USD 334.31 EUR 355.17 RUB 5.31
استانا:

وتكەن جىلدار ورنەگى

بەرەكەلى بەينەۋدەگى تۇڭعىش تەحنيكالىق جانە كاسىپتىك ٴبىلىم بەرەتىن ٴبىلىم ورداسى بەينەۋ گۋمانيتارلىق-ەكونوميكالىق كوللەدجى اشىلعانىنا 10 جىل تولۋ مەرەيتويىن اتاپ ٴوتتى. مەرەكەلىك كەشكە كوللەدجدىڭ العاشقى وقىتۋشىلارى كەش قوناعى رەتىندە شاقىرىلىپ، ستۋدەنتتەردىڭ قۇتتىقتاۋلارى مەن ٴان شاشۋلارى جولدانىپ، كوللەدجدىڭ 10 جىلدىق تاريحىنان سىر شەرتەتىن بەينەروليكتەر، كوللەدج تاريحىمەن بايلانىستىرىلعان اندەر مەن ويىندار ۇيىمداستىرىلدى. كەش بارىسىندا ارىپتەستەردىڭ قىزىقتى ەستەلىكتەرى، جۇرەكجاردى لەبىزدەرى ۋاقىتتى كەيىنگە سىرعىتىپ، جۇرەكتەرگە العاشقى كەزدەگى قىزىقتار مەن قيىندىقتارعا دەگەن ساعىنىشتى ۇيالاتتى. كوللەدجدىڭ ىرگەلى وقۋ ورنى بوپ قالىپتاسۋىنا ەڭبەك سىڭىرگەن ۇستازدار ماراپاتتالدى. مەرەكەلىك كەش جوعارى دەڭگەيدە اتالىپ ٴوتتى. حالقىمىزدا 7 قازىنا بار. سونىڭ ٴبىرى – قىران بۇركىت. قۇسبەگىلەردىڭ ايتۋىنشا، 10 جاسقا تولعان بۇركىت «بارقىن» دەپ اتالادى ەكەن. بارقىن بۇركىتتىڭ ناعىز كەمەلىنە كەلىپ، تولىسقان شاعى، ناعىز جۇگىرگەن اڭدى الماي قويمايتىن كەزى بولىپ ەسەپتەلەدى ەكەن. سول سەكىلدى كوللەدج وتكىزگەن 10 جىلىندا اياعىنان تىك تۇرىپ، كەمەلىنە كەلدى، ىرگەتاسىن نىعايتتى، قابىرعاسىن قاتايتتى.

ال 10 جاستاعى ۇل بالانىڭ جاسىن قازاقتار «قوزى جاسى» دەپ اتايدى ەكەن. بۇل – ەڭبەككە باۋلۋدىڭ العاشقى باسقىشى. بۇل جاستا بالا ەڭبەكتىڭ قيىندىعىن كورىپ، ٴدəمىن تاتادى ەكەن. مىنەكي، سول سەكىلدى ٴبىزدىڭ كوللەدجدەگى اۋداننىڭ ماڭدايالدى وقىتۋشىلارى 10 جىل ىشىندەگى تۇلەكتەرىنىڭ مەكتەپتەر مەن بالاباقشالارداعى جاقسى مامان ەكەندىكتەرىن كورىپ، مارقايىپ وتىر. كوللەدجدىڭ مەرەيلى تويى قارساڭىندا وقۋ ورداسىنىڭ قۇرىلىپ، قالىپتاسۋىنا ەلەۋلى ەڭبەگىن سىڭىرگەن، كوللەدجدى 10 جىل بويى باسقارعان جاڭبىروۆ سۇلتان تالپاق ۇلىمەن جۇرگىزىلگەن سۇحباتتى سىزدەردىڭ نازارلارىڭىزعا ۇسىنىپ وتىرمىز.

- قۇرمەتتى سۇلتان تالپاق ۇلى، ٴسىزدى اۋدانىمىزداعى تۇڭعىش تەحنيكالىق جانە كاسىپتىك ٴبىلىم بەرەتىن كوللەدجدىڭ العاشقى ديرەكتورى رەتىندە كوللەدجدىڭ 10 جىلدىق مەرەيتويىمەن قۇتتىقتايمىن. كەيىنگە شەگىنىس جاساپ، سەلولىق جەردەن كوللەدج اشۋ قاجەتتىلىگى نەدەن تۋىنداعانى تۋرالى اڭگىمەلەپ وتسەڭىز. – سۇلتان تالپاق ۇلى: ەلىمىز تاۋەلسىزدىك العاننان كەيىن ەلباسىمىز ن.ٴا. نازاربايەۆتىڭ قولعا العان ماڭىزدى شارۋالارىنىڭ ٴبىرى شەتتە جۇرگەن باۋىرلارىمىزدى ەلگە ورالتىپ، جان-جاقتى قامقورلىق جاساۋ بولعانىن بىلەمىز. ەلگە ەل قوسىلعاندا مەكتەپ، بالاباقشا سياقتى ٴبىلىم بەرۋ سالالارىنىڭ دا، ولاردا جۇمىس جاسايتىن مامانداردىڭ دا قاجەتتىلىگىنىڭ وتكىر تۋىندايتىنى ٴسوزسىز. وسى ماسەلەنى شەشۋ باعىتىندا اۋداندا جىل سايىن مەكتەپتەر مەن بالاباقشالار ەل يگىلىگىنە پايدالانۋعا بەرىلىپ جاتتى. بەينەۋگە كوشىپ كەلىپ قونىستانعان باۋىرلارىمىزدىڭ بالالارىنىڭ ٴبارىنىڭ بىردەي ەلىمىزدىڭ ٴىرى قالالارىنداعى كوللەدجدەر مەن جوعارى وقۋ ورىندارىنا بارىپ وقۋعا مۇمكىندىكتەرى بولا قويعان جوق. وسى جاعدايدى ويلاعان اۋدان اكىمى ب.ٴازىرحانوۆ وبلىس اكىمىنىڭ الدىنا جاعدايدى ايتىپ، ماسەلە قويىپ، سونىڭ ناتيجەسىندە ماڭعىستاۋ وبلىسى اكىمياتىنىڭ 2005 جىلعى 29 قاراشاداعى № 344 قاۋلىسىمەن «بەينەۋ گۋمانيتارلىق-ەكونوميكالىق كوللەدجى» مەملەكەتتىك كوممۋنالدىق قازىنالىق كاسىپورنى ٴوڭىردى گۋمانيتارلىق جانە ەكونوميكالىق ماماندارمەن قامتاماسىز ەتۋ ماقساتىندا قۇرىلدى. بۇل اۋدان، وبلىس تاريحىندا ەرەكشە شەشىمدەردىڭ ٴبىرى ەدى. كوللەدجدى ۇيىمداستىرىپ اشۋدى اۋدان اكىمى ٴبىلىم بەرۋ سالاسىنىڭ تاجىريبەلى مامانى رەتىندە ماعان سەنىپ تاپسىردى. ٴسويتىپ بەينەۋ گۋمانيتارلىق- ەكونوميكالىق كوللەدجىن ۇيىمداستىرۋعا كىرىستىم.

ت.ق.: – ورنى جوق وقۋ ورنىن جاڭادان ۇيىمداستىرۋ، قالىپتاستىرۋ وڭاي بولماعان بولار؟ العاشقى ٴدارىس بەرۋشى وقىتۋشىلار قۇرامى جايلى ايتىپ وتسەڭىز.

س.ج.: – ارينە، كوللەدجدى ۇيىمداستىرۋ وپ-وڭاي شارۋا بولا قويعان جوق. سەبەبى ول – ٴبىلىم بەرۋ سالاسىنىڭ ارنايى ٴبىلىم بەرۋ باعىتىندا جۇمىس جاسايتىن وقۋ ورنى. ونىڭ ٴبىلىم بەرۋ ستاندارتتارى دا، باعدارلامالارى دا، وقۋلىقتارى دا – ٴوز الدىنا بولەك. ٴسويتىپ الماتىداعى №1 پەداگوگيكالىق كوللەدج، اقتاۋداعى ماڭعىستاۋ گۋمانيتارلىق كوللەدجى، اتىراۋ، ورال قالالارىنداعى پەداگوگيكالىق جانە م.مامەتوۆا اتىنداعى قىزىلوردا گۋمانيتارلىق كوللەدجدەرىنە بارىپ، اۋىزبا-اۋىز سويلەسىپ، ٴتيىستى كەڭەستەر مەن نۇسقاۋلار الىپ، قاجەتتى قۇجاتتاردىڭ ۇلگى كوشىرمەلەرىن الىپ كەلدىم. 2006 جىلدىڭ 26 شىلدەسىندە ماڭعىستاۋ وبلىسىنىڭ ٴبىلىم باسقارماسىنىڭ نومەرى № 0032304 مەملەكەتتىك ليسەنزياسى الىندى. سونىمەن 2006- 2007 وقۋ جىلىندا بەينەۋ ورتا مەكتەبىنىڭ ٴبىر بولىگىنەن 3 كلاسس بولمەسىن الىپ، «مەكتەپكە دەيىنگى تاربيە جانە وقىتۋ» جانە «قازاق ٴتىلى جانە ادەبيەتى» ماماندىقتارى بويىنشا 100 ستۋدەنت قابىلداپ، كوللەدج جۇمىسىن باستاپ كەتتىك. ٴار جىل سايىن ستۋدەنتتەر سانى ۇنەمى ٴوسىپ وتىردى. العاشقى كوللەدج وقىتۋشىلارى ٴبىلىم بەرۋ سالاسىندا وراسان زور ەڭبەگى بار جوعارعى ساناتتى اۋداننىڭ تانىمال مۇعالىمدەرىنەن ىرىكتەلىپ الىندى. ولار ت.ەششانوۆ، ۆ.جولداسبايەۆا، گ.جۇماعاليەۆا، ب.بال ۇلى، ز.ەششان، ب.الدوڭعار، ج.وماروۆا، و.مەدەنوۆ، ج.دارمەنبايەۆا، ي.بايشەكەنوۆ، ن.قوزىبەكوۆ، گ. قاناتوۆا، ف. وتاروۆالار ەدى.

ت.ق.: – اۋدان تۇرعىندارىنىڭ، سونىڭ ىشىندە اتا-انالار مەن تالاپكەرلەردىڭ بەينەۋ گۋمانيتارلىق- ەكونوميكالىق كوللەدجىندە وقىتىلاتىن ماماندىقتارعا دەگەن سۇرانىسى مەن ۇمتىلىسىنىڭ دەڭگەيى قانداي؟

س.ت.: – جىلدا كوللەدجگە قۇجاتتارىن تاپسىراتىن تالاپكەرلەر سانى وتە كوپ. بۇل كورسەتكىش تومەندەپ كورگەن ەمەس. تەك اۋدان ورتالىعى مەن اۋدان ماڭىنداعى اۋىلداردان عانا ەمەس، باسقا اۋدانداردان، ٴتىپتى باسقا وبلىستاردان دا كەلىپ ٴبىلىم الىپ جاتقان ستۋدەنتتەرىمىز بار. ارينە، بۇل – بەينەۋ گۋمانيتارلىق-ەكونوميكالىق كوللەدجىندە وقىتىلاتىن ماماندىقتاردىڭ ەل تۇرعىندارىنىڭ سۇرانىسىنا يە ەكەندىگىنىڭ كورىنىسى. ت.ق.: – ستۋدەنتتەر كوللەدجدە تەوريالىق ٴبىلىم الادى، جاقسى مامان بولىپ قالىپتاسۋ ٴۇشىن بىلىمدەرىن تاجىريبەمەن ۇشتاستىرۋ ماقساتىندا ۇيىمداستىرعان جۇمىستارىڭىز تۋرالى ايتىپ وتسەڭىز.

س.ت.: – ٴيا، كوللەدجدە اۋداننىڭ تاجىريبەلى وقىتۋشىلارى ٴدارىس بەردى، ەندى ستاندارتقا سايكەس الدىمىزدا تاجىريبەدەن ٴوتۋ مىندەتى تۇردى. وسى ماقساتتا اۋدان ورتالىعىنداعى ٴبىلىم بەرەتىن مەكتەپتەرىمەن، مەكتەپكە دەيىنگى ٴبىلىم بەرۋ مەكەمەلەرمەن جانە 4 باسقا دا قارجى، قۇقىق سالاسى مەكەمەلەرىمەن الەۋمەتتىك سەرىكتەستەر رەتىندە كەلىسىمشارتتارعا قول قويىلدى. ٴالى كۇنگە دەيىن وسى مەكەمەلەرمەن تىعىز بايلانىستا جۇمىس جۇرگىزىلىپ كەلەدى. سەرىكتەس مەكەمەلەردە ستۋدەنتتەر پراكتيكادان ٴوتىپ، ٴوز ماماندىقتارىنىڭ قىر-سىرىن مەڭگەرىپ ماشىقتاندى.

ت.ق.: – ايتقان اڭگىمەڭىزگە قاراپ، اۋقىمدى-اۋقىمدى ەڭ قاجەتتى دە ماڭىزدى ىستەر تىندىرىلعانىن باعامداۋعا بولادى ەكەن. ەندىگى كەزەكتە كوللەدج تۇلەكتەرىنىڭ ماماندىقتارى بويىنشا جۇمىسقا ورنالاسۋى جايلى اڭگىمەلەسەڭىز.

س.ت.: – كوللەدجدى ٴبىتىرۋشى تۇلەكتەردىڭ جۇمىسقا ورنالاسۋى، ولاردىڭ جوعارى وقۋ ورىندارىندا بىلىمدەرىن جالعاستىرۋى جايلى ايتار بولسام، 2008-2009 وقۋ جىلىنان باستاپ كوللەدج مىڭداعان ماماندى ەڭبەك نارىعىنا قوستى. بەينەۋ گۋمانيتارلىق- ەكونوميكالىق كوللەدجىن ٴبىتىرۋشى تۇلەكتەردى جۇمىسقا ورنالاستىرۋ باعىتىندا بازالىق مەكەمەلەرگە، اۋداندىق جۇمىسپەن قامتۋ جانە الەۋمەتتىك باعدارلامالار بولىمىنە ٴبىتىرۋشى تۇلەكتەر تۋرالى مالىمەتتەر بەرىلىپ وتىرادى. سونىمەن قاتار ەڭبەك جانە حالىقتى الەۋمەتتىك قورعاۋ مينيسترلىگىنىڭ «تۇلەك» بازالىق باعدارلاماسىنا بىتىرۋشىلەر تۋرالى مالىمەت ەنگىزىلگەن. تۇلەكتەردىڭ جۇمىسقا ورنالاسۋ كورسەتكىشى جىل سايىن ارتىپ كەلەدى. اتاپ ايتساق، كوللەدج تۇلەگى گ. قۇلشايەۆا الماتى قالاسىنداعى قازاق ۇلتتىق پەداگوگيكالىق ۋنيۆەرسيتەتىنىڭ پەداگوگيكا-پسيحولوگيا ٴپانىنىڭ ٴمۇعالىمى ماماندىعىن ويداعىداي ٴبىتىرىپ كەلىپ، ٴوز كوللەدجىندە وقىتۋشى بولىپ قىزمەت جاساپ جۇرسە، ە. اياپوۆ، ب. اتامۋراتوۆتار بەينەۋ پوليتەحنيكالىق كوللەدجىندە جۇمىس جاسايدى. بالاباقشالار مەن مەكتەپتەردەگى تۇلەكتەرىمىزدى اتاماعاندا، اۋداندىق جاسوسپىرىمدەر مەن بالالار سپورت مەكتەبىندە س.انىسوۆ، ع.قوبلانوۆ، ل.ايمولدايەۆا، ا.يماشوۆا، ا.جالەلوۆ سىندى رەسپۋبليكا كولەمىندەگى جەڭىمپاز تۇلەكتەرىمىز شاكىرت تاربيەلەپ، ولار دايىنداعان سپورتشىلار اۋدان قانجىعاسىنا وبلىستىق، رەسپۋبليكالىق، حالىقارالىق دەڭگەيدە ماراپاتتار قوسىپ جۇرگەنىن ماقتانىشپەن ايتۋعا بولادى.

ت.ق.: – العاشقى اشىلعان جىلداردا ورتا مەكتەپتىڭ كابينەتتەرىندە جۇمىسىن باستاعان كوللەدجدىڭ بۇگىنگى تاڭداعى ماتەريالدىق بازاسىنا توقتالىپ وتسەڭىز.

س.ج.: – جىلدار وتە كوللەدجدىڭ ماتەريالدىق بازاسى نىعايدى. 2 وقۋ كورپۋسى، سپورت زالى مەن قوسىمشا عيمارات كوللەدج ستۋدەنتتەرىنە قىزمەت ەتەدى. 108 دەربەس كومپيۋتەر، 11 ينتەراكتيۆتى تاقتا، 11 بەينەپروەكتور، 4 تەلەۆيزور، 32 نوۋتبۋگى بار 2 ميك جيىنتىعى، 6 led پانەل، 2 مۋلتيمەديالىق پوديۋم، 5 كومپيۋتەر كلاسى، 1 اقپاراتتىق كيوسك، 2 پروەكسيالىق تاقتا، 1 اۆتوماتتى جينالمالى پروەكسيالىق تاقتا وقۋ مۇمكىندىكتەرى قامتاماسىز ەتىلگەن. بارلىق كومپيۋتەرلەر ينتەرنەت جۇيەسىنە قوسىلعان. سپورت زال زاماناۋي سپورت قۇرالدارى، كۇرەس كىلەمى، بوكس رينگى، الۋان ٴتۇرلى جاتتىعۋ جابدىقتارى، باسقا دا قۇرالدارمەن جەتكىلىكتى قامتاماسىز ەتىلگەن. كوللەدجدە ۆولەيبول، باسكەتبول، شاحمات، توعىزقۇمالاق، فۋتبول، بوكس، قازاقشا كۇرەس، ۇستەل تەننيسى، “جاس سارباز” ٴتارىزدى سپورت سەكسيالارى ۇدايى جۇمىس جاسايدى. ستۋدەنتتەردىڭ وبلىستىق، رەسپۋبليكالىق، حالىقارالىق سپورت جارىستارىندا ٴبىرشاما جەتىستىكتەرى بار. «دەنە تاربيەسى جانە سپورت ٴپانىنىڭ ٴمۇعالىمى» بىلىكتىلىگى بويىنشا ٴبىلىم العان ا. يماشەۆا – تاەكۆاندودان سپورت شەبەرى، قارا بەلبەۋ يەگەرى بولسا، ا.جالەلوۆ – سامبو، قازاقشا كۇرەسىنىڭ شەبەرى. ج.يماشەۆا تاەكۆوندودان قر سپورت شەبەرلىگىنە ۇمىتكەر، قىزىل بەلبەۋ يەگەرى، س. مامبەتمۇراتوۆ، ا. جيەنبايەۆ- تاەكۆوندودان قر سپورت شەبەرلىگىنە ۇمىتكەرلەرى، قارا بەلبەۋ يەگەرلەرى. كوللەدج باسشىسى رەتىندە الەمدىك وزىق تاجىريبەنى، زاماناۋي ٴدۋالدى ٴبىلىم بەرۋ تەحنولوگياسىن وقۋ ۇردىسىنە ەنگىزۋ ماقساتىندا 2012 جىلى تۇركيا، 2013 جىلى فرانسيا، 2014 جىلى گەرمانيا مەن ششۆەيساريا مەملەكەتتەرىندە ۇيىمداستىرىلعان سەمينارلارعا قاتىستىم. وسى تەحنولوگيامەن «مەكتەپكە دەيىنگى تاربيە جانە وقىتۋ» ماماندىعى بويىنشا جۇمىس جۇرگىزىلىپ كەلەدى.

ت.ق.: – ٴسوز سوڭىندا ۇزاق جىلدار بويى ٴبىلىم سالاسىنا ەڭبەگى سىڭگەن ارداگەر-ۇستازدىڭ تىلەگىن، جاسى ۇلكەن اعا رەتىندەگى باتاسىن تىڭداعىم كەلەدى.

س.ج.: – كوللەدجدىڭ وقىتۋشىلار ۇجىمىن مەرەيتويمەن شىن جۇرەكتەن قۇتتىقتاپ، قاجىرلى دا تابىستى ەڭبەك تىلەگىم كەلەدى. بيىلعى وقۋ جىلىنان باستاپ كوللەدج ديرەكتورلىعى قىزمەتىن اتقارا باستاعان تاجىريبەلى باسشى ق.جامانبايەۆ مىرزانىڭ جۇمىسىنا ساتتىلىك تىلەيمىن. بەينەۋ گۋمانيتارلىق- ەكونوميكالىق كوللەدجىنىڭ كەلەشەگى كەمەل بولعاي!

سۇحباتتاسقان قادىر تولقىن سۇلتانقىزى، كوللەدج وقىتۋشىسى

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي