BAQ.kz - Қазақстан жаңалықтары USD 369.35 BAQ.kz - Қазақстан жаңалықтары EUR 421.47 BAQ.kz - Қазақстан жаңалықтары RUB 5.57
استانا:

وقىرمان وككاما ۇستاراسىمەن قىرىنادى

بيلىك پەن، الەۋمەتتىك جەلىدە وزدەرىن حالىقتىڭ اۆاتارى دەپ ەسەپتەيتىن قولدانۋشىلار اراسىندا ارا-تۇرا تاقىرىپتىق حايپ بولىپ تۇرادى.

رەسميەت وكىلىنىڭ بىلىگى مەن ەتيكاسىنا جانە قولدانۋشىنىڭ قويانشىقتىعىنا بايلانىستى، تاقىرىپ كەيدە بىقسىپ جاتىپ، اقىرى سونەدى; كەيدە لاۋلاپ جانىپ، مازمۇنداس تاقىرىپتاردى دا ورتەپ كەتەدى; ال كەيدە بىقسىعان كۇيى قالىپ، اككاۋنتىڭا كىرگەن سايىن اششى ٴتۇتىنى لەنتاڭدى تۇمشالاپ، كوزدەن جاس پارلاتىپ، تۇنشىقتىرادى. وندايدا بانمەن الدە ۋاقىتشا يا ماڭگىگە جاسىرا تۇرۋ سياقتى فۋنكسيالارمەن قۇتىلماساڭ، كەي تاقىرىپ ونسىز دا قام كوڭىلدى تۇڭعيىققا سۇيرەپ كەتە بەرەدى. بىرەۋىنىكى دۇرىس ەمەس بولسا جاقسى عوي: كەيدە بارىنىكى دۇرىس بولاتىنى جامان.

اناۋ ايتقانداي وقيعا بولسا، رەسميلەر تۇسىندىرمەنى كەشىكتىرىپ جاتادى. جانە كەشىكتىرىپ كەلىپ-كەلىپ، اقىر اياعى وقىرماننىڭ "باسە ايتىپ ەدىم عويىنىڭ" ۇستىنەن ٴدوپ تۇسەتىنى قيىن. بۇل كەي وقىرماننىڭ داندايسىپ، ەسىرۋىنە اكەلىپ سوعادى.

تاعى ٴبىر كورىنىس - وقىرمانعا بەرىلەتىن تۇسىنىكتەمەنىڭ كۇردەلى بولۋى. تاعى ٴبىر دەپ، جاناما اتاپ وتكەنىممەن، باستى ماسەلە وسى شىعار. وقىرماننىڭ قاراپايىم عانا سۇراعىنا - دياگراممالارمەن دەمەلگەن، ساندارمەن قاپتالعان، شەتەلدىك "تاجىريبەمەن" كومكەرىلگەن اۋىر ارتيللەريا شىعارىلادى.

- سۋ قايدا؟ كەۋىپ بارام، سۋ قايدا!
- جاپپاي سۋلاندىرۋدىڭ ٴجۇزجىلدىقتىڭ باعدارلاماسى بويىنشا، ٴبىز ٴقازىر بالەن شاقىرىم قۇبىر تارتۋىمىز كەرەك ەدى. ٴبىراق اقىرزاماننىڭ توپان سۋى ەرتەرەك كەلەتىندىكتەن، ٴجۇزجىلدىق باعدارلامانى ۋاقىتشا توقتاتىپ، قارجى ۇنەمدەۋدى شەشتىك. ەندى، توپان سۋدىڭ ٴدال كۇنىنەن توقتالساق. وزدەرىڭىز بىلەتىندەي، ىنجىلدە...

تاپقازىرگى ماسەلەگە تاعى دا - ٴسوزبۇيدا. ناقتى ماسەلەنى - باسقا يگىلىكپەن جابۋ ارەكەتى وقىرماندى ٴتىپتى جىنداندىرادى. قانداي قيامپۇرىس تەرمين ايتا بەر، نەتكەن شىتىرمان فورمۋلالاردى لاقىلدات، وقىرمان ٴبارىبىر دە:

- ايتتىم عوي انە، ىشىپ-جەپ قويعان! - دەيدى.

بۇل، وقىرمان توپاس دەگەن ٴسوز ەمەس. ٴتىپتى دە. جاي، وقىرمان وككاما باكىسىمەن قىرىنادى. مي قىرتىسىنىڭ بەتكى قاباتىندا جاتقان ويمەن عانا جۇمىس ىستەيدى. مۇمكىن، تۇسىنىستىك تانىتقىسى كەلەتىن بولسا - تانىتار ەدى، جانە ول ٴۇشىن سەبەپ تابار ەدى. ٴبىراق تابيعاتتا ٴيمپۋلستىڭ دە ورنى بار.
سوسىن تاعى ٴبىر ماسەلە -


"بارلىق بالەنىڭ كىلتيپانى - اقشادا"


دەگەن قاراپايىم، ٴتىپتى جەكسۇرىن ۇستانىم راسىمەن - ەشكىمدى ەشقاشان الداعان ەمەس. كەز كەلگەن تەرگەۋشىدە قىلمىستان ەڭ الدىمەن ەكونوميكالىق سەبەپ ىزدەۋ كەرەك دەگەن ينسترۋكسيا بار. مۇندا دا سول.

ەندەشە وقىرمانعا ٴوز ماسەلەڭنىڭ تاريحي العىشتارتتارىن، گەنەزيسىن تۇسىندىرگەننەن گورى، شىندىقتى ايتا سالعان جاقسى.

شىنشىلدىققا ۇندەپ وتىرعانىم جوق، ٴمورالدىڭ كەلبەتى تاپ مەن ەمەس; ٴبىراق شىن ايتپاساڭ - تەز شەشىم دە كۇتپە. "پيارشىعا تيىسپەڭدەر، ول جۇمىسىن قال-قادىرىنشە ىستەپ جاتىر!".


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي