USD 335.71 EUR 357.36 RUB 5.23
استانا:

ولەڭگە تابىنعان اقىن

تىنىشباي راقىم جيىرماعا تارتا ولەڭ جيناعىنىڭ اۆتورى. ولاردىڭ ىشىندە «ون سەگىز - گۇل داۋرەن» دەيتىن العاشقى جيناعى، «قاراتاۋىم - اق وتاۋىم»، «جيىرما بەس - جىر داۋرەن»، «توعىز پەرنە - توقسان كۇي»، «كوكىرەگىم -كۇي ساندىق»، «قوبىزىم - ابىزىم»، «ونەربايان»، «التايدان سالەم»، «ٴدۇلدۇل كوڭىل»، «كۇي ساندىق» سەكىلدى جىر جيناقتارى بار.

تاۋەلسىزدىك – باقىتى عوي ەلىمنىڭ،

تاۋەلسىزدىك – شاتتىعى عوي جەرىمنىڭ.

قولعا قونعان باق قۇسىنداي ايالاعان،

باعى عوي تەڭدەسى جوق بۇل ەلىمنىڭ،-دەمەكشى تاۋەلسىزدىكتىڭ ارقاسىندا قولداعى بارىمىزدى باعالاپ، بولاشاعىمىزدى باعامداي الدىق. سونىڭ ايعاعىنداي جەكسەنبى كۇنى اۋداندىق مادەنيەت ۇيىندە وتكەن اقىنىمىزدى ىزدەگەن،

تىنىشباي راقىمدى ەسكە الۋ كەشى.

تىنىشباي راقىم-جاي اقىن ەمەس. اقان سەرى، ٴبىرجان سال، بالۋان شولاق سياقتى ٴانى مەن ٴسوزىن قاتار ۇسىنعان اقىنداردىڭ، سال-سەرىلەردىڭ ٴوزى دە، ٴىزى دە. مىنە، وسىنداي ٴبىرتۋار اقىن تىنىشباي راقىمنىڭ 70 جىلدىعىنا ارنالعان «ولەڭگە عانا تابىنعان اقىن» اتتى ەسكە الۋ كەشى اۋدان ورتالىعىنداعى مادەنيەت ۇيىندە ٴوتتى.

كەش وتەتىن ورىن اسەم بەزەندىرىلگەن. اۋداندىق ورتالىقتاندىرىلعان كىتاپحانالار جۇيەسىنىڭ كىتاپحاناشىلارى كەلگەن قوناقتاردى زور قوشەمەتپەن قارسى الدى.

كەشكە اقىن رۋحىنا باس ٴيىپ الماتىدان جۇبايى، ۇل-قىزدارى، كورشىلەس اۋداندارداعى تۋىستارى كەلىپ قاتىستى.

سونداي-اق، «كوكىرەگىم-كۇي ساندىق» اتتى كىتاپ كورمەلەرى ۇيىمداستىرىلىپ، كەش قوناقتارىن اۋداندىق ورتالىق كىتاپحانانىڭ كىتاپحاناشىسى لۋيزا راقىمبايەۆا اقىننىڭ ٴار جىلدارى جارىق كورگەن كىتاپتارىمەن، شىعارمالارىمەن، اندەرىمەن تانىستىرىپ ٴوتتى. كەش قوناقتارى «بەسىگىمىز – بەيبىت كۇن»، «ون سەگىز-گۇل داۋرەن»، «قاراتاۋىم-اق وتاۋىم»، «جيىرما بەس-جىر داۋرەن»، «توعىز پەرنە-توقسان كۇي»، «قوبىزىم-ابىزىم»، «كونە ماقام-جاڭا ساز» اتتى ون بەسكە تارتا ليريكالىق جىر جيناقتارى مەن «التايدان سالەم» اتتى ان-ولەڭدەرى كىتاپتارىمەن تانىس بولدى.

اۋدان اكىمى بەيبىتبەك جايلىبايەۆ كورمەدەگى اقىن كىتاپتارىن اقىننىڭ جارى قاراشاشپەن بىرگە تاماشالادى. ٴوز كەزەگىندە قاراشاش اپايىمىز اۋدان باسشىسىنا اقىننىڭ جارىق كورگەن ٴان جيناعىن تارتۋ ەتتى.

سارىسۋىم ولكەم مەنىڭ سايالى،

سەنىڭ لەبىڭ الاقانداي ايالى.

جانىم اڭساپ جەتكەنىمدە شالعايدان،

سايىن دالاڭ كەڭ قۇشاعىن جايادى،-دەپ جىرلاپ وتكەن اقىنعا ارنالعان «ولەڭگە عانا تابىنعان اقىن» اتتى كەش شىمىلدىعى تىنىشباي راقىم تۋرالى دەرەكتى ٴفيلمدى كورۋدەن باستالدى.

وزبەكستان وڭىرىنەن جامبىل وبلىسى، سارىسۋ اۋدانىنا وتباسىمەن كوشىپ كەلگەن بالا تىنىشبايدىڭ، بالالىق شاعى مەن بوزبالا كەزى وسى سارىسۋ وڭىرىندە ٴوتتى. ٴوزى ايتقانداي:

«وسى وڭىردەن باستالعان قارا سوقپاعى، تالاي بەلگە، تالاي بەلەسكە جەتەلەدى.» ارمانى-الىس، مۇراتى-بيىك، ولەڭ-ان ساپارىندا، تۋعان جەرى سارىسۋعا دەگەن، جۇرەگىندەگى پەرزەنتتىك ساعىنىشىنىڭ وتىن،سوڭعى دەمى بىتكەنشە سوندىرمەي ٴوتتى.

مىنە، سودان بولار تىنىشباي راقىمنىڭ ٴار ولەڭىنەن ٴوزى وسكەن جەرلەر-بۇركىتتىگە، اقتوعايعا، جايىلماعا، جاڭاتاس، كوك-جونعا دەگەن ىستىق ىقىلاس، سۇيىسپەنشىلىك تاۋ سامالىنداي ەسىپ تۇرادى. ت.راقىم-نىڭ سوزىنە جازىلعان اندەردى اۋداندىق مادەنيەت ٴۇيىنىڭ جەزتاڭداي انشىلەرى روزا وتەمبايەۆا، عالىمجان تەزەكبايەۆ، جادىرا داۋكەنوۆا، نىعمەتجان حالىقوۆ، مەيىرجان وماروۆ تامىلجىتا شىرقاپ، «ايجانقىز» حالىقتىق بي ۇجىمى مىڭ بۇرالا بي بيلەپ، كورەرمەندەرگە ەرەكشە كوڭىل كۇي سىيلادى.

ال، «سارىسۋ حالىق تەاترى» مۇشەلەرى ساحنالاستىرعان «ولەڭگە عانا تابىنعان اقىن» اتتى قويىلىمى كەشكە قاتىسۋشىلاردى اقىننىڭ بالالىق، بوزبالالىق، ستۋدەنتتىك كەزەڭدەرىنە ساياحات جاساتتى.

مۇنان سوڭ اۋدان اكىمىنىڭ ورىنباسارى دينارا اسانوۆا ٴسوز سويلەپ، اقىننىڭ جۇبايىنا سىيلىقتار تارتۋ ەتتى.

ٴوز كەزەگىندە ٴسوز كەزەگىن العان اقىننىڭ جارى قاراشاش احمەتقىزى:

- تىنىشباي راقىم ماحابباتتىڭ جىرشىسى. جاڭاتاستىڭ كىشكەنتاي قاراتاسىنا دەيىن جىرلاعان اقىن. ونىڭ ايعاعى تۋعان جەرگە دەگەن جىرلارى. ماڭگى ولمەيتىن جىرلارى جاساي بەرسىن، تىڭداي بەرىڭىزدەر.

وسىنداي ٴدۇبىرلى كەشتى ۇيىم-داستىرعان اۋدان اكىمىنە، اۋدان اكىمدىگى اپپاراتىنا، اۋداندىق مادەنيەت ٴۇيى جانە اۋداندىق ورتالىق كىتاپحانا قىزمەت-كەرلەرىنە، اعايىن-تۋعاندارعا باسىمدى ٴيىپ، العىسىمدى بىلدىرەمىن،-دەپ جۇرەكجاردى لەبىزىن جەتكىزدى.

سونىمەن قاتار، قازاقستان جازۋشىلار وداعى باسقارماسى ٴتوراعاسىنىڭ ورىنباسارى، قازاقستان رەسپۋبليكاسىنا ەڭبەگى سىنگەن قايراتكەرى مارالتاي رايىمبەك ۇلى، استانادان ارنايى كەلگەن،تىنىشباي راقىمنىڭ قۇرداسى، قالامگەر دوسى، اقىن، دراماتۋرگ-قازاقستان رەسپۋبليكاسىنىڭ ونەر قايراتكەرى سەرىك تۇرعىنبەكوۆ اقىن جايلى ەستەلىكتەرىن، بىرگە وتكىزگەن قىزىقتى وقيعالارىن اڭگىمەلەي كەلە ٴوزىنىڭ قالامىنان تۋعان «كۇمىس قايىڭ» جىرىن كورەرمەن نازارىنا ۇسىندى. ال، جامبىل وبلىستىق «بالالىق شاق-دەتستۆو» گازەتىنىڭ باس رەداكتورى ەسماحانوۆا گۇلنار اقىن تۋرالى ەستەلىكتەر ايتا كەلىپ، اقىننىڭ ەسىمىن وبلىس ورتالىعىنداعى ٴبىر مەكتەپكە بەرسەك جانە جىل سايىن رەسپۋبليكالىق «تىنىشباي وقۋلارى» بايقاۋى وتكىزىلىپ تۇرسا دەگەن ۇسىنىسىن جەتكىزدى. اقىننىڭ قارىنداسى جاڭىلعان راقىم اقىننىڭ «تاعدىر» اتتى ولەڭىن كوپشىلىككە تارتۋ ەتتى.

بۇكىل بولمىسى، جاراتىلىسىمەن قازاقتىڭ پەرزەنتى، قازاقتىڭ ماقتانىشى بولا بىلگەن تىنىشباي راقىمنىڭ 70 جىلدىعى دۇركىرەپ ٴوتتى.

اقىن رۋحىنا ارنالىپ، اس بەرىلدى.

كامەلي سۇلەيمەنوۆا،

«سارىسۋ»

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي