BAQ.kz - Қазақстан жаңалықтары USD 360.12 BAQ.kz - Қазақстан жаңалықтары EUR 409.67 BAQ.kz - Қазақстан жаңалықтары RUB 5.33
استانا:

حجقو قىزمەتكەرى بۇرىنعىداي بەلگىلەنگەن جالاقى المايدى – ۆيسە-مينيستر

فوتو: интернеттен

ەندى حالىقتى جۇمىسپەن قامتۋ ورتالىقتارىنداعى ازاماتتاردىڭ جالاقىسى تىكەلەي ولاردىڭ قانشا ادامدى جۇمىسقا ورنالاستىرعانىنا بايلانىستى بولادى. بۇل تۋرالى وكق-دە وتكەن بريفينگتە قر ەڭبەك جانە حالىقتى الەۋمەتتىك قورعاۋ ۆيسە-مينيسترى نۇرجان التايەۆ مالىمدەدى، دەپ حابارلايدى baq.kz ٴتىلشىسى.

الدىمەن ۆيسە-مينيستر حالىققا جۇمىس تاۋىپ بەرۋ ماسەلەسىندە جەكە سەكتوردىڭ الەۋەتىن پايدالانۋ قاجەتتىگىن اتاپ ٴوتتى.

«ٴبىز 2018 جىلدان باستاپ، حالىقتى جۇمىسپەن قامتۋ ورتالىقتارىنىڭ جۇمىسىن جەڭىلدەتۋ ٴۇشىن ٴتيىستى جۇمىستاردى جۇرگىزىپ كەلەمىز. تەك مەملەكەتتىڭ اقشاسى مەن كۇشى ارقىلى بۇل ماسەلەنى شەشۋگە تىرىسپاۋ قاجەت. الەمدەگى دامىعان مەملەكەتتەر جەكە جۇمىسپەن قامتۋ اگەنتتىكتەرى مەن جەكە ەڭبەك بيرجاسىنىڭ كومەگىنە سۇيەنەدى. سوندىقتان ٴبىز بيىل وسى جولدى تاڭدادىق»، - دەدى ول.

وسى ورايدا نۇرجان التايەۆ جاقىندا ەلباسى قول قويعان زاڭعا توقتالدى.

«زاڭ حالىقتى ٴوزىن-وزى جۇمىسپەن قامتۋدىڭ كەيبىر ماسەلەسىنە قاتىستى. مىسالى، العاشىندا ەلىمىزدەگى حالىقتى جۇمىسپەن قامتۋ ورتالىقتارى مەملەكەتتىك مەكەمە بولاتىن. ونداعى ازاماتتار بەلگىلەنگەن جالاقى الىپ كەلدى. ياعني ولار قانشا ازاماتتى جۇمىسقا ورنالاستىرعانىنا قاراماستان، بەلگىلەنگەن اقشا قولىنا تيەتىن. سوندىقتان حالىقتى جۇمىسپەن قامتۋ ورتالىقتارىنداعى ازاماتتار حالىققا جۇمىس تاۋىپ بەرۋدە قۇلشىنىسى اسا بايقالا بەرمەيتىن. ولار تەك جۇمىستا وتىرىپ، اقشاسىن الىپ كەلدى»، - دەدى ۆيسە-مينيستر.

ونىڭ ايتۋىنشا، بيىلدان باستاپ، بۇل تالاپ وزگەرەدى.

«وسى جىلى ٴبىز بۇل تالاپتى وزگەرتەمىز. ياعني جوعارىدا اتالعان زاڭدا ەلىمىزدەگى حالىقتى جۇمىسپەن قامتۋ ورتالىقتارى مكك فورماتىنا (مەملەكەتتىك كوممۋنالدىق كاسىپورنى – اۆتور) كوشەدى. ەندى حالىقتى جۇمىسپەن قامتۋ ورتالىقتارىنداعى ازاماتتاردىڭ جالاقىسى مەن مەكەمەنىڭ بيۋدجەتى تىكەلەي ولاردى قانشا ادامدى جۇمىسقا ورنالاستىرعانىنا بايلانىستى بولادى. مىسالى، ولار 5 ادامعا جۇمىس تاۋىپ بەرسە، 5 ازاماتقا بەلگىلەنگەن اقشانى الادى. وسىلايشا ٴبىز حالىقتى جۇمىسپەن قامتۋ ورتالىقتارىنىڭ جۇمىسىنا رەفورما جۇرگىزىپ جاتىرمىز»، - دەپ تۇيىندەدى ٴسوزىن نۇرجان التايەۆ.

الايدا ۆيسە-مينيستر حالىقتى جۇمىسپەن قامتۋ ورتالىعىنىڭ قىزمەتكەرى ەندى قانشا جالاقى الاتىنىن ناقتى ايتقان جوق.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي