BAQ.kz - Қазақстан жаңалықтары USD 368.28 BAQ.kz - Қазақстан жаңалықтары EUR 419.21 BAQ.kz - Қазақстан жаңалықтары RUB 5.59
استانا:

نازاربايەۆ: ٴبىلىمدى يمپورتتاۋدىڭ تيىمدىلىگىن ۋاقىتتىڭ ٴوزى دالەلدەدى

استانا، baq.kz. «بولاشاق» حالىقارالىق ستيپەندياسىنىڭ 25 جىلدىق مەرەيتويىنا وراي استانا «ادامي كاپيتال - جاڭعىرۋ نەگىزى» اتتى حالىقارالىق فورۋم ٴوتىپ جاتىر.

فورۋم بارىسىندا مەملەكەت باسشىسى نۇرسۇلتان نازاربايەۆتىڭ "بولاشاقتىقتاردى" مەرەيتويمەن قۇتتىقتاۋىن قر مەملەكەتتىك حاتشىسى گۇلشارا ٴابدىقالىقوۆا وقىپ بەردى.

«سىزدەردى «بولاشاق» حالىقارالىق ستيپەندياسىنىڭ 25 جىلدىعى مەرەيتويىمەن شىن جۇرەكتەن قۇتتىقتايمىن. شيرەك عاسىردان بەرى ەلىمىزدىڭ تالانتتى جاستارىنا قولداۋ كورسەتىپ كەلە جاتقان «بولاشاق» ستيپەندياسى دۇنيەجۇزىنە تانىلعان قازاقستاندىق برەندكە اينالدى. ٴبىز سوناۋ 1993 جىلدان بەرى 13 مىڭ جاستىڭ شەتەلدە ٴبىلىم الۋىنا جاعداي جاساپ، ولاردىڭ زامان تالابىنا ساي بىلىكتى مامان بولۋىنا جول اشتىق. بۇگىندە «بولاشاق» ستيپەندياسىمەن وقىپ كەلگەن تۇلەكتەر ٴبىلىم بەرۋ، دەنساۋلىق ساقتاۋ، مادەنيەت، عىلىم جانە تەحنيكا سالالارىندا جۇزدەگەن عىلىمي ازىرمەلەر مەن ٴىرى جوبالاردى جۇزەگە اسىرىپ، زور جەتىستىكتەرگە جەتىپ وتىر»، - دەلىنگەن پرەزيدەنتتىڭ قۇتتىقتاۋ حاتىندا.

ەلباسى قۇتتىقتاۋىندا «بولاشاق» ارقىلى ٴبىلىم العان كارديولوگتار 33 مىڭنان استام ادامنىڭ جۇرەگىنە وتا جاساپ، ەمدەۋدىڭ 1700-دەن اسا حالىقارالىق ستاندارتى مەن الگوريتمىن ەنگىزگەنى اتاپ وتىلگەن.

«جاس ينجەنەرلەر ەنەرگەتيكا سالاسىندا باسقارۋدىڭ اۆتوماتتاندىرىلعان جۇيەسىن دامىتىپ، ٴىرى ونەركاسىپ نىساندارىندا پايدالانۋ ٴۇشىن ٴموبيلدى روبوتتار، گيبريدتى پلاتفورمالار قۇراستىردى. سونداي-اق ولار تابيعاتتى قورعاۋ، ەكولوگيالىق ورتانى ورنىقتى دامىتۋ ٴۇشىن بىرەگەي تەحنولوگيالاردى ەنگىزۋ ماسەلەلەرىنە اسا كوڭىل ٴبولىپ وتىر. قازاقستاننىڭ بولاشاعى - سىزدەردىڭ جەتىستىكتەرىڭىزگە، ەلدىڭ جاڭعىرۋىنا قوسقان ۇلەستەرىڭىزگە تىكەلەي بايلانىستى. ٴبىلىمدى يمپورتتاۋدىڭ ٴتيىمدى ەكەنىن ۋاقىتتىڭ ٴوزى دالەلدەدى. الەم ٴتورتىنشى ونەركاسىپتىك رەۆوليۋسيا داۋىرىنە قادام باسقان كەزەڭدە ٴبىزدىڭ الدىمىزعا جاڭا تالاپتار قويىلۋدا»، - دەلىنگەن حاتتا.

نۇرسۇلتان نازاربايەۆ بولاشاقتىقتاردىڭ ٴبىلىمى مەن بىلىگى، الەمنىڭ وزىق ەلدەرىنەن العان ومىرلىك جانە كاسىبي تاجىريبەسى ٴتيىمدى پايدالانىلۋى تيىستىگىن ايتتى.

«بولاشاق» ستيپەندياسى تۇلەكتەرىنىڭ ٴبىلىمى مەن تاجىريبەسى جاسامپازدىققا ۇمتىلعان بارلىق قازاقستاندىقتارعا ۇلگى بولۋى كەرەك. فورۋمعا قاتىسۋشىلارعا الەمدىك ترەندتى تالقىلاپ، ٴاردايىم جاڭا جول تاۋىپ، بيىك بەلەستەردى يگەرۋگە شاقىرامىن. بارشاڭىزعا مول تابىس پەن ساتتىك تىلەيمىن»، - دەدى پرەزيدەنت.

ەستەرىڭىزدە بولسا، نۇرسۇلتان نازاربايەۆتىڭ تىكەلەي باستاماسىمەن «بولاشاق» حالىقارالىق ستيپەندياسى 1993 جىلدان باستاپ بەرىلە باستاعان بولاتىن. شيرەك عاسىردا اتالعان ستيپەنديا ارقىلى 13 مىڭنان استام قازاقستاندىق الىس-جاقىن شەتەلدەردەن ٴبىلىم الدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي