USD 334.89 EUR 361.61 RUB 5.28
استانا:

پرەزيدەنت ىزىمەن: ەڭ قىمبات جوبا. ەلباسىنىڭ تىكەلەي تاپسىرماسىمەن سالىنعان ٴبىلىم ورداسى ەكسكليۋزيۆ

تاۋەلىزدىك جىلدارى ەلباسى نۇرسۇلتان نازاربايەۆ ەرتىس وڭىرىندە جۇمىس ساپارىمەن سان مارتە بولعانى بەلگىلى. رەسمي ساپار بارىسىندا ەل پرەزيدەنتى ٴوڭىردىڭ الەۋمەتتىك-ەكونوميكالىق دامۋىمەن تانىسۋمەن قاتار، حالىقتىڭ كادەسىنە جارايتىن نىسانداردىڭ اشىلۋ راسىمدەرىنە قاتىسۋدى يگى داستۇرگە اينالدىرعان. baq.kz اگەنتتىگىنىڭ پاۆلودارداعى مەنشىكتى ٴتىلشىسى وبلىس جۇرتشىلىعى «تاۋەلسىزدىك تارتۋى» دەپ بىلەتىن الەۋمەتتىك ٴھام وندىرىستىك نىسانداردىڭ بۇگىنگى تىنىس-تىرشىلىگىنە كوز جۇگىرتىپ كوردى.

«ەلباسىعا ۋادە ەتتىك» - ٴوڭىر شارۋالارى

ٴىس-ساپارلارى بارىسىندا نۇرسۇلتان نازاربايەۆ وندىرىستىك ٴوڭىردىڭ وركەندەۋىنە سۇبەلى ۇلەس قوسقان ازاماتتاردىڭ باستامالارىن قولداپ، دەم بەرگەنى راس. سونداي جانداردىڭ قاتارىندا بۇگىندە ساپالى ٴونىمى الىس-جاقىن شەتەلگە «ساعىپ» برەندىمەن تانىلعان كاسىپكەر تولەۋ قۇشمانوۆا بار.

«ٴوز باسىم ەلباسىمەن ٴتورت رەت كەزدەستىم. جۇزدەسۋ بارىسىندا نۇرسۇلتان ٴابىش ۇلىنا قازاعىمىزدىڭ قىمىزىن شەتەلگە تانىتامىن دەپ ۋادە بەرگەن ەدىم. بۇگىندە بۇل ارمانعا دا قول جەتكىزدىك. بۇگىندە ۇلتتىق سۋسىنىمىزدى رەسەي، بىرىككەن اراب امىرلىكتەرىنە دە تاسىمالدايمىز. 25 جىل بۇرىن كىم ەدىم؟ مەن بيە ساۋعان قاراپايىم ايەل ەدىم. ال بۇگىندە نازىك جاندى كاسىپكەر اتانعان جايىم بار. تاۋەلسىزدىكپەن بىرگە تۇلەگەن شارۋاشىلىعىمدا 500-گە جۋىق بيە بار. ەندىگى ماقسات – قازاقتىڭ قۇرتىن الەمگە تانىتۋ. ازىرگە قىتايعا ەكسپورتتاپ جاتىرمىز»، - دەيدى تولەۋ قۇشمانوۆا.

(فوتو: اقوردا سايتىنان الىندى)

ەلباسى ۇستىمىزدەگى جىلعى قىركۇيەكتىڭ 29-ى كۇنى ەرتىس وڭىرىندە بولىپ، اگروونەركاسىپ سالاسىنىڭ دامۋىمەن تانىسقان ەدى. وبلىستىڭ اۋلى شارۋاشىلىعىنىڭ الەۋەتىن پاش ەتەتىن ارنايى كورمە بارىسىندا ەلباسى قازاق ەلىنە تانىمال لەبياجى اۋدانىندا وسىرىلەتىن قاربىزدان ٴدام تاتتى. اۋداننىڭ قۇنارلى جەرىندە «قاربىزشى» اتانىپ كەتكەن قايرات شاپۋوۆ جىل سايىن ٴتاتتى جيدەكتىڭ 92 سۇرىبىن ەگەدى ەكەن.

«ەلباسىمەن كەزدەسكەن ساتتە قاربىزدان بولەك، اسقاباقتىڭ شەمىشكەلەرىن وڭدەۋدى جوسپارلاپ جاتقانىمدى جەتكىزدىم. نۇرسۇلتان ٴابىش ۇلى قولداۋ ٴبىلدىردى. پرەزيدەنىمىزدىڭ سەنىمىن اقتاۋ ماقساتىندا، مىنە، دىتتەگەن ماقساتىما دا جەتتىم. وڭدەۋدىڭ وسى تۇرىمەن ەلىمىزدە بىردە ٴبىر شارۋا اينالىسپايدى ەكەن»، - دەيدى قايرات شاپۋوۆ.

بىرەگەي. جالعىز.

2007 جىل. ەلباسىنىڭ پاۆلودارعا ٴىس-ساپارى. ٴدال وسى كەزدە پاۆلودار وبلىسىندا عانا ەمەس، قازاق ەلىندە بىرەگەي اليۋمينيي ٴوندىرىسى باستاۋ الدى. وڭىردە «قازاقستان ەلەكتروليز زاۋىتىنىڭ» العاشقى كەزەگى بوي كوتەردى. بۇل كاسىپورىن قازاقستانداعى العاشقى جانە جالعىز جوعارى تاڭبالى باستاپقى اليۋمينيي ٴوندىرۋشى بولىپ تابىلادى. وتاندىق مەتاللۋرگيانىڭ فلاگمانى بولىپ ەسەپتەلەدى. ايتا كەتەيىك، دۇنيەجۇزىندەگى وسىنداي 200 اليۋمينيي الپاۋىتتارى اراسىنداعى ۇزدىك وندىققا كىرەدى. ساپالى ٴونىم رەسەي، بەلورۋس، ۋكراينا، وزبەكستانعا ەكسپورتتالادى. قازىرگى تاڭدا بۇل زاۋىتتى 2500-دەن استام ادام ەڭبەك ەتەدى.

پاۆلوداردىڭ العاشقى مەتاللى وسىلاي الىنىپ، ٴتۇستى مەتاللۋرگيا كلاستەرىنىڭ قالىپتاسۋىنا سەرپىن بەردى. بۇگىندە زاۋىت بىر جىلدا 250 مىڭ ٴونىم شىعارادى.

(فوتو: اقوردانىڭ سايتىنان الىندى. 18 قىركۇيەك 2012 جىل)

- مەن سىزدەردى زاماناۋي انودتى زاۋىتتىڭ اشىلۋىمەن قۇتتىقتايمىن. بۇل - مۇلدە جاڭا بىرەگەي تەحنولوگيا. ەندى سىزدەردە تۇراقتى جۇمىس جانە جاقسى ەڭبەكاقى بار. «قازاقستان ەلەكتروليز زاۋىتىنىڭ» جوسپارىندا كەلەشەكتە قۇيۋ ٴوندىرىسىن كەڭەيتۋ قاراستىرىلعان، - دەدى مەملەكەت باسشىسى.

ايتا كەتەيىك، ەلەكتروليز زاۋىتى بيىلعى جىلدى تابىستى كورسەتكىشتەرمەن باستادى. ولاي دەيتىنىمىز، كاسىپورىندا 100 مىڭىنشى انود شىعارىلدى. كاسىپورىننىڭ ٴباسپاسوز قىزمەتى حابارلاعانداي، انود، ياعني، ەلەكترود اليۋمينيي وندىرىسىنە قاجەتتى ٴبىر توننا «قاناتتى» مەتالل الۋ ٴۇشىن 500 كيلوگرامم انود كەرەك.

بۇرىن قازاقستان ەلەكتروليز زاۋىتىندا قىتايدا شىعارىلاتىن انودتار قولدانىلعان. 2014 جىلدىڭ كۇزىندە، ەۋرازيالىق توپتىڭ 20 جىلدىعى قارساڭىندا قازاقستان ەلەكتروليز زاۋىتى انود شىعارا الادى.

ايتا كەتەرلىگى، جوعارى تەحنولوگيالىق جانە ەكولوگيالىق جاعىنان ٴقاۋىپسىز ٴوندىرىستىڭ ٴبىرى – قازاقستان ەلەكتروليز زاۋىتىنىڭ ەلەكترودتار شىعاراتىن سەحى پاۆلودار وبلىسىنداعى اليۋمينيي كلاستەرىن قالىپتاستىرۋشى بۋىننىڭ بىرىنە اينالدى. مۇندا زياندى زاتتاردى 99،5 پايىزعا تازارتاتىن وتە ٴتيىمدى گازتازالاۋ قۇرىلعىسى ورناتىلعان.

تاۋەلسىزدىككە تارتۋ. بىرەگەي كوپىر

بيىلعى جىلى نۇرسۇلتان نازاربايەۆ ورتا ازياداعى تەڭدەسى جوق كوپىردىڭ قۇرىلىس بارىسىمەن تانىسقان بولاتىن. قۇرىلىسشى ارداگەرلەر نىساندى ەل تاۋەلسىزدىگىنىڭ 25 جىلدىعىنا وراي اتاۋ تۋرالى ويلارىن جەتكىزدى. نيەت قابىل بولدى. ەندى الىپ كوپىر تاۋەلسىزدىك كۇنى قارساڭىندا پايدالانۋعا بەرىلەدى.

(فوتو: اقوردانىڭ سايتىنان الىندى)

«كوپىردىڭ قۇرىلىسى اياقتالۋعا جاقىن. قازىرگى تاڭدا بۇل جەردە مىڭنان استام وندىرىستىك كەستەگە ساي جۇمىستارىن جۇرگىزىپ جاتىر. نىسان پايدالانۋعا بەرىلگەن سوڭ نىسان ارقىلى تاۋلىگىنە 7 مىڭنان استام كولىك قاتىنايدى دەپ كۇتىلۋدە. بۇل – ٴبىز ٴۇشىن زور جەتىستىك»، - دەيدى قۇرىلىسشىلار.

ايتا كەتەيىك، قۇرىلىس ماتەريالدارىنىڭ بارلىعى دەرلىك ەلىمىزدە شىعارىلعان. بۇل نىساندى سالۋعا 10 مىڭ توننا مەتالل، 12 مىڭ توننا بەتون مەن 17 مىڭ توننا قوسالقى ماتەريال قولدانىلعان.

ەڭ قىمبات جوبا

پاۆلودار وبلىسىندا «ۇدەمەلى يندۋستريالىق-يننوۆاسيالىق دامۋ» باعدارلاماسى اياسىندا 79 ىلكىمدى جوبا جۇزەگە اسىرىلدى. ناتيجەسىندە 7 مىڭنان استام جاڭا جۇمىس ورنى اشىلدى.

(فوتو. اقوردا سايتىنان الىندى)

پاۆلودار وبلىسىنىڭ ەكونوميكالىق دامۋىنە زور سەرپىن بەرگەن جوبالاردىڭ ٴبىرى – بوزشاكول كەن بايىتۋ فابريكاسى. ەلباسى ساپارى بارىسىندا كاسىپورىننىڭ كاولين بالشىعى بار كەندەرى وڭدەيتىن فابريكاسى ىسكە قوسىلدى.

قازاقستان پرەزيدەنتى جينالعانداردى وسى تاريحي جاڭالىقپەن قۇتتىقتاپ، جاڭا ٴوندىرىستىڭ ىسكە قوسىلۋى پاۆلودار وبلىسىنىڭ يندۋستريالىق-يننوۆاسيالىق الەۋەتى جوعارى ەكەنىن كورسەتەتىنىن اتاپ ٴوتتى.

– جاڭا كاسىپورىن بوزشاكول تاۋ-كەن بايىتۋ كومبيناتىنىڭ كەندى قايتا وڭدەۋ قۋاتىن 30 ملن تونناعا، مىس كونسەنتراتىن ٴوندىرۋ كولەمىن 100 مىڭ تونناعا دەيىن ارتتىرۋعا مۇمكىندىك بەرەدى، – دەدى نۇرسۇلتان نازاربايەۆ.

(فوتو. اقوردا سايتىنان الىندى)

ەسكە سالا كەتسەك، 2015 جىلدىڭ جەلتوقسان ايىندا بوزشاكول كبك-نىڭ جىلىنا 25 ملن توننا ٴسۋلفيدتى كەندەردى وڭدەۋگە قۋاتى جەتەتىن بايىتۋ فابريكاسىندا ىسكە قوسۋ جانە رەتتەۋ جۇمىستارى باستالعان بولاتىن. ال 2016 جىلدىڭ اقپان ايىندا مۇندا العاشقى مىس كونسەنتراتى ٴوندىرىلدى. ال وڭدەۋ قۋاتى جىلىنا 5 ملن توننا كەندى قۇرايتىن جاڭا كاسىپورىن ىسكە قوسىلعاننان كەيىن جالپى جىلدىق وڭدەۋ كولەمى 30 ملن توننا كەنگە جەتەدى.

«جاڭا فابريكادا كاولين بالشىعى بار كەننەن تاۋارلى مىس كونسەنتراتىن ٴوندىرۋ 2016 جىلى باستالادى دەپ كوزدەلىپ وتىر. كاولين بالشىعى بار كەندەر تولىعىمەن وڭدەلگەننەن كەيىن كاسىپورىن ٴسۋلفيدتى كەن بايىتۋ فابريكاسى بولىپ قايتا جاراقتالادى.

كەڭەستىك داۋىردە بوزشاكولدەگى كەن قازۋ جۇمىستارى مۇنداعى قۇرامىندا سازى جوعارى كەننىڭ كوپ بولۋىنان قيىنداعان. كاولين بالشىعى بار كەندەردى وڭدەيتىن تەحنولوگيالار جوق ەدى. تەحنولوگيالاردىڭ دامۋى ارقاسىندا بوزشاكولدىك قورلاردى وڭدەۋگە قول جەتتى. بيىلعى جىلدىڭ سوڭىنا دەيىن بوزشاكولدە كاتود ەكۆيۆالەنتىندەگى 45-55 مىڭ توننا مىس جانە قۇيما ەكۆيۆالەنتىندەگى 50-60 مىڭ ۋنسيا التىن وندىرىلەدى»، - دەپ حابارلادى كاسىپورىننان.

بۇگىندە ٴوندىرىس وشاعىندا 1500 جۋىق ادام جۇمىس ەڭبەك ەتەدى.

دارىندىلار مەكەنى

وسىدان ٴتورت جىل بۇرىن ەكىباستۇز قالاسىندا 650 ورىندىق مۋزىكالىق مەكتەپ قولدانىسقا بەرىلدى. بۇعان دەيىن ەكىباستۇزدىڭ قۇرمەتتى ازاماتتارى شاھارعا مۋزىكا مەكتەبى كەرەكتىگىن ەلباسىنا حات ارقىلى جەتكىزگەن. وسىلايشا، ٴبىلىم وشاعى پرەزيدەنتتىڭ تىكەلەي تاپسىرماسىمەن سالىندى. ٴسانى مەن ساۋلەتى كەلىسكەن ونەر ورداسىنىڭ قازاقستان بويىنشا بالاماسى جوق. اراعا بىرنەشە جىل سالىپ پرەزيدەنت وقۋشىلاردىڭ شىعارماشىلىعىمەن تانىسىپ، مەكتەپتىڭ تىنىس-تىرشىلىگىمەن تانىسقان ەدى.

مەكتەپ ديرەكتورىنىڭ ورىنباسارى ۆيكتوريا راحمانينوۆانىڭ ايتۋىنشا، قازىرگى تاڭدا 7-17 جاس ارالىعىنداعى دارىندى ۇل-قىزدار ٴبىلىم الۋدا.

«مەكتەپ اشىلعالى بەرى 1500-گە جۋىق مۋزىكان تۇلەپ ۇشتى. بۇگىندە ولاردىڭ ٴبىر بولىگى مەكتەبىمىزدە ۇستازدىق ەتسە، قالعانى ەلىمىزدىڭ ۇزدىك شىعارماشىلىق ۇجىمدارىندا ەڭبەك ەتۋدە. مەكتەپتە دومبىرا، پريما-دومبىرا، قوبىز، فورتەپيانو، سكريپكا، بايان، اككوردەون، فلەيتا، گيتارا، شەرتەر سىنىپتارى، سونىمەن قاتار، ۇلتتىق اسپاپتار، ۆوكال-حور، ىشەكتى اسپاپتار سىندى بولىمدەر بار»، - دەيدى ۆيكتوريا راحمانينوۆا.

جالپى، 25 جىلدا 100 جىلعا تاتيتىن ىستەر اتقارىلدى. بۇل سوزدەردى ەلباسى جاڭا كوپىر باسىندا كەزدەسۋىندە ايتقان بولاتىن.

«پاۆلودارلىقتارعا بۇدان ارتىق باعا كەرەك ەمەس»، - دەيدى زيالى قاۋىم.

ەرمەك ەلەمەس

فوتو اۆتوردىكى

سسىلكي پو تەمە:
05 جەلتوقسان 2016, 09:05
سقو-دا شاڭعى مارافونى ٴوتتى
كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي