BAQ.kz - Қазақстан жаңалықтары USD 370.04 BAQ.kz - Қазақстан жаңалықтары EUR 420.99 BAQ.kz - Қазақстан жаңалықтары RUB 5.58
استانا:

ٴوزىم تۋرالى ٴوزىم ايتامىن...

اسپاننانا ادام جاۋمايدى، سالبىراپ تۇسە دە قويعان جوقپىن، اكە–شەشەم مەنى توعايدان دا تاۋىپ العان جوق.

اسپاننانا ادام جاۋمايدى، سالبىراپ تۇسە دە قويعان جوقپىن، اكە–شەشەم مەنى توعايدان دا تاۋىپ العان جوق. مەن اكەم جۇماش پەن انام بەيسەنكۇلدىڭ تۇڭعىشىمىن. اللام بۇل بالا جازدا تۋىلسا، شىبىندار مازاسىن الار دەدى مە، ايازى قاقاعان قىستا، 1957 جىلى 12 جەلتوقسانىندا جارىق دۇنيە ەسىگىن اقىرىن عانا اشىپپىن، سودان بەرى وسى ومىرگە عاشىقپىن!
التى ايدا اپالاقتاپ–ساپالاقتاپ ٴجۇرىپپىن، ٴبىر جىلدان سوڭ، وزىمنەن اۋمايتىن بالانى اينادان كورىپ، سىقىلىقتاي كۇلىپپىن. وڭتۇستىك قازاقستان وبلىسىنىڭ قازىرگى بايدىبەك اۋدانى، اقتاس اۋىلىندا دۇنيەگە كەلىپ، كەڭكىلدەپ كۇلىپ جۇرگەنىمدە، انامنىڭ تۋىستارىنان «جيەن» دەگەن ٴسوزدى كوپ ەستيتىن ەدىم. «نەگە جيەنمىن؟» دەپ اكەمنەن سۇراسام، جەتىم وسكەن اكەم وسى اۋىلدا مال دارىگەرى قىزمەتىندە ٴجۇرىپ، اناما ۇيلەنىپتى، ٴوزىنىڭ تۋعان جەرى تۇلكىباس اۋدانىنداعى قازىرگى داۋان اۋىلى ەكەن. «ەلىمە بارىپ، ەت جەيمىن»» دەگەن سوڭ، اكەم مەنى داۋانداعى جەڭگەسى تاتتىگۇلدىڭ قولىنا تاپسىردى. ٴسويتىپ، توعىزىنشى، ونىنشى كلاستى اۋدان ورتالىعىنداعى اباي اتىنداعى ورتا مەكتەپتە وقىدىم، ماتەماتيكادان «ٴۇش، ٴۇش تە بولسا كۇش!» دەپ باعا الىپ، ادەبيەتتى ٴسۇيىپ، حيميانى جەك كورىپ ٴبىتىردىم. اتتەستات العان سوڭ ايران ٴىشىپ وتىرا بەرمەيسىڭ عوي، دەرەۋ ساعىنعان اتا-اناما زىمىراپ بارىپ، ماۋقىمدى باسقان سوڭ، اۋداندىق «العاباس» گازەتىندە اۋەلى كوررەكتور، كەيىن تىلشىلىك قىزمەت اتقاردىم. العاشقى ايلىعىمدى اكەمە بەردىم. جازۋعا دەگەن قابىلەتىم سەگىزىنشى كلاستا وقىپ جۇرگەندە– اق «گۇلدەپ» كەتكەن. شاعىن سىقاق ولەڭدەر جازىپ جۇرگەن بولاتىنمىن. 1975 جىلى الماتىداعى ٴقازمۋ–دىڭ جۋرناليستيكا فاكۋلتەتىنە وقۋعا ٴتۇستىم، توپقا ستاروستا بولدىم. اۋىلدان بارعان قارا بالا ومىرىندە ٴبىرىنشى رەت ترامۆايدى كوردى، الماتىدان ۇشاققا ٴمىنىپ قايتاردا، يلليۋميناتوردان اقشا بۇلتتارعا قاراپ وتىرىپ: «شىركىن، مىنا بۇلتتاردىڭ بىرىندە اياعىمدى سالبىراتىپ وتىرىپ، ساتيرا جازسام عوي؟» دەپ قيالدىڭ قيارىن جەيتىن ەدىم. وقۋدى جۇرت قاتارلى بىتىرگەن سوڭ، الماتىدا قالعىم كەلىپ، دۋلات يسابەكوۆتىڭ كومەگىمەن قۋىرشاق تەاترىنداعى ادەبيەت بولىمىندە جۇمىس ىستەدىم. ٴسويتىپ جۇرگەندە، وڭتۇستىك قازاقستان وبلىستىق «وڭتۇستىك قازاقستان» گازەتىنە شاقىرىلدىم. «قاقپان» سىن–سىقاق ٴبولىمىن 1983 جىلدان 1988 جىلعا دەيىن باسقاردىم. فەلەتونداردىڭ ٴتۇتىنىن شىعاردىم. مەملەكەت قارجىسىن قىلعىتا سالعان بالا–باقشا مەڭگەرۋشىسى تۋرالى «الاقانىم قىشي بەرەدى» اتتى تاقىرىپپەن فەلەتون جازىپ، سوتتان ٴبىراق شىققان ەدىم. الگى ايەل «مەنىڭ الاقانىم ٴومىرى قىشىعان ەمەس!» دەپ ارىزدانىپتى. «الاقانىڭىز قىشىماسا، جەمقورلىقتى عانا ويلايتىن باسىڭىز قىشىعان شىعار؟»– دەپ ارەڭ قۇتىلعانمىن. ال، 1988–1991 جىلدارى رەسپۋبليكالىق «ارا» جۋرنالىنىڭ وڭتۇستىك وبلىسىنداعى ٴتىلشىسى قىزمەتىندە ٴجۇرىپ، يۋۆەنالدىڭ شىبىرتقىسىمەن جەمقورلاردى سابادىم– اي! قاراپ جۇرمەي قاعىنىپ، 1991 جىلى رەسپۋبليكادا تۇڭعىش رەت «جۇدىرىق» گازەتىن اشىپ، باس رەداكتورى قىزمەتىن اتقاردىم. كەيىن نارىق قارىق قىلمادى دا، «جۇدىرىق» جابىلىپ قالدى. ارادا جىلدار ٴوتىپ، 1998 جىلى «بارىس» اتتى تاۋەلسىز گازەت اشتىم. «بارىس» ٴباسپاسوزدىڭ بيىك شىڭىنا شىقتى. ٴبىراق ساتيرا جازۋعا مۇمكىندىك بولا بارمەدى. «بارىستا» 14 جىل باس رەداكتور قىزمەتىن اتقارىپ، اقىرىندا ٴبىر جولا شىعارماشىلىقپەن اينالىسۋعا بەل بۋدىم. ەرتەرەكتە «بيۋروكراتپەن قوشتاسۋ»، «قۇداعي قۇشاقتاي بەرەدى» (1995 جىل) كىتاپتارىم جارىق كورگەن بولاتىن، 2005 جىلى «تالتايىپ تۇرعىم كەلەدى!»، ىمباپپا»، «كەشىرىڭىز، ٴسىز ەسەك ەمەسسىز!»، «بىت شىتىڭىزدى شىعارامىن!» اتتى ٴتورت تومدىق ٴازىل–سىقاقتارىم وقىرماندار قولىنا ٴتيدى. مەملەكەتتىك تاپسىرىس-پەن جارىق كورگەن «قۋعاندار مەن قاشقاندار» جيناعىم دا بار. ايتپاقشى، ۇيىمداستىرۋشىلىق قابىلەتىمدى ايتا كەتەيىن، 1986 جىلى وبلىستا «كۇلكى جارمەڭكەسى» ٴازىل–وسپاق وتاۋىن ۇيىمداستىرىپ، ول بۇگىندە ٴداستۇرلى جالعاسىن تاۋىپ كەلەدى. «شانشار» تەاترىنا شاپان جاپقان دا ٴوزىم. ٴجۇسىپ پەن ٴۋاليدى جەتەكتەپ الماتىعا اپارىپ، «تاماشاعا» قاتىستىرىپ، قايتار جولدا وسى «شانشار» تۋرالى جىبىر–جىبىر، سىبىر–سىبىر ويلاسقانبىز. مۇنى ٴجۇسىپ مويىنداپ، باسىلىمداردا سۇحبات بەردى، ٴۋالي «ۇمىتىپ» قالىپتى. ٴوزىم دە «كۇلەيىكشى، مۇحتار!» اتتى ٴازىل–وسپاق تەاترىن ٴبىراز جىل سۇيرەدىم. مەنىڭ ساتيرالارىمنان «كۇلكى» ۆيرۋسىن جۇقتىرىپ العان اقتوبەلىك نۇرلىبەك جۇباتقان ٴىنىم، شاكىرتىم تۋرالى تاڭ اتقانشا تاقىلداپ، تالاي اڭگىمە ايتۋعا بولادى. «كۇلكى جارمەڭكەسىندە» تانىسقان بىزدەر بۇگىنگى كۇنگە دەيىن بايلانىسىمىزدى ۇزگەن جوقپىز. تالاي مارتە «ايتقىشتار اقتوبەدە» بايقاۋىندا ٴادىل قازىلار القاسىنىڭ ٴتوراعاسى بولدىم، ول باسقارعان «ەكى ەزۋ» تەاترى ساتيرالارىمدى ساحنالاپ، كوڭىلىم كرانمەن كوتەرىلگەندەي بولدى. ەندى مىنە، مەنىڭ 60 جىلدىعىمدى ەسكەرىپ، اقتوبە وبلىسى اكىمدىگى، مادەنيەت باسقارماسى قولداۋىمەن جانە «ەكى ەزۋدىڭ» دەمەۋىمەن شىعارماشىلىق كەشىم 2018 جىلدىڭ ٴبىرىنشى ساۋىرىندە وتكەلى جاتىر.
ايتىلماعان تاعى نە قالدى ٴوزى؟ بۇگىندە «ارا» گازەتىنىڭ وقو–داعى ٴتىلشىسىمىن، قازاقستان جازۋشىلار وداعىنىڭ مۇشەسى، شونا سماحان ۇلى اتىنداعى ساتيرالىق بايقاۋدىڭ باس جۇلدەگەرى، «قازاق ادەبيەتى» گازەتىنىڭ لاۋرەاتى ەكەنىم راس، جۇرت "وپتوم" الىپ جاتقان حالىقارالىق «الاش» سىيلىعىنىڭ لاۋرەاتى ەمەس ەكەنىم دە راس. ارى قاراي اللا بىلەدى...


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي