BAQ.kz - Қазақстан жаңалықтары USD 371.31 BAQ.kz - Қазақстан жаңалықтары EUR 419.32 BAQ.kz - Қазақстан жаңалықтары RUB 5.59
استانا:

گرۋزيا حالقى پرەزيدەنت سايلاۋىنىڭ قورىتىندىسىنا نارازى

استانا، baq.kz. گرۋزيا استاناسى تبيليسيدە مىڭداعان ادام بيلىك پارتياسى قولداعان كانديدات سالومە ٴزۋرابيشۆيليدىڭ پرەزيدەنت بولىپ سايلانۋىنا قارسىلىق تانىتىپ، شەرۋگە شىقتى.

اكسياعا قاتىسۋشىلار 28 قاراشادا وتكەن پرەزيدەنت سايلاۋى كەزىندە ٴتۇرلى زاڭسىزدىقتاردىڭ بولعانىن مالىمدەدى.

ازاتتىقتىڭ جازۋىنا قاراعاندا، قولدارىنا گرۋزيا مەن ەۋروپا وداعىنىڭ تۋلارىن ۇستاعان شەرۋشىلەر پارلامەنت عيماراتىنىڭ الدىنا كەلىپ، سايلاۋ قورىتىندىسىنىڭ كۇشىن جويىپ، مەرزىمىنەن بۇرىن قايتا سايلاۋ وتكىزۋدى تالاپ ەتتى جانە سايلاۋ تۋرالى جاڭا زاڭ قابىلدانسىن دەدى.

فرانسيادا تۋىپ وسكەن، ەلدىڭ بۇرىنعى پرەمەر-مينيسترى، ميللياردەر بيدزين ٴيۆانيشۆيليدىڭ “گرۋزيا ارمانى” پارتياسىنان كانديدات بولعان 66 جاستاعى سالومە زۋرابيشۆيلي ورتالىق سايلاۋ كوميتەتىنىڭ دەرەگىنشە، سايلاۋشىلاردىڭ 59،5 داۋىسىن العان. ال بىرىككەن وپپوزيسيالىق كۇشتەردىڭ كانديداتى گريگول ۆاشادزەگە سايلاۋشىلاردىڭ 40،48 پايىزى داۋىس بەرگەن.

ۆاشادزە 2 جەلتوقساندا وتكەن نارازىلىق اكسياسى كەزىندە شەرۋشىلەرگە “ۇرلانعان سايلاۋ” قورىتىندىسىنىڭ كۇشى جويىلۋى ٴتيىس ەكەنىن جانە قايتا سايلاۋ وتكىزۋ قاجەتتىگىن ايتتى. ونىڭ پىكىرىنشە، بيلىك گرۋزيانىڭ سايلاۋ جۇيەسىن قايتا قاراستىرىپ، 16 جەلتوقسانعا تامان وپپوزيسيامەن كەلىسسوز جۇرگىزۋ ٴۇشىن جۇمىس توبىن قۇرۋى ٴتيىس. ميتينگكە قاتىسۋشىلارعا ينتەرنەت ارقىلى بايلانىسقا شىعىپ، سويلەگەن ەلدىڭ بۇرىنعى باسشىسى ميحايل سااكاشۆيلي “گرۋزيانىڭ بولاشاعى وسى الاڭدا انىقتالادى” دەپ ايتقان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي