BAQ.kz - Қазақстан жаңалықтары USD 327.42 BAQ.kz - Қазақстан жаңалықтары EUR 383.51 BAQ.kz - Қазақстан жаңалықтары RUB 5.29
استانا:

سالەم جازدىم اعايىن...

سالەم جازدىم اعايىن... وسىلاي اتالاتىن ماقالادا وتان سوعىسى ساربازىنىڭ مايداندا ٴجۇرىپ ەلگە جازعان حاتى جاريالانعان ەدى. baq.kz اقپارات اگەنتتىگى قازاق ساربازىنىڭ ولەڭمەن ورنەكتەلگەن حاتىن نازارلارىڭىزعا ۇسىنادى.

سولتۇستىك قازاقستان وبلىسى ەسىل اۋدانىنا قاراستى اقتاس اۋىلىنىڭ ازاماتى ٴامىرجان امانجولوۆ - 1941 جىلى ۇلى وتان سوعىسىنا العاش الىنعانداردىڭ ٴبىرى. ستالينگراد ٴۇشىن سوعىسقا قاتىسىپ، 1943 جىلى اۋىر جارالانىپ ەلگە ورالعان. اۋىر جۇمىسقا دەنساۋلىعى جاراماي كولحوزدا تارازىشى، گازەت-جۋرنال تاراتۋشى ىستەرىن اتقاردى.

1991 جىلى 13 اقپاندا «سولتۇستىك قازاقستان» گازەتىندە ٴامىرجان امانجولوۆ جايلى ماقالا جارىق كوردى. «سىر ساندىق» ايدارىمەن شىققان «سالەم جازدىم اعايىن» اتتى ماقالانى ەڭبەك ارداگەرى شالاباي ەسقالي جازعان ەدى. وندا ٴامىرجان اقساقالدىڭ سوعىستا جۇرگەندە ەلگە ولەڭمەن جازعان حاتى بار ەكەن. سول حاتىن وقىرماندارعا ۇسىنىپ وتىرمىز:

قولىما قالام الايىن،
سالەم جازدىم اعايىن.
ساعىنىپ بەكەر جۇرگەنشە،
شەر تارقاتىپ الايىن.

سالەم بۇكىل كولىمە،
توعاي-وزەن، جەرىمە.
قىرىق جىل قىرعىن بولسا دا،
بارارمىز ەسەن ەلىمە.

امان با قۇربى-زامانداس،
عارىپشىلىك ٴبىزدىڭ باس.
كورگەنشە ەندى كوپ كۇن بار،
تىلەكتەس بول كارى-جاس.

سەن ٴۇشىن وتان-انامىز،
توگىلدى عوي قانىمىز.
كورەتۇعىن بەينەت بوپ،
قالار ما ەكەن جانىمىز.

كاتەلوك، كۇرەك ارقاڭدا،
ٴتۇيۋلى قان قالتاندا.
توگىلۋدە بەلگى جوق،
توگىلگەنشە شالقاندا.

ۆينتوۆكا، گرانات قولىڭدا،
قازۋلى وكوپ جانىڭدا.
ولاي-بۇلاي بوپ كەتسەڭ،
قالعانىڭ سونىڭ جانىندا.

مىنە وسىلاي ٴحالىمىز،
قينالۋدا جانىمىز.
ەكى تالاي كۇن بولسا،
جاسىرىنبايدى ٴتانىمىز.

قارلىعاشقا ۇقساعان،
سامولەتتەر ۇشادى.
سناريادتار جارىلسا،
يمانىڭ كوككە ۇشادى.

ەسىنەن ۇيقى اشا الماي،
اياق-قولىن شەشە الماي.
ارماندا وتكەن قىرشىن جاس،
بويىمدى جازىپ وسە الماي.

بىرگە تۋعان اعا جوق،
قارىنداس، ٴىنى جانە جوق.
ارمان قىلىپ قايتەيىن،
تالايدان وتكەن دۇنيە بوق.

قايعىرماشى اناجان،
وپاسىز عوي بۇل جالعان.
تالاي قىرشىن ٴوتتى عوي،
وتكەندەردىڭ ٴبارى ارمان.

قىزىعىن كورمەي بالادان،
اتا مەنەن اناجان.
ساعىنىپ جۇرگەن بالاڭنىڭ،
سۇيەگىن ىزدە دالادان.

تەمىر تاياق الارسىڭ،
قۇبىلاعا قارارسىڭ.
ق ۇلىنىڭدى ىزدەسەڭ،
ۋكراينادان تابارسىڭ.

ٴتورت ايدان بەرى ازعانىم،
ەلدى ساعىنىپ توزعانىم.
قاتەسى بولسا كەشىڭدەر،
ساعىنعاننان جازعانىم.

ماتەريال «اقتاس دەگەن اۋىل بار» اتتى ەڭبەكتەن الىندى. كىتاپتىڭ باس رەداكتورى بۇركىتباي اياعان.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي