BAQ.kz - Қазақстан жаңалықтары USD 352.54 BAQ.kz - Қазақстан жаңалықтары EUR 415.15 BAQ.kz - Қазақстан жаңалықтары RUB 5.31
استانا:

ٴۇندىستان كۇرىش ٴوسىرۋدى ازايتۋى كەرەك − عالىمدار

ٴۇندىستان حالقىنىڭ سانى كۇننەن كۇنگە ارتىپ جاتقاندىقتان، بۇل ەلدە ازىق-تۇلىك جەتىسپەۋشىلىگى بايقالادى. سونداي-اق بۇل مەملەكەتتە وسىرىلەتىن كوپتەگەن ٴداندى داقىلدار سۋدى وتە كوپ مولشەردە قاجەت ەتەدى، دەپ جازادى baq.kz اقپارات اگەنتتىگى the guardian باسىلىمىنا سىلتەمە جاساپ.

عالىمدار جۇرگىزگەن سوڭعى زەرتتەۋ ناتيجەلەرىنە سەنسەك، ٴۇندىستان كۇرىش پەن بيداي ٴوسىرۋدى ازايتىپ، قورشاعان ورتا مەن ادام دەنساۋلىعىنا زيانى جوق شارۋاشىلىققا كوشۋى كەرەك.

2050 جىلعا قاراي ٴۇندىستاندا 400 ميلليون ادام ازىق-تۇلىك تاپشىلىعىنا ۇشىرايدى. قازىرگى كۇننىڭ وزىندە سۋ مەن تاماقتىڭ جەتىسپەۋشىلىگى بار ەكەنىن ەسكەرسەك، بۇل بولاشاقتا ۇلكەن ماسەلەگە اينالعالى تۇر.

حالىقارالىق عالىمدار توبى جۇرگىزگەن زەرتتەۋ وسى ەل ۇكىمەتىنىڭ ەكى نەگىزگى مىندەتتەرىنە – ۇلتتى تاماقتاندىرۋ مەن سۋدى دۇرىس پايدالانۋعا نەگىزدەلگەن.

بۇگىنگى تاڭدا ٴۇندىستان حالقىنىڭ ۇشتەن بىرىندە انەميا بار، سونداي-اق اۋىل شارۋاشىلىعى مەن جاۋىن-شاشىننىڭ ازايۋىنان سۋمەن قامتۋ سالاسىندا دا پروبلەمالار كەزدەسەدى.

ٴۇندىستان حالقى كوبىنە ٴداندى داقىلداردى تۇتىنادى. ٴبىراق عالىمدار مەملەكەتتەگى پروبلەمالاردىڭ پايدا بولۋىنا ٴداندى داقىلداردىڭ ٴتۇرىن تاڭداۋ اسەر ەتكەن دەپ بولجام جاساپ وتىر.

«ەگەر ٴۇندىستان كۇرىش پەن بيداي ٴوسىرۋدى ازايتپاسا، رەسۋرستاردى ٴتيىمسىز پايدالانۋ جانە كليماتتىڭ وزگەرۋ پروبلەماسى تولاستامايدى. سوندىقتان تۇتىنۋشىلىق قاۋىپسىزدىك پەن ەكولوگيالىق ماقساتتا وسى پروبلەمانى شەشۋگە تىرىسۋ كەرەك»، - دەيدى كولۋمبيا ۋنيۆەرسيتەتىنىڭ عالىمى كايل دەۆيس.

عالىمدار ٴۇندىستاندا ەڭ كوپ وسىرىلەتىن بەس ٴتۇرلى داقىلدى زەرتتەگەن: كۇرىش، بيداي، جۇگەرى، سورگو (اق جۇگەرى)، پروسو. scienceadvances جۋرنالىندا جاريالانعان زەرتتەۋ ناتيجەلەرىنە سەنسەك، ٴۇندىستاندا سۋدىڭ كوپ مولشەرى كۇرىش وسىرۋگە جۇمسالادى. سونداي-اق بيداي دا كوپ مولشەردە سۋدى قاجەت ەتەدى.

زەرتتەۋدە عالىمدار اۋىل شارۋاشىلىق داقىلدارىنىڭ قۇنارلىلىعىن دا ەسكەرگەن. ونىڭ ىشىندە كالوريا، اقۋىز، تەمىر مەن سينك مولشەرى باستى نازارعا الىنعان. باقىلاۋ ناتيجەسى كورسەتكەندەي، جۇگەرى مەن اق جۇگەرى تەمىر كورسەتكىشىن ازايتادى.

ٴۇندىستاننىڭ كۇرىش پەن بيدايعا تاۋەلدىلىگىنە 1960 جىلدارداعى «جاسىل رەۆوليۋسيا» اسەر ەتسە كەرەك. ول كەزدەرى جاڭا اۋىل شارۋاشىلىق تەحنولوگيالارىنىڭ دامۋى ٴتۇرلى داقىلداردى وسىرۋگە اكەلگەن بولاتىن. دەگەنمەن، بۇل وزگەرىس وڭىردەگى اشتىققا اسەر ەتىپ، قورشاعان ورتاعا كەرى اسەرىن تيگىزگەن، سونداي-اق پارنيك گازدارى مەن اۋانىڭ لاستانۋىنا اكەلگەن.

دەۆيستىڭ ايتۋىنشا، ٴبىر ميللياردتان استام حالىقتىڭ قالىپتاسىپ كەتكەن تاماقتانۋ ٴداستۇرىن بۇزۋ وتە قيىن. سونىمەن قاتار كەيبىر وڭىرلەردە بۇل داقىلداردى تۇتىنۋ كورسەتكىشى دە تىم جوعارى.

«ٴۇندىستان ۇكىمەتى كىشىگىرىم فەرمالارعا سۋبسيديا بەرۋدى ارتتىرىپ، كۇرىش پەن بيدايدى از وسىرۋگە ٴمان بەرە باستاعانى ٴجون»، - دەيدى ماماندار.

اعىلشىن تىلىنەن اۋدارعان التىناي قۋانىشبەك


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي