BAQ.kz - Қазақстан жаңалықтары USD 327.42 BAQ.kz - Қазақстан жаңалықтары EUR 383.51 BAQ.kz - Қазақстан жаңалықтары RUB 5.29
استانا:

مينيستر ەرلىك كورسەتكەن 20 بالانى ماراپاتتادى

فوتو: Бауыржан Жуасбаев

بۇگىن استانا قالاسىنداعى وقۋشىلار سارايىندا ىشكى ىستەر ٴمينيسترى قالمۇحانبەت قاسىموۆتىڭ قاتىسۋىمەن ٴارتۇرلى توتەنشە جاعدايلاردا ەرلىك كورسەتكەن 20 باتىر بالانى سالتاناتتى جاعدايدا ماراپاتتاۋ ٴراسىمى ٴوتتى، دەپ حابارلايدى baq.kz اقپارات اگەنتتىگى.

بۇل ٴىس-شارانىڭ ماقساتى – «باقىتتى بالالىق شاقتى قورعاۋ» جىلى اياسىندا وسكەلەڭ ۇرپاقتى ازاماتتىق، ار-نامىس جانە پاتريوتتىق رۋحتا تاربيەلەۋ، سونداي-اق قوعامدا باتىر بالالاردىڭ ەرلىك ىستەرىن بايانداۋعا مۇمكىندىك جاساپ، كىشكەنتاي باتىرلارعا العىس ٴبىلدىرۋ.

ماراپاتتاۋ راسىمىنە ەلىمىزدىڭ ٴار تۇپكىرىنەن 20 باتىر بالا شاقىرىلعان بولاتىن. ولار - ەرلىك ارەكەتتەرى ٴۇشىن ەشقانداي ماراپات الماعان بالالار.

«مەن سىزدەرگە ۇلكەن قۇرمەت كورسەتە وتىرىپ، استانا قالاسىنا قوش كەلدىڭىزدەر دەيمىن. ەلىمىزدىڭ جۇرەگى – استانا بيىل ٴوزىنىڭ 20 جىلدىق مەرەيتويىن اتاپ وتەدى. مەملەكەت باسشىسى نۇرسۇلتان نازاربايەۆتىڭ كورەگەن ساياساتىنىڭ ارقاسىندا بۇگىندە استانا تاۋەلسىز قازاقستاننىڭ ماقتانىشىنا اينالدى. استانا تەك ەلىمىزدەگى قوعامدىق-ساياسي، ەكونوميكالىق جانە مادەني ٴومىردىڭ ورتالىعى ەمەس، بۇكىل ەۋرازيا كەڭىستىگىنىڭ جۇرەگى سانالادى»، – دەدى قالمۇحانبەت قاسىموۆ ماراپاتتاۋ راسىمىندە.

– ەلوردانىڭ تۋعان كۇنى قارساڭىندا استاناعا ەلىمىزدىڭ ٴار تۇكپىرىنەن ٴجاسوسپىرىم باتىرلار كەلدى. بۇل بالالاردىڭ بارلىعى دا قىسىلتاياڭ شاقتا ەرجۇرەكتىك كورسەتىپ، ادام ومىرىنە اراشا بولعاندار. سىزدەر ٴقازىردىڭ وزىندە كوپكە ۇلگى تۇتاتىن جاندارسىزدار. وسى ورايدا سىزدەردىڭ اتا-انالارىڭىزعا، مۇعالىمدەرىڭىزگە جانە وزدەرىڭدى تاربيەلەپ جۇرگەن تالىمگەرلەرىڭىزگە زور العىسىمدى بىلدىرەمىن. ەلىمىزدە وزدەرىڭىز سياقتى باتىر بالالار باردا الدىڭعى اعا بۋىن قازاقستاننىڭ بولاشاعىنا سەنىممەن قارايدى. ٴبىز سىزدەردى جانە سىزدەردىڭ ەرلىكتەرىڭىزدى ماقتان تۇتامىز! – دەپ اتاپ ٴوتتى مينيستر.

قالمۇحانبەت قاسىموۆ بارلىق بالاعا دەنساۋلىق، تابىس تىلەپ، بولاشاقتا دا وسىنداي باتىر، قىراعى، رۋحى كۇشتى، ەرجۇرەك قالىپتارىن ساقتاپ، بيىكتەردەن كورىنە بەرۋلەرىنە اعالىق تىلەكتەستىگىن جەتكىزدى. بۇدان سوڭ ق. قاسىموۆ باتىر بالالاردى ٴوز قولىمەن «توتەنشە جاعدايداعى ەرلىگى ٴۇشىن» مەدالدارىمەن ماراپاتتاپ، باعالى سىيلىقتار ۇسىندى.

سالتاناتتى ٴىس-شارا بارىسىندا بالالار قۇرمەتتى قاراۋىلدىڭ ونەرلەرىن، اسكەري وركەستردىڭ ورىنداۋىندا پاتريوتتىق جانە اسكەري كومپوزيسيالاردى تاماشالادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي