BAQ.kz - Қазақстан жаңалықтары USD 336.39 BAQ.kz - Қазақстан жаңалықтары EUR 390.28 BAQ.kz - Қазақстан жаңалықтары RUB 5.36
استانا:

سوڭعى ەكى جىلدا ۇلىبريتانيا ۋنيۆەرسيتەتتەرىندە ناسىلشىلدىك 60 پايىزعا ارتقان

بۇگىنگى تاڭدا ۇلىبريتانيا ۋنيۆەرسيتەتتەرى تولەرانتتىلىق پەن ليبەرالدى سيپاتتاعى ورىنعا اينالا الماي وتىر. بۇعان سوڭعى جۇرگىزىلگەن زەرتتەۋ ناتيجەلەرى دالەل بولا الادى. سوڭعى ەكى جىلدا ۇلىبريتانياداعى بۇكىل جوعارى وقۋ ورىندارى بويىنشا ناسىلشىلدىككە بايلانىستى جانجالدار 60 پايىزعا ارتقان، دەپ حابارلايدى baq.kz اقپارات اگەنتتىگى the independent باسىلىمىنا سىلتەمە جاساپ.

ماماندار سوڭعى جۇرگىزىلگەن ساۋالناما ناتيجەلەرى ناقتى بولماۋى مۇمكىن ەكەنىنە، زەرتتەۋ بارلىق قىزمەتكەرلەر مەن ستۋدەنتتەردى قامتىماعاندىقتان، جاعداي بۇدان دا ناشار بولۋى مۇمكىن ەكەنىنە سەنىمدى.

ۇلىبريتانيانىڭ ۇلتتىق ستۋدەنتتەر كەڭەسىنىڭ (nus) حابارلاۋىنشا، مەملەكەت بويىنشا بارلىق قالالارداعى ۋنيۆەرسيتەتتەردە ناسىلشىلدىك ٴورشىپ تۇر. ٴبىراق ۋنيۆەرسيتەت بيلىگى بۇل تۋرالى حابارسىز.

the independent جۇرگىزگەن زەرتەتۋلەر ناتيجەسىندە بەلگىلى بولعانداي، 2017 جىلى ۇلىبريتانيا ۋنيۆەرسيتەتتەرىندە 129 ناسىلشىلدىك جانجال تىركەلگەن. بۇل 2015 جىلعى 80 وقيعامەن سالىستىرعاندا 61 پايىزعا كوپ. سونىمەن قاتار ستۋدەنتتەر مەن ۋنيۆەرسيتەت قىزمەتكەرلەرىنىڭ ناسىلشىلدىككە بايلانىستى شاعىمى ٴبىر جىلدىڭ ىشىندە 23 پايىزعا وسكەن. ال 2016 جىلى 105 شاعىم تۇسكەن.

زەرتتەۋگە مالىمەتتەردى ۇسىنعان 94 ۋنيۆەرسيتەتتىڭ ىشىندە ٴاربىر 5 جوعارى وقۋ ورنىنىڭ ەكەۋىندە (37%) سوڭعى ەكى جىلدا ناسىلشىلدىككە بايلانىستى وقيعالاردىڭ ارتقانىن بايقاۋعا بولادى. دەگەنمەن، nus ۇيىمىنىڭ ايتۋىنشا، ماسەلە بۇدان دا ۋشىعىپ تۇر.

the independent ساۋالناماسىنا جاۋاپ بەرگەن رەسپوندەنتتەردىڭ مالىمەتتەرى ٴدىني سەنىمگە بايلانىستى جەك كورۋشىلىكتەن تۋىنداعان جانجال 2015 جىلمەن سالىستىرعاندا 2017 جىلى ەكى ەسەگە وسكەنىن كورسەتتى. سونداي-اق سوڭعى ٴۇش جىلدا يسلامعا قارسى ارەكەتتەر 26 ۋنيۆەرسيتەتتە بايقالعان.

وتكەن ايدا ەكسەتەر ۋنيۆەرسيتەتىندە زاڭگەر ستۋدەنتتەردىڭ ٴناسىلشىل كوزقاراستارىن بايقاتاتىن جازبالار whatsapp ارقىلى تاراپ، كەيىن facebook الەۋمەتتىك جەلىسىندە كەڭىنەن تالقىلانعان بولاتىن.

the independent انىقتاعان جاڭا مالىمەتتەر بويىنشا، كەيبىر ستۋدەنتتەر ناسىلشىلدىك ٴۇشىن وقۋدان قۋىلعان. ٴبىراق كوپ جاعدايدا ەسكەرتۋ ايتىپ، ايىپپۇل مەن كەشىرىم سۇراتۋمەن شەكتەلگەن. مىسالى، بەلفاستاعى كورولدىك ۋنيۆەرسيتەت ستۋدەنتى يسلامعا قارسى شىققانى ٴۇشىن ەسسە جازۋعا مىندەتتەلگەن. nus ۇيىمىنداعى قارا ناسىلدىلەردىڭ قۇقىعىن قورعاۋشى يلياس ناگدەنىڭ ايتۋىنشا، كوپ جاعدايدا ۋنيۆەرسيتەت اكىمشىلىگى ستۋدەنتتەردىڭ ناسىلشىلدىككە قاتىستى شاعىمدارىنا سەنبەيدى. «ولار وزدەرىنىڭ ورناتقان تارتىپتەرىنىڭ ورىندالماعانىن مويىنداعىسى كەلمەيدى»، دەيدى ول.

زەرتتەۋگە قاتىسقان ۋنيۆەرسيتەتتەردىڭ ۇشتەن ٴبىرى ناسىلشىلدىك وقيعالار تۋرالى تولىق اقپارات بەرمەگەن. ولاردىڭ كوپشىلىگى ونداي اقپارات بىرەۋلەردىڭ جانىنا باتاتىنىن العا تارتقان. ال كەيبىر ۋنيۆەرسيتەتتەر «ٴناسىلشىل» جانجالداردىڭ مۇلدە بولماعانىن ايتقان.

زەرتتەۋ بارىسىندا بايقالعانداي، ۋنيۆەرسيتەتتەردە وقيعالاردى تىركەۋدىڭ ورتاق جۇيەسى جوق.

جاقىندا nus الەۋمەتتىك جەلىدە وزدەرىنىڭ زەرتەتۋ ناتيجەلەرىن جاريالادى. وندا ٴبىر اپتادا 30 ۋنيۆەرسيتەتتە وقيتىن 100-دەن استام ستۋدەنت ناسىلشىلدىككە بايلانىستى وقيعالارىن ايتىپ، قاۋىپسىزدىك ماسەلەسىنە الاڭدايتىنىن ايتقان. بەلگىلى بولعانداي، كوپ جاعدايدا ستۋدەنتتەر ناسىلشىلدىككە باليانىستى وقيعالاردى ايتۋ ٴۇشىن ۋنيۆەرسيتەتتەردىڭ رەسمي كانالدارىن ەمەس، الەۋمەتتىك جەلىلەردى پايدالانادى. مىسالى، نوتتينگەم ستۋدەنتى وتكەن ايدا ناسىلشىلدىك ٴۇشىن ايىپتى دەپ تانىلدى. ونىڭ ٴوز كىناسىن مويىنداۋىنا ۆيدەونىڭ الەۋمەتتىك جەلىدە تاراۋى اسەر ەتتى. سونداي-اق ناسىلشىلدىك قىسىمعا تەك ستۋدەنتتەر ەمەس، ۋنيۆەرسيتەت قىزمەتكەرلەرى دە تاپ بولاتىنىن ايتا كەتكەن ٴجون. «بارلىق ۋنيۆەرسيتەت قىزمەتكەرلەرى كەز كەلگەن وقيعانى اكىمشىلىككە ايتا الاتىنىن بىلگەندەرى ٴجون. ارينە، ولار قولداۋ تاباتىندارىنا سەنىمدى بولعاندا عانا ونداي جاعدايعا باراتىنى انىق»، دەيدى ۋنيۆەرسيتەتتەر كەڭەسىنىڭ حاتشىسى ساللي حانت.

اعىلشىن تىلىنەن اۋدارعان التىناي قۋانىشبەك

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي