BAQ.kz - Қазақстан жаңалықтары USD 361.94 BAQ.kz - Қазақстан жаңалықтары EUR 423.25 BAQ.kz - Қазақстан жаңалықтары RUB 5.4
استانا:

اۆتوبۋس، ايالداما: تيىمدىلىگى زور تىڭ جوبا

كوزدى اشىپ-جۇمعانشا قاقاعان قىس تا تاياندى. ەندى قوعامدىق كولىك كۇتەتىن قاراقۇرىم حالىقتىڭ دا قىستىڭ كوزى قىراۋدا ايالداماداعى قاراسى كوبەيەدى. قۇداسىن ساعاتتاپ كۇتەتىندەردى قايدام، حالىق قوعامدىق كولىكتى سارعايعانشا سارىلا كۇتۋگە ٴماجبۇر.

ماسەلەن، استانانىڭ ارقىراعان ايازى مەن بەت قارىتاتىن جەلىن اسىرەسە ايالدامادا اۆتوبۋس كۇتىپ قالعاندار وتە جاقسى تۇسىنەدى. ٴتىپتى، انەبىر جىلدارى ايگىلى «تيتانيك» ٴفيلمىنىڭ قازاقستاندىق نۇسقاسىنا نەگىز بولعان ايالدامادا ساعاتتاپ كۇتىپ توڭىپ قالعاندار تۋرالى بەينەكورىنىس الەۋمەتتىك جەلىدە ابدەن كورسەتىلگەن. راسىندا ايالداماعا جەتىپ بولمايتىن استاناداعى اۆتوبۋستار اتلانت مۇحيتىنىڭ الىپ كەمەسىن كوزگە ەلەستەدى. استىندا كولىگى بارلارعا كۇلكىلى بولعانىمەن، قوعامدىق كولىككە كۇنى قاراعان قالىڭ جۇرتتىڭ قايعىسى بۇل. سەبەبى، قاھارلى قىستا ايالداماعا جەتەتىن اۆتوبۋستاردىڭ اياق الىسى ادەتتەگىدەن دە باياۋلاپ، جۇرتشىلىقتىڭ جۇيكەسىن جۇقارتىپ جاتاتىنى بار. قوعامدىق كولىكتەردىڭ كەستەگە ساي جۇرمەيتىندىگىن ايتىپ نارازىلىق بىلدىرەتىن تۇرعىندار قاربالاس كەزدە اۆتوبۋسقا سىيماي قالۋدان قورىقسا، ەندى ٴبىرى ەنتەلەي جەتكەن ٴتورت اياقتى تۇلپاردان ٴتىرى شىقسام دەپ شىبىن جانىن شۇبەرەككە تۇيەدى.

شىندىعى سول، جىل سايىن جىرى بىتپەيتىن جولاۋشى كولىكتەرىنىڭ قىزمەت ساپاسى سىننان كوز اشقان ەمەس. ويتكەنى، كوشە بويىندا جارىس ۇيىمداستىرىپ، جولاۋشىلاردى كوكپار قىلاتىن قوعامدىق كولىك جۇرگىزۋشىلەرى اقشا ٴۇشىن ادام ومىرىنە بەي-جاي قارايدى. ونىڭ دالەلى، ايالداماداعى قاتارلاسا كەلگەن اۆتوبۋس دابىلداتقىشتارىنىڭ دارىلى مەن جولاۋشىلارعا تالاس. تارتىستىڭ سوڭى تاس جولداعى جارىسقا ۇلاسىپ، جالعاسى جازاتايىم جاعدايمەن اياقتالىپ جاتسا دا جاۋاپتىلاردان دا ٴجونى ٴتۇزى جاۋاپ الۋ مۇمكىن بولماي تۇر. سالدارىنان قازىرگى كەزدە جول بويىندا جۇيتكىگەن جولاۋشى كولىكتەرىمەن بولاتىن جول-كولىك وقيعالارى جيىلەپ بارادى. ەستە بولسا، جىل باسىندا الماتىداعى قوعامدىق كولىكتى تىزگىندەگەن جۇرگىزۋشى تولە بي داڭعىلى مەن وتەگەن باتىر كوشەسىنىڭ قيىلىسىنا جۇيتكيمىن دەپ، جولدىڭ ار جاعىنا وتپەك بولعان قىزدى جوعارى جىلدامدىقپەن سوعىپ وتكەن. قاتتى سوققىدان جابىرلەنۋشى بىرنەشە مەتر جەرگە ۇشىپ، سول جەردە ٴتىل تارتپاي كەتتى. وسى وقيعادان كەيىن ىلە-شالا قىزىلوردادا ەكى قوعامدىق كولىكتىڭ جارىسى جول بويىندا تۇرعان جولاۋشىنى ارعى دۇنيەگە اتتاندىرىپ جىبەرگەن ەدى. وكىنىشتىسى دە وسى، اۆتوبۋس تىزگىنىندەگىلەردى تەزگە سالىپ تارتىپكە باعىندىرۋ ازىرگە مۇمكىن بولماي تۇر. ايتكەنمەن، جۇرگىزۋشىلەردى جاڭالىققا تولى تىڭ جوبا ارقىلى تارتىپكە باعىندىرىپ، اقپاراتتىق جۇيەمەن اڭداپ باستىرۋدىڭ امالى بار. جۇيەنىڭ جەتىستىگى جول بويىنداعى جازاتايىم جاعدايدى قالاي ازايتۋى مۇمكىن دەيمىز عوي. ابدەن مۇمكىن. ماسەلەن، اقپاراتتىق جۇيە ارقىلى ايالداماعا ايالداپ تۇرعان اۆتوبۋستىڭ قانشا ۋاقىت توقتاپ-جۇرگەندىگى قاداعالانادى. سپۋتنيكتىك باقىلاۋ قۇرالدارى ارقىلى جۇمىس ىستەيتىن تيىمدىلىگى زور تىڭ جوبانى استانالىق «kazintersoft» جشس ويلاپ تاپقان. كولىك ينفرا­قۇ­رىلىمىن دامىتۋعا، قوعامدىق كولىك قوزعالىسى كەستەسىنىڭ قاتاڭ ساقتالۋىنا، جولاۋشىلار تاسىمالىن جەدەلدەتۋگە بىردەن-بىر سەبەپ بولاتىن اقىلدى جۇيەنىڭ ارتىقشىلىعىن ٴبىلۋ ٴۇشىن جوبا جەتەكشىسى سەرگەي الەكساندروۆيچتى اڭگىمەگە تارتقان ەدىك.

كومپانيانىڭ ويلاپ تاپقان يننوۆاسيالىق جوباسىنىڭ ماقساتى قانداي؟ قانداي ەرەكشەلىگى بار؟

– «kazintersoft» كومپانياسى سپۋتنيكتىك مونيتورينگ نارىعىندا 2002 جىلدان باستاپ جۇمىس ىستەپ كەلەدى جانە وسى سالاداعى مول تاجىريبەگە يە busreport قالالىق جولاۋشىلار تاسىمالىن جىبەرۋ ٴۇشىن باعدارلامالىق كەشەندى قۇراستىرعان بولاتىن. ونىڭ قۇرامىنا سپۋتنيكتىك مونيتورينگ جۇيەسى، busreport تالدامالىق جۇيەسى جانە infobus.kz اقپاراتتىق پورتالى كىرەدى. ٴبىزدىڭ بۇل كەشەندى دامىتۋداعى ماقساتىمىز – تۇراقتى قالالىق جانە قالاارالىق جولاۋشىلار تاسىمالى سالاسىندا قىزمەت كورسەتۋ ساپاسىن ارتتىرۋ بولاتىن. قازىرگى باعدارلامالىق قامتاماسىز ەتۋ قىزمەتى ەلىمىزدە عانا ەمەس، سونداي-اق رەسەي اۋماعىندا الىنعان اۆتورلىق پاتەنتپەن راستالادى.

– gps-ترەكەرى مەن «infobus» باعدارلاماسىن كەڭىنەن ٴتۇسىندىرىپ بەرسەڭىز، قولدانىسقا ەنگىزىلگەلى قانشا جىل بولدى جانە قازىرگى كۇنى قانداي قالالاردا جۇزەگە اسىرىلعان؟

gps ترەكەر – وبەكتىنىڭ اعىمداعى ورنالاسۋىنىڭ گەوگرافيالىق كوورديناتتارىن انىقتاۋعا ارنالعان قۇرىلعى. اۆتوبۋستاردا ورناتىلعان gps ترەكەرلەر ولاردىڭ ورنالاسقان جەرى تۋرالى اقپاراتتى infobus.kz سەرۆەرىنە جىبەرەدى. infobus.kz سەرۆەرى اۆتوبۋستاردىڭ دەرەكتەرىنەن باسقا، جولاۋشىلارعا ورىن تۋرالى، توقتاۋعا كەلۋدىڭ بولجامدى ۋاقىتى جانە مارشرۋتتاردى ىزدەۋ مۇمكىندىگى تۋرالى ونلاين اقپاراتىن بەرەتىن قالالىق ديسپەتچەرلىك جۇيەنىڭ باعىتتارى بويىنشا اۆتوبۋستاردىڭ تاراتىلۋى تۋرالى اقپارات الادى. infobus.kz سەرۆيسى http://infobus.kz ۆەب-پورتالىندا بار، سونداي-اق، playmarket جانە appstore-دەن ٴموبيلدى قۇرىلعىلارعا قوسىمشانى جۇكتەۋگە مۇمكىندىك بار. جانە ايتپاعىم، infobus.kz – قالا تۇرعىندارى ٴۇشىن تەگىن. «ينفوبۋس» جوباسى 2013 جىلى ٴوز جۇمىسىن باستادى جانە رەسپۋبليكامىزدىڭ 10 قالاسىندا: كوكشەتاۋ، پەتروپاۆل، سەمەي، اقتاۋ، ورال، تالدىقورعان، قوستاناي، قاراعاندى، ششۋچە، قىزىلوردا، سونداي-اق busreport باعدارلامالىق كەشەنى قازاقستاننان تىس جەرلەردە دە ٴجۇرىپ جاتىر. كرەمەنچۋكا، سونداي-اق رەسەي فەدەراسياسىنىڭ اپاتي-كيروۆسك قالاسىندا دا بار.

– بۇل جوبانى قولعا الۋدىڭ قانداي سەبەبى بولدى؟ تيىمدىلىگى نەدە؟ ەلدىڭ ەكونوميكاسى مەن حالىقتىڭ يگىلىگىنە قانشالىقتى پايداسى ٴتيىپ وتىر؟

ٴقازىر كولىكتىڭ سپۋتنيكتىك مونيتورينگى جاڭالىق ەمەس، ونىڭ ستاندارتتى مۇمكىندىكتەرى اۆتوبۋس پاركتەرىنىڭ جانە جەرگىلىكتى رەتتەۋشى ورگانداردىڭ بارلىق تالاپتارىنا جانە قاجەتتىلىكتەرىنە ساي كەلمەيدى. ال kazintersoft ازىرلەگەن busreport باعدارلاماسى جانە infobus.kz اقپاراتتىق پورتالى اۆتوبۋس پاركىن باسقارۋ پروسەسىن اۆتوماتتاندىرۋعا مۇمكىندىك بەرەدى، ديسپەتچەرلەرگە، فلوتتى باسقارۋعا جانە بارلىق باسقارۋ ورگاندارىنا ونلاين رەجىمىندە زاماناۋي اقپاراتتى ۇسىنادى. جۇيەنى ەنگىزۋ ارقىلى ەلدى ەكونوميكالىق، ەكولوگيالىق جانە الەۋمەتتىك تۇرعىدان دا العا باستارىمىز انىق. مىسالى، gps قۇرىلعىلارىنىڭ اۆتوبۋستاردا پايدالانۋى كولىك قۇرالدارىن دۇرىس پايدالانباۋدى ازايتۋى مۇمكىن، بۇل اتموسفەراعا شىعارىلعان گازداردىڭ شىعارىندىلارىنىڭ مولشەرىن ايتارلىقتاي ازايتادى دەگەن ٴسوز. استاناداعى ٴبىر عانا اۆتوبۋس پاركىنىڭ بەرگەن مالىمەتىنە سۇيەنسەك، gps-قۇرىلعىلاردىڭ ەنگىزىلۋى كۇن سايىن 1 توننا ديزەل وتىنىن ۇنەمدەۋگە اكەلگەن. سونداي-اق، جىلدامدىقتى شەكتەۋدى باقىلاۋ جولاۋشىلار مەن جۇرگىزۋشىلەردىڭ قاۋىپسىزدىگىن جوعارىلاتۋىنا مۇمكىندىك بەرەدى، اۆتوبۋستىڭ عانا ەمەس، بارلىق جول پايدالانۋشىلاردىڭ قاۋىپسىزدىگىن ارتتىرادى.

ٴبىزدىڭ جوبامىزدىڭ الەۋمەتتىك ماڭىزى ٴارقاشان ٴبىرىنشى كەزەكتە، ەڭ الدىمەن قاۋىپسىزدىكتە، قوعامدىق كولىكتە جولاۋشىنى پايدالانۋدىڭ ىڭعايلىلىعى مەن حاباردار بولۋىندا كورىنىس تابۋى كەرەك. ياعني، سوڭعى اقپاراتقا قول جەتكىزە الاتىن جولاۋشى ٴوزىنىڭ ساپارىن بولجامداپ قانا قويماي، ۋاقىتىن ٴتيىمدى جۇمساۋعا جانە دەنساۋلىقتى ساقتاپ، ساپارىنىڭ ٴساتتى بولۋىنا جوسپارلاي الادى دەگەن ٴسوز. اسىرەسە قىستا اۆتوبۋستى ۇزاق كۇتىپ جاتامىز. ال busreport جانە infobus پروگراممالىق كەشەنى ارقىلى ازىرلەنگەن اقپارات ارقىلى جولاۋشىلار قالاداعى كولىك جەلىسىنە جۇكتەمەنى تومەندەتە وتىرىپ، جەكە كولىككە ەمەس، جولاۋشى كولىگىنە تاڭداۋ جاسايدى. ٴقازىر استانالىقتاردىڭ قىستىڭ كوزى قىراۋدا ايالدامالاردا توڭىپ تۇراتىنى راس. كەيبىر اۆتوبۋستاردىڭ ٴجۇرۋ ارالىعىندا ۇزاقتىق بار، دەمەك، تۇرعىنداردىڭ ساعاتتاپ ايالدامالاردا توسىپ تۇراتىنى شىندىق. ونىڭ سوڭى ٴوزىڭىز ايتپاقشى، ۋاقىتىنان كەشىككەن جولاۋشى كولىكتەرىنىڭ جۇرگىزۋشىلەرىن جارىسقا يتەرمەلەپ، ارتى ادام ولىمىنە ۇلاساتىن اپاتقا الىپ كەلەدى.

– «اقىلدى قالا» اتانىپ وتىرعان استانادا بۇل جوبانىڭ جۇزەگە اسۋ جاعى قالاي؟

- استانا جانە الماتى قالالارىندا قوعامدىق كولىك ماسەلەلەرى بويىنشا قاداعالاۋشى ۇيىمدار «استانا-لرت» جشس جانە «الماتى قالاسىنىڭ كولىكتىك حولدينگى» جشس ەكەنىن بىلەسىزدەر. قازىرگى كەزدە ٴبىز بۇل ۇيىمدارعا شەشىم قابىلداۋ ٴۇشىن busreport باعدارلامالىق كەشەنىن ىسكە اسىرۋ بويىنشا ۇسىنىستار جىبەردىك.

الداعى ۋاقىتتا كومپانيا قانداي تىڭ جوبا اكەلمەك، قانداي جوسپارلارىڭىز بار؟ قوعامدىق كولىكتىڭ قوزعالىسىن جاقسارتۋدا اۆتوماتتاندىرىلعان يننوۆاسيالىق جۇيەنىڭ بولاشاقتا وزگەرىسكە ۇشىراۋى مۇمكىن بە؟

kazintersoft كومپانياسىندا بىلىكتى ازىرلەۋشى كوماندا جۇمىس جاسايدى. سوندىقتان ٴبىزدىڭ جوبالارىمىز ۇنەمى دامىپ كەلەدى جانە ٴبىزدىڭ كليەنتتەرىمىزدىڭ تىلەكتەرىنە نەگىزدەلگەن. ونىڭ ٴبىرى، كوپ ۇزاماي infobus.kz قالاارالىق اۆتوبۋستاردا جۇمىس جاسايتىن بولادى.

«ٴبىزدىڭ ەڭبەگىمىز ەل ەكونوميكاسىنا ەلەۋلى ۇلەس قوسسا، ەڭبەگىمىزدىڭ ەش كەتپەگەنى» دەيدى كومپانيا ماماندارى. راسىندا جەرگىلىكتى بيلىك ٴۇشىن دە، بۇقارا حالىق پەن تاسىمالداۋشى تاراپ ٴۇشىن دە جاڭا ينتەللەكتۋالدى جۇيەنىڭ بەرەر پايداسى زور. جاڭا جۇيەنىڭ جۇمىسى جولعا قويىلسا، جۇرگىزۋشىلەر مەن جولاۋشىلار اراسىنداعى داۋدىڭ ٴبىر ساتتە شەشىلەتىندىگىنە ٴشۇبا جوق. بۇل دەگەنىڭىز ايالداماعا باياۋ جەتەتىن جولاۋشى كولىكتەرى ازايىپ، اۆتوبۋستى ساعاتتاپ سارىلا كۇتەتىندەردىڭ قاراسى دا اياقتالار كۇننىڭ الىس ەمەستىگىن اڭعارتقانداي.

جادىرا ٴمۇسىلىم


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي