BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

استانانىڭ 20 جىلدىعىنا وراي سالت اتتىلار ساپارعا شىقتى

استانا قالاسىنىڭ 20 جىلدىعىنا وراي «رۋحاني جاڭعىرۋ» باعدارلاماسى اياسىندا استانا-بۇيراتاۋ-باياناۋىل-قارقارالى باعىتى بويىنشا كوپكۇندىك اتپەن ساپارعا شىعۋ بۇگىن استانا شەتىندەگى «اقبوزات» ودو-دا باستالدى، دەپ حابارلايدى baq.kz اقپارات اگەنتتىگى.

"استانا - ۇلى دالا ەلورداسى" اتتى ەكسپەديسيا اقمولا، پاۆلودار، قاراعاندى وبلىستارىنا قاراستى بۇيراتاۋ، باياناۋىل جانە قارقارالى ۇلتتىق ساياباقتارى ارقىلى وتەدى، تۋردىڭ جالپى ۇزىندىعى – 600 شاقىرىم. شاراعا مۇرىندىق بولىپ، ۇيىمداستىرىپ جۇرگەن بەرىك اقىلبەكوۆ ەسىمدى ازامات.

«بۇل ٴىس-شارا قازاقستاندىق ٴپاتريوتيزمدى قالىپتاستىرۋعا جانە قازاقستاندىقتاردىڭ قوعامدىق ساناسىندا ەلىمىزدىڭ تاۋەلسىزدىگىنىڭ دامۋ جولىنداعى استانامىزدىڭ تاريحي ٴرولىن نىعايتۋعا باعىتتالعان. ون ادام جولعا شىعىپ بارامىز. سەگىزى ەلىمىزدىڭ ٴار وڭىرىنەن كەلگەن ازاماتتار. ەكەۋى – ۆەنگريادان. ساپارىمىز 21 ماۋسىمعا دەيىن جالعاساتىن بولادى. كۇنىنە 60-70 شاقىرىم جول ٴجۇرىپ وتىرساق، ون كۇندە 600 شاقىرىمدى ەڭسەرۋگە بولادى. ٴوزىم وسى جوباعا ەكىنشى رەت قاتىسىپ وتىرمىن» - دەيدى اتپەن ساپارعا شىعىپ بارا جاتقان ايدوس نۇراقىشەۆ.

وتكەن جىلى بۇل اتپەن ساپار باياناۋىلعا بارعان. ساپارعا كەز كەلگەن ادام قاتىسۋىنا بولادى.

«بۇل جوباعا قاتىسۋ ٴۇشىن ەشقانداي تولەم جاساۋدىڭ كەرەگى جوق. قاتىسقىسى كەلگەن ادام ٴوز ىنتاسىمەن كەلۋىنە بولادى. دەگەنمەن جولعا مىنەر اتىڭىزدى وزىڭىزبەن بىرگە الا كەلۋىڭىز كەرەك. جاتار ورىن، تاماق بارلىعى دا جول بويى ۇيىمداستىرىلادى. ارينە، قازاقتىڭ كەڭ داستارحانى قايدا بارساڭىز دا الدىڭىزدا جايۋلى. سوندىقتان دا جول بويى اۋىلدارعا توقتاپ، دەمالىپ، كەزدەسۋلەر ۇيىمداستىرىپ وتىرامىز. ٴتىپتى اۋىل كەزدەسپەي جاتسا، ٴوزىمىزدىڭ الىپ جۇرگەن شاتىرلارىمىز بار» - دەيدى ول.

بۇل توپتاعى ەڭ جاس قاتىسۋشى 14 جاستا. ونىڭ ايتۋىنا قاراعاندا ات ۇستىندە جۇرۋگە جاستايىنان ۇيرەنگەن.

«سەگىز جاسىمنان بەرى اتپەن ساپار جاساۋعا قاتىسىپ كەلەمىن. بۇعان دەيىن استانادان ەرەيمەنتاۋعا، بۇيراتاۋعا، باياناۋىلعا بارعانبىز. ەڭ العاش جۇرگەن كەزىمدە ازداپ شارشاعانىم راس، دەگەنمەن كىشكەنە كەزىمنەن بايگە اتىنا شاۋىپ وسكەندىكتەن ونشا قاتتى قيىن بولعان جوق» - دەيدى 14 جاستاعى ارنا بەرىك ۇلى.

بۇل جولعى ساپاردى حالىقارالىق دەڭگەيگە كوتەرىلدى دەۋگە دە بولادى. سەبەبى بۇعان دەيىن الەمدىك دەڭگەيدە اتپەن ساپار جاساپ، ەكسپو كورمەسىنە اتپەن كەلگەن ۆەنگريالىق ماديار – ەۋرازيا بىرلەستىگى اسسوسياسياسىنىڭ پرەزيدەنتى، تۇركى حالىقتارى ۇلتتىق سپورت تۇرلەرى حالىقارالىق اسسوسياسياسىنىڭ مۇشەسى يشتۆان بەنسا جولسەرىگىمەن بىرگە وسى توپقا قوسىلعان.

«ٴبىزدىڭ ساپار باستالعالى ٴبىراز جىل بولدى. وتكەن جىلى ەكسپو حالىقارالىق كورمەسىنە اتپەن كەلىپ، ساپارىمىز وسى استانادا توقتاعان بولاتىن. ەندى بيىل سول ساپاردى قايتا جالعاستىرا باستادىق. 21 ماۋسىمعا دەيىن وسى توپپەن بىرگە باياناۋىلعا بارساق، ودان ارى شىعىس قازاقستانعا ٴوتىپ، مارقاكولگە دەيىن ات باسىن تىرەمەكپىز. شەكارادان اتپەن وتكىزبەيتىندىكتەن، ٴبىز قوشاعاش اينالىپ بايان-ولگەيگە ٴوتۋ، ودان ارى كۇلتەگىننىڭ باسىنا بارۋ جوسپاردا بار» - دەيدى بەلگىلى جيھانكەز بەنسا.

سالت اتتىلاردى جولعا سالۋ ٴۇشىن استاناداعى ٴبىرقاتار زيالى قاۋىم وكىلدەرى، قالالىق مادەنيەت جانە سپورت باسقارماسىنىڭ قىزمەتكەرلەرى، ۆەنگريانىڭ قازاقستانداعى توتەنشە جانە وكىلەتتى ەلشىسى اندراش باراني جانە استانا قالاسى ارداگەرلەر ۇيىمىنىڭ باسشىسى ٴومىرزاق وزعانبايەۆ باستاعان قاريالار قاتىستى.

الىس جولعا اتتانعان ازاماتتارعا ٴومىرزاق وزعانبايەۆ اق باتاسىن بەرىپ اتتاندىردى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي