USD 336.23 EUR 360.3 RUB 5.28
استانا:

يەمەندە ٴۇش تاۋلىك بويى وق اتپاۋ رەجيمى جاريالانادى

يەمەندە بۇگىن جەرگىلىكتى ۋاقىتپەن 23 ساعات 59 مينۋتتان باستاپ وق اتپاۋ رەجيمى ەنگىزىلەدى. ول 72 ساعات ياعني، ٴۇش تاۋلىك بويى ساقتالماق.

الايدا سوعىستان ابدەن مەزى بولعان تۇرعىندار ەلگە ۋاقىتشا تىنىشتىق ەمەس بەرىك ٴبىتىم ورناتىپ، قانتوگىستى توقتاتۋ كەرەك دەيدى. يەمەندە ٴۇش تاۋلىك بويى تىنىشتىق ورنايتىنىن بىرىككەن ۇلتتار ۇيىمىنىڭ يەمەن ىستەرى جونىندەگى ارنايى وكىلى مالىمدەدى.

ايتۋىنشا، ايماقتا سوعىسىپ جاتقان قارۋلى توپتىڭ بارلىعى وق اتپاۋعا كەلىسكەن. وسى ارالىقتا ۇيىم شالعايدا جاتقان ەلدى مەكەندەرگە گۋمانيتارلىق كومەك جەتكىزۋدى كوزدەپ وتىر. ال قاقتىعىستان قاجىعان سانا تۇرعىندارى وسى بىتىمگەرلىك اتىستى توقتاتۋدىڭ العاشقى قادامى بولادى دەپ ۇمىتتەنەدى. دەگەنمەن، تۇرعىندار اراسىندا وعان سەنبەيتىندەر دە جوق ەمەس.

- ٴبىز بولاشاققا ۇلكەن ۇمىتپەن قارايمىز. ەگەر مۇندا قان توگىپ جاتقان بارلىق تاراپ حالىقارالىق ۇيىمدار قويعان تالاپتى ورىنداپ كەلىسىمگە كەلسە، ەلىمىزگە بەيبىت كۇندەر قايتا ورالار ەدى. تاڭ تىنىش اتسا دەپ ٴاربىر يەمەن تۇرعىنى ارمانداپ ٴجۇر.

- ٴبىز مىنا سۇم سوعىس تولاستاپ، بەيبىتشىلىك ورنايدى دەگەن ۇمىتتەمىز. مەنىڭ ويىمشا، بەيبىتشىلىكتى قولدايتىن ۇيىمدار مەن مەملەكەتتەر قاقتىعىسۋشى تاراپتارعا قىسىم كورسەتسە دە ٴبىتىمدى ساقتاپ قالۋى كەرەك.

- وق اتپاۋ ٴتارتىبى ەنگىزىلدى دەپ جاريالاعانى بولماسا اۋە سوققىلارى دامىل تاپپادى. ولار مەكتەپ، مەشىت پەن تۇرعىن ۇيلەرگە وق جاۋدىرىپ، ٴبارىن جەرمەن جەكسەن ەتتى. وسىنى كورىپ بىتىمگە كىم كەلە قويسىن؟

بۇعان دەيىن «ٴال جازيرا» تەلەارناسى يەمەن پرەزيدەنتى ابد راببو مانسۋردىڭ ٴۇش كۇندىك ٴبىتىمدى ودان ٴارى ۇزارتۋعا نيەتتى ەكەنىن حابارلاعان بولاتىن. وق اتپاۋ رەجيمىن حالىقارالىق ۇيىمدار دا قىزۋ قولداپ وتىر. ٴتىپتى بىتىمگە بۇلىكشى حۋسيتتەرگە قارسى اۋە سوققىلارىن جۇمسايتىن ساۋد ارابياسىنىڭ كواليسياسى دا ماقۇلدادى.

«بارلىعى تاراپتاردىڭ شىنايى نيەتىنە بايلانىستى. وسى كەزگە دەيىن جالعاسقان قانتوگىس كيكىلجىڭنىڭ قارۋمەن شەشىلمەيتىنىن دالەلدەپ بەردى. مەملەكەتىمىزدە تىنىشتىق ورناپ، وسىپ-وركەندەۋ ٴۇشىن دوستىق قاتىناس ەل ىشىندە عانا ەمەس، كورشى ەلدەرمەن دە قالىپتاسۋى كەرەك»، - دەيدى ساياساتتانۋشى ابدۋل-باري تاحەر.

ايتا كەتەيىك، يەمەندگى قاقتىعىس باستالعالى مۇندا وق اتپاۋ رەجيمى العاش رەت جاريالانىپ وتىرعان جوق. بۇعان دەيىن 11 ساۋىردە تاراپتار قول جەتكىزگەن بىتىمگەرلىك كەلىسىم بەس ايعا عانا سوزىلعان. تامىز ايىنىڭ باسىندا ونى ساۋد ارابياسى باسقاراتىن كواليسيا ۇشاقتارى ساناگا اۋە سوققىلارىن جاساۋ ارقىلى بۇزدى. سودان قايتا جاندانعان قاقتىعىستار ٴالى دە تولاستار ەمەس.

24.kz

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي