BAQ.kz - Қазақстан жаңалықтары USD 375.9 BAQ.kz - Қазақстан жаңалықтары EUR 423.56 BAQ.kz - Қазақстан жаңалықтары RUB 5.55
استانا:

نازاربايەۆ شقو حالقىن استانانىڭ 20 جىلدىعىمەن قۇتتىقتادى

ەلباسى نۇرسۇلتان نازاربايەۆ شىعىس قازاقستان وبلىسىنىڭ اكىمى دانيال احمەتوۆكە ٴوڭىر حالقىن استانا مەرەيتويىمەن قۇتتىقتاۋ حاتىن جولدادى. بۇل تۋرالى baq.kz اقپارات اگەنتتىگى وبلىس اكىمىنىڭ ٴباسپاسوز قىزمەتىنە سىلتەمە جاساپ حابارلايدى.

قۇتتىقتاۋ حاتتا مەملەكەت باسشىسى شىعىس قازاقستان وبلىسىنىڭ ەلوردانىڭ تۋعان كۇنىنە جاساعان تارتۋى ەرەكشە سىي بولعانىن اتاعان.

«قۇرمەتتى دانيال كەنجەتاي ۇلى! ٴسىزدى جانە بۇكىل شىعىس قازاقستان وبلىسىنىڭ جۇرتشىلىعىن استانانىڭ 20 جىلدىعىمەن شىن جۇرەكتەن قۇتتىقتايمىن. تاۋەلسىز قازاقستاننىڭ سيمۆولى سانالاتىن باس قالامىزدىڭ ايتۋلى مەرەيتويى - بارشا قازاقستاندىقتارعا ورتاق قۋانىش. سارىارقا توسىنە قازىعىن قاققان ەڭسەلى ەلوردامىزدى تۇرعىزۋعا بۇكىل حالقىمىز جۇمىلا اتسالىستى. «وڭىرلەردىڭ استاناعا تارتۋى» جوباسى اياسىندا شىعىس قازاقستان وبلىسى دا ەلورداعا ەرەكشە سىي جاسادى. زاماناۋي تەحنولوگيالاردى قولدانا وتىرىپ بوتانيكالىق باق اۋماعىندا سالىنعان جارىقتى-مۋزىكالى سۋبۇرقاق باقتىڭ سانىنە ٴسان قوسقان نىسان بولدى. بۇل جەر ەلوردا تۇرعىندارى مەن قوناقتارى سەرۋەندەيتىن سۇيىكتى دەمالىس ورنىنا اينالاتىنىنا سەنىمدىمىن. استانانى كوركەيتۋگە زور ۇلەس قوسقان سىزگە جانە ٴوڭىر تۇرعىندارىنا شىنايى ريزاشىلىعىمدى بىلدىرەمىن. سىزدەرگە زور دەنساۋلىق، باق-بەرەكە تىلەيمىن» - دەلىنگەن قۇتتىقتاۋ حاتتا.

ايتا كەتەيىك، شىعىس قازاقستاننىڭ بۇل تارتۋى استاناداعى ەڭ ۇلكەن سۋبۇرقاق رەتىندە تىركەلدى. الىپ سۋبۇرقاقتىڭ فورماسى شەڭبەر ٴتارىزدى. سىرتقى ديامەترى 73 مەتردى قۇرايدى. كەشەننىڭ ٴدال ورتاسىندا بيىكتىگى 6،5 مەتر تايقازان ورنالاسقان. سۋ بەينە ٴبىر وسى قازاننىڭ ىشىنەن قايناپ شىعىپ جاتقانداي كورىنىس بەرەدى.

فونتاننىڭ تاعى ٴبىر ەرەكشەلىگى - اسپانعا شاپشىپ جاتقان سۋدىڭ قايدان شىعىپ، قايدا ٴسىڭىپ جاتقانىن اڭداۋ قيىن. تايقازاننان اتقىلاعان سۋ جەرگە ٴسىڭىپ جاتقانداي اسەر بەرەدى. ال شىندىعىندا ول الاڭداعى سۇزگىدەن ٴوتىپ، جاسىرىن قويماعا جەتەدى. سان ٴتۇرلى شامدارمەن كومكەرىلگەن اۋەزدى سۋبۇرقاقتىڭ ورناتۋعا 938 ميلليون تەڭگە جۇمسالعان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي