USD 335.71 EUR 357.36 RUB 5.23
استانا:

مارعاسقا جازۋشى، دارىندى دراماتۋرگ

راحىمجان، دارحان دارىنىم،

اتىراۋداي ەركە ارىنىم.

بىرگە وسكەن اساۋ جىلداردا،

رۋحىنىڭ كۇشىن تانىدىم، - دەپ مۇحتار شاحانوۆ باستاپ، شىڭعىس ايتماتوۆ قوستاپ: «راحىمجان – ينتەللەكتۋالدى قازاق پروزاسىنىڭ xxi عاسىرداعى وزىق ويلى وكىلى» دەسە، دۋلات يسابەكوۆ: «راحىمجاننىڭ شىعارمالارىندا قانشاما كەيىپكەر بولسا – سونشاما قايتالانباس عاجايىپ وبراز بار» دەپ باعا بەردى. ابىز ٴابدىجامىل نۇرپەيىسوۆ تە «راحىمجاننىڭ ٴار جازعانى جۇرەككە شابار شىندىق» دەگەن ەكەن. بۇل پىكىردى ٴارىسى اكادەميك زەينوللا قابدولوۆ، بەرىسى سماعۇل ەلۋبايەۆ سىندى مىقتىلار قۋاتتاپ، قوستاعاندار قانشاما.

مىنە، ۇلت زيالىلارىنىڭ اق باتاسىنا بولەنىپ، 60 دەگەن اسقارتاۋعا امان جەتىپ، قازاق ٴتىلدى وقىرماندى عانا ەمەس، شەتەلدىكتەردى دە مويىنداتقان قازاقستاننىڭ ەڭبەك سىڭىرگەن قايراتكەرى، حالىقارالىق «ايتماتوۆ» اكادەمياسىنىڭ اكادەميگى، جازۋشى-دراماتۋرگ راحىمجان وتاربايەۆ تاياۋدا جاستىق شاعى وتكەن اق جايىعىنا ارنايى سوعىپ، كوز كورگەن يگى-جاقسىلارعا سالەم بەرىپ كەتتى.

23 قاراشا كۇنى وبلىس اكىمى التاي كولگىنوۆ تانىمال تۇلعانى ارنايى قابىلداپ، يىعىنا شاپان جاۋىپ، قالامگەرگە زور قوشەمەت كورسەتسە، ەرتەسىنە ٴوزى ٴبىلىم العان بۇرىنعى ورال پەدينستيتۋتى، قازىرگى م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى «قازىرگى ادەبيەتتانۋ، ٴتىلتانۋ ماسەلەلەرى جانە جازۋشى-دراماتۋرگ راحىمجان وتاربايەۆ شىعارماشىلىعى» اتتى رەسپۋبليكالىق عىلىمي-تاجىريبەلىك كونفەرەنسيانى جوعارى دەڭگەيدە وتكىزدى. اتالمىش ۋنيۆەرسيتەت رەكتورى، اكادەميك اسحات يمانعاليەۆ «دارىندى جازۋشى وتاربايدىڭ راحىمجانىنا وسىدان 10 جىل بۇرىن اتىراۋ ۋنيۆەرسيتەتىندە رەكتور بولىپ تۇرعانىمدا «قۇرمەتتى پروفەسسور» ٴتاجىن ٴوز قولىممەن كيگىزىپ ەدىم، ەندى، مىنە، الپىسىندا «بقمۋ-دىڭ قۇرمەتتى پروفەسسورى» اتانىپ، جانىمدا تۇر. سەن جەتپىسكە جەتكەندە وسى جاقسىلىق ٴۇشىنشى ٴبىر ۋنيۆەرسيتتەتتە جالعاسىن تاپقاي» دەدى زال تولى قاۋىمعا دۋ قول سوقتىرىپ. ورال قالاسىنىڭ اكىمى ناريمان تورەعاليەۆ ارنايى قاتىسىپ، قۇتتىقتاۋ ٴسوز سويلەپ، جايىق جۇرتشىلىعى اتىنان العىس حات تابىس ەتكەن عىلىمي شارا ٴبىرسارىندى باياندامادان گورى، جىلى شىرايلى ەستەلىككە، تۇشىمدى اڭگىمەگە تولى بولدى.

«تەكتى ٴسوزدىڭ كيەسى» اتتى بەينەبايان توردەن جارقىراي كورىنىپ، جازۋشىنىڭ بۇعان دەيىن ٴجۇرىپ وتكەن جولدارىنان سىر شەرتىلدى. قولىنا قالام ۇستاپ، تابيعاتىنان كيەلى ونەرگە جاراتىلعان جايساڭ ۇل و باستا تالاي مارعاسقالارمەن جۇزدەسىپ، ورتالارىن تولتىرىپتى. «باتالى ۇل ارىماس» دەگەن، تالاي دۋالى اۋىزدان جىلى ٴسوز ەستىپ، ٴۇمىت ارقالاعان راحىمجان وتاربايەۆتىڭ مەرەيلى جاسقا توم-توم كىتاپتارىن ارقالاي جەتۋى زاڭدىلىق ىسپەتتى. بۇل جونىندە ٴبىرىنشى بولىپ مىنبەرگە كوتەرىلگەن «اق جايىقتىڭ – اق شاعالاسى» اقۇشتاپ باقتىگەرەەۆا دا جاقسى ايتتى. – جازۋشى ەشكىمگە ۇقسامايتىن قولتاڭباسىمەن ەرەكشەلەنەدى. عاسىرلار قويناۋىنان بەيبارىس سۇلتاندى، مۇستافا شوقايدى، شىڭعىس حاندى، جاڭگىر حاندى سۋىرىپ الىپ، دراماتۋرگيا تىلىمەن سويلەتۋ ەرلىككە ٴتان. بالا بوپ كەتكەن جەرىنە دانا بوپ قىزمەت ەتۋ، بالام دەگەن ۇلتقا داناسى بوپ قىزمەت ەتۋ – تاعدىردىڭ سىيى. بۇگىنگى تاڭدا، جالپى ادامزاتقا نە كەرەك؟ بىرنەشە ماماندىق كەرەك جاستارعا. ٴبىراق، بارلىق ماماندىقتىڭ باسىندا ٴبىرىنشى تۇراتىن نارسە – ۇلتتىق تاربيە مەن انانىڭ بەسىكتەن سىيلاعان، اتانىڭ قالدىرعان ۇلى سوزدەرى. ادەبيەتتەن باستالعان تاربيە بارلىق ماماندىقتى يگەرەدى، – دەگەن اقىن اپامىز جازۋشىمەن جۇزدەسۋ، جازۋشىنى كورۋ ۇلكەن قۇبىلىس ەكەنىن، بۇگىنگى كۇننەن جاستاردىڭ كوكىرەگىندە كوپ ساۋلە قالاتىنىن جەتكىزدى. – تۋعان جەر ٴۇمىتىن ارقالاپ، ۇلتتىڭ الدىنداعى ۇلكەن بورىشتى وتەپ ٴجۇرسىڭ، اينالايىن! – دەدى بۇدان سوڭ كەش يەسىنە قاراتا: – سەنىڭ تويىڭ تۇركيادا، باتىستا، شىعىستا، وڭتۇستىكتە، استانادا! سەن قىرعىزدا دا سۇيىكتىسىڭ! سەن قىتايدا دا سويلەپ جاتسىڭ! سەنىڭ مارتەبەڭە ۇشقان ۇياڭ مەن بىزدەر قاتتى قۋانامىز. سامعاي بەر، قاناتىڭ تالماسىن، قالامىڭ قولىڭنان تۇسپەسىن، – دەدى اقۇشتاپ اقىن.

قاشان دا شاكىرتتەرىمەن ماقتاناتىن ارداگەر-ۇستاز مەرۋەرت جولدىقايىروۆانىڭ وسى كەشتە قۋانىشىندا شەك بولمادى. بۇعان سەبەپ – راحىمجان وتاربايەۆقا كۋراتور بولۋى. 1973 جىلى گۋرەۆ وبلىسىنىڭ تەڭىز اۋداندىق ورتا مەكتەبىن ٴبىتىرىپ كەلگەن بوزبالا پۋشكين اتىنداعى ورال پەداگوگيكالىق ينستيتۋتىنىڭ قازاق ٴتىلى مەن ادەبيەتى، ياعني، فيلولوگيا فاكۋلتەتىنە وقۋعا ٴتۇسىپ، ستۋدەنت بولادى. – سول جىلعى تۇسكەن توپقا كافەدرا مەنى كۋراتور ەتىپ تاعايىندادى. توپتا 21 قىز بالا، 4 ەر بالا بولدى. ٴتورت جىگىتتىڭ ۇلكەنى شايحوللا، مىنەكەي، قاسىمدا تۇر دەپ، مەرۋەرت اپاي وزىمەن ساحناعا ەرە شىققان بوكەيوردالىق ازامات شايحوللا ەلەمەسوۆتى، قاراتوبەلىك مورياك فازىلعاليەۆتى، اتاقتى ساكەن مەكتەبىنىڭ ٴمۇعالىمى كوشەرباي توكەستايدى كورسەتتى. ال ٴتورتىنشىسى توردە وتىرعان سىيلى قوناق راحىمجان وتاربايەۆ بولىپ شىقتى. ٴارقايسىسىنا ستۋدەنت كەزدەگىدەي «5» دەگەن باعا بەرگەن مەرۋەرت اپاي: – وسى تورتەۋى كۋراتوردىڭ وڭ قولى. ستۋدەنتتەردىڭ ۇيىمشىل بولۋىنا، جاقسى وقۋىنا، بىر-بىرىنە قامقورشى بولۋىنا جانىن سالدى. ال راحىمجان ولەڭ، ماقالا جازاتىن. كوپ وقيتىن، كينوعا كوپ باراتىن. ونى ۇستازدارى كوپ ماقتايتىن. وسىنداي قاسيەتتەرىمەن ەسىمدە قالدى. مۇعالىمدەر راحىمجاننىڭ كەي ساباقتاردا ولەڭمەن جاۋاپ بەرەتىنىنە تاڭ قالۋشى ەدى. جاراتقان ادامعا ٴۇش جاستىق شاق سىيلايدى ەكەن. ٴبىرىنشىسى – ٴوز جاستىق شاعىڭ. ەكىنشىسى – شىن ماحابباتقا جولىققانىڭ. ٴۇشىنشىسى – 100 جاسقا تولعانىڭ. ەكەۋىنەن ٴوتتىڭ. ەندى ۇشىنشىسىنەن دە امان-ساۋ ٴوت، – دەپ توقساننان اسقان كەيۋانا ٴبىر كەزدەگى شاكىرتىنە، بۇگىنگى تانىمال تۇلعاعا الاقانىن جايىپ باتاسىن بەردى.

بۇدان سوڭ ٴسوز العان تانىمال جازۋشى مەرەكە قۇلكەنوۆ مەرەيتوي يەسىنىڭ «ٴىز» دەگەن اڭگىمەسىن ايتىپ، كوپشىلىكتى ۇيىتتى. – «ٴىز» – جۇمەكەن ناجىمەدەنوۆتىڭ جالعىز تۇياعىنا ارنالعان اڭگىمە. جالعىز ۇلى سوعىسقا كەتىپ بارا جاتقاندا اكەسى سورعا اپارىپ، اياعىنىڭ ٴىزىن سالدىرىپ، قازانمەن ٴۇستىن جاۋىپ قويادى. راحىمجان ايتىپ تۇرعان بۇل دەرەكتى وقيعا ەش جەردە جوق. جۇمەكەننىڭ دە كىتاپتارىنان ىزدەپ تاپپادىم. سوندا ٴتۇسىندىم. ول جازۋشىنىڭ كوركەم شىندىعى ەكەن. وسى اڭگىمە جۇرتتىڭ ٴبارىنىڭ اۋزىندا ٴجۇردى. ٴومىر شىندىعى ەشقاشان ادەبي كوركەم شىندىق بولا المايدى. ال ادەبي كوركەم شىندىق ول ٴومىردىڭ شىندىعىنا اينالىپ كەتەدى. جازۋشىنىڭ قۇدىرەتى وسىندا! كىشكەنتاي ٴبىر دەتالدى ٴوزىنىڭ كوكىرەگىنەن، قيالىنان شىعارىپ، ٴومىردىڭ شىندىعىن جاساپ وتىر. اكەنىڭ بالاعا دەگەن بۇدان ارتىق قانداي ماحابباتى بولۋى مۇمكىن؟ راحىمجاننىڭ سول كىشكەنتاي اڭگىمەسى كلاسسيكالىق اڭگىمەلەردىڭ قاتارىنا قوسىلدى. ول قازاق ادەبيەتىنە بۇكىل قالامگەرلەر سەكىلدى جۋرناليستيكا ارقىلى كەلدى. «قازاق ادەبيەتى» گازەتىندە جۇمىس ىستەپ جۇرگەن كەزىندە رەداكتور شەرحان مۇرتازا تاپسىرما بەردى. قىزىلورداعا بارىپ، «ارال تاعدىرى – ادام تاعدىرى» دەگەن سيكلدى ماقالالار جازدى. قالامىنىڭ قۇدىرەتىن سول كەزدە بايقادىم. قازاق پۋبليسيستيكاسىنىڭ ۇلكەن تۇلعاسى بولىپ كورىنە باستادى، – دەپ جازۋشىنىڭ جازۋ ستيلىنە، سوزگە ساۋلە مەن بوياۋ تۇسىرەتىن كەرەمەت ەرەكشەلىگىنە توقتالدى.

رەسپۋبليكالىق كونفەرەنسيانىڭ مودەراتورى، پروفەسسور ابات قىدىرشايەۆ، عىلىم كانديداتى ريتا سۇلتانعاليەۆا وتاربايەۆ شىعارمالارىن تەرەڭ زەرتتەپ، باياندامالارىنا ارقاۋ ەتتى. سوناۋ سىرىم اۋدانىنىڭ بۇلان ورتا مەكتەبىنەن ادەبيەتكە قۇشتار ٴبىر توپ شاكىرتتەرىن الىپ ٴلايلى ناۋايقىزى كەلدى. وتاربايەۆ اڭگىمەلەرىن جاتتاپ العان بۇلاندىق جانە ورالدىق وقۋشىلار ٴار وبرازدان ٴۇزىندى وقىدى. ٴۇش توپتان تۇراتىن سەكسيالىق جۇمىستار جۇزەگە استى. مۇنىڭ ٴبارى قادىر مىرزا ٴالى ايتقانداي، «تالانتتى تىرىسىندە باعالاپ»، ابىرويىن اسقاقتاتۋ.

– راحىمجان اتىراۋ ٴوڭىرىنىڭ تۋماسى ەمەس، قازاقتىڭ ماڭدايىنا بىتكەن دارىندى دراماتۋرگ. قازاقتىڭ راحىمجانى. ٴبىزدىڭ ۋنيۆەرسيتەتتىڭ تۇلەگى، – دەپ تىلەگىن باستادى بقمۋ رەكتورى، اكادەميك، پروفەسسور اسحات يمانعاليەۆ. – كۋراتورى مەرۋەرت اپايدىڭ ستۋدەنتىن قالاي ماقتايتىنىن بىلە تۇرا، كەشە مەن راحىمجاننىڭ سىناق كىتاپشاسىن تاۋىپ الدىم. تىلەۋجانوۆ، ٴابۋحانوۆ، اقمۋرزين، جولدىقايىروۆا باعا قويعان قولدارىن كوردىم. شىن مانىسىندە راحىمجان وتە جاقسى وقىعان ەكەن. راحىمجاننىڭ كلاسسيكالىق تۋىندىلارى قارا ەڭبەگىنىڭ ارقاسىندا كەلدى. باعاسىن الىپ جاتىر. انكارا قالاسىندا ەكى كىتابىنىڭ تۇساۋى كەسىلدى، – دەپ اسحات ٴسالىم ۇلى جازۋشىنىڭ ٴبىر كەزدەرى ۇلتتىق كىتاپحانانىڭ باس ديرەكتورى قىزمەتىن ابىرويمەن اتقارعانىن، استانالىقتاردىڭ مويىندايتىنىن، قاندايما قۇرمەتكە لايىق ەكەنىن ايتىپ، ۋنيۆەرسيتەتتىڭ 2016 جىلعى عىلىمي كەڭەسىنىڭ شەشىمىمەن راحىمجان وتاربايەۆتى «بقمۋ-دىڭ قۇرمەتتى پروفەسسورى» ەتىپ قابىلداپ، كۋالىك بيلەتىن تابىس ەتتى.

كوڭىلدى جارىپ شىققان ىزگى تىلەكتەر ودان ٴارى جالعاسىپ، اقىن دوسى امانكەلدى شاحين: – راحىمجاندى جاس كۇنىمىزدە تەكتى، تالانتتى اقىن بولادى دەپ كۇتكەنبىز. «وڭ قول»، «اكە ٴسوزى» دەگەن ولەڭدەرىن ٴسۇيسىنىپ وقۋشى ەك. داۋسى دا ەرەكشە ەدى. راديودا ديكتور بولدى. وبلىستىق گازەتتە جۇمىس ىستەدى. شىعارمالارى تەگەۋرىندى ول شىڭعىس حاننىڭ كوزىنەن جاس شىعاردى. جاڭگىر حاندى جاڭا ۇلتتىق تۇرعىدان، وڭ كوزقاراسپەن تانىتتى. بەيبارىس سۇلتاندى ارامىزعا اكەلدى، – دەپ ۇزەڭگىلەسىنە ارناعان ولەڭىن وقىدى.

ٴتۇيىن: سونىمەن ەكى كۇن بويى قالامگەرىن قادىرلەگەن اق جايىق وتاربايدىڭ راحىمجانىنا قارا باستىڭ اماندىعى مەن تىل-كوزدەن ادا بولۋىن تىلەدى. ٴبىلىم نۇرىن سەپكەن بايىرعى ورداسىنا جازۋشى دا جيىن سوڭىندا اعىنان جارىلىپ ريزاشىلىعىن، كوكەيدەگى ويىن بۇكپەسىز ايتتى. اسىرەسە، الدىڭعى قاتاردا وتىرعان كۋراتورى مەرۋەرت جولدىقايىروۆاعا جىلى شىرايمەن ەركەلەي داۋسىن سوزىپ: – الپىس، الپىس دەسە نە شارۋالارىڭ بار دەۋشى ەدىم. كەيىن مويىنداپ، ٴوزىم ايتاتىن بولدىم الپىس دەپ. ۇيرەنبەگەن جاسىمىز عوي، وسالدىعىڭدى، كەمشىلىگىڭدى ايتىپ تۇرعانداي سەزىنۋشى ەك. ەندى، مىنە، جاڭا عانا ٴسىز سويلەدىڭىز، اپا! ۇستازىم مەنىڭ توقساننىڭ تورىندەگى! ەندى ٴوزىمدى جاس سەزىنىپ تۇرمىن. ٴسىزدىڭ قاسىڭىزدا مەنىڭ جاسىم ويناقتاعان لاقتاي ەكەن عوي، – دەپ زال ٴىشىن دۋ كۇلدىرتتى. سوسىن: – دۇنيەنىڭ ٴبىراز جەرىن ارالادىق. ٴبىراز تىلدە كىتاپتار شىقتى. پەسامىز قويىلدى. اناۋ كايردا «بەيبارىستى» قويعان. ولارمەن دە كەزدەسكەن ٴسات بولدى. مەرەكە اعا كۋا، قىتايشا توتە جازۋمەن كىتابىم شىقتى 2007 جىلى. ۇلكەن كەزدەسۋلەر ٴوتتى. انكارادا «اق كوبەلەكتەر» دەگەن 18 اڭگىمەدەن تۇراتىن ەكى اڭگىمەلەر جيناعىم. «باس» دەگەن رومانىمدى تۇرىك تىلىندە تۇركيا ەلى شىعارىپ، ٴزاۋلىم-زاۋلىم سارايلاردا تۇساۋىن كەستى. مەن قازاقتان ٴسوز سۇرامايتىن اداممىن. اشەكەي سوزگە جوقپىن. تولقىمايمىن. تالاي حالىقتىڭ الدىنا شىققام. ٴبىراق ەكى مارتە شىعىپ تۇرمىن وسى اراعا اسحات ٴسالىم ۇلىنىڭ شاقىرۋىمەن. مەن وسى جەرگە كەلگەندە قاتتى تولقيمىن. نەگە؟ مەن 17 جاسقا تولماي وسىندا ەندىم. ۇستازىمنىڭ الدىندا ٴالى بالامىن. سول بالا كوڭىلمەن تولقيمىن. مىنا زال ٴزاۋلىم ٴدارىسحانا بولىپ كورىنەتىن. وسى زال، وسى كورەرمەن، وسى ساحنا مەن ٴۇشىن قاسيەتتى، قىمبات. نەگە دەسەڭىز، مەنىڭ بالالىق شاعىمدى، ارمانمەن الىسىپ جۇرگەن شاعىمدى كوز الدىما الىپ كەلەدى. سول ٴۇشىن دە سىزدەرگە راحمەت. سول ٴۇشىن دە سىزدەرگە تاعزىم دەگىم كەلەدى. كەشەدەن بەرى مەنى وبلىس اكىمى باستاعان ازاماتتار قارسى الىپ جاتىر. وسى كەزدەسۋدىڭ ٴبارىن ۇيىمداستىرىپ وتىرعان ۇجىمنىڭ باسشىسى، اكادەميك اسحات ٴسالىم ۇلى سىزگە مىڭ سان راحمەت، – دەدى جازۋشى قىر مۇرنىنا قاراي تولقىنداي توگىلگەن «تەنتەك» بۇيرا شاشتارىن كۇرەكتەي قولىمەن شالقايتا قايىرىپ قويىپ. ٴسوز ساپتاۋى بولەك، ٴوزىن ەركىن ۇستايتىن قالامگەرمەن كوزبە-كوز كەزدەس-كەن ۇلكەن-كىشى وقىرمان كەشتەن رۋحاني ٴلاززات الىپ، «جاڭگىر حان» قويىلىمىن كورۋ ٴۇشىن قازاق دراما تەاترىنا بەت الدى.

ميرا شۇيىنشاليەۆا،

سۋرەتكە تۇسىرگەن

رافحات حالەلوۆ

مەرەكە قۇلكەنوۆ جازۋشى-باسپاگەر:

– راحىمجاننىڭ كوپ جازۋشىدان ارتىقشىلىعى، «ٴبىر جازۋشى پويىزعا ٴمىندى» دەپ جازۋى مۇمكىن. راحىمجان «پويىزعا ورمەلەپ شىعىپ بارا جاتىر» دەيدى. ٴقازىر دراماتۋرگياعا ەڭبەك ٴسىڭىرىپ ٴجۇر. دراماعا كەرەگى – ٴتىل. ٴتىلى جوق دراماتۋرگيا – دراماتۋرگيا ەمەس. حالىقتىڭ الدىنا شىققان ادام اكتەر بەينەسىنە كىرگەن كەزدە ايتاتىن ويى، ٴسوزى دۇرىس بولۋى كەرەك. ول ٴسوز ادامنىڭ جانىنا، جۇرەگىنە جەتۋى كەرەك. تاعى ٴبىر ارتىقشىلىعى – وتە ەڭبەكقور. قاي كەزدە ۋاقىت تاۋىپ جازىپ ٴجۇر دەپ تاڭ قالاسىڭ. دراماتۋرگياعا قوسا، ٴقازىر رومان جازۋ ۇستىندە. راحىمجان الەم وقىرماندارى مويىنداعان شىن تالانت يەسى.

شايحوللا ەلەمەسوۆ، ستۋدەنتتىك دوسى:

– 17 جاسقا تولا قويماعان راحىمجان ارامىزداعى كەنجەمىز بولاتىن. دارىندى ادامنىڭ جاس كۇنىندە ٴبىر بەلگىسى بولماۋى مۇمكىن ەمەس. كەيىن ويلاساق، بەلگىلەرى بولعان ەكەن. كۇزگى سەمەستردى ەرتەرەك تاپسىرىپ اۋىلىنا كەتتى. ساباعى ىلگەرى بولاتىن. ول كەزدە جەتىنشى نويابر جان-جاقتى تويلاناتىن. وسى مەيرامعا اۋىلدا اتشابىس بولىپ، راحىمجان ات قوسىپتى. بايگەدەن اتى ٴبىرىنشى كەلىپتى. «اتىم بابىندا ەكەن. اينالىمىندا ورتادان جوعارى ۇزاقتاۋ بولدى. ٴبىرىنشى ورىن الدى» دەپ ايتىپ كەلدى. تۇلپاردى تۇياعىنان تانۋ – ۇلكەن عانيبەت. جازۋشىلىق تالاپتىڭ بەلگىسى وسى بولسا كەرەك.

4-كۋرستا جاس اقىن-جازۋشىلاردىڭ جيىنىنا قاتىستى. قاي قالادا ەكەنىن بىلمەيمىن. سوندا ٴىلياس ەسەنبەرلينمەن ٴبىر بولمەدە بولعانىن، كىشكەنتاي اق شاشتى شالدىڭ كىم بالاسىڭ دەپ سۇراعانىن، سودان بىرگە وتىرىپ اڭگىمە ايتقانىن بىزگە ايتىپ بەردى. سول كەزدەر راحىمجاننىڭ وسىنداي دارەجەگە كوتەرىلۋىنە باستاۋ بولدى ما دەپ ويلايمىز. ەلگە تانىمال راحىمجاننىڭ كىتاپتارىن قىزىعىپ وقىپ جۇرەمىز.

كوممەنتاريي0

ۆاش كوممەنتاريي بۋدەت وپۋبليكوۆان پوسلە مودەراسيي