BAQ.kz - Қазақстан жаңалықтары USD 370.55 BAQ.kz - Қазақстан жаңалықтары EUR 421.76 BAQ.kz - Қазақстан жаңалықтары RUB 5.57
استانا:

ەلىمىزگە اكەلىنگەن فيلمدەردىڭ بارلىعى قازاقشاعا اۋدارىلادى – ۆيسە-مينيستر

استانا، baq.kz ٴتىلشىسى. بۇگىن قر پارلامەنتىنىڭ سەناتى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا «كينەماتوگرافيا» تۋرالى قر زاڭ جوباسى جانە «قر كەيبىر زاڭنامالىق اكتىلەرىنە كينەماتوگرافيا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭ جوباسى قارالدى.

زاڭ جوبالارىمەن قر مادەنيەت جانە سپورت ۆيسە-مينيسترى اقتوتى رايىمقۇلوۆا تانىستىردى. ونىڭ ايتۋىنشا، بۇل كينەماتوگرافيا سالاسىن جەكە، دەربەس سالاعا شىعاراتىن مادەنيەت سالاسىنداعى العاشقى زاڭ. ٴقازىر قازاقستانداعى كينەماتوگرافيا «مادەنيەت تۋرالى» زاڭنىڭ بىرنەشە نورمالارىمەن عانا رەتتەلىپ كەلەدى.

ۆيسە-مينيستر زاڭ جوباسىندا فيلمدەردى پروكاتتاۋ، ٴتىل ماسەلەسىنە ەرەكشە كوڭىل ٴبولىنىپ وتىرعانىن ايتتى.

«بۇگىنگى كۇنى قولدانىستاعى «مادەنيەت تۋرالى» زاڭىندا قاراستىرىلعان فيلمدەردى قازاق تىلىندە مىندەتتى تۇردە دۋبلياجداۋعا قاتىستى باپ دەكلاراتيۆتى ەكەنى بەلگىلى. ەلىمىزگە 300-گە جۋىق شەتەلدىك فيلم اكەلىنەدى. ٴىس جۇزىندە ولاردىڭ بارلىق پروكاتىنىڭ قازاق تىلىندەگى نۇسقاسى جۇرگىزىلمەيدى. بۇل كوپتەگەن سەبەپتەرمەن تۇسىندىرىلەدى. ولاردىڭ ٴبىرى – قۇقىق يەلەنۋشىلەر ٴۇشىن نورمانىڭ شىعىندىلىعى. فيلمدەردىڭ كاسىبي دۋبلياجىنا جۇمسالعان شىعىندار قازاقستان رەسپۋبليكاسى اۋماعىندا ولاردى پروكاتتاۋدان تۇسكەن كىرىستەردەن اسىپ كەتۋى مۇمكىن. قازاق تىلىنە اۋدارۋدىڭ ٴۇش نۇسقاسى ۇسىنىلىپ وتىر. بۇل فيلمدەردى دۋبلياجداۋ، سۋبتيترلەۋ نەمەسە كادردان تىس اۋدارما. بۇل حالىقارالىق تاجىريبە. قىتاي، اقش-تا بارلىق فيلمدەردى ٴتۇپنۇسقا تىلىنەن اۋديتوريانىڭ تىلىنە سۋبتيترلەۋمەن قامتاماسىز ەتۋ مىندەتى شارت سانالادى. بۇل ەڭ قولايلى جانە ٴتيىمدى مەحانيزمدەردىڭ ٴبىرى»، - دەدى اقتوتى رايىمقۇلوۆا.

ۆيسە-مينيستردىڭ ايتۋىنشا، قازاقستان اۋماعىنا ەنگەن فيلمدەر قازاق تىلىنە دۋبلياجدالۋى ٴتيىس. بۇل نورما وسىعان دەيىن ٴتيىستى دەڭگەيدە جۇمىس ىستەمەدى.

«ەندى بۇل زاڭناما ورىندالۋى ٴۇشىن «كينەماتوگرافيا تۋرالى» جاڭا زاڭ جوباسىندا ەل اۋماعىنا كىرگەن ٴفيلمدى قازاق تىلىنە اۋدارۋ تۇرعىسىندا دۋبلياجداۋ، نە سۋبتيترلەۋ، نە فيلمدەردى كادردان تىس اۋدارما جاساۋ ەسكىرىلگەن. ياعني، بۇل قازاقستان اۋماعىنا جەتكىزىلگەن فيلمدەردىڭ بارلىعى قازاقشا نۇسقاسىمەن بولۋى ٴۇشىن جاسالىپ وتىر»، - دەدى اقتوتى رايىمقۇلوۆا كۋلۋاردا بەرگەن سۇحباتىندا.

بۇعان دەيىن ۆيسە-مينيستر ۇلتتىق فيلمدەردى پروكاتتاۋ كەزىندە كينوتەاترلار كورپوراتيۆتىك تابىس سالىعىنان بوساتىلادى دەگەن بولاتىن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي