Облыс әкімі Асхат Шахаров Ақтөбе қаласындағы коммуналдық кәсіпорындардың тыныс-тіршілігін бағамдап, олардың алдағы жылу беру маусымына дайындығын пысықтады, деп хабарлайды BAQ.KZ.
Алдымен ол «Ақтөбе ЖЭО» АҚ барып, мұндағы жүргізіліп жатқан жұмыстармен танысты.
Бүгінде «Ақтөбе ЖЭО» акционерлік қоғамында 11 бу қазандығы, 6 турбоагрегат және 5 ыстық су қазандығы бар. Биылғы жылдың 1 қаңтарындағы жағдай бойынша жабдықтардың тозу көрсеткіші 41,78 пайыз. Компания басшысы Бақтияр Ізбасаров 2028 жылға қарай жөндеу жұмыстарының арқасында бұл көрсеткіш 36,2 пайызға дейін төмендейтінін жеткізді.
Қазіргі таңда жылу энергиясының негізгі тұтынушылары — облыстағы 11 кәсіпорын. Олардың қатарында «Aqtobe su-energy group» акционерлік қоғамы, Ақтөбе хром қосындылары зауыты, Ақтөбе ферроқорытпа зауыты, «Лотос-Ақтөбе» және «Meridian» жауапкершілігі шектеулі серіктестіктері бар.
Бүгінде «Ақтөбе жылу электр орталығы» АҚ жөндеу жұмыстары жүргізіліп жатыр. Бу қазандықтарының 38 пайызы, турбоагрегаттардың 64 пайызы, ыстық су қазандарының 60 пайызы жөнделді. Бұлардың ішінде қазандықты жөндеу жұмыстарын өз күшімізбен жүргізсек, турбоагрегаттарды мердігер мекемелер жөндейді. Қазір жөндеу жұмыстарын жүргізуде мәселе жоқ. Жоспарға сәйкес, жылыту маусымына дейін жөндеу жұмыстары толық аяқталады. Күн суытқанда компания қала халқын жылу және ыстық сумен толығымен қамтамасыз етеді, - дейді мекеменің бас инженері Александр Давыскиба.
Биыл инвестициялық бағдарлама бойынша мекемеге 4,9 млрд теңге қаржы бөлінген. Ал «Инвестицияға айырбас тарифі» бағдарламасы арқылы бұл қаржы көлемі 22 млрд теңгеге дейін ұлғайтылған. Осы орайда компания 2027 жылға дейін су жылыту және бу қазандықтарын ауыстыруды жоспарлап отыр. Айта кету керек, бұл компанияда бүгінде 630-дан астам адам жұмыс істейді.
Бұдан кейін Асхат Шахаров «Энергосистема» ЖШС жұмысымен танысты.
2004 жылы құрылған мекеме бүгінде 255 мыңнан астам тұрғынды электр қуатымен қамтамасыз етіп отыр. Серіктестіктің құрамында 174 қосалқы станция, 13 900 шақырымнан асатын әуе және 340 шақырымға жуық кабельдік желі, 2370 қуат трансформаторы бар.
Қысқа дайындық қарқынды түрде жүріп жатыр, атап айтқанда, қосалқы станцияларды, электр желілерін жөндеу жұмыстары жүргізілуде. Биыл 609 миллион теңге бөлініп, оның 200 миллион теңгесі, яғни 30 пайыздан астамы игерілді. Жоспарға сәйкес, 1 қыркүйекке дейін барлық жұмыс аяқталады. Бұл ретте инвестициялық бағдарлама жүзеге асырылуда, жалпы мөлшері 5 миллиард теңгеге жуық қаржыға жобалар жоспарланған. Бүгінде инвестициялық бағдарлама бойынша құны миллиард теңгені құрайтын ең ірі жоба – қаламыздағы «Сельмаш» ауданындағы қосалқы стансаға күрделі жөндеу жүргізу жобасы. Бұл жерде трансформаторлар толығымен ауыстырылады. Электр қуаты өшетін болса, әлеуметтік желілердегі парақшалар, сондай-ақ ресми сайтымыз арқылы тұрғындарды алдын-ала хабардар етеміз. Стансада диспетчерлік қызмет тәулік бойы жұмыс істейді, — дейді «Энергосистема» ЖШС бас директорының міндетін атқарушы Рүстем Арыстанов.
Оның сөзінше, биыл су тасқыны кезінде қаладағы көптеген желілер зақымданып, құлаған. Қазір тасқынның салдарын жою жұмыстары аяқталуға жақын. Сонымен қатар кәсіпорын жоспар бойынша 4 мың ескі электр бағанасын жаңасына ауыстыруы тиіс. «Энергосистема» ЖШС басшылығын тыңдаған облыс әкімі желідегі апатты жағдайды азайту үшін бұл көрсеткішті арттыруды тапсырды. Жұмысты мерзімінен кешіктірмей, тезірек атқару керектігін қадап айтты.
Әрі қарай облыс әкімі Есет батыр тұрғын алабындағы «Ақтөбе Сити-2» қазандығының құрылыс алаңында болды. Мердігер ұйым — «Қазтеплоэнергомонтаж» серіктестігі. Жоба бойынша құрылысы 2018 жылы басталған қазандық тұрғын алаптағы 1, 2 және 3 шағын аудандардағы 90 тұрғын үйді, сондай-ақ мектептер мен балабақшаларды, спорт кешендерін жылу және ыстық сумен қамтып отыр. Қазіргі таңда мұнда 6 қазандық пен 4 қазандық сорғысы толығымен орнатылған. Мамандар «ДУ-500» коллекторларын жылу алмастырғыш құбырмен қамтамасыз етуде. Қазір бір қазандық жұмыс істеп тұр, қалғандары — резервте. Бүгінде қазандық пайдалануға беру туралы келісімшарттың бұзылуына байланысты қала балансына өткен.
Облыс басшысы құрылыс-монтаж жұмыстарын мерзімінде аяқтауды тапсырды.
