BAQ.kz - Қазақстан жаңалықтары USD 361.66 BAQ.kz - Қазақстан жаңалықтары EUR 409.51 BAQ.kz - Қазақстан жаңалықтары RUB 5.41
استانا:

ەلىمىزدە مەكتەپ وقۋشىلارىنا ارنالعان «ولكەتانۋ» وقۋلىعى جارىق كوردى

فوتو: Автор

بيىلعى وقۋ جىلىنان باستاپ 5،6،7 سىنىپ وقۋشىلارى ٴتورت ٴپان بويىنشا دەرەكتەرمەن قامتىلعان «ولكەتانۋ» وقۋلىعىن پايدالانا الادى، دەپ حابارلايدى baq.kz اقپارات اگەنتتىگىنىڭ ٴتىلشىسى.

بۇگىن «الماتى كىتاپ» باسپاسىندا «ولكەتانۋ» وقۋلىعىنىڭ تانىستىرىلىمى ٴوتتى. جيىن بارىسىنادا وقۋلىقتىڭ اۆتورلارى ٴوز پىكىرلەرىمەن ٴبولىسىپ، اتقارعان ىستەرى بويىنشا بايانداپ بەردى.

«ەلباسى «بولاشاققا باعدار: رۋحاني جاڭعىرۋ» اتتى ماقالاسىندا «تۋعان جەر» باعدارلاماسىن ۇسىنعان بولاتىن. وسىنىڭ نەگىزىندە مەملەكەت «ولكەتانۋ» وقۋلىعىن جاسادى. بۇل جالپى ٴبىلىم بەرۋ جۇيەسىندەگى قوسىمشا وقىتۋ قۇرالى بولماق. اتالعان باعدارلاما بويىنشا 20 ساعات ٴبولىنىپ وتىر، ٴارى ول 5، 6، 7-سىنىپتاردى قامتيدى. الماتى قالاسىنىڭ «ولكەتانۋ» قۇرالى ۇعا اكادەميگى كارل بايپاقوۆتىڭ باسقارۋىمەن جانە قالا اكىمدىگىنىڭ كومەگىمەن ازىرلەندى. اۆتورلاردىڭ بارلىعى بىلىكتى ماماندار ٴارى جىل ٴمۇعالىمى اتانعان الماتىنىڭ ۇزدىك وقىتۋشىلارى. وزدەرىڭىز بىلەسىزدەر، ولكەتانۋ دەگەن – ٴوزىڭنىڭ تۇرىپ جاتقان مەكەنىڭدى تەرەڭىرەك تانىپ، بىلۋگە، ونى جاقسى كورۋگە سۇيەمەلدەيدى. سوندىقتان ٴبىز كىتاپتا پاتريوتتىق ماتەريالداردىڭ كوپتەپ بولعانىن ٴجون كوردىك»، - دەيدى «الماتى كىتاپ» باسپاسى باس رەداكتورىنىڭ ورىنباسارى الميرا ۇمبەتوۆا.

سونىمەن قاتار ول ٴار وبلىس بويىنشا «ولكەتانۋ» كىتابى باسىپ شىعارىلاتىنىن، نەگىزگى بولىگىن «الماتىكىتاپ»باسپاسى شىعاراتىنىن ايتىپ ٴوتتى.

«ٴار باسپا ەكى وبلىستان الدى. ٴبىز وسى سالادا تاجىريبەمىزدىڭ مولدىعىنا قاراي 5 وبلىس پەن ەكى قالانىڭ وقۋلىعىن شىعارامىز. ولار: الماتى وبلىسى، اقتوبە وبلىسى، تۇركىستان وبلىسى، جامبىل وبلىسى، قاراعاندى وبلىسى جانە استانا مەن الماتى قالالارى. الايدا ٴار وبلىس وقۋلىقتى وزدەرى دايىندايدى، بىزدە تەك باسىلىپ شىعارىلادى»، - دەيدى ول.

اۆتورلاردىڭ ايتۋىنشا، 2017 جىلدىڭ 10 تامىزىندا مەملەكەت اتالعان باعدارلامانى ماقۇلداپ، وقۋلىقتى ازىرلەۋگە رۇقسات بەرگەن. وقۋلىققا گەوگرافيا، قازاقستان تاريحى، مۋزىكا جانە قازاق ادەبيەتى ٴپانى بويىنشا دەرەكتەر ەنگەن.

الماتى «ولكەتانۋ» وقۋلىعى اۆتورلارىنىڭ ٴبىرى گۇلميرا اسانبەكوۆا، ٴوز وقۋلىقتارىنىڭ وزگە وبلىستىكىنەن يلليۋستراسيالىق جاعى وزىق تۇرعانىن ايتادى.

«الماتى قالاسىنىڭ «ولكەتانۋ» وقۋلىعىن ازىرلەۋدە سەگىز اۆتور قامتىلدى، ٴتورت ٴپان كىرگەندىكتەن ٴار پانگە ەكى اۆتور جۇمىلدىرىلدى. بارلىعى 20 ساعات بولسا، ونىڭ ٴ12-سى تاريح پانىنە ارنالعان. وزگە ايماقتاردا جاسالىپ جاتقان «ولكەتانۋ» وقۋلىقتارىن ينتەرنەت ارقىلى باقىلاپ وتىرامىز، وسى تۇرعىدا يلليۋستراسيالىق جاعىنان الماتى قالاسىنىڭ «ولكەتانۋ» وقۋلىعىنا جوعارى باعا بەرەمىن. ويتكەنى وندا يلليۋستراسيالىق ماتەريالدار كوپ قامتىلعان، ٴارى ونداعى ماتەريالداردىڭ كوبى بۇعان دەيىن باسقا جەرلەردە جاريالانباعان تىڭ مالىمەتتەر. بۇل وقۋشىلارعا دا اتا-انالارعا دا پايدالى وقۋلىق. سونىمەن قاتار، قازاقستان تاريحى ٴپانى بويىنشا قامتىلماعان تىڭ ماتەريالدار وسى وقۋلىققا كىرگەن. وقۋلىقتى جازۋ بارىسىندا تاپسىرمالارعا اسا ٴمان بەردىك. وقۋشىلاردىڭ فۋنكسيونالدىق ساۋاتتىلىعىن ارتتىراتىن تاپسىرمالاردى كوپ قامتىدىق، سوندىقتان بۇل وقۋلىق بالالاردىڭ كوڭىلىنەن شىعادى دەگەن ويدامىن»، - دەيدى ول.

قازاق ادەبيەتى ٴپانى بويىنشا قۇراستىرعان اۆتوردىڭ ٴبىرى گۇلميرا رىسگەلديەۆا وقۋشىلاردى ويلاندىراتىن، ىزدەنۋگە يتەرمەلەيتىن تاپسىرمالاردى كوپتەپ بەرگەندىكتەرىن ايتادى.

«بۇل وقۋلىقتىڭ قۇرىلىمدىق جاعىن اۆتورلار ويلانا كەلە تاڭدادىق. وندا «وي سەرپىن، «وي قازىق» «وي قازىنا»، «ٴبىلىپ ٴجۇر» دەگەن ايدارلار كىردى. ماسەلەن، «وي سەرپىن» ايدارى وقۋشىلاردىڭ قىزىعۋشىلىعىن ارتتىرۋعا باعىتتالسا، «وي قازىق» نەگىزگى تاقىرىپقا قاتىستى ماتەريال، «وي قازىنا» سول تاقىرىپقا قاتىستى تەرەڭدەتىلگەن مالىمەتتەر، «ٴبىلىپ ٴجۇر» ايدارىندا وقۋشىنى سەلت ەتكىزەتىن قىزىقتى دەرەكتەر بەرىلدى. ادىستەمەلىك جاعى وقۋلىقتىڭ تالاپتارىنا سايكەس قۇراستىرىلدى. ونداعى تاپسىرمالار قازىرگى ٴبىلىم بەرۋ باعدارلاماسىنا سايكەس جەكە، جۇپتىق جانە توپتىق جۇمىستارمەن قامتىلدى»، - دەيدى اۆتور.

تاعى ٴبىر اۆتور نۇرزيا مۇحامەداليەۆا وقۋلىقتا مۋزىكا ٴپانى بويىنشا ٴار سىنىپقا ٴبىر ساعاتتان عانا بولىنگەندىگىن جەتكىزدى.

«مەن 6 سىنىپتىڭ مۋزىكا ساباعىن دايىنادادىم. ول جەردەگى تاقىرىپ «تۋعان جەردىڭ تالانتتارى». ارينە ٴبىر ساعاتتا بارلىق مۋزىكا تالانتتارىن قامتۋ مۇمكىن ەمەس. قولىمىزدان كەلگەنىنشە قازاقتىڭ مۋزىكا تاريحىندا اتى قالعان اتاقتى ادامداردى قامتۋعا تىرىستىق. جىل سايىن قازاقستاندى عانا ەمەس، بۇكىل الەمدى مويىنداتىپ جاتقان دارىندى جاستارىمىز كوپتەپ شىعۋدا. دەگەنىمەن ٴبىز سوناۋ حالىقىمىزبەن جاساسىپ كەلە جاتقان، ەڭ ٴبىرىنشى حالىق اۋىز ادەبيەتى، ونىڭ ىشىندە جىرشىلار، تەرمەشىلەر، كۇيشىلەردى قامتىدىق. ودان كەيىن كاسىبي مۋزىكانىڭ ىرگەتاسىن قالاپ، تەاترلارىمىزدىڭ ساحناسىندا ونەر كورسەتكەن ەسىمدەردى الدىق. ۋاقىت ٴبىر ورنىندا تۇرمايدى، سوندىقتان الداعى ۋاقىتتا مالىمەتتەر تاعىدا وزگەرىپ وتىراتىن شىعار دەگەن ۇمىتتەمىن»، - دەيدى ول.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي