USD 335.71 EUR 357.36 RUB 5.23
استانا:

ەلوردا بيۋدجەتىنىڭ جوباسى ماقۇلداندى

استانا قالاسىنىڭ قوعامدىق كەڭەسىنىڭ وتىرىسىندا ەلوردانىڭ 2017-2019 جىلدارعا ارنالعان بيۋدجەتىنىڭ جوباسى ماقۇلداندى. ەلوردانىڭ باستى قارجى قۇجاتىنىڭ جوباسىن اكىمنىڭ ورىنباسارى اندرەي لۋكين تانىستىردى. استانانىڭ الداعى 2 جىلعا ارنالعان جەرگىلىكتى بيۋدجەتىنىڭ جالپى كولەمى 660،5 ملرد تەڭگە سوماسىندا بەكىتىلدى، سونىڭ 219 ملرد تەڭگەسى كەلەسى جىلعا ارنالعان. قالا قازىناسىنىڭ نەگىزگى بابى الەۋمەتتىك سالا بولىپ تابىلادى، دەپ حابارلايدى astana.gov.kz.

«قالانىڭ بيۋدجەتى الەۋمەتتىك باعدارلانعان بولىپ قالدى. الداعى جىلى الەۋمەتتىك سالانىڭ وزىنە جالپى بيۋدجەتتىڭ 41،3%-ىن نەمەسە 90 ملرد تەڭگە ٴبولۋ جوسپارلانعان»، – دەپ اتاپ كورسەتتى اكىمنىڭ ورىنباسارى.

ٴسوز سويلەۋ بارىسىندا اندرەي لۋكين الداعى جىلى استانانىڭ رەسپۋبليكالىق بيۋدجەتتى قالىپتاستىرۋعا قانداي كولەمدە ۇلەس قوساتىنىن حابارلادى.

«جالپى سيپاتتاعى ترانسفەرتتەردىڭ كولەمدەرى تۋرالى زاڭعا سايكەس، كەلەسى جىلعا ارنالعان بيۋدجەتتىڭ جوباسىندا شىعىستار شامامەن 20،5 ملرد تەڭگەنى قۇراماق، ياعني، بۇكىل ەل بولىپ ەلوردانى سالساق، ەندى ەلوردا دونور بولا وتىرىپ، رەسپۋبليكالىق بيۋدجەتكە قارجى قۇيادى»، – دەدى اندرەي لۋكين.

سونداي-اق، ول كەلەسى جىلى جەرگىلىكتى بيۋدجەت قانداي كولەمدە كىرىس الۋدى جوسپارلاپ وتىرعانىن حابارلادى جانە ەلوردانىڭ جەكە كىرىستەرىنىڭ باستى كوزى ەڭبەكاقى تولەۋ قورىنىڭ سالىقتىق تۇسىمدەرى ەكەنىن اتاپ كورسەتتى.

«2017 جىلعا تۇسىمدەر بويىنشا بيۋدجەتتىڭ جوباسى جەكە كىرىستەر بويىنشا 212 ملرد 550 ملن تەڭگە كولەمىندە بەكىتىلدى، بيىلعا جوسپارلانعان بيۋدجەتكە قاتىستى ٴوسىم 32،5 ملرد تەڭگە نەمەسە 18%.

اتاپ وتەرلىگى، جەرگىلىكتى بيۋدجەت كىرىستەرىندە سالىق تۇسىمدەرىنىڭ ۇلەس سالماعى باسىم – 90-نان 97% -عا دەيىن. سونىڭ ىشىندە، ەلەۋلى ۇلەس ەڭبەكاقى تولەۋ قورىنىڭ سالىقتارىنا كەلەدى – تولەم كوزىنەن الىناتىن كىرىستەرگە جەكە كىرىس سالىعى – 43% جانە الەۋمەتتىك سالىق – 36%»، – دەدى اكىمنىڭ ورىنباسارى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي