USD 334.89 EUR 361.61 RUB 5.28
استانا:

ەلباسى بەينەلەنگەن بانكنوتتىڭ قانداي بولاتىنى ايتىلدى

قازاقستان رەسپۋبليكاسىنىڭ ۇلتتىق بانكى 2016 جىلعى 1 جەلتوقساننان باستاپ قازاقستان تاۋەلسىزدىگىنىڭ 25 جىلدىعىنا ارنالعان، نومينالدىق قۇنى 10 000 تەڭگەلىك مەرەيتويلىق بانكنوتتى اينالىمعا شىعارادى، - دەپ حابارلايدى tengrinews.kz ٴتىلشىسى بانكتىڭ ٴباسپاسوز قىزمەتىنە سىلتەمە جاساپ. ايتا كەتەيىك، پرەزيدەنت نۇرسۇلتان نازاربايەۆتىڭ سۋرەتى بەينەلەنگەن كۋپيۋرا تاۋەلسىزدىكتىڭ 25 جىلدىعىنا ارنالعان.

بانكنوتتىڭ ديزاينى اينالىستاعى اقشا بەلگىلەرىمەن ٴبىرىڭعاي ستيلدە ورىندالعان: بەت جاعىندا بەينەلەر باسىم تۇردە تىگىنەن، سىرت جاعىندا كولدەنەڭىنەن ورنالاسقان. بانكنوتتىڭ باسىم ٴتۇسى - كوكشىل كۇلگىن.

بانكنوتتىڭ بەت جاعىنداعى نەگىزگى بەينەلەر: "قازاق ەلى" مونۋمەنتى، ەسىك قورعانىنان تابىلعان "التىن ادامنىڭ" باس كيىمىنىڭ ٴبىر بولىگى - "ٴومىر اعاشى". گولوگرافيالىق مەتالل جولاقتا استانانىڭ كورىنىسى، قازاقستان رەسپۋبليكاسى تۇڭعىش پرەزيدەنتىنىڭ فاكسيميلەسى جانە كۇننىڭ ستيلدەندىرىلگەن بەينەسى ورنالاسقان. قازاقستان كارتاسىنىڭ بەينەسى كولبەۋ بۇرىشىن وزگەرتكەن كەزدە ٴتۇسىن وزگەرتەتىن قورعانىش ەلەمەنتىن بىلدىرەدى. كارتانىڭ بەتىندە "ماڭگىلىك ەل" دەگەن جازبا بار. سونىمەن قاتار ىلە الاتاۋىنداعى تاۋ تىزبەگى بەينەلەنگەن.
سول جاعىندا ورتاسىندا نومينالدىڭ سيفرلىق بەينەلەنۋى باسىلعان. جوعارعى وڭ جاق بۇرىشىندا شىعارۋشى بانك- "قازاقستان ۇلتتىق بانكى"، سونداي-اق قولدان جاساعانى ٴۇشىن جاۋاپكەرشىلىك تۋرالى ەسكەرتەتىن "بانكنوتتاردى قولدان جاساۋ زاڭمەن قۋدالانادى" دەگەن جازبا بار.

بانكنوتتىڭ سىرت جاعىندا نەگىزگى بەينە قازاقستان رەسپۋبليكاسىنىڭ تۇڭعىش پرەزيدەنتى، ۇلت كوشباسشىسى - نۇرسۇلتان ٴابىش ۇلى نازاربايەۆتىڭ پورترەتى بولىپ تابىلادى. پورترەت قاعازدىڭ بەتىندە بەدەرلىكتى قامتاماسىز ەتەتىن جانە ۇستاعان كەزدە سەزىلەتىن ينتاگليو (تەرەڭ باسۋ) ادىسىمەن ورىندالعان. الەمدىك تاجىريبەدە بۇل ٴادىس بانكنوتتارداعى پورترەتتەردى ورىنداعان كەزدە ٴداستۇرلى ٴادىس بولىپ تابىلادى.

ارتقى كورىنىستە قازاقستان كارتاسى بەينەسىنىڭ اياسىندا "بايتەرەك" مونۋمەنتىن قوسا العاندا، استانا قالاسىنداعى بىرنەشە عيمارات بەينەلەنگەن. قىزعىلت سارى قورعانىش ۇزىك-ۇزىك ٴجىپ بانكنوتتىڭ كولبەۋ بۇرىشىنا وراي ٴتۇسىن وزگەرتەدى. "پوددەلكا بانكنوت پرەسلەدۋەتسيا پو زاكونۋ" دەگەن جازبا بانكنوتتىڭ سول جاقتاعى تومەن بۇرىشىندا ورنالاسقان.

باسقا اقشا بەلگىلەرىمەن قاتار، بۇل بانكنوت اينالىسقا شىعارىلعان ساتتەن باستاپ زاڭدى تولەم قۇرالى بولىپ تابىلادى، سونداي-اق بارلىق تولەمدەر مەن اقشا اۋدارىمدارىندا قابىلدانۋعا مىندەتتى. تارالىمى -100 000 دانا.

ەسكە سالا كەتەيىك، 15 قاراشادا نازاربايەۆ بەينەلەنگەن جاڭا كۋپيۋرا تانىستىرىلعان بولاتىن. ول بانكنوتپەن ساۋدا جاساۋعا دا بولادى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي