USD 335.71 EUR 357.36 RUB 5.23
استانا:

پرەزيدەنت ىزىمەن: ەلباسى شامالعانداعى كورشىسىمەن كەزدەسىپ، «اقتوبەنىڭ» ويىنىن تاماشالادى ەكسكليۋزيۆ

ەلباسى نۇرسۇلتان نازاربايەۆ جىل سايىن وڭىرلەردى ارالاپ، ٴوندىرىس ورنى، اۋىل شارۋاشىلىعى قۇرىلىمدارى مەن جالپىحالىقتىق سپورتتىق، مادەني شارالارعا قاتىسىپ ٴجۇر. اقتوبەگە ساپارى ۇنەمى ايتۋلى وقيعالارعا تولى بولدى، دەپ حابارلايدى baq.kz اگەنتتىگىنىڭ اقتوبەدەگى مەنشىكتى ٴتىلشىسى.

زاۋىتتاردى ىسكە قوسىپ، جاڭا ٴوندىرىس ورىندارىمەن تانىسۋ كەزىندە جۇمىسشىلارمەن تىلدەسەدى. حالىق ٴۇشىن قولعا الىنعان ىستەردى تىزبەكتەپ، كەيدە ٴازىل ايتىپ، يمەنىپ تۇرعان جۇمىسشىلارعا جىلىلىق سىيلادى. اقتوبەگە ساپارى كەزىندە توسىنسىيلار دا كوپ بولدى. ماسەلەن، مەملەكەت باسشىسى نۇرسۇلتان نازاربايەۆ شامالعاندا اتا-اناسىمەن كورشى تۇرعان ەۆدوكيا سانجاروۆامەن كەزدەستى. تەننيس ورتالىعىندا سپورتشىلارمەن كەزدەسىپ، وسىدان 7 جىل بۇرىن 11 جاستا بولعان ٴادىل قالياقپاروۆپەن راكەتكا ٴتۇيىستىردى. اقتوبەنىڭ 140 جىلدىعىندا «اقتوبە» فۋتبول كلۋبىنىڭ ويىنىن تاماشالادى.

«ول ماتچ، قاتەلەسپەسەم، 2005 جىلدىڭ 11 مامىرىندا وتكەن بولاتىن. كوكتەمنىڭ مامىراجاي كۇندەرىنىڭ بىرىندە بولعان سول ويىن مەنىڭ جەتكىنشەك سانامدا كادىمگىدەي جاتتالىپ قالىپتى. بالكىم، ولاي بولۋىنا سول كەزدەسۋدى ەلباسىمىزدىڭ ٴوز كوزىمەن تاماشالاۋى اسەر ەتكەن بولار. ول كەزدە جاسىم بار بولعانى 13-تە ەكەن. ستاديون ديكتورى «بۇگىنگى ويىنعا قازاقستان پرەزيدەنتى نۇرسۇلتان نازاربايەۆ قاتىسىپ وتىر» دەگەندە، جالعىز جانكۇيەرلەردىڭ عانا ەمەس، سونىمەن قاتار فۋتبولشىلاردىڭ دا اسا تولقىپ، ادەمى ويىن ورنەگىن پاش ەتۋگە تىرىسىپ باققاندارى ٴالى ەسىمدە. ستاديونداعى ادەتتەگى تاڭعاجايىپ اتموسفەرا، ەل باسشىسىنا تارتۋ ەتىلگەن سىي-جەيدە، ٴبىزدىڭ جىگىتتەردىڭ قوناقتار قاقپاسىنا جاۋاپسىز ەكى دوپ سوعۋى، ٴبارى-بارى – سمارتفونسىز، سەلفيسىز، الاڭسىز زامان بولسا دا تۋرا كەشە بولعانداي جادىمدا سايراپ تۇر. تاپ سول جىلى سۇيىكتى «اقتوبەمىز» فۋتبولدان قازاقستان بىرىنشىلىگىنىڭ نەگىزگى تروفەيىن جوعارى كوتەرسە، 2006 جىلى «اقتوبە» ەلىمىز تۇگىل، ەۋروپانىڭ تالاي مىقتىلارىن ساستىرعان الپاۋىت ۇجىمعا اينالعان ەدى...»،- دەيدى تۇراقتى جانكۇيەر مەرەي قۇپجان.

2008 جىل. ەلباسى نۇرسۇلتان نازاربايەۆ پەن سول جىلدارى رەسەي فەدەراسياسىنىڭ پرەزيدەنتى بولعان دميتريي مەدۆەدەۆ اقتوبەدە وتكەن شەكارالاس وڭىرلەردىڭ فورۋمىنا قاتىستى. اقتوبە ٴوڭىرى بۇل كۇنگە تىڭعىلىقتى دايىندالدى. «قونىس» سپورت سارايىندا قوس ەل كاسىپكەرلەرىنىڭ وندىرىستىك كورمەسى ۇيىمداستىرىلىپ، ونداعان ٴىرى جانە شاعىن كاسىپورىن ٴوز ونىمدەرىن ۇسىندى. كەزدەسۋ كەزىندە ىنتىماقتاستىق مەموراندۋمىنا قول قويىلدى. ساپار كەزىندە قوس پرەزيدەنت «نۇر عاسىر» مەشىتى مەن اۋليە نيكولسك پراۆوسلاۆيە شىركەۋىنە باردى.

ەلباسى نۇرسۇلتان نازاربايەۆ اقتوبەگە ساپارى كەزىندە ٴار جىلدارى ٴىرى ٴوندىرىس ورىندارىن ىسكە قوستى. اسىرەسە، مەتاللۋرگيا سالاسىنىڭ جاڭالىعى مول بولدى. ماسەلەن، ەۋرازيالىق توپتىڭ قۇرامىنا كىرەتىن «قازحروم» تۇك» اق فيليالى، اقتوبە فەرروقورىتپا زاۋىتىندا ٴۇش رەت كەزدەسۋ وتكىزدى. العاشقى تانىستىق 2005 جىلى ٴوتتى. ول كەزدە كەن-بايىتۋ سەحى سالتاناتتى تۇردە ىسكە قوسىلعان بولاتىن. ال 2009 جىلى الەمدە تەڭدەسى جوق №4 سەحتىڭ كاپسۋلاسىن سالدى.

«مەملەكەت باسشىسى يندۋستريالاندىرۋ كارتاسىنا ەنگەن اقتوبە فەرروقورىتپا زاۋىتىنداعى №4 سەحتىڭ ٴبىرىنشى بالقىتۋ پەشىن سالتاناتتى تۇردە ىسكە قوستى. سەح اۋماعى 47 گەكتار. جاڭا فەرروقورىتپا سەحىندا ٴتورت پەش بار. قۇرىلىستىڭ جالپى قۇنى - 843 ملن. دوللار. سەح قۇرىلىسى مەن ونى پايدالانۋعا بەرۋ حروم ٴوندىرۋدى ۇلعايتادى، سەيىلتكىش گازدار مەن شيكى قۇرامدا جىلىتۋ ارقىلى تۇراقتاندىرعىشتاردىڭ شىعىنىن تو­مەن­­دەتەدى. مۇندا مەملەكەت باسشىسى ن.نازاربايەۆ زاۋىت جۇمىسشىلارىمەن تىلدەستى. سول جىلدارى زاۋىتتىڭ بالقىتۋ ٴبولىمىنىڭ ينجەنەر-تەحنولوگى جانىبەك نۇرمۇحانوۆ ٴاردايىم مەتاللۋرگتەردى نازارىندا ۇستاپ، قولداۋ تانىتىپ كەلگەنى ٴۇشىن العىس ٴبىلدىردى»،- دەيدى زاۋىتتىڭ ٴباسپاسوز حاتشىسى ۇلتۋار اسانوۆا.

ال ەلباسىمەن ەكى رەت كەزدەسىپ، ەرەكشە ىقىلاسقا بولەنگەن جانىبەك نۇرمۇحانوۆ بۇگىندە ٴار جۇزدەسۋدىڭ ساتتىلىك اكەلگەنىن ايتىپ ٴجۇر.

«2009 جىلدىڭ قىركۇيەگى بولاتىن. ەلباسى وڭىرگە ساپارى كەزىندە اقتوبە فەرروقورىتپا زاۋىتىنىڭ جاڭا سەحىنا ارنالعان كاپسۋلانى سالدى. ول كەزدە مەن №1 بالقىتۋ سەحى باستىعىنىڭ ورىنباسارى ەدىم. ەلباسى الدىندا «ەلىمىزدىڭ بولاشاعى ٴبىز سياقتى جاستاردىڭ قولىندا، سوندىقتان دا تالاي ەڭبەك بەلەستەرىن باعىندىرىپ، مەتاللۋرگيا سالاسىنا وزىندىك قولتاڭبامىزدى قالدىرامىز» دەپ جاستاردىڭ اتىنان ۋادە بەرىپ، قول الىسقان ەدىم. وسى كەزدەسۋدەن كەيىن كوپ ۇزاماي-اق «قازحروم» تۇك» اق-نىڭ تۇرعىن ٴۇي باعدارلاماسى بويىنشا اقتوبە قالاسىنداعى «باتىس-2» شاعىن اۋدانىنان زامان تالابىنا ساي سالىنعان ەكى بولمەلى پاتەرگە يە بولدىم. قازىرگى تاڭدا وتباسىممەن وسى پاتەردە تۇرىپ جاتىرمىن. اراعا بەس جىل سالىپ «قازحروم» تۇك» اكسيونەرلىك قوعامىنىڭ جاڭا فەرروقورىتپا زاۋىتىنىڭ ىسكە قوسۋ شاراسىندا ەكىنشى رەت ەلباسىمەن كەزدەستىم.

جاڭا زاۋىت قۇرىلىسىنا قاتىسقان جاس مامانداردىڭ اتىنان كومپانيادا جاستارعا قاراستىرىلعان جەڭىلدىكتەر جايىن بايانداپ بەردىم. ٴسوزىمدى ەرەكشە ٴبىر ىقىلاسپەن تىڭداعان ەلباسى قولىمدى الىپ، ريزاشىلىعىن ٴبىلدىردى. سونداي-اق ەلباسىمەن ەستەلىككە سۋرەتكە ٴتۇسىپ، ٴبىر جاساپ قالدىم. كەيدە دوستارىم قالجىڭداپ، «ەندى قاشان پرەزيدەنتپەن كەزدەسەسىڭ؟» دەپ ازىلدەيدى. مەن دە ەش ويلانباستان «مەتاللۋرگيا سالاسىندا امان-ەسەن جۇرسەم ٴالى تالاي كەزدەسىپ، اڭگىمەلەسەمىن» دەپ جاۋاپ بەرەمىن»،- دەيدى «قازحروم» تۇك» اق-نىڭ جاڭا فەرروقورىتپا زاۋىتىنىڭ دايىنداۋ جانە ىسكە قوسۋ ۋچاسكەسىنىڭ جاڭا تەحنولوگيالاردى ەنگىزۋ جونىندەگى باس مامانى جانىبەك نۇرمۇحانبەتوۆ.

مەملەكەت باسشىسى نۇرسۇلتان نازاربايەۆ اقتوبەگە ساپارى كەزىندە اگرارلىق سالانىڭ جەتەكشىلەرىمەن ٴجيى كەزدەستى. جىلىجاي، ەت وڭدەۋ كەشەنى مەن بالىق شارۋاشىلىعى، ۇن وڭدەۋ، قۇس ٴوسىرۋ سالاسىمەن تانىسىپ، اۋىل شارۋاشىلىعى قۇرىلىمدارىنا قولداۋ كورسەتتى، مەملەكەت تاراپىنان بەرىلەتىن كومەك جايىن ايتتى.

ەل بىرلىگى مەن تاتۋلىعىن پاش ەتكەن شارالار دا ەلباسى نازارىنان تىس قالعان جوق. ماسەلەن، 2009 جىلدىڭ كۇزىندە اقتوبەدە «دوستىق» ٴۇيى اشىلدى.

مۇندا 18 ەتنو-مادەني ورتالىق پانالاپ وتىر. ولار ٴوز ٴتىلىن ۇيرەنىپ، ٴسالت-داستۇرىن ساقتاۋ جولىندا بوسقاسادى. ۇلتتىق بي ۇجىمدارى وبلىستاعى بارلىق مادەني شارالارعا بەلسەنە قاتىسىپ، تاتۋلىقتى ساقتاۋدا سۇبەلى جۇمىس ىستەپ ٴجۇر.

2014 جىل. اقتوبە. «دارۋ» وڭالتۋ ورتالىعى. ەلباسى نۇرسۇلتان نازاربايەۆ شامالعان اۋىلىنداعى كورشىسى ەۆدوكيا سانجاروۆامەن كەزدەستى.

«شامالعان اۋىلىندا جۇبايىم يۆان سانجاروۆ، تۋعان-تۋىستارىم قاي­تىس بولعان سوڭ، ٴسىڭلىم ماريا مە­­نى اقتوبەگە شاقىردى. ٴسويتىپ، 1999 جىلى وسى جاققا قونىس اۋدار­دىم. العاشىندا ٴبارى جاقسى بولدى. ٴبىز جاز بويى ساياجايعا بارىپ، كو­كو­نىس ەكتىك. قىس تۇسە، ٴتۇرلى جەمىستەن پى­سىرگەن توساپ، كوكونىستى ساتىپ ەدىك. ۋاقىتىمىز جاقسى ٴوتىپ، ٴسىڭلىم ەكەۋ­مىز بىر-بىرىمىزگە سۇيەۋ بولدىق. ال ول قازا تاپقان سوڭ مەن جالعىز قالىپ، دەنساۋلىعىم دا سىر بەرە باستادى. ەمحاناعا حابارلاسىپ، دارىگەر شا­قىردىم. ەشكىم كەلمەدى، ٴبىراق ٴبىر كۇنى ۇيگە «دارۋ» ەمحاناسىنىڭ باس دا­رىگەرى مەرەكە مارات ۇلى باس سۇ­عىپ، ەرتەڭ اۋرۋحاناعا جاتاتى­نىم­دى ايتتى. سول ەمحاناعا بىرنەشە رەت جاتىپ، ەم قابىلدادىم. كەزەكتى ەم قابىلداۋ كەزىندە سۇلتان كەلىپ، قۋانىپ قالدىم. مەن شامالعاننان كوشىپ كەتكەن سوڭ، ول جاققا بارمادىم، سۇلتاندى كور­مەدىم. ارادا 15 جىل وتكەندە قاي­تا قاۋىشۋعا، ونى قۇشاقتاپ، امان­دىعىن بىلۋگە تاعدىر جازدى. شا­­مالعانداعى ٴۇيدىڭ جانىندا ورىن­­دىق بولدى. سول جەردە وتىرعان كەز­دە كىشكەنتاي سۇلتان كەلىپ جا­نى­مىزعا جايعاسادى، قۇشاقتاپ سۇيۋگە مۇمكىندىك بەرمەي قاشىپ كەتەدى. ال اقتوبەگە كەلگەندە ونى قۇشاقتاپ، ٴسۇيدىم دە كىشكەنتايىندا سۇيۋگە ەش مۇمكىندىك بەرمەي كەتىپ قالاتىنىن ەسكە سالدىم»،- دەيدى قاريا.

ەلباسى نۇرسۇلتان نازاربايەۆ اقتوبەگە ساپارى كەزىندە سپورتتىق نىسانداردى ىسكە قوستى، حالىقارالىق تاراپقا ساي كەلەتىن كەشەندەردىڭ جۇمىسىمەن تانىستى. «دوستىق» سۋ سپورتى كەشەنى مەن تەننيس ورتالىعىندا بولدى. ٴتىپتى، «اقتوبە» فۋتبول كلۋبىنىڭ ويىنىن تاماشالاپ، ارنايى سىيلىق الدى.

ال سۋدا جۇزۋدەن وبلىستىق، رەسپۋبليكالىق بىرىنشىلىكتەردىڭ جەڭىمپازى، قر كۋبوگىنىڭ يەگەرى ايبەك كامزەنوۆ «دوستىق» سۋ سپورتى كەشەنىندەگى كەزدەسۋدى جىلى شىرايمەن ەسكە الادى. ەلباسى نۇرسۇلتان نازاربايەۆپەن بەتپە-بەت كەلگەن سپورتشى حالىقارالىق تالاپقا ساي سالىنىپ، سپورتشىلارعا بارلىق جاعداي جاسالعان كەشەننىڭ جۇمىسىنا ساتتىلىك تىلەگەنىن ايتادى.

«مەملەكەت باسشىسىمەن كەزدەسۋ، تىلدەسۋ ۇلكەن مارتەبە. ٴبىز سۋدا ٴجۇزۋدىڭ جاقسى ۇلگىسىن كورسەتتىك، مەملەكەت باسشىسىمەن بىرگە سۋرەتكە تۇستىك. بىزگە ريزا بولىپ، سپورتتىق جولىمىزعا ساتتىلىك تىلەدى. مىنە، سول كەزدەسۋدەن سوڭ «دوستىق» سۋ سپورتى كەشەنىنە كەلىپ، جاتتىعاتىن بالالار مەن جاسوسپىرىمدەر قاتارى ارتتى. ٴبىزدىڭ ەلىمىزدە سپورتپەن شۇعىلدانامىن دەگەن ادامعا بار جاعداي جاسالعان. مۇنىڭ ٴبارى ەلباسى نۇرسۇلتان نازاربايەۆتىڭ ۇتقىر شەشىمدەرى مەن ۇتىمدى جۇمىسىنىڭ جەمىسى»،- دەيدى اقتوبەلىك سپورتشى ا.كامزەنوۆ.

تۇڭعىش پرەزيدەنت كۇنى جانە تاۋەلسىزدىگىنىڭ 25 جىلدىعىنا وراي «ٴاليا» مەموريالدىق مۋزەيى مەن اقتوبە وبلىستىق مەملەكەتتىك مۇراعاتى «ۇلت ماقتانىشى - ەلباسى» اتتى فوتوقۇجاتتار كورمەسىن ۇيىمداستىردى. كورمەگە مۇراعاتتاعى بىرەگەي سۋرەتتەر قويىلدى.

«ەلباسى نۇرسۇلتان نازاربايەۆ اقتوبەگە 80 جىلى ححiv پارتيا كونفەرەنسياسىنا كەلگەن بولۋى مۇمكىن. سەبەبى، مۇراعاتتا سويلەگەن ٴسوزى بار، تۇزەتىلگەن. بۇل قۇجات ٴالى دە زەرتتەۋدى قاجەت ەتىپ تۇر. ال 1984 جىلى قازاق سسر كوممۋنيستىك پارتياسى ورتالىق كوميتەتىنىڭ ٴبىرىنشى حاتشىسى دىنمۇحامبەت قونايەۆ پەن سول جىلدارى قازاق سسر مينيسترلەر كەڭەسىنىڭ ٴتوراعاسى نۇرسۇلتان نازاربايەۆ اقتوبەگە كەلگەن. ولار گەولوگياق مۋزەيگە، ٴاليا مولداعۇلوۆا اتىنداعى مۋزەيگە بارعان. بۇل فوتوسۋرەتتەر مۇراعاتتاۋلى ساقتاۋلى. قازىرگى ۋاقىتتا «ۇلت ماقتانىشى - ەلباسى» دەگەن اتپەن تۇراقتى كورمە رەتىندە قويىلدى»،- دەيدى وبلىستىق مادەنيەت، مۇراعاتتار جانە قۇجاتتاما باسقارماسىنىڭ قۇجاتتاردى جاريالاۋ جانە پايدالانۋ توبىنىڭ باسشىسى باقىتگۇل ەشمۇراتوۆا.

ەلباسى نۇرسۇلتان نازاربايەۆتىڭ اقتوبەگە ساپارى ٴاردايىم تابىستى بولدى. كاسىپكەرلەر مەن شارۋالار، باسشىلار مەن قاراپايىم جۇمىسشىلار، ستۋدەنتتەر مەن وقۋشىلار، سپورتشىلار نازاردان تىس قالمادى. ٴارقايسىسى ەرەكشە ىقىلاسپەن، زور قوشەمەتپەن قارسى الىپ، مەملەكەت باسشىسىنا تابىس تىلەدى.

التىناي ساعىندىقوۆا

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي