USD 336.23 EUR 360.3 RUB 5.28
استانا:

شەجىرەلى قارتتارىم امان ٴجۇرسىن

«الپىس جاستان اسقاننان اقىل سۇرا» دەگەن حالىق. اقساقال - ەلدىڭ باسشىسى، جول باستاۋشىسى، كول-داريا، اقىلشىسى. سولاي بولعان، سولاي بولا بەرەدى دە.

قازاق حالقى ەجەلدەن قاريالارىنا بايىپپەن قاراپ، ولاردىڭ اقىل-كەڭەستەرىن تىڭداپ، ايتقان ۋاجدەرىن ەكى ەتپەي ورىنداپ، ەرەكشە قۇرمەتى مەن قامقورلىعىن تانىتا ٴبىلدى. قۇدايعا شۇكىر ول جاقسى ٴۇردىس، ۇلكەنگە قۇرمەت، كىشىگە ىزەت كورسەتۋ بۇگىنگى ۇرپاققا دەيىن جالعاسىپ كەلەدى.

قايماعى بۇزىلماعان قازاق اۋىلدارىنىڭ بىرەگەيى سانالاتىن زەلەنوبور سەلولىق وكرۋگىنە قاراستى مادەنيەت اۋىلىنا قازىنالى قاريالار مەن اق جاۋلىقتى انالاردىڭ داستارحان باسىندا جينالعان ٴداستۇرلى كەزدەسۋ ٴساتىنىڭ كۋاگەرى بولدىق. زەلەنوبور سەلولىق وكرۋگىنىڭ اكىمى مارجان جولداسپايەۆا، ۆەدەنوۆ وكرۋگىنىڭ قارابۇلاق اۋىلىنداعى كەزدەسۋدەن سوڭ مادەنيەتتىك ارداگەرلەرگە دە ۋاقىت تاۋىپ كەلگەن اۋداندىق ارداگەرلەر كەڭەسىنىڭ ٴتوراعاسى مالگەلدى جۇماعۇلوۆ، اۋداندىق جۇمىسپەن قامتۋ جانە الەۋمەتتىك باعدارلامالار ٴبولىمىنىڭ باسشىسى قانات قوجاعۇلوۆ اق جارما اق تىلەكتەرىن ٴبىلدىرىپ، ارداگەرلەرگە دەگەن وزدەرىنىڭ قۇرمەتتەرىن ٴبىلدىردى.

اۋىل شارۋاشىلىعى سالاسىندا كەزىندە ينجەنەر-مەحانيك، بريگادير، ۋچەتچيك، مەحانيزاتور، كولىك جۇرگىزۋشى، ديقانشى، قاراپايىم ەڭبەك ادامى، مالشى، ت.ب. ٴارتۇرلى جۇمىسشى ماماندىقتاردى كاسىبي شەبەرلىكپەن اتقارىپ، قازىرگى تاڭدا ۇزاق جىلعى ەڭبەكتىڭ زەينەتىن كورىپ وتىرعان ەڭبەك ارداگەرلەرى، «التىن» جانە «كۇمىس» القا يەگەرلەرى - اق جاۋلىقتى انالارىمىز مەرەكەلى باي داستارحاننىڭ مەيىرماندى قوناقتارى بولدى.

داستارحان ٴمازىرىن جايىپ، ەلدىڭ ۇلكەندەرىنىڭ باتاسىن الۋعا نيەت بىلدىرگەن اۋىلدىڭ بەتكە ۇستار جاس ازاماتتارىنىڭ ٴبىرى، قازىرگى تاڭدا كوكشەتاۋ قالاسىنىڭ تۇرعىنى، كاسىپكەر جاسلان قوسىموۆ. جاسلاننىڭ اتا-اناسى سايلاۋ ٴشارىپ ۇلى مەن گۇلشيرا كەنجەبولاتقىزى شاڭىراق قۇرعاندارىنا بيىلعى جىلى 40 جىل تولىپ وتىرعان ەلىمىزدىڭ ٴقادىرلى وتباسى. سانالى عۇمىرىنىڭ باقىتتى جىلدارىن مەملەكەتتىك قىزمەتكە ارناپ، گۇلشيرا كەنجەبولاتقىزى زەلەنوبور سەلولىق وكرۋگىنە قاراستى، كەزىندە مادەنيەت سەلولىق وكرۋگىنىڭ حاتشىسى قىزمەتىنەن باستاپ، كۇنى بۇگىنگە دەيىن اۋىلدىڭ تىنىس-تىرشىلىگىنە جاقىن ارالاسىپ ٴتۇرلى ساياسي ناۋقانداردى جوعارى دەڭگەيدە ۇيىمداستىرىپ، مەملەكەتتىك قىزمەتشىگە جۇكتەلەتىن اۋىر مىندەتتى جاۋاپكەرشىلىكپەن ورىندادى. ۋاقىتقا ەشكىم اراشا بولا المايدى، ەندى مىنە گۇلشيرانىڭ ٴوزى اۋدانداعى زەينەتكەرلەردىڭ سانىن ٴبىر ادامعا ارتتىرىپ، ەڭبەك دەمالىسىنا شىعۋعا شەشىم قابىلدادى. ۋاقىتپەن ساناسپاي، ٴتۇرلى مىنەزدى شەنەۋنىكتەر جىل ساناپ اۋىسىپ جاتاتىن اكىم-قارالارمەن ٴتىل تابىسىپ، اۋىلدىڭ الەۋمەتتىك-ەكونوميكالىق دامۋىنا قالتقىسىز قىزمەت اتقارعان ەر ادامدارمەن يىق تىرەستىرە ٴجۇرىپ ەڭبەكتەنگەن گۇلشيرا كەنجەبولاتقىزىنا اۋىل تۇرعىندارى، اعا بۋىن وكىلدەرى - قاريالارىمىز ٴدان ريزا. ىقىلاستى نيەتى مەن قوسىموۆتار وتباسىنا دەگەن رياسىز تازا كوڭىلدەرىن وزدەرىنىڭ ايتقان تىلەك سوزدەرى مەن بەرگەن باتالارىندا ايتىپ، توقتالىپ ٴوتتى.

قانداي دا بولماسىن ۇيىمداستىرىلعان يگىلىكتى ٴىس-شارا مادەنيەت پەن ونەر تارلاندارىنىڭ قاتىسۋىنسىز ٴسانى كەلمەيدى، ونى بۇقارا حالىق جاقسى تۇسىنەدى. اۋدان ورتالىعىنان ەگدە ادامدار مەن مۇگەدەكتەردى الەۋمەتتىك قولداۋ ايلىعىنا ٴوز جۇمىس جوسپارىن بەكىتىپ، ارنايى كونسەرتتىك باعدارلاما ازىرلەپ كەلگەن اۋداندىق مادەنيەت ٴۇيىنىڭ ونەرپازدارى كەزدەسۋ ٴساتىنىڭ اجارىن ودان سايىن تۇرلەندىرە ٴتۇستى. مەكەمە باسشىسى ايسۇلۋ جامانتىقوۆانىڭ جەتەكشىلىگىندەگى «اسىل اجەلەر» ٴانسامبلى، تالدىقورعان قالاسىندا وتكەن تۇمانباي مولداعاليەۆ اندەرى رەسپۋبليكالىق بايقاۋىنىڭ جەڭىمپازى، جەزتاڭداي ٴانشى گۇلنۇر ايماحان، مادەنيەت ٴۇيىنىڭ قىزمەتكەرى نۇرجان اۋەلبەكوۆ ٴان مەن جىردان شاشۋ شاشىپ، اۋىل تۇرعىندارىنىڭ قوشەمەتىنە بولەندى. ونەردى ومىرلەرىنە قۋات ەتكەن حالقىمىزدىڭ عاسىرلاردان مۇرا بولىپ جەتكەن ٴتول مادەنيەتىن ەل اراسىندا ناسيحاتتاپ، كەمەل كەلەشەگىمىز - جاستارعا ۇلگى بولىپ جۇرگەن «اسىل اجەلەر» ٴانسامبلى ورىنداعان اۋەزدى اندەرگە اۋىل قاريالارى بىرگە قوسىلا وتىرىپ، قوناقتارعا وزدەرى دە اۋەلەتە ٴان شىرقاپ، ادەمى ۇندەستىك ورناتىپ، كەشىمىزدىڭ تارتىمدى وتۋىنە ۇلكەن اسەر قالدىردى. ونەر ايدىنىندا قالىقتاپ، تاۋەلسىزدىگىمىزدىڭ 25 جىلدىعى قارساڭىندا اۋىل-اۋىلداردى ارالاپ جۇرگەن «اسىل اجەلەر» توبىمەن قوناقتار ەستەلىك سۋرەتكە ٴتۇسىپ، جاستىق كەزەڭدەرىن ەستەرىنە الىپ، ٴبىر مارقايىپ قالدى.

ٴبىلىم ورداسىنىڭ بىلىكتى باسشىسى ە.ىسمايىلوۆ اتىنداعى مادەنيەت ورتا مەكتەبىنىڭ ديرەكتورى دينا قاميدوللاقىزى جينالعان كوپشىلىكتى اتالمىش مەرەكەلەرىمەن قۇتتىقتاپ، مەكتەپتىڭ كۇندەلىكتى تاۋسىلمايتىن تىنىس-تىرشىلىگىنە تۇسىنىستىكپەن قاراپ، قاشاندا قول سوزۋعا دايىن تۇراتىن اۋىلدىڭ شەجىرەلى ابىز اقساقالى دۋلات اتا، سايلاۋ اعالارىمىزعا ريزاشىلىعىن ٴبىلدىرىپ، قولداۋ كورسەتكەندەرى ٴۇشىن العىسىن ٴبىلدىردى.

ەستە قالارلىقتاي وتكەن تاربيەلىك ٴمانى زور دەمالىس كەشى، مادەنيەتتىك ارداگەرلەردىڭ ٴبىراز ۋاقىتقا دەيىن جۇرەگىن جاۋلاپ العانداي قۋانىشتى اسەر قالدىردى.

بولات سابىر ۇلى،

«نۇروتان» پارتياسى ساياسي كەڭەسىنىڭ مۇشەسى

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي