USD 335.71 EUR 357.36 RUB 5.23
استانا:

ويلاعانى - ەل قامى

سالەم ال ۇلكەن-كىشى، كوز كورگەنىم،
ىستىقسىڭ تۇڭعىشىمداي كەز كەلگەنىڭ.
اۋىلدا بەسىك جىرمەن اۋىزداندىم،
سول جىر عوي اسىلىم دەپ وڭگەرگەنىم.
جۇرەكتى الاۋلاتتى، كۇمبىرلەتتى،
تاۋەلسىز قازاقستانىم، قۇدىرەتتى.
ەلباسى الىپ شىقتى قىل كوپىردەن،
بىرلىك پەن ىنتىماققا بۇردىق بەتتى.

ەلىمىزدىڭ تۇڭعىش پرەزيدەنتى دۇنيەگە كەلگەن اياداي مەكەن ماعان دا ٴقادىرلى – ٴۇشقوڭىر اۋىلى. ەلباسى باستان وتكەرگەن شەجىرەلى جىلداردىڭ ايتار سىرى دا، شەرتەر جىرى دا كوپ. اۋىلداس زامانداسپەن بايلانىستىراتىن تاريحتىڭ عاجايىپ تۇستارىندا ەل كوزىنە ىلىككەن ەلەۋلى ەڭبەگىممەن ەلۋ ەكى جىل ۇلەس قوسقانىما ريزا-قوشپىن. قاسكەلەڭدە نۇرەكەڭ تامامداعان اباي اتىنداعى التىن ۇيا ينتەرنات-مەكتەبىمنەن ارماننىڭ اق جالىنا، جارقىن بولاشاق ساپارىنا مەن دە اتتاندىم، ۇستازدىقتى تاڭدادىم. ...سىزدەرمەن ٴبىر باس قوسقان سول تاڭ ماعان، ٴاۋ باستا مۇعالىمدىك جول تاڭداعام. وسىلاي جيىن-تويمەن، دۇرمەكپەنەن، ٴومىرىم وتسە ٴوتسىن شولتاڭداعان. بۇل ٴبىر ايتىستا ايتقانىم ەكەن. شىنىم، ەگدەلىككە جەتكىزگەن، ۇلكەنىم، اقىنىم دەگىزگەن ٴاربىر كۇنىم توي بولىپ وتكەن باقىتتى اداممىن. قوعامدىق ومىرگە قىزۋ ارالاسىپ، دەلەگات بولىپ، دەپۋتات بولىپ شاپقىلاپ جۇرگەن شاقتارىمدا ەلباسىمەن جۇزبە-جۇز كەزدەسۋدىڭ ۇمىتىلماس بىرنەشە ٴساتى ٴتۇستى. قازاقستان كومپارتياسى ورتالىق كوميتەتىنىڭ ٴبىرىنشى حاتشىسى بولىپ قىزمەتكە كىرىسكەننەن كەيىنگى العاشقى كوكتەمىندە اقىن، ٴانشى، جازۋشى، ەڭبەك وزاتى دەسكەن قىز-كەلىنشەكتەردىڭ باسىن قوسىپ، مەيرامىمىزبەن قۇتتىقتاپ، قيلى دا قيىن تاريحي كەزەڭدەگى جاۋاپكەرشىلىك جايىندا وي ٴبولىسىپ، سىي-سياپاتپەن قايىرعانى – ەرمىز دەگەن وتاعامىزدان دا از كورەتىن جىلىلىق ەدى كوڭىلىمىزدى اسقاقتاتقان. جانە ٴبىر كەزدەسىپ، جۇزدەسكەن ٴساتىم – ەگەمەن قازاق ەلىنىڭ ٴبىر جىلدىعى اتالاتىن جيىنعا شاقىرىلعاندا جىرىمدى توگىپ، قۇتتىقتاعانىم ٴالى ەسىمدە. ول تۇستا (1989- 1994 ج.ج.) الماتى وبلىستىق كەڭەسىنىڭ دەپۋتاتىمىن، بىرەر ولەڭ كىتاپتارىنىڭ يەسىمىن، ايتىستاعى جەڭىمپاز اقىن اتىمىز مىقتاپ ورنىققان كەز. جامبىل اتامىز ىنىسىندەي كورگەن قازاقستاننىڭ حالىق اقىنى ۇمبەتالىگە ارنايى مۋزەي اشىلىپ، ابىرويىم اسقاقتاعان جىلدارىم ەدى. «جازمىشتان – وزمىش جوق» دەپ حالىق تەگىن ايتپاعان. جوعارى ٴبىلىمدى، كۇيەۋگە ۇزاتىلعان جيىرما ٴبىر جاسار قىزىم قارلىعاش اياقاستى سال دەرتىنە (پاراليچ) دۋشار بولدى. گەرماندىق دارىگەرلەر ەمدەمەك بولىپ، قول ۇشىن سوزدى. گازەت ارقىلى ەل- جۇرتقا جۇگىندىم. جاعدايىمدى ايتىپ، كومەك سۇراعان جىرلارىم باسىلدى. ەڭ الدىمەن نۇرەكەڭنىڭ بايبىشەسى سارا حانىم حابارلاسىپ، ەلىمىزدىڭ قىسىلشاڭ كەزىنىڭ وزىندە كومەك ۇيىمداستىردى. شيرەك عاسىر قولارباعا تاڭىلعان سول قارلىعاشىم بۇل كۇندە قازاقستان جازۋشىلار وداعىنىڭ مۇشەسى، ورىس تىلىندە جازاتىن اقىن. «پوەدينوك س سۋدبوي» اتتى جاڭا كىتابى باسپادان شىقپاقشى. وسى جىلعى قاراشانىڭ 12-دە كەمباعال توعىز قىز قاتىسقان « ۇلى دالا حانشايىمى» اتتى بايقاۋدا كوركىمەن دە، ونەرىمەن دە كوپشىلىكتىڭ نازارىنا ٴتۇستى. ٴوز ولەڭدەرىن ناقىشىنا كەلتىرە وقىپ، كورەرمەننىڭ العىسىنا بولەندى. ەكىنشى ورىندى يەلەندى. قارلىعاشىمنىڭ جۇرەگىنە جىر ۇيالاتقان ەلباسىنىڭ، ازات وتانىمىزدىڭ، قازاقتىڭ بيىك رۋحى عوي.

1996 جىلى ۇلى جامبىل بابامىزدىڭ 150 جىلدىق مەرەي تويىنا نۇرەكەڭنىڭ سىنىپتاستارى تۇگەل شاقىرىلدى. ٴۇي يەسى، جاكەڭنىڭ كەلىنى بولىپ قىزمەت ەتتىم. تويدان ٴبىر كۇن بۇرىن جەتكەن سىنىپتاستار سول كەزدەگى «بەرىكتاس» شارۋاشىلىعىنىڭ ديرەكتورى، مارقۇم ٴمۇسىمحان قيسىقوۆ دايىنداعان اقشاڭقان، اشەكەيلى كيىز ۇيگە ٴتۇستى. توي كەرەمەت ٴوتتى. باتىس جاق التىن كۇننىڭ قىزىل شاپاعىنا بويانعان ساتتە نۇرەكەڭ قۇرداستارى باس قوسقان وتاۋعا قىزى داريعا مەن سارا حانىمىن ەرتىپ كەلدى. دومبىرانى سەرىك قىپ، قۇتتى بولسىن جىرىمدى شاشۋ ەتتىم. قۇرداستار بالالىق شاقتارىن، قىزىقتى ساتتەرىن ەسكە ٴتۇسىردى. نۇرەكەڭنىڭ كوڭىلى الاۋلاپ، جاستىق شاعىمەن قايتا قاۋىشقانداي، قايتا تۇلەگەندەي كۇي كەشتى. دومبىراما قولىن سوزىپ، ارقانىڭ كەڭ تىنىستى ٴانىن شىرقادى. ەركىن وتىرىپ، ٴان سالىپ، جاراسىمدى ٴازىل-قالجىڭدار ايتىلدى. ەسكەرتكىش رەتىندە سۋرەتكە تۇستىك. نۇرەكەڭ ۇستاعان دومبىرا شاڭىراعىمىزدىڭ ەرەكشە جادىگەرى، ٴتورىمىزدىڭ ٴسانى، بابىندا تۇر. اڭىزعا اينالعان كەزدەسۋدىڭ اسەرى كۇنى بۇگىنگىدەي جادىمدا. ەلىمىز كولەمىندە اتالىپ وتىلەتىن ايتۋلى مەرەكەلەردىڭ ەشبىرىنەن شەت قالماي شاقىرىلامىن. 2010 جىلى جەتپىسكە تولعان شاعىمدا ەلباسىنىڭ قولىنان «قازاقستاننىڭ ەڭبەك سىڭىرگەن قايراتكەرى» اتاعىن الدىم. پرەزيدەنت نۇرەكەڭ كوكىرەگىمە بەلگىنى تاعىپ، قۇتتىقتاپ بولعان سوڭ: «ەلگە سالەم ايت! جۇرتىما سالەم دە»، – دەدى. تولقىپ كەتتىم. ساعىنىشىن اڭعاردىم. «ٴبىر اۋىز ٴسوز ايتسام بولا ما؟» – دەپ رۇحسات سۇراعانىمدا باسىن يزەدى. مىنبەرگە كوتەرىلىپ، وسى مانا عانا اقوردا تورىندە قۇراعان «ٴداۋىر ۇلى» اتتى ولەڭىمدى وقىدىم. جەر ٴۇستىن تۇگەل تاڭعالتقان، قازاعىم، ارداق، ماقتانىم! ەل كوشىن تۇزەپ، اعارتقان شاشىڭنىڭ ٴسۇيدىم ٴار تالىن! ەلباسى نۇرسۇلتان ٴابىش ۇلى شاڭىراعىمىزدىڭ اعاسى، اتاسى، جاناشىرى، اقىلشىسى. از ۋاقىتتا كوپ ٴىس تىندىرعان دانا، دارا باسشىمىز. الەمدىك كوپتەگەن قاۋىمداستىققا مۇشەمىز. اي مەن كۇنى جارقىراعان ٴىرى مەملەكەتتەرمەن ەلشىلىك قاتىناستا بولىپ، تەرەزەمىز تەڭ ەلگە اينالدىق. شەتەل قايراتكەرلەرى قاتىناپ، قازاق حالقىنىڭ بەرەكە، ٴناسىبىن الەمگە تانىتار ٴسوز ايتىپ جاتىر. ...شۇكىر-اۋ، ەرەكشەمىز كۇللى جۇرتتان، قۇرالدىق قىر گۇلىندەي ٴتۇرلى ۇلتتان. كەۋدەگە جاز ورناتىپ، نۇر جايلاتىپ، كۇن شىقتى ماسايراتىپ كۇلىپ بۇلتتان. ەگەمەن، ىنتىماقتى، ٴتاتۋ-تاتتى، حالقىمىز ەلباسىنا سەنىم ارتتى. ەل قامىن ويلاعان ەردىڭ ٴۇمىتى دە، سۇيەنىشى دە – ەل-جۇرتى.

اماندىق تىلەۋشى – نادەجدا لۋشنيكوۆا، اقىن،

قازاقستاننىڭ ەڭبەك سىڭىرگەن قايراتكەرى، جامبىل اۋدانىنىڭ قۇرمەتتى ازاماتى.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي