BAQ.kz - Қазақстан жаңалықтары USD 336.39 BAQ.kz - Қазақстан жаңалықтары EUR 390.28 BAQ.kz - Қазақстан жаңалықтары RUB 5.36
استانا:

1 شىلدەدەن باستاپ بازالىق زەينەتاقى وسەدى

2018 جىلعى 1 شىلدەدەن باستاپ قازاقستاندا زەينەتاقى جۇيەسىنە قاتىسۋ وتىلىنە قاراي بازالىق تولەمدەر قايتا ەسەپتەلەتىن بولادى. بازالىق زەينەتاقى ازاماتتار جالپى بەلگىلەنگەن زەينەتكەرلىك جاسقا تولعان ۋاقىتتان باستاپ قانا تاعايىندالادى. بۇل وزگەرىستەر زەينەتكەرلىككە جاڭادان جانە بۇرىن شىققان تۇلعالاردى قامتىپ، 1 شىلدەدەن باستاپ بازالىق زەينەتاقى قايتا ەسەپتەلەدى، دەپ حابارلايدى baq.kz اقپارات اگەنتتىگى «ازاماتتارعا ارنالعان ۇكىمەت» مەملەكەتتىك كورپوراسياسى» كە اق ٴباسپاسوز قىزمەتىنە سىلتەمە جاساپ.

قازىرگى تاڭدا قازاقستاندا مەملەكەتتىك بازالىق زەينەتاقى تولەمىنىڭ مولشەرى 15 274 (ەڭ تومەنگى كۇنكورىس دەڭگەيىنىڭ 54%) تەڭگەنى قۇرايدى. بۇل تولەماقىنىڭ كولەمى ەڭبەك وتىلىنە قاراماستان، بارلىق زەينەتكەرلەر ٴۇشىن بىردەي.

2018 جىلعى 1 شىلدەدەن باستاپ مەملەكەتتىك بازالىق زەينەتاقى كولەمى زەينەتاقى جۇيەسىنە قاتىسۋ وتىلىنە قاراي قايتا ەسەپتەلەدى. ەسەپتەۋ بارىسىندا تۇلعانىڭ 1998 جىلعى 1 شىلدەگە دەيىنگى ىنتىماقتى زەينەتاقى ٴوتىلى مەن سودان كەيىنگى جيناقتالعان ٴوتىلى ەسكەرىلەدى.

ەگەر ادامنىڭ جۇمىس ٴوتىلى بولماسا نەمەسە 10 جىلدان كەم بولسا، بازالىق زەينەتاقىنىڭ مولشەرى ەڭ تومەنگى كۇنكورىس دەڭگەيىنىڭ 54%-ىن پايىزىن قۇرايدى. 10 جىلدان اسقان ٴار جىلدىڭ جۇمىس ٴوتىلى ٴۇشىن بازالىق زەينەتاقى 2 پايىزعا وسەدى. مىسالى، 20 جىلدىق قاتىسۋ ٴوتىلى بولسا، بازالىق زەينەتاقى كولەمى ەڭ تومەنگى كۇنكورىس دەڭگەيىنىڭ 74 پايىزىن، 30 جىلدىق قاتىسۋ ٴوتىلى – 94 پايىزدى قۇرايدى. ەگەر قاتىسۋ ٴوتىلى 33 جىل جانە ودان دا ارتىق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 100 پايىزىن، ياعني 28 284 تەڭگەنى قۇرايدى.

زەينەتاقى وتىلىنە ىنتىماقتى جۇيەدە اتقارعان ەڭبەك ٴوتىلى (1998 جىلعى 1 قاڭتارعا دەيىن)، مىندەتتى زەينەتاقى جارنالارى (مزج) تولەنگەن كەزەڭدى قامتيتىن جيناقتاۋشى ٴوتىلى، 3 جاسقا دەيىنگى بالا كۇتىمى، بالا كەزىنەن مۇمكىندىگى شەكتەۋلى تۇلعانىڭ 16 جاسقا دەيىنگى كۇتىمى، اسكەري قىزمەتتەگى، ارنايى مەملەكەتتىك ورگانداعى، ديپلوماتيالىق جۇمىستاعى جۇبايىمەن بىرگە تۇرعان كەزەڭ جانە ت.ب. كىرەدى.

بۇل وزگەرىستەر زەينەتكەرلىككە جاڭادان جانە بۇرىن شىققان تۇلعالاردى قامتىپ، 1 شىلدەدەن باستاپ بازالىق زەينەتاقى قايتا ەسەپتەلەدى. ايتا كەتۋ كەرەك، مەملەكەتتىك بازالىق زەينەتاقىنى قايتا ەسەپتەۋ پروسەسى اۆتوماتتى تۇردە جۇرگىزىلەدى، سوندىقتان زەينەتكەرلەرگە ەشقايدا جۇگىنۋدىڭ نەمەسە قۇجات تاپسىرۋدىڭ قاجەتى جوق.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي