BAQ.kz - Қазақстан жаңалықтары USD 367.06 BAQ.kz - Қазақстан жаңалықтары EUR 416.17 BAQ.kz - Қазақстан жаңалықтары RUB 5.56
استانا:

باسپانانى تەگىن الۋعا تاعى ٴبىر مۇمكىندىك

فوتو: imotisiana.com

استانا، baq.kz ٴتىلشىسى. كەشە استانا قالاسىندا وتكەن «قازاقستاننىڭ اۋىلدىق اۋماقتارىن تۇراقتى دامىتۋعا ايەلدەردىڭ ۇلەسى» اتتى اۋىل ايەلدەرىنىڭ ٴبىرىنشى فورۋمىنا كەلگەن «اسىل ادام» قورىنىڭ نەگىزىن قالاۋشى، «باقىتتى وتباسى» الەۋمەتتىك جوباسىنىڭ اۆتورى كوڭىلباي شۇكەنوۆ جاڭا جوبا قولعا الىنعانىن ايتتى.

بۇرىن سوڭدى بولماعان ەرەكشە جوبا

«بۇل جوبا 2014 جىلى كوپبالالى، الەۋمەتتىك از قامتىلعان وتباسىلارعا كومەكتەسۋ، ولارعا ٴۇي سالىپ، بيزنەس جوبالار جاساپ بەرۋ ماقساتىندا اشىلدى. ٴتورت جىل ىشىندە «باقىتتى وتباسى»، «اقىلدى ٴۇي» الەۋمەتتىك جوبالارىن ىسكە اسىردىق. بۇرىن الدىمىزعا جىلاپ كەلگەن كوپبالالى وتباسىلارعا ٴۇي سالىپ بەرەتىنبىز، ٴبىراق ولار بەلگىلى ٴبىر كاسىپ تۇرىمەن اينالىسپايتىن. بۇدان بىلاي باعىتىمىزدى ٴسال وزگەرتىپ، قازاقستاندا بۇرىن سوڭدى بولماعان بىرەگەي جاڭا جوبانى قولعا الماقپىز. بۇل جوبا «شارۋا مەكەنى» دەپ اتالادى»، - دەيدى كوڭىلباي قالدىبەك ۇلى.

اتى ايتىپ تۇرعانداي، جوبا كوپبالالى عانا ەمەس، ەڭبەكقور وتباسىلارعا ارنالعان.

«اقمولا وبلىسى، ارشالى اۋدانىنا 190 شارشى مەترلىك بەس ٴۇي سالدىق. سول بەس ٴۇيدىڭ بىرىندە تەگىن تۇرىپ، جۇمىس ىستەيتىن كوپبالالى، الەۋمەتتىك جاعىنان از قامتىلعان وتباسىلارعا بايقاۋ جاريالايمىز. بايقاۋعا قازاقستاننىڭ بارلىق وڭىرلەرىندەگى تۇرعىندار قاتىسا الادى»، - دەيدى ول.

«شارۋا مەكەنى» جوباسىنا قاتىسۋ شارتتارى

قوردىڭ نەگىزىن قالاۋشى بۇل جوباعا قاتىسۋ شارتتارىن ٴتۇسىندىردى.

«بۇل ٴۇيدىڭ اۋلاسىنا جىلىجاي بولادى جانە ٴۇي قۇستارىن اسىراۋعا مۇمكىندىك جاسالادى. بايقاۋدا جەڭىمپاز بولعان وتباسى وسى ۇيدە تەگىن تۇرادى جانە جارتى جىل بويى جاڭا تەحنولوگيا بويىنشا جەمىس-جيدەك ەگىپ، ٴۇي قۇستارىنا قارايدى. ەگەر كومەك قاجەت بولسا، سول سالا بويىنشا بىلىكتى ماماندار كەلىپ، باعىت-باعدار بەرەدى. جوبانىڭ جۇزەگە اسۋ بارىسىندا وتباسى مۇشەلەرىنە ۇيالى تەلەفون ۇستاۋعا رۇقسات ەتىلمەيدى. ەگەر اي سايىن تولەيتىن نەسيەلەرى بولسا، بانككە نەسيە تولەۋ ۋاقىتىن توقتاتا تۇرۋ تۋرالى ٴوتىنىش جازامىز. جارتى جىل بويى ولارعا كۇن سايىن تاپسىرما بەرىلىپ، ول ۆيدەوعا تۇسىرىلەدى. جوبانىڭ تەلەۆيزيالىق نۇسقاسى youtube كانالىنان كورسەتىلەدى»، - دەيدى ول.

وسى جىلدىڭ جەلتوقسان ايىندا www.asyl­adam.kz سايتىندا «شارۋا مەكەنى» دەگەن اتاۋمەن پاراقشا اشىلادى. قاتىسۋعا نيەت بىلدىرگەندەر سول جەرگە ٴوتىنىش جىبەرەدى. ارنايى كوميسسيا قۇرىلىپ، اقپان ايىنىڭ سوڭىنا دەيىن ىرىكتەۋ بولادى. جوباعا وتكەن وتباسى ناۋرىز ايىنان باستاپ ارشالىداعى ۇيگە بارادى.

اتالعان جوبانىڭ ەرەكشەلىگى وسى عانا ەمەس. جوباعا قاتىسقان وتباسى وسى ٴۇيدى ٴبىر جىلدان كەيىن ٴوز مەنشىگىنە اۋدارىپ الۋعا قۇقىلى. ول ٴۇشىن نە ىستەۋ كەرەك؟

بيزنەس جانە تەگىن ٴۇي

«ەگەر وتباسى مۇشەلەرى كۇن سايىن بەرىلەتىن تاپسىرمانى بۇلجىتپاي ورىنداسا، جىلىجايدا وسكەن جەمىس-جيدەكتى ساتۋ ارقىلى اي سايىن 600 مىڭ تەڭگە تابىس تابا الادى. ال اي سايىن 600 مىڭ تابىس تاپسا، وزدەرى تۇرىپ جاتقان ٴۇي سول وتباسىعا سىيعا بەرىلەدى»، - دەيدى كوڭىلباي قالدىبەك ۇلى.

ول وسى جوبا ارقىلى اۋىلدا تۇرىپ، جۇمىس ىستەپ قانا قويماي، مول تابىسقا كەنەلۋگە بولاتىنىن دالەلدەگىسى كەلەتىنىن ايتتى.

«ەگەر جوبا ٴساتتى جۇزەگە اسسا، سول ٴۇيدىڭ قاسىنداعى ٴتورت ۇيگە باسقا دا كوپبالالى وتباسىلاردى كىرگىزەمىز. ولار دا جارتى جىل بويى ٴبىزدىڭ تالاپ بويىنشا جۇمىس ىستەيتىن بولادى، ٴبىراق ٴار وتباسى قولعا الاتىن كاسىپتىڭ باعىتى ٴارتۇرلى بولماق. مىسالى، ٴبىر وتباسى جىلىجايدا جەمىس-جيدەك وسىرۋمەن اينالىسسا، ەكىنشى وتباسى مال وسىرەدى، ٴۇشىنشى وتباسى قولونەرمەن اينالىسادى»، - دەيدى ول.

قايىرىمدى جاندار قاتىساتىن جوبا

كوڭىلباي شۇكەنوۆ قازىرگى ۋاقىتتا «ارمان ٴۇي» دەگەن ناۋقان جاساپ جاتقاندارىن ايتتى.

«وسى ناۋقان بويىنشا بارلىق مينيسترلىكتەرگە حات جولدادىق. بۇل جوبا بويىنشا قر ەڭبەك جانە حالىقتى الەۋمەتتىك قورعاۋ مينيسترلىگى جاقسى جۇمىس ىستەپ جاتىر»، - دەيدى ول.

«ارمان ٴۇي» جوباسىنا اتالعان قايرىمدىلىق قورىنا قول ۇشىن سوزعان كەز كەلگەن ادام قاتىسا الادى.

«مىسالى، تابيعي اپاتتان قيراپ قالعان ۇيگە جوندەۋ جۇمىستارىن جۇرگىزىپ جاتقان كەزدە قاسىمىزعا كەلگەن قالا تۇرعىنى «اسارلاتىپ جاتىر ەكەنسىزدەر. كومەگىم بولسىن دەپ سىزدەرگە تاماق اكەلدىم» دەدى. ٴبىز وعان سەرتيفيكات بەردىك. وندا «ٴسىز جاقسى ادامسىز. وسى سەرتيفيكات ارقىلى «ارمان ٴۇي» جوباسىنا قاتىسا الاسىز» دەگەن سياقتى سوزدەر جازىلعان. كەز كەلگەن قايىرىمدىلىق جاساعان ادامعا وسىنداي سەرتيفيكات بەرەمىز. كەلەسى جىلى 1 ناۋرىزدا، ياعني العىس ايتۋ كۇنى ارنايى ۇتىس ويىنىن وتكىزىپ، ساتتىلىك سەرىك بولعان سەرتيفيكات يەسى قوسشىدا سالىنىپ جاتقان جاڭا ٴۇيدىڭ 2 بولمەلى پاتەرىنە يە بولادى»، - دەيدى جوبا اۆتورى.

ول اۋىلداعى ايەلدەر فورۋمىنا قاتىسۋشىلارعا بىرنەشە سەرتيفيكات ۇلەستىرىپ بەردى.

كوڭىلباي شۇكەنوقايىرىمدى ىسپەن اينالىسۋ سەبەبىن بىلاي ٴتۇسىندىردى:

«ماقسات – كەدەيلىكپەن كۇرەسۋ، ٴومىر ساپاسىن جاقسارتۋ. وقۋشى كەزىمدە بولاشاقتا كىم بولعىمىز كەلەتىنى تۋرالى العاش شىعارما جازعان كەزدە «ادامدارعا قايىرىمدىلىق جاساۋمەن اينالىسامىن» دەپ جازعان ەدىم. سول ارمانىم، مىنە، ىسكە اسۋدا. جالپى ٴوزىم ماماندىق بويىنشا قۇرىلىسشىمىن»، - دەيدى ول.

فوتولار كوڭىلباي شۇكەنوۆتىڭ جەكە مۇراعاتىنان الىندى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي