعان بيالاي قولعاپتان قىراننىڭ تۇياعى تەسىپ وتە المايدى دا ادام قولىنا زاقىم كەلمەيدى. قىس كۇندەرى بيالايدىڭ ىشىنەن كيگىز قولعاپ قوسىپ كيىلەدى.
تۇتىك. قىران جەم جەگەننەن كەيىن مولشەرلى، ولشەم بويىنشا تۇتىكپەن سۋ ۇرلەپ كەڭىردەگىنە قۇياتىن قۇرال. بۇل قۇرال ەرتەدە قۇمايدىڭ قانات توپشىسىنىڭ جىلىگىنەن جاسالادعان. بۇل جىلىك قۇرعاعاننان كەيىن وتە مايدا، سىلىق بولادى. قىراننىڭ كەڭىردەگىن جارالامايدى.
بالداق. تاۋدىڭ قىزىل تالى، قايىڭ سياقتى اعاشتان اشالاپ ٴبىر قول ەمىن-ەركىن سياتىنداي ەتىپ، قولدىڭ بىلەزىگى كەلەتىن جەرگە قۇرىم ۇلتان الاقان تارتىپ جاسايدى دا رەڭ بەرىپ بوياپ، كۇمىستەر تاعىپ اشەكەيلەيدى. ول ەردىڭ الدىڭعى جاعىنداعى ياعىني قامشىلار جاعىنداعى قول قانجىعاعا بەكەمدەپ بايلانادى. قۇسبەگىلەر اتقا مىنگەندە بالداقتى قولىنا قويىپ، بيالايىن كيىپ قىراندى قولىنا قوندىرىپ الادى. بالداق-ساياتشى سالبۇرىنعا، ۇزاق ساپارعا شىققاندا قولدىڭ تالۋ، ۇيۋىنان ساقتايدى.
تۇعىر. قايىڭ، قاراعاي، تال سياقتى اعاشتاردىڭ ٴۇش اشا تامىرىنان جاسالىپ، قىراندى قوندىرىپ قوياتىن نەگىزگى قۇرال.

قىراندى تۇلەككە بايلاۋ:
قىران تۇلەككە ٴساۋىر ايىنان قازان ايىنا دەيىن ارقاندالادى. بۇل كەزدە قىران ەركىن تۇلەۋ ٴۇشىن شىجىم، اياقباۋ، توماعالارى تۇگەل الىنىپ جىلقى قىلىنان ەسكەن جىپپەن قىراننىڭ تەگەۋىرىنىنەن كەسىپ كەتپەيتىندەي مىقتىلاپ بايلاپ كول، بۇلاق بويلارىنداعى سازداۋ جەرگە قازىققا ايلانسوق توڭگە ورناتىپ، ارقانداپ قويادى. بۇل كەزدە جەمدى قولدان جەگىزبەيدى، ولگەن مالدىڭ تازا ولەكسەلەرىن، سۇرىلەنگەن ەت جانە مويىن ەتتەردى كوك شىمعا تاستاپ بەرىپ ازىقتاندىرىپ وتىرادى. وسىلايشا، قىراننىڭ ەركىن تارانۋ، سۋ ٴىشۋ، ازىقتانۋىنا جاقسى ورتا جاراتىپ بەرەدى. بۇل كەزدە قىران جاباعى جۇندەرىن تاستاپ، سىنعان قاۋرسىندارىن تاراپ ٴجۇنىن جەتىلدىرىپ، دەنەسىن سەرگىتىپ تۇزدەگى كۇيىنە كەلەدى. ايتۋلارعا قاراعاندا ەرتەدەگى مىقتى قۇسبەگىلەر قىران قۇستارىن ٴوز قولىمەن وتىز رەت تۇلەتىپ، ومىرلىك سەرىگى ەتكەندەرى دە بار ەكەن.

 

 

 

قىراندى قايىرىپ باپتاۋ ٴادىسى:
قىراندى ادەتتە كۇيلى قۇس، كۇيسىز قۇس دەپ ەكىگە بولەدى. كۇيسىز قۇستى قولعا ۇيرەتىپ قايىرىپ بولعاننان كەيىن اڭ-قۇسقا سالا بەرەدى. بۇل قۇستى قىراننىڭ ىشىندەگى ەڭ العىرى، الىمدىسى دەپ بىلەدى. ال كۇيلى قۇستى قايىرۋ ٴبىرشاما ۇزاققا سوزىلادى. قىراندى قايىرۋ قاراشا ايىنان باستالادى. قىراندى قولعا ۇيرەتىپ، دەنەسىن قاتىرىپ، ادامعا ۇيىرلەستىرىپ، بابىنا كەلترىپ قلت ەتكەندى قيا جىبەرمەيتىندەي العىرلىعىنا اكەلۋ باسقىشىن قايىرىپ باپتاۋ ٴادىسى دەيمىز. بۇل كەزدە قىرانعا الدىمەن اق جەم جەگىزەدى. مالدىڭ ەتىن سۋعا شىلاپ مايىن، ٴسولىن كەتىرىپ اق جەم قىپ بەرەدى. مۇنى قۇستىڭ سەمىز-ارىقتىعىنا قاراي 10-15 كۇن شاماسىندا جەگىزىپ، قىراننىڭ سالماعىن كەمەيتىپ، ەتىن قاتىرادى. جاراي باستاعاندا قىران قۇسقا قويا سالىنادى. مۇنى سالۋداعى ماقسات بۇركىتتىڭ جازدايعى جەگەن ازىعىنىڭ قالدىعىن تۇگەلىمەن تازالاۋ. قويا – قامىس قويا، قامىستىڭ ۇلپىلدەك باسىن سۋعا شىلاپ، جىپپەن بۋىپ دومالاقتاپ ازىناۋلاق جەممەن قوسىپ جۇتقىزىپ جىبەرەدى. ٴجۇن قويا – كۇزەم جۇننەن جاسالادى. ٴشوپ قويا قاتارلى قويالار سالىنادى. ەتىنە كەلمەي قويعان كەيبىر جاڭا ۇستالعان اساۋ، كۇيشىل قۇستارعا قىل قويا سالىنادى. اتتىڭ، جاباعى تايدىڭ جالىن سۋمەن جۇمساتىپ جۇتقىزاتىن بۇل قويا قويانىڭ ەڭ مىقتىسى. قۇس قويانى جۇتقاننان كەيىن سەمىز، ەتىنە كەلمەگەن قۇستار ەكى كۇندە، ال بابىنا جاقىنداعان قۇستار ٴبىر تاۋلىكتە قايتا قۇسىپ تاستايدى. سول كەزدە قويامەن بىرگە قۇستىڭ اسقازانىنداعى جالىن، جالقايا، قورىتىلماعان سۇيەك-ساياق بىرگە جابىسىپ ٴتۇسىپ قالادى دا بۇركىتتىڭ دەنساۋلىعى قالپىنا كەلىپ، تابەتى ارتادى. جەمتىككە تەز ۇمتىلاتىن بولادى. بۇدان وزگە ساياتشى كۇندەلىكتى قىراننىڭ قانات-قۇيرىعىن، باسىن، موينىن، سانىن سىلاپ-سيپاپ دەنەسىندەگى قىتىقتارىن ابدەن كەتىرىپ، ادامعا ۇيىرسەك ەتىپ كوندىرەدى. جاڭا ۇستالعان شۋاساۋ قۇستاردى ىرعاققا وتىرعىزۋ، ۇيقىسىن الۋ، شارشاتۋ ادىستەرىن قولدانىپ ابدەن جۋاسىتادى دا اتقا الىپ جۇرۋگە كوندىرەدى. ات ۇستىندە، جەردە جەمتىككە شاقىرۋعا تاربيەلەپ، قۇسبەگىنىڭ داۋىسىن ەستىگەندە قولداعى قىزىلعا ۇشىپ كەلەتىندەي ەتىپ مىقتىلاپ قايىرپ باپتايدى. بۇل كەزدە قىران يەسىن تانيتىن ۇيرسەك بولىپ ساياتشىمەن دوستاسىپ كەتەدى. سوڭىندا قىراننىڭ بابىنا كەلگەن، كەلمەگەندىگىن بايقاۋ ٴۇشىن شىرعاعا ٴتۇسىرىپ كورەدى. بۇل كەزدە ساياتشىنىڭ شاكىرتى ٴۇش ٴجۇز، بەز ٴجۇز ٴتىپتى مىڭ مەتر ارالىقتان تۇلكى، قاسقىر تەرىسىن اتپەن سۇيرەتەدى.
ٴتىپتى، قىراندى مىقتاپ شىڭداۋ ٴۇشىن تۇلكىنى ىننەن ىس سالۋ، قاقپان قۇرىپ ۇستاۋ ارقىلى ٴتىرى تۇلكىنى ورەلەپ، اۋزىن تۇمىلدىرىقتاپ قويا بەرىپ تە العىرلىعىن سىنايدى. بۇل كەزدە ساياتشى ٴدوڭ باسىنان قىراننىڭ توماعاسىن تارتادى، جاراپ بابىنا كەلگەن قۇس بولسا ۇزاقپىنىڭ تاسىنداي اتىلىپ، شىرعاعا تۇسەدى. ال بابىنا كەلمەگەن قۇستار توماعاسىن تارتساڭ دا تىلەنىپ ۇشقىسى كەلمەيدى. مۇنداي بۇركىتتەردى ساياتشى قايتا بابىنا كەلگەنشە جاراتىپ اۋىرەگە تۇسەدى.
قىراندى اڭ-قۇسقا سالۋ بارىسى دا ٴار ٴتۇرلى. ماسەلەن، جون-جوتالى، تاۋلى وڭىرلەردە بيىكتەن كەلىپ شانشىلا تۇسەدى. ال جازىق، جاداعاي جەرلەردە سىپىرا تۇسەدى. قيا بەتتەردە، جار قاباقتارىنان ٴىلىپ تۇسەدى. ال ەندى قىراندى اقپاننىڭ 15-ىنەن كەيىن اڭ-قۇسقا سالۋدى توقتاتادى. مۇنداعى سەبەپ – جابايى اڭ وسى مەزگىلدە ۇيەككە تۇسەدى، قۇستار شاعىلىسا باستايدى دا ۇرپاق ٴوربىتۋ مەزگىلىنىڭ ٴبىرىنشى باسقىشىنا وتەدى.
جالپى العانداي، بۇركىت سالىپ «سالبۋرىنعا» شىعۋ باعزى زاماننان جالعاسىپ كەلە جاتقان، اتادان بالاعا مۇرەگەرلىك بويىنشا جالعاساتىن دالا مادەنيەتىندەگى ورنىن وگەيسىتۋگە بولمايتىن ەرەكشە ونەرىمىزدىڭ ٴبىر ٴتۇرى.

اۆتور: باعداۋلەت باتىربەك ۇلى

سۋرەتتەردى تۇسىرگەن اۆتور.

 دايىنداعان مايگۇل سۇلتان

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي