USD 334.31 EUR 355.17 RUB 5.31
استانا:

جايداق ٴمىنىپ جاۋعا شاپقان ٴارۋاقتى ەر

بايباقتى قارمىس ۇلىنىڭ دۇنيەدەن وتكەنىنە 100 جىل تولۋىنا ارناپ اس بەرىلدى

قازاق حالقى قاي كەزدە بولسا دا، قۋانىش پەن شاتتىقتا، قيىنشىلىق پەن اۋىرتپالىقتا ٴبىر جەردەن تابىلىپ، ٴبىر جاعادان باس، ٴبىر جەڭنەن قول شىعارىپ، ىنتىماق پەن بىرلىكتىڭ، تۋىسقاندىق پەن دوستىقتىڭ تۋىن جوعارى كوتەرىپ، ەلدىگىمىزدىڭ ەرەن ەڭبەگىن كورسەتىپ جۇرگەن، الداعى كەزدە دە وسى قاھارماندىق جولداردان ەش ۋاقىتتا تايماي جۇرەتىن حالىق ەكەنىن سان عاسىردان بەرى دالەلدەپ كەلەدى.

حالقىمىزدا «ٴولى ريزا بولماي، ٴتىرى بايىمايدى» دەگەن قاناتتى ٴسوز بار. ولاي بولسا ومىردەن وزعان اتا-بابالاردىڭ وشپەس رۋحىنا تاعزىم ەتۋ، قۇران باعىشتاۋ - بۇگىنگى ۇرپاقتىڭ ابىرويلى بورىشتارىنىڭ ٴبىرى.

حاكىم اباي: «ەدينيسا بولماسا نە بولادى وڭكەي ٴنول» دەمەكشى، بابالارىمىزدىڭ مىقتىلىعىنىڭ دارۋىنەن بولار، شىن مانىندە ۇرپاقتارىمىزدىڭ ٴىلىمپازدىعى، بەكزادالىعى، سايىپ كەلگەندە، تەكتى اتالارىمىزدىڭ قانى تامىرىمىزدا تۋلاپ، بۋىرقانىپ جاتقاندىعى دا سونىڭ ٴبىر دالەلى ىسپەتتەس. قازاق وندايدى قالىبى مىقتى ەكەن دەپ جاتادى. حالقىمىز ٴاماندا ەر مىنەزدى باتىرلارىن ٴپىر تۇتقان. ولاردىڭ اتىن ۇرانعا قوسىپ، ەل رۋحىن اسقاقتاتار ەرلىگىن اڭىزعا اينالدىرىپ، ماقتانىش ەتكەن. اتاجۇرتى ٴۇشىن جاۋعا شاپقان، حالقىنىڭ نامىسىن تۋ ەتىپ، بار ٴومىرىن ات ۇستىندە وتكىزگەن باتىرلاردان دا كەندە ەمەسپىز. ەل باسىنا كۇن تۋعاندا ارىن الاۋ ەتىپ، جانىن جالاۋ ەتىپ، تەبىنگىسىن تەرگە شىرىتكەن، تەرلىگىن مايعا ەرىتكەن، قاس دۇشپانىن تىزە بۇكتىرگەن حاس باتىرلار از بولعان جوق.

وسى ورايدا وتكەن اپتانىڭ جۇماسى كۇنى كەزىندە الەمگە مۇنايىمەن تانىلىپ، «قارا التىندى» سەلدەتكەن دوسسور كەنتىنىڭ تەرىستىگىندە ورنالاس-قان بايباقتى اتا كەسەنەسى باسىندا ارۋاقتى ەر، باتىر بابا بايباقتىعا ارنالىپ اس بەرىلىپ، ات شاپتىرىلدى، سۋىرىپ سالما اقىندار ايتىستى.

ميزام شۋاعىن توككەن بۇل كۇن جينالعان كوپتىڭ كوڭىل شاتتىعىمەن ۇندەسە ارايلانىپ تۇردى. اۋەلى جينالعان بارشا جۇرتشىلىق باتىر بابا كەسەنەسى باسىنا جينالىپ، قاۋىشقان كوپ اعايىن بىر-بىرىنە «قابىل بولسىن!» ايتىستى.

بايباقتى اتا قارمىس ۇلى كەسەنەسى باسىندا ميتينگىگە جينالعان كوپشىلىكتىڭ الدىندا اۋدان اكىمى بەرىكقالي سارسەنعاليەۆ ٴسوز سويلەپ، وتكەنىمىز بەن كەلەشەگىمىز تاريحىمىزدان باستاۋ الاتىندىعى جونىندە، بۇگىنگى تاعزىم ەتۋ يگىلىكتى شاراسىنىڭ ماڭىزدىلىعىنا توقتالىپ ٴوتتى.

- حالىقتى بەرەكە-بىرلىككە شاقىرىپ، ۇلتاراقتاي بولسا دا، اتاقونىس - تۋعان جەرىمىزدى ەشكىمگە تاپتاتپاعان ەل بيلەگەن اۋزى دۋالى بيلەرىمىز بەن باتىرلارىمىزدىڭ، اۋليە بابالارىمىزدىڭ ەسىمىن ۇمىتپاۋ- پارىزىمىز.

ٴبىز ۇنەمى تاريحىمىزدان جاڭاشا وي، جاعىمدى جاڭالىقتار كۇتەتىنىمىز راس. وشكەنىمىز جانىپ، جوعالعانىمىز تابىلىپ، تاريحىمىزدى زەردەلەپ، تەگىمىزدى تۇگەندەي باستادىق. ارۋاقتى بابالارىمىزدىڭ ەسىمدەرىن جاڭعىرتىپ، كەسەنە، ەسكەرتكىشتەر تۇرعىزىپ، يماندىلىققا دا بەت بۇردىق. اسىل ٴدىنىمىزدى قايتا ورالتتىق. «ٴبىز–بابالارىمىزدىڭ ۇلى ىستەرىن جالعاستىرۋشىلارىمىز»، –دەگەن ەلباسىمىزدىڭ سىندارلى ساياساتىنىڭ ٴبىرى ەلىمىزگە ٴداستۇردى قايتا جاڭعىرتۋ ماسەلەسىن قولعا العاننان باستاپ، ەلىمىزدە قازاق باتىرلارىنىڭ بىلەكتىڭ كۇشىمەن، نايزانىڭ ۇشىمەن قورعاپ قالعان قاسيەتتى، كەڭ بايتاق قازاق جەرىمىزبەن اسىل قازىنالى ٴداستۇرىمىزدى دارىپتەپ، جانداندىرۋ قاجەت دەپ ماقسات قويىلعان بولاتىن. وسى ويدى جالعاستىرۋ ٴالى دە جالعاسىن تابۋدا. وسىعان دالەل رەتىندە، بۇگىندە حالقى قادىرلەگەن ارۋاقتى اتا -بابالارىمىزدىڭ ەسىمدەرىن قايتا جاڭعىرتىپ جاتىرمىز. بۇل - قۋانارلىق جاعداي. وسىنداي باتىر اتالارىمىز بارىن ٴبىز بۇگىن ۇلكەن ماقتانىشپەن ايتا الامىز. اۋليە بايباقتى اتا ەسىمىن جاڭعىرتىپ جانە وسكەلەڭ ۇرپاققا اتا - بابامىزدى تانىتىپ، قۇرمەتتەۋ- مىندەتىمىز. قازىرگى تاڭدا اتا تۋرالى كوپتەگەن ماتەريالدار جيناقتالىپ، كىتاپتارى جارىققا شىقتى. وسى شارانىڭ بارلىعى تاۋەلسىزدىگىمىزدىڭ 25 جىلدىعىنىڭ اياسىندا ٴوتىپ جاتىر. الداعى ۋاقىتتا اتامىزدىڭ رۋحىن قۇرمەتتەۋ ماقساتىندا ابزال ىستەر جالعاسىن تابا بەرەتىنىنە سەنىمىم مول،-دەدى اۋدان اكىمى.

وسى استا بابا قۇرمەتىنە ٴوزىنىڭ جۇرەكجاردى لەبىزىن بىلدىرگەن قازاق كينوسىن الەمدىك دەڭگەيگە كوتەرگەن قازاقستاننىڭ حالىق ٴارتىسى ، كسرو حالىق ٴارتىسى، “پاراسات” وردەنىنىڭ يەگەرى ٴاسانالى ٴاشىموۆ:

- ٴبىز وزىمىزدەن تىس تابيعاتتىڭ تىلسىم كۇشى بار ەكەنىن بىلەمىز. مىنە، سونداي ٴبىر قۇدىرەتتىڭ يەسى بايباقتى اتا باسىنا جينالىپ، بارشا حالىق جينالىپ، قۇران باعىشتاپ وتىرعانىمىز – ادامدىقتىڭ، كىسىلىك پەن بىرلىكتىڭ، ىنتىماقتىڭ كۇشى. تاعزىم ەتۋ، دۇعا ەتۋ- ساۋاپتى ٴىستىڭ نەگىزگىسى. ساۋاپتى ٴىسىمىز وڭعا باسسىن. قابىل بولسىن!-دەپ لەبىزىن جەتكىزدى. ارۋاقتى ەرگە ارنالىپ، قۇران باعىشتالىپ، كوپشىلىك دۇعا ەتىستى.

وسىدان سوڭ ايتۋلى شارالاردىڭ العاشقىسى - الامان بايگەنى كورۋگە اسىققان جۇرت بايگە الاڭىنا باعىت الدى.

الامان بايگە - 30 شاقىرىمدىق قاشىقتىققا شاۋىپ، باق سىناساتىن ات جارىسى. الامان بايگەگە 4 جاستان جوعارى جاراتۋلى سايگۇلىكتەر قاتىسادى. بايگەنى اشىق جازىق جەرلەردەگى بەلگىلەنگەن شەڭبەرلەردى اينالدىرا وتكىزەدى. اتالمىش الامان بايگەنىڭ تارتىبىنە ساي ات شاباتىن الاڭ اينالما قاشىقتىعى 5 شاقىرىم دا ، 6 اينالىمدا 30 شاقىرىمدى قۇرادى.

بايگەگە رەسپۋبليكامىزدىڭ تۇكپىر - تۇكپىرىنەن توپتان وزعان 43 سايگۇلىك قاتىستى.

بايگەنىڭ باس تورەشىسى، «ۇلتتىق سپورت تۇرلەرى» قاۋىمداستىعىنىڭ ٴتوراعاسى، قر-نىڭ جوعارى دارەجەلى تورەشىسى جانبالا ونەربەك بولدى.

«جۇزدەن – جۇيرىك، مىڭنان – تۇلپار» دەمەكشى، ناعىز تۇلپاردىڭ انىقتالاتىنى وسى 30 شاقىرىمدىق الامان بايگە.

بىرنەشە جىلدان بەرى بايگە قىزىقتاپ، ات شابىسىن تاماشالاماعان حالىق شولىركەپ قالعان ەكەن. دەلەبەسى قوزعان جانكۇيەرلەر سايگۇلىكتەردى اتاپ شۋلاسسا، ٴبىرقاتارى شاباندوزىن ماداقتاپ، جەلپىنىپ جاتتى.

«ٴشۇۋ» دەپ اتتىڭ باسىن جىبەرگەندە، 43 شاباندوز قارا جولدىڭ بويىمەن ۇزەڭگىلەس كەتكەن ەدى، ەكى-ۇش اينالىمنان كەيىن شىن سايگۇلىكتەر العا سۋىرىلىپ شىعىپ، تاعى ەكى-ۇش اينالىمنان كەيىن قالعاندارىنان ارالارى الشاقتاي باستادى. العاشقى اينالىمنان-اق، №20، №15، №17، №23 سايگۇلىكتەر وزگەلەردەن الدا بولدى. بايگەنىڭ قىزىعى دا سول، سوڭعى اينالىمعا كەلگەندە جانكۇيەرلەر دە جەلپىنە مويىن سوزىپ، العا ەنتەلەي ٴتۇستى. الىستان شاڭ كوتەرىلىپ، مارە سىزىعىنا ٴبىر توپ سايگۇلىك تە جاقىنداي بەردى. «جۇيرىكتەن جۇيرىك وزار جارىسقاندا» دەمەكشى، مارە سىزىعىنا ٴبىرىنشى بولىپ استانالىق «امانات» اتتى سايگۇلىگىمەن ايان امانجول شاباندوز جەتتى.

جارىستىڭ شارىقتاۋ شەگى دە، جۇرتتىڭ اسىعا كۇتەتىنى دە وسى. الامان بايگەگە 6 جۇلدە تاعايىندالدى. استانالىق 15 جاسار شاباندوز امانجول ايان «امانات» سايگۇلىگىمەن ٴبىرىنشى ورىن الىپ، «ۋاز پاتريوت» اۆتوكولىگىنىڭ كىلتىنە يە بولدى. 2- ورىندى «ارزاماس» سايگۇلىگىمەن قىزىلقوعالىق شاباندوز داستان تۇرجانوۆ ۇتىپ الىپ، «نيۆا» اۆتوكولىگىنە قول جەتكىزدى. جارىس جولىنا ماڭعىستاۋدان كەلگەن «دجەك پوت» سايگۇلىگىمەن شىققان شاباندوز تىلەكتەس نۇرتاس مارەگە ٴۇشىنشى بولىپ كەلىپ، «پريورا» اۆتوكولىگىنىڭ يەسى اتاندى. اقتاۋلىق «وسموس» سايگۇلىگىمەن شاباندوز حويتبايەۆ سالامات اتان تۇيەگە، اتىراۋلىق «ايقاراكوز» سايگۇلىگىمەن شاباندوز حايرۋللين قايرات بيەگە لايىق دەپ تانىلدى. التىنشى بوپ مارە سىزىعىن كەسكەن «كوركەم» سايگۇلىگىمەن بەينەۋلىك شاباندوز ٴالي يمانقۇل كىلەمگە يە بولدى.

شاباندوزداردى ماراپاتتاۋ ٴراسىمىن اۋدان اكىمى بەرىكقالي سارسەنعاليەۆ جانە كسرو حالىق ٴارتىسى، قر حالىق ٴارتىسى ٴاسانالى ٴاشىموۆ تابىستادى.

راسىمنەن كەيىن حالىقارالىق «شابىت» فەستيۆالىنىڭ گران-پري يەگەرى قايرات كاكىمنىڭ ورىنداۋىندا حالىق ٴانى «ايجاناي» شىرقالىپ، حالىققا ادەمى كوڭىل كۇي سىيلادى.

دانا حالقىمىزدىڭ «جەتى اتاسىن بىلگەن ۇل جەتى جۇرتتىڭ قامىن جەر، جەتى اتاسىن بىلمەگەن قۇلاعى مەن جاعىن جەر» دەگەن جۇيەلى قاعيداسى كوپ ماعىنانى ٴبىلدىرىپ، تۇڭعيىقتان سىر شەرتەرى انىق. ٴسوز جوق، بۇل تۇجىرىم ۇرپاقتان- ۇرپاققا وسيەت بولىپ قالىپتاسىپ، اتالارىمىز ونى ەجەلدەن قۇلاعىمىزعا سىڭدىرۋمەن كەلەدى. سەبەبى، تەگىڭدى ٴبىلۋ، ارۋاقتى قاستەرلەۋ، اتا-بابا سالتىنا بەرىك بولۋ تاريحي زاڭدىلىقتىڭ ٴارى قۇندىلىقتىڭ ٴبىر پاراسى بولىپ سانالادى. بۇل – قانشا مارتە تالقىلانسا دا ماعىناسى جويىلمايتىن، ٴمانى جوعالمايتىن ماڭگىلىك تاقىرىپ. قاي كەز، قانداي زامان بولماسىن، بابالارعا كورسەتىلەر قۇرمەت، ولاردىڭ ۇلاعاتىن جادىمىزدا جاڭعىرتۋ تاربيە مەن ٴتالىمنىڭ ماڭگىلىك قاينار كوزى بولماق.

اسەرلى ٴان قۇشاعىندا تۇرعان جۇرتشىلىق الدىندا ٴتۇرلى ماراپاتتار مەن قايىرىمدىلىق شارالارى جۇزەگە اسىپ جاتتى. اتاپ وتسەك، ايتۋلى شارانى ۇيىمداستىرۋشىلاردىڭ ٴبىرى بولات تولەۋبايەۆ جىلدار بويى بايباقتى اتا تۇنەك ٴۇيىنىڭ باسىندا ەڭبەك ەتىپ جۇرگەن شىراقشى نۇرلان الديار ۇلىنا تولەۋبايەۆتار اۋلەتى اتىنان «نيۆا» اۆتوكولىگىن مىنگىزدى.

كۇللى قازاقستان جەرىنە جار سالىپ، حالىق ٴۇشىن يماني، رۋحاني، مازمۇندى ٴىستى ۇيىمداستىرىپ، حالىقتىڭ ىنتىماعىن جاراستىرعان ۇيىمداستىرۋشى داۋلەتوۆ مارات تىلەك ۇلىنا قۇلسارى قالاسىنان كەلگەن بايباقتى اتانىڭ ۇرپاقتارى سايگۇلىك مىنگىزىپ، شاپان كيگىزدى. سونىمەن قاتار، قۇلسارى قالاسىنان كەلگەن ٴماريام، تامارا ەسىمدى كاسىپكەرلەر دوسسور كەنتىنىڭ مۇمكىندىگى شەكتەۋلى 10 ادامىنا كىلەم جانە ون ادامعا ون مىڭ تەڭگە كولەمىندە ماتەريالدىق كومەگىن ۇسىندى. ساۋاپتى ٴىستى ازاماتتىق بورىشى ساناعان ازاماتتارعا حالىقتىڭ العىسى جاۋدى.

باتىر بابانىڭ ۇرپاقتارى اتىنان كەلگەن ماڭعىستاۋلىق ورىنباسار اقساقال پەرنەباي دۇيسەنبين جازعان «شەركەشناما» كىتابى جونىندە توقتالىپ، ٴسوز سوڭىندا «بايباقتى اتا» قورىنا اقشالاي سىيلىق بەردى. شىراقشى نۇرلان الديار ۇلى مۇمكىندىگى شەكتەۋلى جاندارعا تابىس ەتەتىنىن جەتكىزدى. سونداي -اق، ورىنباسار اقساقال شارانى ۇيىمداستىرۋشىلارعا سىي-سياپاتىن جاساۋدى ۇمىتپادى.

ساحنا تورىنەن جاسالعان سىي-سياپات، ماراپاتتان سوڭ اسقا جينالعان بارشا جۇرتشىلىق وڭكەي قاتار ورنالاسىپ، ايدالاعا ەرەكشە ٴسان بەرىپ تۇرعان اق شاڭقان قازاقى كيىز ۇيلەرگە ارنايى دايىندالعان داستارحاننان ٴدام تاتۋعا باعىتتالدى. قاتار تىزىلگەن ٴۇي ماڭايىندا اۋداندىق مۇراجايدىڭ باتىر بابا ۇستاپ تۇتىنعان جانە وزگە دە قۇندى تاريحي جادىگەرلەرىنەن جيناقتالعان كورمەسىن ۇسىندى.

ارۋاقتارعا اس بەرۋ داڭعازالىقتان، ماقتانىشتان جۇزەگە اسپايدى. قايتا ەل مەن ەلدى تاتۋلىققا، يماندىلىققا شاقىرار جاعىمدى ٴىس. سوندىقتان تۇششىمدى اڭگىمە، ەلدىڭ ٴبىرتۇتاستىعى وسى جەردە ايتىلادى. وسى جەردە ٴپاتۋالى ىستەر شەشىمىن تابادى.

مۇنداي اۋقىمدى شارانى ۇيىمداستىرۋ جالعىز ادامنىڭ قولىنان كەلەر ٴىس ەمەس. وعان كوپ بولىپ جۇمىلعاندا، بابالار ارۋاعىنا دەگەن قوشەمەتتى بۇكىل قاۋىم بولىپ بىرىگىپ كورسەتكەندە عانا اتا-بابالار ارۋاعىن ٴبىر اۋناتىپ، ولار نەگىزىن قالاپ كەتكەن سىيلاستىق جەلىسىنىڭ التىن ٴجىبى ۇزىلمەسى انىق.

مىڭنىڭ ٴىسىن اتقارىپ، اس بەرۋدى ۇيىمداستىرۋدا باس بولىپ جۇرگەن ابزال جان بولات تولەۋبايەۆ:

- ەل تاۋەلسىزدىگىنىڭ 25 جىلدىعىنا وراي بايباقتى بابامىزدىڭ ومىردەن باقيلىق بولعانىنا 100 جىل تولۋىنا وراي قازاق ەلى ۇلكەن ٴىس اتقارىپ جاتىر. اتامىز قوسىمنىڭ بالاسى بولسا، ٴبىز قوعاشتىڭ ۇلدارىمىز. بالا كۇنىمىزدەن سۇرىنسەك تە، سۇيەنسەك تە «بايباقتى اتا» دەپ ۇرپاعىمىز اتا شاپاعاتىمەن ٴوسىپ كەلە جاتىر. جىلما - جىل اتا باسىنا كەلىپ تاعزىم ەتەمىز. بيىل دا مىنەكەي ۇلكەن ٴىس ۇيىمداستىردىق. بۇعان الىستان، جاقىننان كەلگەن قوناقتارىمىز، ٴاسانالى ٴاشىموۆ اتامىز كەلىپ قۋانتىپ جاتىر. جان - جاقتان كەلگەن اعايىن - تۋماعا، مىناۋ اتبەگىلەرگە، وسىنى ۇيىمداستىرعان بارلىق ۇيىمداستىرۋشىلارعا ايرىقشا العىسىمىزدى بىلدىرەمىز. اتانىڭ ارۋاعى ريزا بولىپ، ٴبارىمىزدى جەبەپ ٴجۇرسىن ،- دەپ لەبىزىن ٴبىلدىردى.

باتىر بابامىزدىڭ رۋحىنا باعىشتالعان ايتۋلى شارالاردىڭ قاتارىندا اقىندار ايتىسى – «ونەر دەسە، ىشكەن استارىن قويىپ»، قازاقتىڭ قارا دومبىراسىن قولپاشتاپ، قۋانا قول سوعار اعايىنعا مەرەكە سىيلادى.

ايتىسقا رەسپۋبليكامىزعا تانىمال اۋىزى دۋالى سەگىز ايتىسكەرىمىز قاتىستى.

ايتىس تاقىرىبى بايباقتى اتامىزدىڭ كەلىستى كەلبەتى، بوياماسىز بولمىسى، ازاماتتىق ارمانىمەن ۇشتاستىرا وتىرىپ، قازاقستان رەسپۋبليكاسىنىڭ تاۋەلسىزدىككە قول جەتكىزگەن 25 جىلدىعىن جىرلاۋ بولدى.

ايتىسقا ٴتورت جۇپ قاتىستى. فينالعا ەكى جۇپ جولداما الدى. ولار: اسحات قىلىشبەك پەن قاينار الا-گوزوۆ جانە سىرىمبەك سارسەنبايەۆ پەن رينات زايتوۆ.

«ارىستانداي ايباتتى،

جولبارىستاي قايراتتى.

اتامىز ٴبىزدىڭ بايباقتى،

قىلىشىن تاسقا قايراپتى.

ون ەكىگە تولعاندا،

تاز ەلىندە بولعاندا.

وتەپ باتىردان باتا الىپ،

ساندۋعاشتاي سايراپتى.

باتىرلىعىن ايتايىن،

تۇركىمەنمەنەن سوعىسىپ،

ادايعا تارتىپ اپەرگەن،

ماڭعىستاۋ دەگەن ايماقتى.

اۋليەلىگىن ايتايىن،

دۇشپانىنىڭ كوزىنە،

جىلان بولىپ كورىنىپ

بۇلت بولىپ قۋىپ ايداپتى.

جىلىويدىڭ ساعاسىن،

ايرانكولدىڭ سالاسىن،

كوشىپ قونىپ جايعاپتى.

ەلى ٴۇشىن تۇسپەي اتىنان،

ەرتە تۇرىپ جاي جاتتى» -، دەپ مۇرادىم اقىن اسحات قىلىشبەكپەن ايتىسىندا ٴسوز باستاسا، باتىر بابا جەرلەنگەن كيەلى دوسسور توپىراعىن قاينار الاگوزوۆ بىلاي جىرعا قوستى:

«دوسسوردىڭ اينالاسى سور بولعانمەن،

الەمگە مۇنايىمەن اتى ٴمالىم.

باسىندا باق بار ەكەن سورتاڭ جەردىڭ

باسىلعان بابامىزدىڭ تابانىمەن».

رينات زايتوۆ بولسا، اقىن بابامىزدى بىلاي دەپ جىرعا قوستى :

«ٴجۇز جىلدا بابالارىن ەسىنە العان

اعايىننىڭ شەرى ٴبىر تارقاسىن دا،

ويتكەنى وسى كۇنگە جەتكەنىمىز

بايباقتىداي باتىرلاردىڭ ارقاسىندا.»

جەرلەس اقىنىمىز سىرىمبەك سارسەنبايەۆ ۇيىمداستىرۋشىلارعا العىسىن:

«دۇركىرەگەن توي ٴوتتى دالامىزدا،

سىيلاستىق، بىرلىك بولسىن ارامىزدا،

ٴور رۋحتى اسىل جۇرتىم امان بولشى،

اس بەرگەن بايباقتىداي بابامىزعا»- دەپ جەتكىزدى.

ايتىس قورىتىندىسىندا ايان سەيىتوۆ، اسەم ەرەجەقىزى، مۇرادىم ميرلانوۆ، سىرىم اۋەزحان ىنتالاندىرۋ سىيلىعىنا (ٴجۇز مىڭ) تەڭگە بەرىلدى. ٴىىى ورىندى قىلىشبەك اسحات (ٴۇش ٴجۇز مىڭ) تەڭگە،

ٴىى ورىندى قاينار الاگوزوۆ (بەس ٴجۇز مىڭ) تەڭگە، ٴى ورىندى سىرىمبەك سارسەنبايەۆ (1 ميلليون تەڭگە) يەلەندى. باس جۇلدەگە تالايدى اششى شىندىعىمەن سۇرىندىرگەن ەسىمى ەلگە تانىلعان رينات زايىتوۆ لايىق دەپ تانىلىپ، ايتىستىڭ جۇلدەسىنە تىگىلگەن اۆتوكولىك كىلتىنە يە بولدى.

كسرو حالىق ٴارتىسى، قر حالىق ٴارتىسى ٴاسانالى ٴاشىموۆ: - بۇگىن ٴبىر تاريحتا ۇلكەن ورنى قالاتىن جيىن بولدى. ارۋاقتارعا باس ٴيىپ، سولاردان قالعان ٴسوزدى ايتىپ، حالىقتى ريزا قىلىپ جاتىرعان باسشىلارعا، ۇيىمداستىرۋشىلارعا راحمەت ايتامىن. اتا - بابالارىمىزدان قالعان جەر سولاردىڭ قانىمەن، تەرىمەن كەلگەن. ولاردىڭ ەڭبەگى ٴار ۋاقىتتا سىيلى. سونى باعالاي بىلەيىك. ەندەشە، حالقىمىزدىڭ نامىسىنان جاراتىلىپ، ٴداۋىر جۇگىن ارقالاپ وتكەن بابالارعا ٴتاۋ ەتۋ بارشا الاش جۇرتىنىڭ پەرزەنتتىك پارىزى دەر ەدىم. ٴاماندا وسىلاي بىرلىگىمىز ارتىپ، ٴبىرىمىز مىڭنىڭ، مىڭىمىز ەردىڭ، ەلدىڭ ٴىسىن اتقارۋعا اللا ٴناسىپ ەتكەي، - دەپ ۇيىمداستىرۋشىلاردىڭ بارلىعىنا ٴوز اتىنان شاپان كيگىزىپ، شارا سوڭىندا ەستەلىك سىيلىقتار تابىس ەتتى.

ٴسويتىپ، ادىلدىكتىڭ اق سەمسەرىن كوتەرىپ، ەلدىڭ قامىن ويلاعان، ٴوز زامانىندا «قارا قازان سارى بالا قامى» جاۋمەن ايقاسقان ەر جۇرەكتى باتىرىن، ارۋاقتى ەرىن وسىلايشا ەسكە الىپ، كەلەر ۇرپاققا ۇمىتىلماستاي ٴىزىن قالدىردى.

تاۋەلسىزدىككە قول جەتكىزگەن ەلىمىزدە اتا - بابادان جەتكەن مۇرامىز بەن وتكەن تاريحي قۇندىلىقتارىمىزدى وسىلايشا تۇگەندەپ كەلەمىز.

باتىر بابالاردىڭ ەل تاعدىرىنداعى ورنى مەن ولار جاساعان ەرلىكتەرىنىڭ ٴمانى مەن ماعىناسى بىرنەشە عاسىرلار بويىنا ەل جادىندا ٴبىر ساتكە بولسا دا ۇمىت بولعان ەمەس.

ٴسان-سالتاناتى جاراسقان، ىنتىماعى بەل اسقان، ىرىسى ارناسىنا سىيماي، وشاقتان قازانى، دالاسىنان ٴجىر-انى كەتپەگەن، قۋانىشتى ٴسات وسى استا تولىعىمەن كورىنىس بەردى.

رەپورتاجدى جۇرگىزگەندەر:

ٴمولدىر ٴىزتۇرعانوۆا،

الماگۇل تاۋمۋرينوۆا.

سۋرەتتەر اۆتورلاردىكى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي