BAQ.kz - Қазақстан жаңалықтары USD 363.26 BAQ.kz - Қазақстан жаңалықтары EUR 420.11 BAQ.kz - Қазақстан жаңалықтары RUB 5.54
استانا:

جىل باسىنان بەرى زەينەتاقى جيناقتارىنىڭ جالپى سوماسى 9% ٴوستى

2018 جىلدىڭ 1 شىلدەسىنە قاراي زەينەتاقى جيناقتارىنىڭ جالپى سوماسى 8،4 تريلليون تەڭگەنى قۇراپ، جىل باسىنان بەرى 663،6 ملرد تەڭگەگە نەمەسە 9 پايىزعا ٴوستى، دەپ حابارلايدى baq.kz اقپارات اگەنتتىگىنىڭ ٴتىلشىسى «بجزق» اق ٴباسپاسوز ورتالىعىنا سىلتەمە جاساپ.

«2018 جىلدىڭ العاشقى جارتىجىلدىعىندا سالىمشىلار مەن الۋشىلاردىڭ زەينەتاقى شوتتارىنا ەسەپتەلگەن تازا ينۆەستيسيالىق تابىس سوماسى 356،4 ملرد تەڭگە بولدى. جىل باسىنان بەرى تابىستىلىق 4،5 پايىزعا جەتتى. بۇل كەزەڭدە ينفلياسيا دەڭگەيى 2،6 پايىز بولدى. ال جىلدىق تۇرعىدا الىپ قارايتىن بولساق، قوردىڭ زەينەتاقى اكتيۆتەرىنىڭ تابىستىلىعى 2017 جىلدىڭ 1 شىلدەسى مەن 2018 جىلدىڭ 1 شىلدەسى ارالىعىندا 9،5 پايىزدى قۇراپ وتىر. ال بۇل كەزەڭدەگى ينفلياسيا دەڭگەيى 5،9 پايىز بولدى»، -دەلىنگەن حابارلامادا.

اعىمداعى جىلدىڭ العاشقى التى ايى ىشىندە زەينەتاقى جارنالارى بويىنشا تۇسىمدەردىڭ جالپى سوماسى 407،5 ملرد تەڭگەگە (كەرى قايتارىلعان جارنالاردى ەسەپكە الماعاندا) جەتكەن. بۇل وتكەن جىلدىڭ سايكەس كەزەڭىمەن سالىستىرعاندا (366،4 ملرد تەڭگە بولعان) 11 پايىزعا جوعارى. بۇل رەتتە تۇسىمدەردىڭ نەگىزگى ۇلەسى مىندەتتى زەينەتاقى جارنالارىنا تيەسىلى.

«جالپى، 2018 جىلدىڭ العاشقى جارتىسىنىڭ قورىتىندىسى بويىنشا 5،6 ميلليوننان استام ادام ٴبىرىڭعاي جيناقتاۋشى زەينەتاقى قورىنا زەينەتاقى جارنالارىن اۋداردى. ال ولاردىڭ 70 پايىزى (شامامەن 4،1 ملن ادام) زەينەتاقى جارنالارىن جىلىنا كەمىندە التى رەت اۋدارادى. بۇل رەتتە ولاردىڭ تولەگەن مىندەتتى زەينەتاقى جارنالارىنىڭ سوماسى 407،4 ملرد تەڭگە بولدى. سالىستىرىپ قارايتىن بولساق، 2017 جىلى 5،9 ميلليوننان استام سالىمشى بجزق-عا جالپى سوماسى 756،1 ملرد تەڭگەگە مىندەتتى زەينەتاقى جارنالارىن اۋداردى. بۇل 2016 جىلعى كورسەتكىشتەن 8 پايىزعا جوعارى»، - دەلىنگەن حابارلامادا.

قور ەكونوميكالىق تۇرعىدان بەلسەندى تۇرعىنداردى جيناقتاۋشى زەينەتاقى جۇيەسىنە تارتۋ جانە زەينەتاقى جارنالارى بىرنەشە جىل بويى تۇسپەگەن شوتتاردى بەلسەندى ەتۋ ماقساتىندا ولاردى وڭدەۋ جۇمىستارىن قولعا العان.

«سالىمشىلاردىڭ دەرەكقورىندا 2015-2017 جىلدار ارالىعىندا اشىلعان، ٴبىراق سودان بەرى بىردە-بىر رەت جارنا تۇسپەگەن نەمەسە تۇراقتى ٴتۇسىپ تۇرماعان شوتتار انىقتالدى. 2018 جىلدىڭ اقپان-ماۋسىم ايلارى ارالىعىندا 218،4 مىڭنان استام سالىمشىمەن بايلانىس ورناتىلدى. سولاردىڭ 13 پايىزى، ياعني 29 مىڭعا جۋىق ادام قوسىمشا اقىل-كەڭەس الۋ ٴۇشىن قورعا حابارلاستى. ال 50،65 مىڭ شوتقا جارنالار اۋدارىلدى. ەكونوميكالىق تۇرعىدان بەلسەندى ازاماتتاردىڭ بارلىعىن جيناقتاۋشى زەينەتاقى جۇيەسىمەن قامتۋ ماقساتىندا بۇل باعىتتاعى جۇمىستار ودان ٴارى جالعاساتىن بولادى»، - دەلىنگەن «بجزق» اق حابارلاماسىندا.

2018 جىلدىڭ العاشقى جارتىسىندا بجزق-دان تولەنگەن زەينەتاقى تولەمدەرىنىڭ سوماسى 100،9 ملرد تەڭگە، ونىڭ ىشىندە ساقتاندىرۋ ۇيىمدارىنا جاسالعان اۋدارىمدار 8،8 ملرد تەڭگە بولعان. كەستە بويىنشا تولەمدەر 63،4 ملرد تەڭگەنى قۇراعان، ونىڭ ىشىندە: جىل سايىن – 61،9 ملرد تەڭگە، ٴۇش اي سايىن – 11،9 ملن تەڭگە جانە اي سايىن – 1،5 ملرد تەڭگە تولەنگەن. بۇدان باسقا، بجزق جالپى سوماسى 28،6 ملرد تەڭگەگە ٴبىر جولعى تولەمدەردى جۇزەگە اسىرعان. ونىڭ ىشىندە زەينەتكەرلىك جاسقا تولۋعا بايلانىستى بەرىلگەن ٴبىر جولعى تولەمدەر سوماسى – 1،6 ملرد تەڭگەنى قۇراعان.

«سالىستىرىپ قارايتىن بولساق، وتكەن جىلدىڭ سايكەس كەزەڭىندە بجزق-دان 121،2 ملرد تەڭگە، ونىڭ ىشىندە ساقتاندىرۋ ۇيىمدارىنا 14،7 ملرد تەڭگە تولەندى. جالپى تولەمدەر كولەمىنىڭ ازايۋى تولەمدەردى اي سايىن جۇزەگە اسىرۋ ٴتارتىبىن ەنگىزۋگە بايلانىستى ورىن الىپ وتىر. بۇل ٴوز كەزەگىندە تولەمدەردى الۋ ۋاقىتىن ۇزارتۋعا جانە الۋشىلاردىڭ جيىنتىق زەينەتاقىسىنىڭ كولەمىن ارتتىرۋعا سەپتىگىن تيگىزەدى. ساقتاندىرۋ ۇيىمدارىنا جاسالاتىن اۋدارىمدار كولەمىنىڭ ازايۋىنا بىرنەشە سەبەپ بار. اتاپ ايتار بولساق، ولار: ساقتاندىرۋ اننۋيتەتى شارتىن جاساسۋ ٴۇشىن لايىقتى بولاتىن سومانىڭ ٴوسۋى، زەينەتاقى جيناقتارىنىڭ ساقتالۋىنا قاتىستى مەملەكەتتىك كەپىلدىكتەن ايىرىلۋ، ساقتاندىرۋ كومپانيالارىنىڭ ۇسىناتىن شارتتارىنىڭ وزگەرۋى جانە باسقا دا سەبەپتەر»، - دەلىنگەن حابارلامادا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي