BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

وقۋشىلار باعا ٴۇشىن وقىپ كەلگەن – مامان

جاڭارتىلعان ٴبىلىم بەرۋ مازمۇنىنداعى وزەكتى ماسەلەلەردى تالقىعا سالۋ ٴۇشىن 400-گە جۋىق ۇستاز استاناعا كەلدى، دەپ حابارلايدى baq.kz ٴتىلشىسى.

بۇگىن «قازمەديا» ورتالىعىندا ٴبىلىم جانە عىلىم ۆيسە-مينيسترى اسحات ايماعامبەتوۆتىڭ قاتىسۋىمەن 2017-2018 وقۋ جىلىن قورىتىندىلاۋ بويىنشا «كرييتەريالدى باعالاۋ جۇيەسى: تاجىريبە، ماسەلەلەر، كەلەشەگى» اتتى رەسپۋبليكالىق سەمينار-ترەنينگ وتۋدە.

سەمينار-ترەنينگتە ٴبىلىم بەرۋ مازمۇنىن جاڭارتۋ جونىندەگى مەكتەپ كوورديناتورلارى، 5 جانە 7-سىنىپتارعا ساباق بەرەتىن ۇستازدار، وبلىستار مەن استانا، الماتى قالالالارىنىڭ ٴبىلىم باسقارمالارى باسشىلارىنىڭ ورىنباسارلارى، وبلىستىق، قالالىق، اۋداندىق ادىستەمەلىك ورتالىقتارىنىڭ جەتەكشىلەرى قاتىسىپ جاتىر.

جيىندا جاڭارتىلعان ٴبىلىم بەرۋ مازمۇنىن ەنگىزۋ جانە كريتەريالدى باعالاۋدىڭ قورىتىندىلارى تالقىعا سالىنادى.

رەسپۋبليكالىق سەمينار-ترەنينگتە ٴسوز سويلەگەن ٴبىلىم جانە عىلىم ۆيسە-مينيسترى ەلىمىزدەگى ٴبىلىم وردالارىن جاڭارتىلعان ٴبىلىم بەرۋ مازمۇنىنا كوشىرۋ جۇمىسى جالعاسا بەرەتىنىن اتاپ ٴوتتى.

«جاڭارتىلعان ٴبىلىم بەرۋ مازمۇنىنا باياۋ كوشىپ جاتىرسىڭدار دەيدى. ٴبىراق بۇل پروسەستى تەز جۇرگىزۋ مۇمكىن ەمەس. بىزگە ۋاقىت كەرەك. جاڭارتىلعان ٴبىلىم بەرۋ مازمۇنىنا كوشۋدىڭ گرافيگى بار. وسى كەستە بويىنشا جۇمىس ىستەيمىز. سىزدەردىڭ تاجىريبەلەرىڭىز مول. سوندىقتان سىزدەردى وسى سەميناردا ايتقان ٴاربىر سوزدەرىڭىز ٴبىز ٴۇشىن وتە قۇندى. ٴوز پىكىرلەرىڭىزدى ەركىن ايتىڭىزدار»، - دەدى اسحات ايماعامبەتوۆ جينالعان مۇعالىمدەرگە.

ال بعم مەكتەپكە دەيىنگى جانە ورتا ٴبىلىم بەرۋ دەپارتامەنتىنىڭ ديرەكتورى شولپان كارينوۆا رەسپۋبليكالىق سەمينارعا قانشا ۇستاز قاتىسىپ جاتقانىن، جيىندا قانداي ماسەلەلەر تالقىعا سالىناتىنىن جەتكىزدى.

«وسى جيىندا جاڭارتىلعان ٴبىلىم بەرۋ مازمۇنىنا كوشۋ، كريتەريالدى باعالاۋ بويىنشا جەتكەن جەتىستىكتەر، وقۋشىلاردىڭ ٴبىلىم كورسەتكىشتەرى، ٴبىلىم ساپاسى قانشالىقتى كوتەرىلدى دەگەن سۇراقتارعا جاۋاپ ىزدەيمىز. سونداي-اق بۇگىن وسى ماسەلەلەر بويىنشا پىكىر الماسامىز. بۇگىنگى سەمينارعا ەلىمىزدىڭ بارلىق وڭىرىنەن 400-گە جۋىق ٴمۇعالىم قاتىسىپ وتىر»، - دەدى ول.

سونىمەن قاتار شولپان كارينوۆا كريتەريالدى باعالاۋ جۇيەسىنىڭ ەرەكشەلىگىنە توقتالدى.

«بيىل مەكتەپتەرگە كريتەريالدى باعالاۋ جۇيەسى ٴبىرىنشى رەت ەنگىزىلىپ وتىر. بۇل – جاڭارتىلعان ٴبىلىم مازمۇنىنا كىرەتىن تالاپتىڭ ٴبىرى. بۇرىنعى باعالاۋ جۇيەسى بەس بالمەن ەسەپتەلەتىن. بۇل كەڭەستىك ٴبىلىم بەرۋ جۇيەسىنەن الىنعان. ەندى وسى جۇيەنىڭ ەسكىرگەندىگى بايقالدى. ونى ۇستازدار بىرنەشە جىل بويى ايتىپ كەلدى. ال كريتەريالدى باعالاۋ جۇيەسى وقۋشىنى ناقتى جەتىستىكتەرگە جەتەلەيدى»، - دەدى ول.

ونىڭ ايتۋىنشا، وسىعان دەيىن ۇستازدار وقۋشىلارعا «2،3،4، 5» دەپ باعا قويعان. بۇل وقۋشىلاردىڭ ناقتى ٴبىلىم دەڭگەيىن كورسەتپەيدى. ەندى قازاقستاندىق وقۋشىلاردىڭ ٴبىلىمى كريتەريالدى باعالاۋ جۇيەسىمەن باعالانادى. ياعني بەلگىلى ٴبىر ٴپاننىڭ تاراۋىن وقۋشىلار وتكەننەن كەيىن ٴمۇعالىم ولاردان ساباق سۇراپ، ەمتيحان الىپ وتىرادى. وسىلايشا، وقۋشىلار بالل جينايدى. ٴپان بويىنشا قورىتىندى باعا سونىڭ ناتيجەسىندە شىعارىلادى.

«كريتەريالدى باعالاۋ جۇيەسىنە كوشكەن وقۋشىلاردان قورىتىندى ەمتيحان الىنبايدى. ول الىنىپ تاستالعان. سونى اتا-انالار تۇسىنبەي جاتىر. كرييتەريالدى باعالاۋ جۇيەسىندە بەلگىلى ٴبىر ٴپاننىڭ تاراۋىن وتكەن كەزدە وقۋشىلاردان ەمتيحان الىنادى. بىرنەشە تاقىرىپتار جيناقتالىپ، ەمتيحان جۇرگىزىلەدى. ناتيجەسىندەن مۇعالىمدەر قورىتىندى باعانى قويادى، باسقاشا ايتقاندا توقساندىق جيىنتىق باعالاۋدى جۇرگىزەدى»، - دەدى دەپارتامەنت ديرەكتورى.

ال شىعىس قازاقستان وبلىسى اياگوز اۋدانى ٴبىلىم بەرۋ مازمۇنىن جاڭارتۋ جونىندەگى جەتەكشى مەكتەپتەردىڭ كوورديناتورى نۇرجانات ەركىنبايەۆا كريتەريالدى باعالاۋ جۇيەسى وقۋشىنىڭ بىلىمىنە وبەكتيۆتى باعا بەرەدى دەگەن ويدا. ونىڭ پىكىرىنشە، وسىعان دەيىن وقۋشىلار باعا ٴۇشىن وقىپ كەلگەن.

«اشىعىن ايتقاندا، جاڭارتىلعان ٴبىلىم مازمۇنىنا وقۋشىلار دايىن بولعان جوق. ويتكەنى، وقۋشىلاردىڭ ٴبىلىمى كەڭەستىك باعالاۋ جۇيەسىمەن باعالاندى. وسىعان دەيىن بالالار باعا ٴۇشىن وقىپ كەلدى. ال جاڭارتىلعان ٴبىلىم بەرۋ مازمۇنىندا وقۋشىنىڭ ٴبىلىمى ارنايى كريتەرييلار بويىنشا باعالانىپ، توقساندىق جيىنتىق باعالاۋمەن سايكەستەندىرىلەدى. مىسالى، جاڭارتىلعان مازمۇنىنا كوشۋ ارقىلى ٴبىزدىڭ وبلىستىڭ 5-7 سىنىپتارداعى ٴبىلىم ساپاسى 20%-كە ٴوستى. ال جالپى وبلىستا ٴبىلىم ساپاسى 60% بولسا، ٴقازىر ول كورسەتكىش 75-80% ارتتى. سونداي-اق اتا-انالار تاراپىنان ريزاشىلىق بار»، - دەپ تۇيىندەدى ٴسوزىن نۇرجانات ەركىنبايەۆا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي